សមត្ថកិច្ច​ចាប់​ខ្លួន​មេ​បក្ស​ខ្មែរ​ឈ្នះ​ពី​បទ​ញុះញង់​បញ្ហា​ព្រំដែន និង​បញ្ជូន​យុវជន ​២​នាក់​ទៅ​តុលាការ

ដោយ ហេង រស្មី
2020-08-14
អ៊ីម៉ែល
មតិ
Share
បោះពុម្ព
ប្រធាន​គណបក្ស​ខ្មែរ​ឈ្នះ លោក សួង សុភ័ណ្ឌ។
ប្រធាន​គណបក្ស​ខ្មែរ​ឈ្នះ លោក សួង សុភ័ណ្ឌ។
Photo courtesy

អាជ្ញាធរ​នៃ​របប​ក្រុងភ្នំពេញ បង្កើន​ការ​ចាប់ខ្លួន​មនុស្ស​បន្ថែម​ទៀត នៅ​ថ្ងៃ​សុក្រ​នេះ ដោយ​បាន​ចាប់ខ្លួន​ប្រធាន​គណបក្ស​ខ្មែរ​ឈ្នះ លោក សួង សុភ័ណ្ឌ ចោទប្រកាន់​ពី​បទ​ញុះញង់​បញ្ហា​ព្រំដែន​។ ក្នុង​ថ្ងៃ​ដដែល​នេះ ប៉ូលិស​ក៏​បាន​បញ្ជូន យុវជន​២​នាក់ នៃ​ក្រុម​ចលនា​ខ្មែរ​ថាវរៈ ទៅ​តុលាការ ពី​បទ​ញុះញង់​ឲ្យ​មាន​ភាព​វឹកវរ​ដល់​សង្គម និង​បទ​រារាំង​សមត្ថកិច្ច​ក្នុង​ការ​ឆែកឆេរ​កន្លែង​ស្នាក់នៅ។

អ្នកនាំពាក្យ​គណបក្ស​ខ្មែរ​ឈ្នះ លោក យិន ឈឿន ប្រាប់​អាស៊ីសេរី​ថា ប៉ូលិស បាន​ចាប់ខ្លួន លោក សួង សុភ័ណ្ឌ នៅ​ម៉ោង ជាង​១២​ថ្ងៃត្រង់ និង​មិន​បាន​បង្ហាញ​ដីកា​ចាប់ខ្លួន​ទេ ដោយ​បាន​ធ្វើ​សកម្មភាព​ចាប់​ភ្លាមៗ បញ្ជូន​ទៅ​ស្នងការដ្ឋាន​រាជធានី​ភ្នំពេញ​។ លោក​បន្ត​ថា ប៉ូលិស មិន​អនុញ្ញាត​ឲ្យ​មន្ត្រី​គណបក្ស​ខ្មែរ​ឈ្នះ បាន​ចូល​ជួប លោក សួង សុភ័ណ្ឌ ក្នុង​ស្នងការដ្ឋាន​ឡើយ​។ លោក យិន ឈឿន បន្ត​ទៀត​ថា មន្ត្រី​គណបក្ស​កំពុង​ប្រជុំ​គ្នា ដើម្បី​ចេញ​សេចក្ដីថ្លែងការណ៍​ជុំវិញ​ការ​ចាប់ខ្លួន​នេះ នឹង​មានបំណង​ពឹង​ពាក់ បណ្ដា​អង្គការ ស្ថានទូត​នានា ដើម្បី​ឲ្យ​ជួយ​អន្តរាគមន៍៖ «យើង​ទាក់​ទង​គ្នា​ ការងារ​ គឺ​ការ​ចាប់​ខ្លួន​ហ្នឹង អត់​បាន​បង្ហាញ​ដីកា​អ្វី​ទេ។ អ៊ីចឹង យើង​អត់​ដឹង​ថា អ្វី​ជា​ធាតុ​ផ្សំ ឈាន​ទៅ​ដល់​ការ​ចាប់​ខ្លួន​ហ្នឹង»។

