អ្នក​វិភាគ​ថា លោក ហ៊ុន សែន កំពុង​តែ​រំលោភ​រដ្ឋធម្មនុញ្ញ​លើ​សំណុំ​រឿង​កាត់​ក្ដី លោក កឹម សុខា

ដោយ ទីន ហ្សាការីយ៉ា
2020-02-24
អ៊ីម៉ែល
មតិ
Share
បោះពុម្ព
លោក កឹម សុខា ប្រធាន​គណបក្ស​សង្គ្រោះ​ជាតិ (ឆ្វេង) និង​លោក​នាយករដ្ឋមន្ត្រី ហ៊ុន សែន។
លោក កឹម សុខា ប្រធាន​គណបក្ស​សង្គ្រោះ​ជាតិ (ឆ្វេង) និង​លោក​នាយករដ្ឋមន្ត្រី ហ៊ុន សែន។
រូប៖ RFA និង​ហ្វេសប៊ុក​លោក ហ៊ុន សែន

មន្ត្រី​គណបក្ស​ប្រឆាំង​លើក​ឡើង​ថា លោក នាយក​រដ្ឋមន្ត្រី ហ៊ុន សែន ប្រកាស​ថា សំណុំ​រឿង​កាត់​ទោស​ជន​ក្បត់​ជាតិ នឹង​មិន​រា​ថយ​ឡើយ។ ការ​ប្រកាស​នៅ​ពេល​នេះ ទំនង​ជា​លោក​ចង់​សំដៅ​ទៅ​លោក កឹម សុខា ហើយ​ក៏​ជា​ការ​បង្ហាញ​កាន់​តែ​ច្បាស់​ថា សំណុំ​រឿង​នេះ គឺ​ជា​ល្ខោន​នយោបាយ ដែល​លោក ហ៊ុន សែន ប្រឌិត​ឡើង ដើម្បី​ធ្វើ​បាប​គណបក្សប្រឆាំង។

រីឯ​ក្រុម​អ្នក​ឃ្លាំមើល​សង្គម​វិញ ចាត់​ទុក​ការ​ថ្លែង​របស់​លោក ហ៊ុន សែន បែបនេះ គឺ​រំលោភ​រដ្ឋធម្មនុញ្ញ និង​ប៉ះពាល់​ដល់​ឯករាជភាព​របស់​តុលាការ។

មន្ត្រី​ជាន់​ខ្ពស់​គណបក្ស​សង្គ្រោះ​ជាតិ​លោក ម៉ន ផល្លា ដែល​កំពុង​និរទេស​ខ្លួន​នៅ​ក្រៅ​ប្រទេស​លើក​ឡើង​ថា ការ​កាត់​ក្ដី​លើ​ប្រធាន​គណបក្ស​សង្គ្រោះ​ជាតិ និង​មន្ត្រី​គណបក្ស​នេះ​ផ្សេង​ទៀត គឺ​គ្រាន់​តែ​ជា​ការ​រៀបចំ​របស់​របប​ក្រុង​ភ្នំពេញ​ប៉ុណ្ណោះ។ លោក​បន្ត​ថា តុលាការ​មិន​អាច​ផ្ដល់​យុត្តិធម៌​ដល់​ក្រុម​គណបក្ស​ប្រឆាំង ឬ​លោក កឹម សុខា បាន​ទេ ដ៏​រាប​ណា​លោក ហ៊ុន សែន នៅ​តែ​លូកលាន់​កិច្ចការ​ផ្ទៃក្នុង​របស់​តុលាការ​បែប​នេះ៖ «ដំណើរ​មាតុភូមិ​និវត្តន៍​ថ្នាក់​ដឹក​នាំ​គណបក្ស​សង្រ្គោះ​ជាតិ​នឹង​កើត​មាន​ឡើង​ក្នុង​ឆ្នាំ២០២០ ដ៏​ខ្លី ដូច្នេះ​ហើយ​ការ​ផ្លាស់​ប្ដូរ​ក៏​កើត​មាន​ឡើង​ជាមួយ​ដំណើរ​មាតុភូមិ​និវត្តន៍»

