ជនមិនស្គាល់មុខលួចកាត់បំផ្លាញផ្ទាំងបដាគោលនយោបាយរបស់គណបក្សភ្លើងទៀននៅតាមឃុំ សង្កាត់មួយចំនួននៃខេត្តសៀមរាបជាបន្តបន្ទាប់ អំឡុងពេលយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥នេះ។ មន្ត្រីជាន់ខ្ពស់បក្សភ្លើងទៀនចាត់ទង្វើទាំងនោះថា ជាការគំរាមកំហែងផ្នែកនយោបាយ។ មន្ត្រីសង្គមស៊ីវិលជំរុញអាជ្ញាធរពាក់ព័ន្ធត្រូវទប់ស្កាត់ និងចាត់វិធានការឱ្យបានម៉ឺងម៉ាត់ទៅតាមច្បាប់លើជនប្រព្រឹត្ត។
គណបក្សភ្លើងទៀនដែលជាដៃគូប្រកួតប្រជែងជាមួយគណបក្សប្រជាជនកម្ពុជា បន្តទទួលរងការធ្វើទុក្ខបុកម្នេញពីសំណាក់ជនមិនស្គាល់មុខ ដោយមានគេលួចបំផ្លាញស្លាក និងបដាគោលនយោបាយរាប់សិបករណីនៅតាមស្រុកមួយចំនួននៅខេត្តសៀមរាប ខណៈការបោះឆ្នោតកាន់តែខិតជិតមកដល់។ មន្ត្រីជាន់ខ្ពស់គណបក្សភ្លើងទៀន លើកឡើងថា អាជ្ញាធរខេត្តសៀមរាបមិនដែលបញ្ជាក់មូលហេតុឱ្យបានច្បាស់លាស់ ឬស្វែងរកជនល្មើសយកមកផ្ដន្ទាទោសបានម្ដងណាឡើយ។
សមាជិកគណៈកម្មាធិការអចិន្ត្រៃយ៍ និងជាប្រធានក្រុមការងារគណបក្សភ្លើងទៀនខេត្តសៀមរាប លោក សុខ គឹមសេង ប្រាប់វិទ្យុអាស៊ីសេរីនៅថ្ងៃទី២៤ ខែឧសភាថា រយៈពេល ៤ថ្ងៃនៃយុទ្ធនាការឃោសនាបោះឆ្នោតនេះ មានបដាសារនយោបាយរបស់បក្សភ្លើងទៀនដែលចងនៅទីតាំងសាធារណៈជាច្រើនផ្ទាំង ត្រូវបានជនមិនស្គាល់មុខលួចកាត់ផ្ដាច់ និងហែកបំផ្លាញជាហូរហែ ដូចជានៅឃុំព្រះដាក់នៃស្រុកបន្ទាយស្រីមាន៩ករណី និងសង្កាត់សាលាកំរើក ស្វាយដង្គុំ និងគោកចកនៃក្រុងសៀមរាប រួមទាំងស្រុកមួយចំនួនទៀត។ ដូច្នេះលោកចាត់ទុកករណីទាំងនេះថា ជាការគំរាមកំហែងផ្នែកនយោបាយ និងបង្កបរិយាកាសអាប់អួមុនការបោះឆ្នោត៖ «គណបក្សភ្លើងទៀនសូមឱ្យមានការការពារសុវត្ថិភាពដោយស្មើភាពទាំងសុវត្ថិភាពបេក្ខជន អ្នកគាំទ្រ និងទាំងទ្រព្យសម្បត្តិរបស់គណបក្សត្រូវតែមានការការពារ មិនមែនបាត់បង់តែគណបក្សភ្លើងទៀនទេ តែគណបក្សកាន់អំណាច និងគណបក្សផ្សេងដែលគេចាត់ទុកថា មិនជាការគំរាមកំហែង ឬប្រកួតប្រជែងធំដុំជាមួយគេអត់បានបាត់បង់ អាហ្នឹងគឺជាការប្រកួតប្រជែងមួយ ដែលមិនសេរី ត្រឹមត្រូវ និងយុត្តិធម៌»។
លោក សុខ គឹមសេង ឱ្យដឹងទៀតថា អាជ្ញាធរខេត្តសៀមរាបហាក់លម្អៀងទៅរកបក្សកាន់អំណាចដោយពួកគេមិនសូវយកចិត្តទុកដាក់ ឬពង្រឹងកិច្ចសហការល្អជាមួយបក្សភ្លើងទៀននោះទេ ដូចជាការការពារសុវត្ថិភាពចរាចរណ៍អំឡុងពេលហែក្បួនឃោសជាដើម។ ផ្ទុយទៅវិញលោករកឃើញថា អាជ្ញាធរស្លៀកពាក់ស៊ីវិលបែរជាតាមថតសកម្មភាពហែក្បួនដើម្បីរកលេសចាប់កំហុសអ្នកគាំទ្ររបស់លោកទៅវិញ។ មន្ត្រីបក្សភ្លើងទៀនរូបនេះបញ្ជាក់ថា លោកនឹងដាក់ពាក្យបណ្ដឹងពីករណីមិនប្រក្រតីទាំងនេះទៅគណៈកម្មការឃុំ សង្កាត់ រៀបចំការបោះឆ្នោតឆាប់ៗនេះ។
ឆ្លើយតបនឹងរឿងនេះ ប្រធានលេខាធិការដ្ឋានគណៈកម្មការរៀបចំការបោះឆ្នោតខេត្តសៀមរាប លោក នឹម វ៉ាន់សំ ប្រាប់វិទ្យុអាស៊ីសេរីថា បញ្ហាដែលកើតលើគណបក្សភ្លើងទៀនកន្លងមក គណៈកម្មការឃុំសង្កាត់រៀបចំការបោះឆ្នោតបានកោះប្រជុំអាជ្ញាធរពាក់ព័ន្ធរួចហើយ ដើម្បីចាត់វិធានការដោះស្រាយ និងពង្រឹងការអនុវត្តសមត្ថកិច្ចរបស់ខ្លួនឡើងវិញនៅល្ងាចថ្ងៃទី២៤ ខែឧសភា។ លោកអះអាងថា អាជ្ញាធរបានយកចិត្តទុកដាក់ថែរក្សាសុខសុវត្ថិភាពជូនគណបក្សនយោបាយទាំងអស់ដោយពុំមានការរើសអើយដូចការលើកឡើងនោះទេ៖ «រឿងនេះយើងបានដឹងហើយ យើងកំពុងចាត់ចែងហើយ វិធីស្រាវជ្រាវយើងនឹងសហការជាមួយប៉ូលិសប៉ុស្តិ៍នៅមូលដ្ឋានហ្នឹងឯង ដើម្បីចុះស្រាវជ្រាវ ស៊ើបអង្កេតរឿងហ្នឹង អ៊ីចឹងពង្រឹងសិន ហើយគ្រប់គណបក្សនយោបាយមិនមែនតែគណបក្សភ្លើងទៀនទេ»។
ទោះជាយ៉ាងណា បេក្ខជនចៅសង្កាត់សាលាកំរើក ក្រុងសៀមរាប លោក នង ធារ៉ា ប្រាប់ថា លោកបានដាក់ពាក្យបណ្ដឹងទៅគណៈកម្មការឃុំ សង្កាត់ រៀបចំការបោះឆ្នោត និងជូនដំណឹងទៅអាជ្ញាធរមូលដ្ឋានឱ្យជួយស្រាវជ្រាវចាប់ជនដៃដល់ និងអ្នកពាក់ព័ន្ធមកផ្ដន្ទាទោសតាមច្បាប់រួចហើយ។ ប៉ុន្តែលោកហាក់គ្មានជំនឿថា សមត្ថកិច្ចពាក់ព័ន្ធរកអ្នកប្រព្រឹត្តឃើញនោះឡើយ។ បេក្ខជនចៅសង្កាត់រូបនេះបន្តថា បញ្ហានេះបានធ្វើឱ្យរូបលោក និងបេក្ខជនផ្សេងទៀតពិបាកបញ្ជូនសារនយោបាយជូនប្រជាពលរដ្ឋ និងប៉ះពាល់ដល់ដំណើរប្រកួតប្រជែងដោយស្មើភាពគ្នា៖ «ខ្ញុំពិតជាមានការសោកស្ដាយជាខ្លាំង ពីព្រោះករណីនេះ គឺករណីដែលមិនអាចទទួលយកបានទេ ក្នុងនាមខ្ញុំជាបេក្ខជនមួយរូបនៅក្នុងសង្កាត់សាលាកំរើក តែត្រូវជនអនាមិកមកបំផ្លាញបដារបស់ខ្ញុំ ដែលចងនៅតាមទីសាធារណៈ»។
ជុំវិញរឿងនេះ នាយកប្រតិបត្តិអង្គការឃ្លាំមើលការបោះឆ្នោតនៅកម្ពុជាហៅកាត់ថា និចហ្វិច (Nicfec) លោក សំ គន្ធាមី មានប្រសាសន៍ថា ការលួច ឬបំផ្លាញស្លាក បដាដែលជាសម្ភារៈរបស់គណបក្សនយោបាយ គឺជាអំពើល្មើសច្បាប់យ៉ាងធ្ងន់ធ្ងរ ជាពិសេស ប៉ះពាល់ដល់សិទ្ធិនយោបាយរបស់ពលរដ្ឋដែលអាជ្ញាធរត្រូវចាត់វិធានការជាបន្ទាន់ និងប្រកបដោយប្រសិទ្ធិភាព។ លោកអំពាវនាវដល់អាជ្ញាធរត្រូវទប់ស្កាត់ទង្វើខុសច្បាប់ទាំងនោះឱ្យខាងតែបាន៖ «រូបភាពនេះប៉ះពាល់ដល់ការផ្សព្វផ្សាយគោលនយោបាយរបស់គណបក្ស អ៊ីចឹងបានទាមទារកុំឱ្យប៉ះពាល់ដល់សកម្មភាពគណបក្សនីមួយៗ ជាពិសេសផុសស្ទ័រ (Poster) និងបេនន័រ (Banner) អីហ្នឹង។ សូមឱ្យបញ្ឈប់សកម្មភាពនេះទៅ ព្រោះវាជាសកម្មភាពខុសច្បាប់ ហើយសកម្មភាពអីចឹងប៉ះពាល់ដល់ការបោះឆ្នោត»។
ក្រុមអង្គការសង្គមស៊ីវិល និងអ្នកសង្កេតការណ៍បោះឆ្នោតវាយតម្លៃថា បើបរិយាកាសនយោបាយ នៅតែស្ថិតក្នុងភាពអាប់អួបែបនេះ នោះនឹងមិនអាចធានាថា ការបោះឆ្នោតនៅពេលខាងមុខ អាចប្រព្រឹត្តទៅដោយសេរី ត្រឹមត្រូវ និងយុត្តិធម៌នោះទេ។
ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ នេះ នឹងប្រព្រឹត្តទៅនៅថ្ងៃអាទិត្យ ទី៥ ខែមិថុនាខាងមុខ។ ក្នុងនោះគណបក្សនយោបាយចំនួន១៧ បានចូលប្រកួតប្រជែងដណ្ដើមយកអាសនៈសមាជិក ក្រុមប្រឹក្សាឃុំសង្កាត់ ដែលមានចំនួនជាង ១ម៉ឺន (១១.១២២) អាសនៈ ហើយប្រជាពលរដ្ឋជាង ៩លាន ២សែននាក់ បានចុះឈ្មោះក្នុងបញ្ជីបោះឆ្នោត៕