អ្នកនាំពាក្យ​ស្នងការដ្ឋាន​នគរបាល​រាជធានី​ភ្នំពេញ លោក សាន សុខសីហា ប្រាប់​អាស៊ីសេរី ថា លោក សួង សុភ័ណ្ឌ ត្រូវ​ចាប់ខ្លួន តាម​បញ្ជា​របស់​ព្រះរាជអាជ្ញា នៅ​ក្នុង​លំនៅឋាន ក្នុង​ខណ្ឌ​ទួលគោក ដោយសារ ប្រព្រឹត្តិ​បទល្មើស​ជាក់ស្ដែង ពាក់ព័ន្ធ​នឹង​ការ​ញុះញង់​បំភ្លៃ​ការពិត លើ​បញ្ហា​ព្រំដែន​។ លោក​អះអាង​ថា ប៉ូលិស បាន​បង្ហាញ​ដីកា ចាប់ខ្លួន លោក សួង សុភ័ណ្ឌ និង​អនុវត្ត​ត្រឹមត្រូវ​តាមច្បាប់​។ គិត​ត្រឹម​ម៉ោងជាង ៤​ល្ងាច ថ្ងៃ​សុក្រ ប៉ូលិស​កំពុង​សាកសួរ លោក សួង សុភ័ណ្ឌ ដោយ​មិន​ទាន់​សម្រេច​ថា នឹង​បញ្ជូន ទៅ​តុលាការ ឬ​អត់​ទេ គឺ​រង់ចាំ​បញ្ចប់​នីតិវិធី​សាកសួរ​នៅ​ដំណាក់កាល​នគរបាល​សិន៖ «ពេល​នេះ យើង​កំពុង​តែ​ធ្វើ​ការ​សាកសួរ (លោក សួង សុភ័ណ្ឌ) ​នៅ​ស្នងការដ្ឋាន​នគរបាល​រាជធានី​ភ្នំពេញ​​។ យើង​នឹង​ធ្វើ​តាម​នីតិវិធី​បន្ត ប្រសិន​យើង​​​ភាព​ជាក់​ស្ដែង​យ៉ាង​ណា យើង​នឹង​បន្ត​នីតិវិធី​ជាក់ស្ដែង​តាម​ហ្នឹង​ទៀត។ អ៊ីចឹង​​ខ្ញុំ​អត់​ទាន់​ប្រាកដ​ថា ជាក់ស្ដែង​នឹង​បញ្ជូន​​ ឬ​ក៏​យ៉ាង​ម្ដេច​ទេ ព្រោះ​យើង​អត់​ទាន់​ដឹង​​ច្បាស់​ថា តើ​យ៉ាង​ម្ដេច​អ៊ីចឹង​ណា។ ឥឡូវ​នេះ គ្រាន់​តែ​យើង​បាន​នាំ​ខ្លួន ដើម្បី​ធ្វើ​ការ​សាកសួរ​ ហើយ​បទ​ល្មើស​ហ្នឹង គឺ​ទាក់ទង​​បទ​ល្មើស​ជាក់ស្ដែង​ញុះញង់​បំភ្លៃ​ការពិត​ពាក់ព័ន្ធ​នឹង​រឿង​ព្រំដែន។

មុន​ការ​ចាប់ខ្លួន ប៉ុន្មាន​ម៉ោង លោក សួង សុភ័ណ្ឌ អះអាង​ប្រាប់​អាស៊ីសេរី​ថា លោក​មិន​ខ្លាច​ការ​ចាប់ខ្លួន​ឡើយ ហើយ គណបក្ស​ខ្មែរ​ឈ្នះ ត្រៀម​ដឹកនាំ​បាតុកម្ម​ទាមទារ​ឲ្យ​មានការ​ដោះលែង​លោក រ៉ុង ឈុន និង​ក្រុម​យុវជន​ទាំងអស់ ដោយ​ឥត​លក្ខខណ្ឌ និង​ត្រៀម​ចេញ​សេចក្ដីថ្លែងការណ៍ អំពី​ការ​រក​ឃើញ​ភាព​មិន​ប្រក្រតី នៃ​ការ​បោះបង្គោល​ព្រំដែន ចន្លោះ​លេខ​១១៤ ដល់​១១៨ ស្ថិតនៅ​ភូមិ​ត្រពាំង​ផ្លុង ឃុំ​ត្រពាំង​ផ្លុង ស្រុក​ពញាក្រែក ខេត្ត​ត្បូងឃ្មុំ​។ ទោះ​យ៉ាងណា អ្នក​នយោបាយ​រូប​នេះ ប្រាប់​ថា បាន​ត្រៀមខ្លួន សម្រាប់​ជាប់​ពន្ធនាគារ​គ្រប់​ពេល​រួចហើយ ប៉ុន្តែ លោក​រក្សា​ជំហរ​ដាច់អហង្ការ​ថា លោក​មិន​បាន​ប្រព្រឹត្តិ​កំហុស និង អះអាង​ថា ឆន្ទៈ​ហ៊ាន​ជាប់​ពន្ធនាគារ ព្រោះ​ដើម្បី​ប្រយោជន៍​ពលរដ្ឋ៖ «ខ្ញុំ​ជា​អ្នក​នយោបាយ​ម្នាក់ ខ្ញុំ​ជា​បាន​បំពេញ​​ តួនាទី​កាតព្វកិច្ច​របស់​ខ្ញុំ​ តួនាទី​ធំ គឺ​ទី១ ការពារ​អធិបតេយ្យ​របស់​ជាតិ។ ទី​២​ការពារ​រាល់​អំពើ​​​រំលោភ​ទាំង​ឡាយ​ណា​ ដែល​​ធ្វើ​ឲ្យ​មាន​ភាព​អយុត្តិធម៌​សង្គម​ទៅ​លើ​ប្រជាពលរដ្ឋ។ នេះ​ជា​​តួនាទី​របស់​ខ្ញុំ ហើយ​ខ្ញុំ​ត្រូវ​តែ​បំពេញ​កាតព្វកិច្ច​ហ្នឹង​ ហើយ​បើ​ខ្ញុំ​មិន​ធ្វើ​សួរ​ថា ខ្ញុំ​ធ្វើ​នយោបាយ​ធ្វើ​ស្អី មាន​ន័យ​អ្វី? ដូច្នេះ​ខ្ញុំ​អត់​រុញរា​ទេ ដូច​ខ្ញុំ​បាន​បញ្ជាក់​អ៊ីចឹង​​​ថា ទោះ​បី​ជា​បាត់បង់​សេរីភាព​​ ក៏​ខ្ញុំ​អត់​រុញរា​ដែរ។ យើង​ត្រូវ​តែ​ធ្វើ​ដើម្បី​ប្រជាពលរដ្ឋ ដើម្បី​ជាតិ ហើយ​សន្ទុះ​(បាតុកម្ម) នឹង​កើន​ឡើង​លើស​ហ្នឹង​ទៅ​ទៀត»។

លោក សួង សុភ័ណ្ឌ ធ្លាប់​ជា​អតីត​បេក្ខជន​តំណាងរាស្ត្រ​របស់​គណបក្ស​សង្គ្រោះជាតិ នៅ​មណ្ឌល​ប៉ៃលិន និង​ក្រោយ​មក​បាន​ចាក​ចេញពី​គណបក្ស​សង្គ្រោះ​ជាតិ ទៅ​ចូលរួម​ជាមួយ​គណបក្ស​អំណាច​ខ្មែរ​របស់​លោក សួន សេរី​រដ្ឋា មុននឹង​បែក​ចេញ​មក​បង្កើត​គណបក្ស​ថ្មី​មួយ​ឈ្មោះ​គណបក្ស​ខ្មែរ​ឈ្នះ ដែល​លោក​ដឹកនាំ​សព្វថ្ងៃ​។ ក្រោយ​ការ​ចាប់ខ្លួន​លោក រ៉ុង ឈុន លោក សួង សុភ័ណ្ឌ បាន​ដឹកនាំ​មន្ត្រី​គណបក្ស​ខ្មែរ​ឈ្នះ ចុះ​ជួប​ពលរដ្ឋ និង​ដើរ​មើល​តាម​ព្រំដែន​នៅ​ភូមិ​ត្រពាំង​ផ្លុង ពី​បង្គោល​លេខ​១១៤ ដល់​១១៨ កាលពី​ថ្ងៃទី១០ សីហា ដោយ​អះអាង​ថា ដើម្បី​ផ្ទៀងផ្ទាត់ នឹង​សេចក្ដីថ្លែងការណ៍​របស់ លោក រ៉ុង ឈុន។ ក្នុង​ការ​ចុះ​ពិនិត្យ​ព្រំដែន​នោះ លោក សួង សុភ័ណ្ឌ អះអាង​ថា រក​ឃើញ​ភាព​​មិន​ប្រក្រតី​នៃ​ការ​បោះ​បង្គោល​ព្រំដែន។

ប៉ុន្តែ រដ្ឋាភិបាល បដិសេធ​ការ​រក​ឃើញ​នេះ ដោយ​ថា ការ​ចុះ​ពិនិត្យ​ព្រំដែន គ្មាន​អ្នក​ជំនាញ គ្មាន​មូលដ្ឋាន​ច្បាស់លាស់ ហើយ​សំអាង​តាមតែ​សំដី​អ្នកភូមិ មិន​អាច​យក​ជា​ការ​បាន​ទេ​។ មុន​ការ​ចាប់ខ្លួន​នេះ អ្នកនាំពាក្យ​រដ្ឋាភិបាល ធ្លាប់​ព្រមាន គណបក្ស​ខ្មែរ​ឈ្នះ ឲ្យ​ប្រយ័ត្នប្រយែង ក្នុង​ការ​ចេញ​សេចក្ដីថ្លែងការណ៍ ព្រោះ​រដ្ឋាភិបាល​នឹង​ប្រើ​វិធានការ​ច្បាប់ បើ​សេចក្ដីថ្លែងការណ៍​នេះ មាន​ចេតនា​ញុះញង់​បញ្ហា​ព្រំដែន​។​

ពាក់ព័ន្ធ​នឹង​យុវជន​ចំនួន ៦​នាក់ ដែល​រង​ការ​ចាប់ខ្លួន កាលពី​ថ្ងៃ​ទី​១៣ សីហា វិញ នៅ​ថ្ងៃ​ទី​១៤ សីហា​នេះ ប៉ូលិស​បាន​បញ្ជូន​យុវជន​២​នាក់ ទៅ​សាលាដំបូង​រាជធានី​ភ្នំពេញ​ហើយ គឺ អ្នកនាង ឈឿន ដារ៉ាវី និង លោក ហ៊ុន វណ្ណៈ។ អ្នកនាំពាក្យ​អគ្គស្នងការដ្ឋាន​នគរ​បាល​ជាតិ លោក ឆាយ គឹមខឿន ប្រាប់​អាស៊ីសេរី ថា កញ្ញា ឈឿន ដារ៉ាវី ចោទ​ពី​បទ​ញុះញង់​ឲ្យ​មាន​ភាព​វឹកវរ​ដល់​សង្គម ឯ​លោក ហ៊ុន វណ្ណៈ បទ​ពី​បទ រារាំង​សមត្ថកិច្ច​ឆែកឆេរ​ផ្ទះ។ លោក ឆាយ គឹមខឿន បដិសេធ​ថា ប៉ូលិស​ប្រើ​ហិង្សា ក្នុង​ការ​ចាប់ខ្លួន អ្នកនាង ឈឿន ដារ៉ាវី ដោយ​កម្រោល៖ «យើង​ឃាត់​ខ្លួន​២នាក់ សល់​ប៉ុន្មាន​អប់រំ​ឲ្យ​គាត់​ទៅ​ផ្ទះ​វិញ​ហើយ។ ឃាត់​ខ្លួន​នោះ ឈឿន ដារ៉ាវី តាម​អំណាច​​ដីកា​តុលាការ សម្រាប់​ ហ៊ុន វណ្ណៈ ឃាត់​ខ្លួន​បញ្ជូន​ទៅ​តុលាការ​ ដោយសារ​គាត់​រារាំង​សមត្ថកិច្ច​ក្នុង​ការ​អនុវត្ត​ដីកា​ឆែកឆេរ.... ហើយ​ការ​​ចាប់​​ខ្លួន ប្អូន​ឯង​​ គិត​ទៅ រក​ចាប់​ស្រួល​ណាស់​ គាត់​ត្រូវ​តវ៉ា​រញ៉េរញ៉ៃ។​ យើង​វា​ត្រូវ​ទាញ​ដៃ​ទាញ​ជើង​ខ្លះ​ហើយ។ គេច​អត់​រួច​ទេ។ ប៉ុន្តែ​បើ​ថា យើង​កម្រោល​អ្វី​ហ្នឹង​ ដូច​ជា នារី​ម្នាក់ នរណា​ទៅ​ប្រើ​(កម្លាំង)​កម្រោល​ប្អូន។ ឈឿន ដារ៉ាវី ជា​នារី​ម្នាក់ ហើយ​កម្លាំង​បី​ បួន នាក់​ទៀត​ កន្លង​ទៅ​បង​មើល​ឃើញ​ចេះ​ចោទ​សំណួរ​អ៊ីចឹង​ ថា ការ​ទាញ​ប្រូស​ប្រាស ​អត់​អាន​ដីកា។ យើង​អត់​អាច​ធ្វើ​ការ​អ្វី ​ដែល​អត់​ដីកា​ ទៅ​ចាប់​ អត់​មាន​ទេ»។

ជុំវិញ​ករណី​នេះ អាស៊ីសេរី មិន​អាច​សុំ​ការ​បញ្ជាក់​ពី​អ្នកនាំពាក្យ​តំណាង​អយ្យការ លោក គុជ គឹមឡុង បានទេ នៅ​ថ្ងៃ​ទី​១៤ សីហា​។ ចំណែក​យុវជន ៤​នាក់​ទៀត គឺ កញ្ញា ជា គន្ធីន ថា ឡាវី លោក យ៉ង សៀងហៃ និង​លោក ស្វាយ សំណាង នៅ​មិន​ទាន់​មាន​ការ​ដោះលែង​ទេ។ អ្នកនាំពាក្យ​ស្នងការដ្ឋាន​នគរបាល​រាជធានី​ភ្នំពេញ លោក សាន សុខសីហា ប្រាប់​ថា ប៉ូលិស​កំពុង​បន្ត​នីតិវិធី​សាកសួរ អ្នក​ទាំង​៤ នៅ​ក្នុង​ស្នងការដ្ឋាន​នគរបាល​រាជធានី​ភ្នំពេញ​។ ប៉ុន្តែ​លោក​មិន​ទាន់​ដឹង​ថា នឹង​ត្រូវ​បញ្ជូន​ទៅ​តុលាការ ឬ​អត់​ទេ៖ «២នាក់ គឺ​យើង​អនុវត្ត​តាម​ដីកា ពាក់ព័ន្ធ​នឹង​បទ​ញុះញង់​បង្ក​​ឲ្យ​មាន​វឹកវរ​សង្គម មាន​២នាក់ គឺ​យើង​បាន​បញ្ជូន​ទៅ​តុលាការ​ថ្ងៃ​មិញ​ហើយ ហើយ​៤នាក់​ទៀត គឺ​យើង​កំពុង​​ធ្វើការ​សាកសួរ​បន្ថែម​នៅ​ស្នងការ​។ ៤នាក់ យើង​កំពុង​ធ្វើ​ការ​សាកសួរ​ ធ្វើ​តាម​នីតិវិធី​ស្រាវជ្រាវ​ជាក់ស្ដែង​សិន​។ អា​ហ្នឹង​ ក៏​យើង​អត់​ទាន់​ថា​ម្ដេច​ដែរ ហើយ​បើ​អត់​មាន​ជាប់​ពាក់ព័ន្ធ​អ្វី​ទេ​ យើង​នឹង​ធ្វើ​ការ​ដោះលែង តែ​​បើ​សិន​ជា​មាន​ពាក់ព័ន្ធ​ពី​បទ​អ្វី​មួយ​ អា​ហ្នឹង​ យើង​នឹង​ធ្វើ​ការ​តាម​ជាក់ស្ដែង​អ៊ីចឹង​ណា​បង»។

សមាជិក​ក្រុម​យុវជន​ខ្មែរ​ថាវរៈ កញ្ញា សូ មេត្តា បញ្ជាក់​លើ​បណ្ដាញ​សង្គម​ហ្វេសប៊ុក (facebook) ថា ក្រុម​យុវជន កំពុង​រក​ការ​មេធាវី និង​សុំ​ឲ្យ​អង្គការ​ជាតិ និង​អន្តរជាតិ​ជួយ​។ ទោះ​យ៉ាងណា នៅមុខ​ការ​ចាប់ខ្លួន​នេះ ក្រុម​អ្នក​តវ៉ា​ទាំងអស់ អះអាង​ថា ពួកគេ​មិនបាន​ប្រព្រឹត្តិ​កំហុស​ទេ ហើយ​ពួកគេ​មិន​ខ្លាច​ញញើត​ចំពោះ​ការ​ចាប់ខ្លួន​នេះ​ឡើយ។

នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស នៃ​អង្គការ​លីកាដូ លោក អំ សំអាត សង្កេត​ថា បទ​ចោទ​ញុះញង់​ឲ្យ​មាន​វឹកវរ​ដល់​សង្គម ប្រឆាំង​ក្រុម​យុវជន​ខ្មែរ​ថាវរៈ មាន​ស្ថានភាព​ធ្ងន់ធ្ងរ​ខ្លាំង​ពេក ដូច្នេះ តុលាការ គួរតែ​ទម្លាក់​ការចោទប្រកាន់ លើ​ក្រុម​យុវជន​ទាំង​៦​នាក់ ដើម្បី​ជៀសវាង​ការ​រិះគន់​ថា មាន​ចេតនា​បំបាក់​ស្មារតី​យុវជន ដែល​ចូលរួម​សម្ដែង​មតិ ទាមទារ​យុត្តិធម៌​សង្គម។

ជុំវិញ​ការ​ចាប់ខ្លួន​ប្រធាន​គណបក្ស​ខ្មែរ​ឈ្នះ​លោក សួង សុភ័ណ្ឌ អ្នកឃ្លាំមើល​សិទ្ធិមនុស្ស​រូប​នេះ បន្ត​ថា ធ្វើឡើង ក៏​មិន​ខុស​ពី ករណី ចាប់ខ្លួន លោក រ៉ុង ឈុន ដែរ​។ លោក អំ សំអាត ជឿ​ថា ការ​បន្ត​ចាប់ខ្លួន អ្នកឃ្លាំមើល​ព្រំដែន នឹង​ធ្វើ​ឲ្យ​មាន​រិះគន់​បន្ថែម​ទៀត ពី​ការ​រឹតត្បិត​សេរីភាព​បញ្ចេញមតិ លើ​បញ្ហា​ព្រំដែន៖ «ហើយ​រឿង​នេះ យើង​ឃើញ​ហើយ​ថា ចង់​មិន​ចង់ មតិ​ជាតិ និង​​មតិ​អន្តរជាតិ​ គេ​អាច​លើក​ឡើង​ថា ជា​ការ​បំបាក់​ស្មារតី សម្រាប់​ក្រុម​យុវជន​ដែល​ស្រលាញ់ ឬ​ក៏​ចូលរួម​ក្នុង​ចលនា​សង្គម​។ ជា​ពិសេស​ គឺ​ទាក់ទង​ជាមួយ​ហ្នឹង​ សេរីភាព​នៅ​ក្នុង​ការ​ស្វែង​រក​យុត្តិធម៌ ឬ​ក៏​ចូលរួម​បញ្ហា​សង្គម​ផ្សេងៗ​ទៀត»។

របប​ក្រុងភ្នំពេញ បាន​បង្ក្រាប​ក្រុម​អ្នកតវ៉ា​ទាមទារ​ដោះលែង លោក រ៉ុង ឈុន ជា​បន្តបន្ទាប់ មាន​ទាំង​កម្មករ គ្រូបង្រៀន ព្រះសង្ឃ និង​យុវជន ដែល​ហ៊ាន​ធ្វើ​សកម្មភាព​តវ៉ា ប្រឆាំង​នឹង​ការ​ចាប់ខ្លួន​នេះ​។ ក្រុម​អ្នកតវ៉ា ខ្លះ​រង​អំពើ​ហិង្សា ខ្លះ​រង​ការព្រមាន​ដោយ​ប្រយោល ខ្លះ​ត្រូវ​បាន​អាជ្ញាធរ​គំរាមកំហែង និង ខ្លះ​ទៀត ត្រូវ​បាន​ប៉ូលិស ចាប់​ដាក់​ពន្ធនាគារ។

អ្នក​រង​ការ​បង្ក្រាប​ទាំងអស់ មាន​ដូចជា សកម្មជន​បក្ស​ប្រឆាំង​៣​នាក់ គឺ លោក ជុំ ពុទ្ធី លោក ឈួ ផេង និង កញ្ញា ស កន្និកា ជា​អ្នក​ទាមទារ ឲ្យ​ដោះលែង លោក រ៉ុង ឈុន នៅមុខ​តុលាការ​ក្រុងភ្នំពេញ ត្រូវ​បាន​ចោទ​ពី​បទ​បង្ក​ភាព វឹកវរ​ដល់​សង្គម បន្ទាប់មក គឺ​អ្នកភូមិ​ត្រពាំង​ផ្លុង រង​ការ​គំរាមកំហែង​ពី​ប៉ូលិស​មូលដ្ឋាន តំណាង​កម្មករ​រោងចក្រ វ៉ាយអូលែ​ (Violet apparel Cambodia Co.ltd) លោកស្រី អ៊ុង ចាន់​ធឿន កំពុង​គេច​ខ្លួន ក្រោយ​មានការ​គំរាម ប្រធាន​សមាគម​គ្រូបង្រៀន​កម្ពុជា​ឯករាជ្យ អ្នកស្រី អ៊ុក ឆាយាវី គ្រោះថ្នាក់​ចរាចរណ៍​ធ្ងន់ធ្ងរ ដោយសារ​ជន​មិន​ស្គាល់​មុខ ធ្វើ​ឲ្យ​ដួល​ម៉ូតូ​ពេល​បើកបរ ក្រុម​គ្រូបង្រៀន​នៅ​ខេត្ត​តាកែវ រង​ការព្រមាន​លុបឈ្មោះ​ពី​ក្របខ័ណ្ឌ បើ​ហ៊ាន​ចូលរួម​ការ​តវ៉ា ក្រុម​ព្រះសង្ឃ ចំនួន​៨​អង្គ នៅ​ខេត្ត​បាត់ដំបង រង​ការ​បណ្ដេញ​ចេញពី​វត្ត គណបក្ស​ខ្មែរ​ឈ្នះ រង​ការព្រមាន​បង្ក្រាប និង​លុបឈ្មោះ បើ​ហ៊ាន​ធ្វើបាតុកម្ម នៅ​ទីលាន​ប្រជាធិបតេយ្យ ការ​ប្រើ​ហិង្សា​លើ​ក្រុម​យុវជន​ខ្មែរ​ថាវរៈ ការ​ចាប់ខ្លួន​យុវជន​ក្រុម​នេះ ចំនួន​៦​នាក់ និង​ការ​ចាប់ខ្លួន​ប្រធាន​គណបក្ស​ខ្មែរ​ឈ្នះ ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល