ការថ្លែងបែបនេះ ធ្វើឡើងពេលដែលលោក ហ៊ុន សែន និងលោកនាយករដ្ឋមន្ត្រីវៀតណាម ង្វៀន តាន់យុង (Nguyen Tan Dung) នៅព្រឹកថ្ងៃទី១៣ ខែមករា បានចូលក្នុងពិធីសម្ពោធមន្ទីរពេទ្យជោរៃ ភ្នំពេញ (Cho Ray Phnom Penh) ដែលជាសាខារបស់មន្ទីរពេទ្យជោរៃ ឬពេទ្យរដ្ឋប្រទេសវៀតណាម។
នេះគឺជាលើកទី១ហើយក្នុងឆ្នាំថ្មីនេះ ដែលលោកនាយករដ្ឋមន្ត្រីកម្ពុជា បង្ហាញមុខ និងថ្លែងការណ៍ជាសាធារណៈទៅកាន់ប្រជាពលរដ្ឋ។ ក្នុងសុន្ទរកថារយៈពេលជាងកន្លះម៉ោង លោក ហ៊ុន សែន ថ្លែងរំលឹកពីចំណងមិត្តភាពរបស់បក្សកាន់អំណាច និងបក្សកុម្មុយនិស្តវៀតណាម រំលឹកពីរបប ប៉ុល ពត ព្រមទាំងជំរុញឲ្យពលរដ្ឋខ្មែរដែលធ្លាប់ទៅទទួលសេវាសុខភាពនៅវៀតណាម ឲ្យប្រើប្រាស់សេវាសុខភាពនៅមន្ទីរពេទ្យជោរៃ ភ្នំពេញ វិញម្ដង។
លោក ហ៊ុន សែន មានប្រសាសន៍ថា រូបលោកក៏ជាអតិថិជនម្នាក់ដែលតែងតែពិនិត្យសុខភាពនៅមន្ទីរពេទ្យជោរៃ នៅទីក្រុងហូជីមិញ ប្រទេសវៀតណាម ជាប្រចាំដែរ។ លោកបន្តថា មន្ទីរពេទ្យជោរៃ ថ្មីនៅភ្នំពេញនេះ នឹងអាចផ្ដល់ឱកាសឲ្យពលរដ្ឋខ្មែរដែលទុកចិត្តលើគុណភាពសេវាសុខាភិបាលរបស់វៀតណាម អាចទទួលយកសេវានេះប្រកបដោយទំនុកចិត្ត។
លោកបញ្ជាក់ថា លោកសូមអរគុណប្រទេសវៀតណាម ដែលបានទទួលអ្នកជំងឺខ្មែរទៅព្យាបាល ហើយគិតប្រាក់ធម្មតាដូចប្រជាជនវៀតណាមដែរ ហើយពេទ្យតាមព្រំដែនខ្លះមិនយកប្រាក់ទៀតផង៖ «ខ្ញុំសូមប្រាប់ថា កាលមុនធ្លាប់ទៅមើលជំងឺនៅមន្ទីរពេទ្យជោរៃ ហូជីមិញ ឥឡូវសូមមកមន្ទីរពេទ្យជោរៃ ភ្នំពេញ វិញម្ដង វាស្ថិតនៅច្បារអំពៅ ផ្លូវជាតិលេខ១»។
ទាក់ទងនឹងបញ្ហានេះ នាយករដ្ឋមន្ត្រីវៀតណាម លោក ង្វៀន តាន់យុង បញ្ជាក់ថា វៀតណាមនៅតែជាមិត្តភ័ក្ដិរបស់កម្ពុជា និងចាំជួយកម្ពុជាបន្តទៀត។ លោកបញ្ជាក់ថា មន្ទីរពេទ្យជោរៃ ភ្នំពេញនេះ នឹងក្លាយជាមន្ទីរពេទ្យមួយដែលគួរជាទីទុកចិត្តរបស់ពលរដ្ឋកម្ពុជា។ ទោះជាបែបណាក្តី នៅក្នុងពិធីនោះ លោកនាយករដ្ឋមន្ត្រី ហ៊ុន សែន មិនបានលើកឡើងពីទស្សនៈវិស័យក្នុងការអភិវឌ្ឍវិស័យសុខាភិបាលកម្ពុជាឡើយ។ លោកគ្រាន់តែប្រាប់និស្សិតពេទ្យថា បើសិនជាមានសញ្ញាបត្រវេជ្ជបណ្ឌិត ហើយខ្វះមន្ទីរពេទ្យធ្វើការនោះ គ្រូពេទ្យគ្រាន់តែជាពេទ្យសម្រាប់កោសខ្យល់ប៉ុណ្ណោះ។
ពលរដ្ឋមួយចំនួនដែលវិទ្យុអាស៊ីសេរី ជួបសម្ភាសន៍បានប្រាប់ថា ពួកគាត់សុខចិត្តចំណាយលុយទៅមើលជំងឺនៅក្រៅប្រទេស មកពីពេទ្យនៅក្រៅប្រទេសមានសមត្ថភាពខ្ពស់ ចំណាយតិចជាងមើលជំងឺក្នុងស្រុក។ គ្រូពេទ្យក្នុងស្រុកមិនសូវមានក្រមសីលធម៌វិជ្ជាជីវៈ និងខ្វះបរិក្ខារទំនើបៗក្នុងការព្យាបាលអំពើពុករលួយនិងបក្សពួកនិយមក្នុងចំណោមគ្រូពេទ្យជាដើម។
ក្រុមគ្រួសាររាជវង្ស មន្ត្រីធំៗក្នុងជួររដ្ឋាភិបាល អ្នកជំនួញស្ដុកស្ដម្ភ សុទ្ធតែមានពេទ្យផ្ទាល់ខ្លួននៅក្រៅប្រទេស។ សែរាជវង្សនិយមព្យាបាលព្រះរោគដោយពេទ្យចិន សែមន្ត្រីធំៗស្និទ្ធនឹងលោក ហ៊ុន សែន និយមព្យាបាលរោគនៅសិង្ហបុរី និងវៀតណាម ហើយពលរដ្ឋធម្មតាមួយចំនួនតូចទៅព្យាបាលនៅថៃ និងពលរដ្ឋមួយចំនួនធំនិយមទៅមើលជំងឺនៅវៀតណាម។
យ៉ាងណាក៏ដោយ មកទល់ពេលនេះមិនមានរបាយការណ៍ណាមួយសិក្សាលម្អិតពីការខាតបង់ផ្នែកសេដ្ឋកិច្ចនិងសង្គម ដែលបណ្ដាលមកពីពលរដ្ឋខ្វះជំនឿចិត្តលើវិស័យសុខាភិបាលក្នុងប្រទេសនៅឡើយ។
មន្ទីរពេទ្យជោរៃ ភ្នំពេញ ត្រូវបានវិនិយោគក្នុងទំហំទឹកប្រាក់ ៤២លានដុល្លាររបស់ក្រុមហ៊ុនវិនិយោគបរិក្ខារពេទ្យ សៃហ្គន (Saigon) និងក្រុមហ៊ុនរបស់លោកឧកញ៉ា សុខ គង់។ មន្ទីរពេទ្យនេះសាងសង់លើផ្ទៃដី ៥ហិកតារ និងទំហំអគារសង់លើផ្ទៃដី ១ហិកតារ ដោយគម្រោងសាងសង់រយៈពេល ៣៧ខែ គឺចាប់ពីខែឧសភា ឆ្នាំ២០១០ ដល់ខែមករា ឆ្នាំ២០១៣។ បច្ចុប្បន្នមន្ទីរពេទ្យនេះមានបុគ្គលិកជាង ២០០នាក់ ភាគច្រើនជាគ្រូពេទ្យវៀតណាម ហើយមានបន្ទប់ព្យាបាលចំនួន ១០៦បន្ទប់ និងគ្រែសម្រាប់អ្នកជំងឺមានចំនួនជាង ២០០គ្រែ ហើយបម្រើសេវាព្យាបាលជំងឺទូទៅ ២៤ម៉ោង លើ ២៤ម៉ោង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។