លោក ហ៊ុន សែន បាន​និយាយ​ជំនួស​ស្ថាប័ន​តុលាការ​ថា អ្នក​ដែល​បំផ្លាញ​ជាតិ​មិន​អាច​រួច​ខ្លួន​ឡើយ ហើយ​ដំណើរ​ការ​ផ្លូវ​ច្បាប់​នៅ​ក្នុង​តុលាការ ដើម្បី​កាត់​ទោស​ជន​ក្បត់​ជាតិ​នោះ នៅ​តែ​បន្ត អត់​មាន​ថយ​ក្រោយ​ទេ។ ក្រៅ​ពី​នេះ​ទៀត លោក ហ៊ុន សែន បញ្ជាក់​ជា​ថ្មី កាល​ពី​ថ្ងៃ​ទី២៤ កុម្ភៈ​ថា គណបក្ស​សង្គ្រោះ​ជាតិ ដែល​ត្រូវ​បាន​រំលាយ​ហើយ​នោះ នឹង​មិន​អាច​ឱ្យ​រស់​ឡើង​វិញ​ដែរ៖ «ថ្ងៃ​នេះ​ជូន​សារ​ជាក់​លាក់​ច្បាស់លាស់​ថា កម្ពុជា​មិន​ថយ​ក្រោយ​លើ​ការ​កាត់​ក្តី ចំពោះ​ជន​ក្បត់​ជាតិ ជន​ដែល​ទទួល​ទណ្ឌកម្ម​ទេ អ្វី​ដែល​អ្នក​ឯង​បាន​ធ្វើ​អ្នក​ឯង​ត្រូវ​ចាំ​អ្នក​ឯង​យក​ថ្ងៃ​ទី២៩ ខែ​ធ្នូ ២០១៣ គឺ​ជា​ថ្ងៃ​ផ្តាច់​ព្រាត់​ក្នុង​ការ​ផ្តួល​រំលំ»

ទីប្រឹក្សា​សមាគម​គ្រូ​បង្រៀន​កម្ពុជា​ឯករាជ្យ និង​ជា​អតីត​សមាជិក​គណៈកម្មាធិការ​ជាតិ​រៀបចំ​ការ​បោះឆ្នោត លោក រ៉ុង ឈុន យល់ថា ការ​ថ្លែង​បែប​នេះ​របស់​លោក ហ៊ុន សែន គឺ​ផ្ទុយ​ពី​ជំហរ​របស់​សហគមន៍​អន្តរជាតិ​ចង់​បាន ដែល​ធ្វើ​ឲ្យ​ភ្ញៀវ​ទេសចរណ៍ និង​អ្នក​វិនិយោគ​មិន​ហ៊ាន​ចូល​មក​កម្ពុជា។ លោក រ៉ុង ឈុន បន្ត​ទៀត​ថា សារ​របស់​លោក ហ៊ុន សែន នេះ នឹង​ធ្វើ​ឲ្យ​ប៉ះ​ពាល់​ដល់​ការ​សម្រេច​ចិត្ត​របស់​តុលាការ​ដែល​ស្ថាប័ន​នេះ​កន្លង​មក​រង​ការ​រិះគន់​ថា ស្ថិត​ក្រោម​ការ​បង្គាប់​បញ្ជា​របស់​នាយក​រដ្ឋមន្ត្រី៖ «ជះ​ឥទ្ធិពល​អាក្រក់​ទៅ​ស្ថាប័ន​តុលាការ​ឆ្លុះ​បញ្ចាំង​ថា ប្រព័ន្ធ​តុលាការ​នៅ​កម្ពុជា​មិន​ឯករាជ្យ​អី​ទេ គ្រាន់​តែ​តុលាការ​មួយ​ចាំ​ប្រថាប់​ត្រា​តាម​នាយក​រដ្ឋមន្ត្រី»

លើស​ពី​នេះ​ទៀត ការ​ថ្លែង​របស់​លោក ហ៊ុន សែន បែប​នេះ គឺ​ផ្ទុយ​ពី​រដ្ឋធម្មនុញ្ញ​ពីរ​ចំណុច។ ចំណុច​ទី១ មាត្រា៥១ថ្មី​ចែង​ថា អំណាច​បែង​ចែក​ដាច់​ពី​គ្នា រវាង​អំណាច​នីតិប្បញ្ញត្តិ អំណាច​នីតិប្រតិបត្តិ និង​អំណាច​តុលាការ។ ចំណុចទី២ ដែល​លោក ហ៊ុន សែន សន្មត​ថា លោក កឹម សុខា ជា​ជន​ក្បត់​ជាតិ​មុន​តុលាការ​កាត់​សេចក្ដី​នោះ គឺ​ផ្ទុយ​ពី​រដ្ឋធម្មនុញ្ញ​មាត្រា ៣៨ ដែល​ចែង​ថា វិមតិសង្ស័យ ត្រូវ​បាន​ជា​ប្រយោជន៍​ដល់​ជន​ជាប់​ចោទ។ ជន​ជាប់​ចោទ​ណា​ក៏​ដោយ ត្រូវ​ទុក​ជា​មនុស្ស​ឥត​ទោស ដរាប​ណា​តុលាការ​មិន​ទាន់​កាត់​ទោស​ជា​ស្ថាពរ។ ប្រការ​នេះ មានន័យថា លោក កឹម សុខា ប្រធាន​គណបក្ស​សង្គ្រោះ​ជាតិ គឺ​ជា​ជន​សង្ស័យ ដែល​តុលាការ​កំពុង​តែ​បន្ត​សំណុំ​រឿង​ជំនុំ​ជម្រះ​នៅ​ឡើយ ពោល​គឺ តុលាការ​មិន​ទាន់​សម្រេច​ថា លោក កឹម សុខា ជា​ជន​ក្បត់​ជាតិ ឬ​យ៉ាង​ណា​នៅ​ឡើយ​មក​ទល់​ពេល​នេះ។

សហ​មេធាវី​ការពារ​ក្ដី លោក កឹម សុខា លោក មេធាវី ចាន់ ចេន សុំ​មិន​ធ្វើ​អត្ថាធិប្បាយ​លើ​ករណី លោក ហ៊ុន សែន ហៅ​លោក កឹម សុខា ជា​ជន​ក្បត់​ជាតិ​នេះ​ឡើយ។ ប៉ុន្តែ លោក​មេធាវី ចាន់ ចេន បញ្ជាក់​ថា សហ​មេធាវី​លោក កឹម សុខា នឹង​ចូលរួម​សវនាការ​ជំនុំ​ជម្រះ​ក្ដី លោក កឹម សុខា លើ​សំណុំ​រឿង​ចោទ​ប្រកាន់ សន្ទិដ្ឋិភាព​ជាមួយ​បរទេស ឬ​ក្បត់​ជាតិ​នេះ នៅ​ថ្ងៃ​ទី២៦ ថ្ងៃ​ទី២៧ កុម្ភៈ​នេះ​ទៀត បន្ទាប់​ពី​ក្រុម​មេធាវី បានដើរចេញពីសវនាការកាលពីទី១៣ កុម្ភៈ។ លោក មេធាវី ចាន់ ចេន បាន​រំលឹក​ថា សវនាការ​កាល​ពី​ថ្ងៃ​ទី១៣ កុម្ភៈដែលមានភាពចម្រូងចម្រាស់នោះ គឺ​ចៅក្រម​ជំនុំ​ជម្រះ​មិន​បើក​សិទ្ធិ​ឲ្យ​សហ​មេធាវី​លោក កឹម សុខា បាន​ឡើង​និយាយ​ការពារ​កូន​ក្ដី​របស់​ខ្លួន​ឲ្យ​បាន​ពេញលេញ ទី២ ចៅក្រម​ជំនុំ​ជម្រះ​យក​ឯកសារ​ភស្តុតាង​ចំនួន ១.១៩២ទំព័រ ដែល​ទើប​យក​មក​ពី​ចៅក្រម​ស៊ើបសួរ ទាំង​សហ​មេធាវី​លោក កឹម សុខា មិន​មាន​ឯកសារ​ទាំង​នោះ៖ «ក្រុម​មេធាវី​ដើរ​ចេញ គឺ​ចៅក្រម​ឲ្យ​ក្រឡា​បញ្ជី​ទៅ​យក​ឯកសារ​ពី​ចៅក្រម​ស៊ើបសួរ កាល​ណា​សំណុំ​រឿង​ជំនុំ​ជម្រះ​ហើយ បែរ​ជា​ភស្តុតាង​នៅ​ចៅក្រម​ស៊ើប​នៅ​ឡើយ ដែល​រឿង​នេះ វា​ខុស​ប្រក្រតី»

អ្នក​ឃ្លាំមើល​ផ្នែក​អភិវឌ្ឍន៍​សង្គម លោក បណ្ឌិត មាស នី មានប្រសាសន៍ថា សំណុំរឿង លោក កឹម សុខា នេះ ជា​រឿង​នយោបាយ។ លោក​បន្ថែម​ថា សំណុំ​រឿង​ក្ដី​លោក កឹម សុខា នេះ លោក​មើល​ឃើញ​ថា នឹង​អូស​បន្លាយ​ពេល​វេលា រហូតដល់បោះឆ្នោតឃុំសង្កាត់ឆ្នាំ២០២២ ឬ​ដល់​ការ​បោះ​ឆ្នោត​អាណត្តិ​ទី៧ ឆ្នាំ២០២៣ ជា​ដើម ដើម្បី​កុំ​ឲ្យ​មេ​បក្ស​ប្រឆាំង​រូប​នេះ​ធ្វើ​សកម្មភាព​នយោបាយ​អ្វី​បាន៖ «ខ្ញុំ​មើល​ឃើញ​ខុស​ពី​រដ្ឋាភិបាល ខ្ញុំ​ផ្ដល់​អត្ថន័យ​អ្នក​ទោស​ប្រព្រឹត្តិ​ដោយ​ខុស​ច្បាប់ និង​អ្នក​ទោស​នយោបាយ សម្រាប់​អ្នក​ទោស​នយោបាយ គឺ​គេ​យក​មនុស្ស​ទៅ​ឃុំ​ឃាំង គេ​ចង់​ឃុំ​ឃាំង ១០ឆ្នាំ​ក៏​បាន​ដែរ ហើយ​ករណី​លោក កឹម សុខា នេះ ជា​ករណី​នយោបាយ​តាំង​ពី​ដើម​ទី​មក»

នេះ​មិន​មែន​លើក​ទី​មួយ​ទេ ដែល លោក ហ៊ុន សែន តែង​ប្រើ​វេទិកា​សាធារណៈ ដើម្បី​ជ្រៀតជ្រែក​កិច្ចការ​ផ្ទៃ​ក្នុង​តុលាការ ។ កាលពីឆ្នាំ២០១៧ មុន​ពេល​តុលាការ​សម្រេច​រំលាយ​គណបក្ស​សង្គ្រោះ​ជាតិ លោក ហ៊ុន សែន ក៏​បាន​និយាយ​មុន​ការ​សម្រេច​របស់​តុលាការ​ថា គឺ​គណបក្ស​សង្គ្រោះ​ជាតិ​នឹង​ត្រូវ​រំលាយ​ចោល ក្រោយ​មក​តុលាការ​កំពូល​បាន​ក៏​សម្រេច​រំលាយ​ទៅ​តាម​ការ​ចង់​បាន​របស់​លោក ហ៊ុន សែន ដូច្នោះ​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល