សកម្មជន​បក្ស​សង្គ្រោះ​ជាតិ​ម្នាក់​នៅ​ក្រុង​ភ្នំពេញ​ធ្លាក់ខ្លួន​ឈឺ​នៅ​ពន្ធនាគារ​ព្រៃស

ដោយ សេក បណ្ឌិត
2020-07-23
អ៊ីម៉ែល
មតិ
Share
បោះពុម្ព
លោក ឃឹម ភាណា ចៅសង្កាត់​ផ្សារ​ដេប៉ូ​ទី៣ ជាប់​ឆ្នោត​គណបក្ស​សង្គ្រោះ​ជាតិ ខណ្ឌ​ទូល​គោក រាជធានី​ភ្នំពេញ ដែល​ប៉ូលិស​ចាប់​នៅ​ឃុំ​រកា​កោង ស្រុក​មុខ​កំពូល ខេត្ត​កណ្ដាល នៅ​ថ្ងៃ​ទី២ ខែ​មេសា ឆ្នាំ២០២០។
លោក ឃឹម ភាណា ចៅសង្កាត់​ផ្សារ​ដេប៉ូ​ទី៣ ជាប់​ឆ្នោត​គណបក្ស​សង្គ្រោះ​ជាតិ ខណ្ឌ​ទូល​គោក រាជធានី​ភ្នំពេញ ដែល​ប៉ូលិស​ចាប់​នៅ​ឃុំ​រកា​កោង ស្រុក​មុខ​កំពូល ខេត្ត​កណ្ដាល នៅ​ថ្ងៃ​ទី២ ខែ​មេសា ឆ្នាំ២០២០។
រូប៖ ប្រពន្ធ​លោក លោក ឃឹម ភាណា ផ្ដល់​ឱ្យ

ប្រពន្ធ​សកម្មជន​គណបក្ស​សង្គ្រោះ​ជាតិ​ម្នាក់ នៅ​រាជធានី​ភ្នំពេញ ព្រួយបារម្ភ​អំពី​សុខភាព​ប្ដី​របស់​លោកស្រី​ខ្លាច​គ្រោះថ្នាក់​ដល់​អាយុជីវិត ក្នុង​ពេល​ជាប់ឃុំ​នៅ​ពន្ធនាគារ​ព្រៃស។ លោកស្រី អះអាង​ថា ប្ដី​លោកស្រី​បាន​ធ្លាក់ខ្លួន​ឈឺ​ស្គមស្គាំង​ខុស​ប្រក្រតី ដោយសារតែ​បង្គន់​ក្នុង​បន្ទប់​ឃុំឃាំង​មាន​ក្លិនស្អុយ​សម្រាន្ត​មិន​បាន​ជាច្រើន​ថ្ងៃ​ហើយ ហើយ​ពុំ​មាន​មន្ត្រី​ពន្ធនាគារ​ណា​ដោះស្រាយ​រឿង​នេះ​នៅ​ឡើយ​ទេ។

ប្រពន្ធ​ចៅសង្កាត់​ផ្សារ​ដេប៉ូ​៣ ខណ្ឌ​ទួលគោក រាជធានី​ភ្នំពេញ​លោកស្រី សុខ បូលីម៉ា ឱ្យ​ដឹង​ថា លោកស្រី​តក់ស្លុត​ចិត្ត​យ៉ាង​ខ្លាំង​នៅ​ពេល​ទៅ​សួរសុខទុក្ខ​ប្ដី គឺ​លោក ឃឹម ភាណា នៅ​ក្នុង​ពន្ធនាគារ​ព្រៃស កាល​ពី​ថ្ងៃ​ទី​២២ កក្កដា ហើយ​ឃើញ​ប្ដី​របស់​លោក​ស្រី​ស្គម​ស្លេកស្លាំង​ជាង​មុន​។ លោកស្រី បន្ថែម​ថា លោក ឃឹម ភាណា វង្វេងស្មារតី និយាយ​មិនសូវ​ឮ​ដូច​ពេល​មុនៗ​នោះ​ទេ​។ លោកស្រី​ថា ប្តី​ធ្លាក់ខ្លួន​ឈឺ​ព្រោះ​សម្រាន្ត​មិន​បាន ប្រហែល​មួយ​សប្ដាហ៍​មក​ហើយ ដោយសារ​បង្គន់​នៅ​ក្នុង​បន្ទប់​ឃុំឃាំង​របស់​គាត់​ខូច ហើយ​លាមក​ហៀរ​ចេញ​មក​ខាងក្រៅ មាន​ក្លិនស្អុយ​ភាយ​ពុំ​មាន​មន្ត្រី​ពន្ធនាគារ​ណា​ទៅ​ជួសជុល​បង្គន់​ឱ្យ​ពួកគាត់​នោះ​ទេ​។ លោកស្រី​បន្ថែម​ថា ដោយសារតែ​ក្លិនស្អុយ​បង្គន់​នេះ ប្ដី​របស់​លោកស្រី​ពិបាក​ដង្ហើម ហើយ​កម្លាំង​ចុះ​ខ្សោយ​ទន់ដៃទន់ជើង៖ «គាត់​ថា​ដេក​អត់​បាន​ឡើង​ស្លេក ខ្ញុំ​ឡើង​ស្រក់​ទឹកភ្នែក ហើយ​គាត់​និយាយ​មក​ខ្ញុំ ខ្ញុំ​ស្ដាប់​អត់​ឮ ហើយ​គាត់​ក៏​ស្ដាប់​ខ្ញុំ​អត់​ឮ​ដែរ។ ប្ដី​ខ្ញុំ​ទោស​នយោបាយ​ទេ ម៉េច​ក៏​ដល់​ថ្នាក់​ហ្នឹង​ជាមួយ​គាត់ មិន​ឱ្យ​ខ្ញុំ​យំ​ម៉េច​បើ​ប្ដី​ខ្ញុំ​ស្លេកស្លាំង ឧបមា​បើ​គាត់​ស្លាប់​នៅ​ក្នុង​គុក តើ​អស់លោក​ហ្នឹង​អ្នកទទួលខុសត្រូវ​ឬ​? ខ្ញុំ​ចង់​សួរ​គាត់​វិញ សូម​អស់លោក​បើក​គ្រាប់ភ្នែក​មើល​គាត់​ផង»

លោកស្រី​បន្ត​ថា ស្ថានភាព​បែបនេះ ធ្វើ​ឱ្យ​ជំងឺលើសឈាម​របស់​ប្តី​លោកស្រី​រើ​ឡើងវិញ កាន់តែ​ធ្ងន់ធ្ងរ។ លោកស្រី ព្រួយបារម្ភ​ថា ប្រសិនបើ​អាជ្ញាធរ​មិន​បាន​ដោះស្រាយ​រឿង​នេះ​ឱ្យ​បាន​ឆាប់​ទេ នោះ​លោក ឃឹម ភាណា អាច​នឹង​ឈឺ​ស្លាប់​នៅ​ក្នុង​ពន្ធនាគារ​នៅ​ពេល​ដ៏​ខ្លី​ខាងមុខ ព្រោះ​សព្វថ្ងៃ​លោក​ហូប​បាយ​មិន​សូវ​បាន សម្រាន្ត​មិន​លក់ ហើយ​វិលមុខ​ដួល​ជា​ញឹកញាប់​ទៀង​ផង៖ «របៀប​ថា​ស្ទើរ​ទៅ​ស្ទើរ​នៅ តែ​ម្ដង​គាត់​និយាយ​ប្រាប់​ខ្ញុំ ដល់​ខ្ញុំ​ឮ​អីចឹង ស្រក់​ទឹកភ្នែក​ខ្ញុំ​និយាយ​អត់​ចេញ​ទេ ហើយ​វ័យ​គាត់​ចាស់​ទៀត របៀប​ថា ធ្វើបាប​អ្នក​ទោស​នយោបាយ​មែនទែន​ហ្មង ធ្វើបាប​ផ្លូវចិត្ត​ផ្លូវ​កាយ​អីចឹង ខ្ញុំ​ជា​ប្រពន្ធ​ជនរងគ្រោះ ខ្ញុំ​មិន​អាច​ទទួល​យក​បានទេ ហើយ​គាត់​អត់​មាន​ខុស​អី​ផង​ធ្វើ​បាប​គាត់​ធ្វើ​អី។ ខ្ញុំ​សំណូមពរ​ហើយ​សំណូមពរ​ទៀត សុំ​ឱ្យ​ស្ថានទូត​អាមេរិក ស្ថានទូត​សហភាព​អឺរ៉ុប និង​អ្នកសារព័ត៌មាន​អន្តរជាតិ​សូម​លោក​ជួយ​ខ្ញុំ​ផង ពួក​ខ្ញុំ​រងគ្រោះ​មែនទែន បាត់បង់​សិទ្ធិ​សេរីភាព​និយាយ​រួម​ទៅ​បាត់​ទាំងអស់»

លោកស្រី សុខ បូលីម៉ា ឱ្យ​ដឹង​ថា លោកស្រី​បាន​ប្រាប់​រឿង​ទៅ​អង្គការ​លីកាដូ (Lichado) និង​សមាគម​ការពារ​សិទ្ធិមនុស្ស​អាដហុក (Adhoc) ដើម្បី​ជួយ​អន្តរាគមន៍​ដល់​លោកស្រី​រួចហើយ​។​

ទាក់ទង​នឹង​បញ្ហា​នេះ អ្នកនាំពាក្យ​អគ្គនាយកដ្ឋាន​ពន្ធនាគារ​នៃ​ក្រសួងមហាផ្ទៃ​លោក នុត សាវនា ប្រាប់​អាស៊ីសេរី​ថា លោក​ពុំ​បាន​ដឹង​បញ្ហា​ស្ទះ​បង្គន់​អនាម័យ​របស់​អ្នក​ជាប់ឃុំ​នេះ​នៅ​ឡើយ​ទេ ប៉ុន្តែ​លោក​ថា លោក​នឹង​ប្រាប់​មន្ត្រី​ពន្ធនាគារ​ព្រៃ​ស​ឱ្យ​ទៅ​ត្រួតពិនិត្យ​ដោះស្រាយ​រឿង​នេះ​ក្នុង​ពេល​ឆាប់ៗ​។ លោក​បន្ត​ថា ប្រសិនបើ​មាន​អ្នក​ជាប់ឃុំ​ឈឺ​ធ្ងន់ សមត្ថកិច្ច​ពន្ធនាគារ​នឹង​បញ្ជូន​ពួកគេ​ទៅ​ព្យាបាល​ជំងឺ​នៅ​មន្ទីរពេទ្យ​ដោយ​មិន​ទុក​ឱ្យ​ពួកគាត់​ស្លាប់​នោះ​ឡើយ៖ «បាទ យើង​ផ្ដល់​ជូន​តើ បើ​ជំងឺ​ធម្មតា​យើង​ព្យាបាល​បាន​នៅ​ក្នុង​មណ្ឌល យើង​មើល​ប៉ុស្តិ៍​សុខភាព​ហ្នឹងឯង ហើយ​បើ​ថា ព្យាយាម​ទៅ​អស់​លទ្ធភាព​អ្នក​មន្ត្រី​ពេទ្យ​នៅ​ក្នុង​មណ្ឌល​ហ្នឹង​យើង​បញ្ជូន​ទៅ​ព្យាបាល​នៅ​មន្ទីរ​សូវៀត និង​ពេទ្យ​លោកសង្ឃ​អីចឹង​ទៅ»

ចៅសង្កាត់​ផ្សារ​ដេប៉ូ​៣ ជាប់ឆ្នោត​គណបក្ស​សង្គ្រោះ​ជាតិ លោក ឃឹម ភាណា ត្រូវ​បាន​អាជ្ញាធរ​របប​លោក ហ៊ុន សែន ចាប់ខ្លួន​កាលពី​ថ្ងៃ​ទី​២ មេសា ដោយ​ចោទប្រកាន់​ពី​បទ​រួមគំនិត​ក្បត់ ញុះញង់​កុំ​ឱ្យ​យោធិន​ស្តាប់​បង្គាប់ និង​ញុះញង់​ឱ្យ​ប្រព្រឹត្ត​បទ​ឧក្រិដ្ឋ​ជាអាទិ៍​។ គិត​ត្រឹម​ចុងខែ​កក្កដា​នេះ លោក​បាន​ជាប់ឃុំ​ក្នុង​ពន្ធនាគារ​ព្រៃ​ស អស់​រយៈពេល​ជិត ៤​ខែ​មក​ហើយ។

អ្នកនាំពាក្យ​សមាគម​ការពារ​សិទ្ធិមនុស្ស​អាដហុក (Adhoc) លោក ស៊ឹង សែនករុណា មាន​ប្រសាសន៍​ថា មន្ត្រី​ពន្ធនាគារ​គួរតែ​ដោះស្រាយ​បញ្ហា​នេះ​ឱ្យ​បាន​ឆាប់​ដោយ​មិន​គួរ​បណ្ដោយ​ឱ្យ​អ្នក​ជាប់ឃុំ​មាន​បញ្ហា​សុខភាព​ដោយសារ​ការ​ស្ទះ​បង្គន់​អនាម័យ ជះក្លិន​ស្អុយ​បែប​នេះ​ឡើយ។ លោក​បន្ថែម​ថា ប្រសិនបើ​អ្នក​ជាប់ឃុំ​មាន​គ្រោះថ្នាក់​ដល់​អាយុជីវិត​ដោយសារ​រឿង​នេះ មន្ត្រី​ពន្ធនាគារ​ជា​អ្នកទទួល​ត្រូវ​ចំពោះ​មុខ​ច្បាប់។ លោក​បញ្ជាក់​ថា ជន​ជាប់ឃុំ​បាត់បង់​តែ​សិទ្ធិ​សេរីភាព​ប៉ុណ្ណោះ តែ​ពួកគាត់​ត្រូវ​ទទួល​បានការ​មើលថែ​ទាំ​ផ្នែក​សុខភាព​ពី​អាជ្ញាធរ​ដូច​ប្រជាពលរដ្ឋ​ទូទៅ​ដែរ៖ «ព្រោះ​មនុស្ស​មិនមែន​ជា​សត្វ​ទេ ត្រូវ​ការពារ​សុខុមាលភាព​របស់​ពួកគាត់​ឱ្យ​បាន​ត្រឹមត្រូវ ជាជាង​ការរិះគន់​ផ្សេងៗ ហើយ​ជាពិសេស​សម្រួល​ទៅលើ​រឿង​អនាម័យ​ហ្នឹង​តែម្ដង​កុំ​ឱ្យ​ពួកគាត់​រស់នៅ​ក្នុង​ពន្ធនាគារ​ពេល​ដែល​ទៅ​មាន​សុខ​ភាព​ល្អ ពេល​ចេញ​មកវិញ​បែរជា​មាន​ជំងឺ​ជាប់​កាយ​ទៅវិញ​នោះ។ ព្រោះ​កន្លែង​ហ្នឹង​ជា​កន្លែងធ្វើការ​​អប់រំ​កែប្រែ គឺ​ចេញ​មកវិញ​ជា​ធនធានមនុស្ស​ធ្វើ​ឱ្យ​ទ្រុឌទ្រោម​សុខភាព​បញ្ញា ស្មារតី​អី​ធ្វើ​ឱ្យ​បាត់បង់​ទេ»

ចាប់​តាំង​ពី​ដើម​ឆ្នាំ​២០២០មក មាន​សកម្មជន​បក្ស​ប្រឆាំង ចំនួន​១៧​នាក់​ហើយ ត្រូវ​បាន​អាជ្ញាធរ​ចាប់ខ្លួន ដាក់​ពន្ធនាគារ​ព្រៃស។ ពួកគេ​ភាគច្រើន ត្រូវ​បាន​តុលាការ​ចោទប្រកាន់​ពី​បទ​រួមគំនិត​ក្បត់ ញុះញង់​កុំ​ឱ្យ​យោធិន​ស្តាប់​បង្គាប់ និង​ញុះញង់​ឱ្យ​ប្រព្រឹត្ត​បទ ឧក្រិដ្ឋ​ជាអាទិ៍ និង​ខ្លះ​ទៀត​ត្រូវ​បាន​ចោទប្រកាន់ ពី​បទ​ជេរប្រមាថ​ថ្នាក់ដឹកនាំ​រដ្ឋាភិបាល។

មេធាវី​ការពារ​ក្ដី​ឱ្យ​សកម្មជន​គណបក្ស​សង្គ្រោះ​ជាតិ​ដែល​កំពុង​ជាប់ឃុំ​ទាំងនោះ គឺ​លោក សំ សុគង់ មាន​ប្រសាសន៍​ថា មន្ត្រី​ពន្ធនាគារ​បាន​ឃុំ​កូន​ក្តី​របស់​លោក​ជាមួយ​អ្នក​ជាប់ឃុំ បទល្មើស​ឧក្រិដ្ឋ ដូចជា​អ្នក​ជួញដូរ​គ្រឿងញៀន និង​អ្នក​សម្លាប់​មនុស្ស​ជាដើម​។ លោក​បន្ត​ថា កូនក្ដី​របស់​លោក​មាន​ជំងឺ​ស្ទើរ​គ្រប់គ្នា ដោយសារតែ​ពួកគាត់​ខូចចិត្ត​រឿង​អាជ្ញាធរ​ចាប់​ដាក់​ពន្ធនាគារ​ដោយ​អយុត្តិធម៌​។ លោក​ថា ពួកគាត់​បាន​ស្នើ​សុំ​ឱ្យ​តុលាការ​ទម្លាក់​ចោលការ​ចោទប្រកាន់ និង​ដោះលែង​ឱ្យ​មាន​សេរីភាព​ឡើងវិញ ដើម្បី​រក​ប្រាក់​ចំណូល​ដោះស្រាយ​ជីវភាព​គ្រួសារ តែ​តុលាការ​បាន​បដិសេធ៖ «

ការចោទប្រកាន់​ពួកគាត់​ហ្នឹង​ក៏​ទាក់ទង​បទល្មើស​នយោបាយ​ដែរ ហើយ​គួរតែ​អាជ្ញាធរ​ក៏​ដូច​ខាង​ពន្ធនាគារ​ហ្នឹង​រៀបចំ​ឱ្យ​បាន​រស់នៅ​កន្លែង​ស្ថាន​មួយ​ល្អ​ហើយ គាត់​អាច​នៅ​ជុំគ្នា ដើម្បី​ឱ្យ​ពួកគាត់​ហ្នឹង​ទទួល​បាន​ការរស់នៅ​សមរម្យ។ ដោយសារ​ពួកគាត់​គឺជា​អ្នក​ដែល​កំពុង​ជាប់ពន្ធនាគារ​ជា​បណ្ដោះអាសន្ន​ហ្នឹង​ជា​គោលការណ៍​ច្បាប់ គឺ​ពួកគេ​មិនទាន់​សន្មត​ថា​មាន​ទោស​ទេ គ្រាន់​ជា​ជនសង្ស័យ​នៅឡើយ​ទេ។ អីចឹង ការប្រព្រឹត្ត​ទៅលើ​ពួកគាត់​ហ្នឹង​គួរតែ​មាន​ការ​យកចិត្ត​ដាក់​ហើយ​ឱ្យ​រស់​បែប​ជា​មនុស្ស​ហើយ​ហ្នឹង​រស់នៅ​សមរម្យ»

មន្ត្រី​សិទ្ធិមនុស្ស លោក ស៊ឹង សែនករុណា ឱ្យ​ដឹង​ថា ចាប់​តាំង​ពី​អាជ្ញាធរ​ចាប់ខ្លួន​សកម្មជន​បក្ស​ប្រឆាំង​ទាំង​នោះ​មក សេដ្ឋកិច្ច​គ្រួសារ​របស់​ពួកគាត់​ប៉ះពាល់​ជា​ខ្លាំង ដោយ​បាត់បង់​មេ​គ្រួសារ​។ ចំណែក​កូនៗ​របស់​អ្នក​ជាប់ឃុំ​មួយ​ចំនួន មិន​ចង់​ទៅ​សាលារៀន ព្រោះ​ខ្មាស​មិត្រ​ភក្ដិ ជាដើម

មន្ត្រី​អង្គការ​សង្គម​ស៊ីវិល​ជាតិ និង​អន្តរជាតិ​ជាច្រើន បាន​ថ្កោលទោស​ចំពោះ​ការ​ចាប់ខ្លួន​នេះ ថា ជា​ការ​ធ្វើ​ទុក្ខបុកម្នេញ​ផ្នែក​នយោបាយ ហើយ​ទាមទារ​ឱ្យ​រដ្ឋាភិបាល​ដោះស្រាយ​ពួកគេ​ឱ្យ​មាន​សេរីភាព​វិញ ដោយ​គ្មាន​លក្ខខ័ណ្ឌ ហើយ​ត្រូវ​គោរព​សិទ្ធិមនុស្ស និង​ស្ដារ​ប្រជាធិបតេយ្យ​ឡើងវិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល