សាលាឧទ្ធរណ៍ បដិសេធ​សំណើសុំ​នៅ​ក្រៅ​ឃុំ​របស់​លោក ពៀត ម៉ាប់ និង​លោក ស៊ុន ធន់

ដោយ ខែ សុណង
2020-07-24
អ៊ីម៉ែល
មតិ
Share
បោះពុម្ព
លោក ពៀត ម៉ាប់ (ឆ្វេង) និង​លោក ស៊ុន ធន់ ក្នុង​បន្ទប់​រង់ចាំ​សវនាការ​នៅ​សាលា​ឧទ្ធរណ៍​រាជធានី​ភ្នំពេញ នៅ​ព្រឹក​ថ្ងៃ​ទី២៤ ខែ​កក្កដា ឆ្នាំ២០២០។
លោក ពៀត ម៉ាប់ (ឆ្វេង) និង​លោក ស៊ុន ធន់ ក្នុង​បន្ទប់​រង់ចាំ​សវនាការ​នៅ​សាលា​ឧទ្ធរណ៍​រាជធានី​ភ្នំពេញ នៅ​ព្រឹក​ថ្ងៃ​ទី២៤ ខែ​កក្កដា ឆ្នាំ២០២០។
រូបថត៖ លោក ធន់ ធានី កូនប្រុស លោក ស៊ុន ធន់

ចៅក្រម​សាលាឧទ្ធរណ៍​ភ្នំពេញ តម្កល់​សាលក្រម​សាលាដំបូង​ទុក​ជា​បាន​ការ ដោយ​បដិសេធ​សំណើ​សុំ​នៅ​ក្រៅ​ឃុំ​សមាជិក​ក្រុមប្រឹក្សា​ខេត្ត​ជាប់​ឆ្នោត​របស់​គណបក្ស​ប្រឆាំង ២នាក់ គឺ​លោក ពៀត ម៉ាប់ និង​លោក ស៊ុន ធន់ នៅ​ថ្ងៃ​ទី២៤ កក្កដា​នេះ។ សាច់ញាតិ និង​សង្គម​ស៊ីវិល ហៅ​ការ​សម្រេច​នេះ​ថា ជា​ករណី​អយុត្តិធម៌ និង​ទាមទារ​ឲ្យ​ដោះ​លែង​អ្នក​ទាំង​ពីរ ដោយ​ឥត​លក្ខខណ្ឌ និង​ជា​បន្ទាន់។

មេធាវី​ការពារ​ក្ដី​ឲ្យ​មន្ត្រី​បក្ស​ប្រឆាំង និង​ជា​សមាជិក​សមាគម​គ្រូបង្រៀន​កម្ពុជា​ឯករាជ្យ​ទាំង​ពីរ​នាក់ គឺ​លោក​មេធាវី សំ សុគង់ ប្រាប់​ថា មេធាវី​បាន​ពិភាក្សា​ជាមួយ​កូនក្ដី​រួចហើយ នឹង​បន្ត​ប្ដឹង​ទៅ​តុលាការ​កំពូល​ទៀត ដោយសារ​កូន​ក្ដី​ចាត់​ទុក​ការ​សម្រេច​នេះ​ថា អយុត្តិធម៌៖ «គេ​មិន​ទទួល​តាម​ការ​ស្នើសុំ​របស់​យើង​ទេ ហើយ​មេធាវី នឹង​ដាក់ពាក្យ​ប្ដឹង​សារទុក្ខ​ទៅ​តុលាការ​កំពូល ដើម្បីឲ្យ​តុលាការ​កំពូល​ពិនិត្យ​ឡើង​វិញ»

ចំណែក​កូនប្រុស​របស់​លោក ស៊ុន ធន់ គឺ លោក ធន់ ធានី យល់​ថា ការ​បន្ត​ឃុំខ្លួន​ឪពុក មិន​អាច​ទទួល​យក​បាន​ទេ ព្រោះ​លោក​អះអាង​ថា លោក ស៊ុន ធន់ ជា​មនុស្ស​ស្អាតស្អំ។ លោក ធន់ ធានី ទាមទារ​ឲ្យ​តុលាការ​គ្រប់​ជាន់​ថ្នាក់ ដោះលែង​លោក ស៊ុន ធន់ ព្រោះ​ការ​ចាប់​ខ្លួន​នេះ ជា​រឿង​នយោបាយ និង​ជា​ការ​បំបាក់​ស្មារតី​សមាជិក​បក្ស​ប្រឆាំង នៅ​តាម​មូលដ្ឋាន មិន​ឲ្យ​ហ៊ាន​ធ្វើ​សកម្មភាព​រិះគន់​រដ្ឋាភិបាល៖ «ការ​សម្រេច​ហ្នឹង វា​ជា​រឿង​អយុត្តិធម៌ ហើយ​ការ​គាប​សង្កត់​ពី​ខាង ថ្នាក់​ដឹក​នាំ​ពី​ខាង​រដ្ឋាភិបាល មក​លើ​តុលាការ​ផង ការ​ចាប់​ចង​នេះ ហើយ​ជា​បញ្ហា​ដែល​យើង​មិន​អាច​ទទួល​យក​បាន​អ៊ីចឹង​ណា ព្រោះ​ការ​ចោទប្រកាន់​បណ្ដឹង​ពាក់ព័ន្ធ​នឹង​គាត់​ហ្នឹង សុទ្ធតែ​គាត់​មិន​បាន​ប្រព្រឹត្តិ ហើយ​ជា​ការ​ចោទ​ប្រកាន់​មាន​រយៈពេល​ពីរ បី ឆ្នាំ​កន្លង​ផុត​មក​ហើយ ទើប​យក​មក​ចោទ​ប្រកាន់»

លោក ធន់ ធានី បន្ត​ថា បច្ចុប្បន្ន​ឪពុក​របស់​លោក​ស្គម​ជាង​មុន និង​ឧស្សាហ៍ឈឺ នៅ​ក្នុង​ពន្ធនាគារ​ព្រៃស។ លោក​ឲ្យដឹង​ថា ឆ្មាំ​ពន្ធនាគារ​មិន​ព្រម​ឃុំ​ខ្លួន​អ្នកទោស​នយោបាយ​ក្នុង​បន្ទប់​ឃុំឃាំង​តែ​មួយ​តាម​សំណើ​នោះ​ទេ គឺ​ឃុំ​អ្នកទោស​នយោបាយ​បក្ស​ប្រឆាំង​ទាំង​អស់ នៅ​បន្ទប់​ផ្សេង​គ្នា នៅ​លាយឡំ​ជាមួយ​ក្រុម​ឧក្រិដ្ឋជន ហើយ​ក្នុង​បន្ទប់​ឃុំ​ខ្លួន​លោក ស៊ុន ធន់ មាន​អ្នកជាប់ឃុំ​ចំនួន ២៤នាក់។

អាជ្ញាធរ​ខេត្ត​សៀមរាប និង​ខេត្ត​កំពង់ធំ បាន​ចាប់ខ្លួន លោក ពៀត ម៉ា​ប់ និង​លោក ស៊ុន ធន់ កាលពី​ចុង​ថ្ងៃ​ទី២៦ ខែឧសភា និង​ថ្ងៃ​ទី១ ខែមិថុនា បញ្ជូន​មក​សាលាដំបូង​រាជធានី​ភ្នំពេញ ហើយ​ចៅក្រម​ស៊ើបសួរ លោក កូយ សៅ បាន​ចោទ​អ្នក​ទាំងពីរ ពី​បទ​ញុះញង់​យោធិន​មិន​ឲ្យ​ស្ដាប់បញ្ជា និង​ចូលរួម​គំនិត​ក្បត់ ពាក់ព័ន្ធ​នឹង​គម្រោង​មាតុភូមិ​និវត្តន៍​របស់​លោក សម រង្ស៊ី កាលពី​ខែ​វិច្ឆិកា ឆ្នាំ២០១៩។ អ្នក​ទាំងពីរ ជាសមាជិក​សមាគម​គ្រូបង្រៀន​កម្ពុជា​ឯករាជ្យ។ គ្រូបង្រៀន​ទាំងពីរ​នាក់ ធ្លាប់​ប្រាប់​អាស៊ី​សេរី​ថា ក្រោយ​ការ​រំលាយ​គណបក្ស​សង្គ្រោះ​ជាតិ កាលពី​ចុង​ឆ្នាំ២០១៧ មក ពួក​គាត់ តែង​រង​ការ​ធ្វើទុក្ខ​បុក​ម្នេញ​ជា​បន្ត​បន្ទាប់ ដោយសារ​ពួក​គាត់ មិន​ព្រម​ចុះចូល​ជាមួយ​គណបក្ស​ប្រជាជន​កម្ពុជា។ ការ​ធ្វើទុក្ខ​បុក ម្នេញ​នោះ ដូចជា ករណី​រដ្ឋមន្ត្រី​ក្រសួង​អប់រំ លោក ហង់ជួន ណារ៉ុន លុប​ឈ្មោះ លោក ពៀត ម៉ាប់ ពី​ក្របខ័ណ្ឌ​គ្រូបង្រៀន ដោយ​ចោទ​ថា លោក​អវត្តមាន មិន​ព្រម​ទៅ​បង្រៀន ក្នុង​អំឡុងពេល​លោក​ព្យួរ​ឈ្មោះ ធ្វើជា​សមាជិក​ក្រុមប្រឹក្សា​ខេត្ត​សៀមរាប។ ឯ​លោក ស៊ុន ធន់ វិញ រង​ការ​ផ្លាស់​សាលាបង្រៀន​ច្រើន​លើក​ច្រើន​សារ និង​ចុង​ក្រោយ​កាល​ពី​ឆ្នាំ២០១៩ ជន​មិន​ស្គាល់​មុខ ៤នាក់ បាន​ល្បួង​លោក ស៊ុន ធន់ ឡើងឡាន នាំ​យក​ទៅ​វាយ ក្នុង​ចម្ការ​ស្ងាត់​មួយ​កន្លែង។

ជុំវិញ​ករណី​ការ​បដិសេធ​សំណើសុំ​នៅ​ក្រៅ​ឃុំ​នេះ សង្គម​ស៊ីវិល​ឃ្លាំមើល​សិទ្ធិ​គ្រូបង្រៀន ហៅ​ការ​បន្ត​ឃុំ​ខ្លួន លោក​ទាំងពីរ​នេះ​ថា ធ្វើឡើង​ដោយ​ភាព​អយុត្តិធម៌។ ប្រធាន​សមាគម​គ្រូបង្រៀន​កម្ពុជា​ឯករាជ្យ អ្នកស្រី អ៊ុក ឆាយាវី ហៅ​ការ​បន្ត​ឃុំខ្លួន លោក ស៊ុន ធន់ និង​លោក ពៀត ម៉ាប់ ថា ជា​ការ​បន្ត​ធ្វើទុក្ខ​បុក​ម្នេញ លើ​សិទ្ធិ​នយោបាយ​របស់​គ្រូបង្រៀន ព្រោះ​ការ​ចាប់ខ្លួន​ធ្វើឡើង​ក្រោម​រូបភាព​នយោបាយ។ អ្នកស្រី​ទាមទារ​ឲ្យ​តុលាការ​ដោះលែង និង​ផ្ដល់​ភាព​ស្អាតស្អំ ដល់​សមាជិក​សមាគម​គ្រូបង្រៀន​ទាំង ៤នាក់ ដែល​កំពុង​ជាប់​ឃុំ​ក្នុង​ពន្ធនាគារ​ព្រៃ​ស ដោយសារ​រឿង​នយោបាយ​នេះ​ផង​ដែរ៖ «ស្រេច​តែ​គេ​បញ្ជា ឬក៏​ធ្វើ​ទៅតាម​ស្ថានការណ៍​នយោបាយ។ បើ​នយោបាយ​កម្ពុជា​ល្អ​ប្រសើរ​ទៅ គឺ​ពួក​គាត់​បាន​រួច​ផុត​ចាក​ទុក្ខទោស​នៅ​ក្នុង​ពន្ធនាគារ។ ប៉ុន្តែ​បើ​ក្ដៅ​គគុក​ដូច​សព្វថ្ងៃ​នេះ តែងតែ​រង​ឥទ្ធិពល​ដោយ​អយុត្តិធម៌។ យើង​សូម​ថ្កោលទោស»

ចាប់​តាំង​ពី​ដើម​ឆ្នាំ២០២០ មក របប​ក្រុង​ភ្នំពេញ បាន​ចាប់​ឃុំខ្លួន​សមាជិក​គណបក្ស​សង្គ្រោះ​ជាតិ នៅ​តាម​មូលដ្ឋាន​ជិត ២០នាក់​ហើយ ដោយ​ចោទ​ប្រកាន់​ពី​បទ​ផ្សេងៗ ដែល​អង្គការ​ជាតិ និង​អន្តរជាតិ មើល​ឃើញ​ថា ជា​ការ​បង្ក្រាប​ឥតស្រាក​ស្រាន្ត ដើម្បី​កម្ចាត់​គណបក្ស​ប្រឆាំង។ ចំណែក​សកម្មជន​បក្ស​ប្រឆាំង​ជិត ២០នាក់​ផ្សេង​ទៀត ត្រូវ​ជន​មិន​ស្គាល់​មុខ លប​លួច​វាយ​របួស​ក្បាល និង​របួស​ដៃ។ ជាង​កន្លះ​ឆ្នាំ​មកនេះ សមត្ថកិច្ច​រក​មិន​ដែល​ឃើញ​ជន​ដៃដល់ និង​អ្នក​បញ្ជា​ពី​ក្រោយ​យក​មក​ផ្ដន្ទាទោស​នៅ​ឡើយ​ទេ៕

ព័ត៌មាន (0)
Share
គេហទំព័រ​ទាំងមូល