ថ្នាក់​ដឹកនាំ​បក្ស​ប្រឆាំង​និង​បក្ស​ប្រជាធិបតេយ្យ​មូលដ្ឋាន​ជួប​គ្នា​ក្នុង​កសិដ្ឋាន​មួយ​កន្លែង

ដោយ ខែ សុណង
2020-11-08
អ៊ីម៉ែល
មតិ
Share
បោះពុម្ព
ប្រធាន​គណបក្សសង្គ្រោះជាតិ លោក កឹម សុខា (ឆ្វេង​ទី១) និង​​ស្ថាបនិក​គណបក្ស​​ប្រជាធិបតេយ្យ​មូលដ្ឋាន លោក យ៉ង សាំងកុមារ (បន្ទាប់) ក្នុង​កសិដ្ឋាន​ ១កន្លែង ម្ដុំ​វាលវែង កាល​ពី​ថ្ងៃ​ទី៦ ខែ​វិច្ឆិកា ឆ្នាំ​២០២០។
ប្រធាន​គណបក្សសង្គ្រោះជាតិ លោក កឹម សុខា (ឆ្វេង​ទី១) និង​​ស្ថាបនិក​គណបក្ស​​ប្រជាធិបតេយ្យ​មូលដ្ឋាន លោក យ៉ង សាំងកុមារ (បន្ទាប់) ក្នុង​កសិដ្ឋាន​ ១កន្លែង ម្ដុំ​វាលវែង កាល​ពី​ថ្ងៃ​ទី៦ ខែ​វិច្ឆិកា ឆ្នាំ​២០២០។
រូប​ពី​ហ្វេសប៊ុក​លោក កឹម សុខា

ស្ថាបនិក​គណបក្ស​ ប្រជាធិបតេយ្យ​មូលដ្ឋាន លោក​បណ្ឌិត យ៉ង សាំង​កុមារ និង លោក កឹម សុខា ប្រធាន​គណបក្ស​សង្គ្រោះ​ជាតិ បាន​ជួប​គ្នា ក្នុង​កសិដ្ឋាន​មួយ នៅ​ខេត្ត​កោះកុង កាលពី​ថ្ងៃ​ទី៦ វិច្ឆិកា ម្សិលមិញ​។​

តើ​មេដឹកនាំ​គណបក្ស​ទាំង​ពីរ​បាន​ជជែក​អំពី​បញ្ហា​អ្វីខ្លះ​ដែរ?

បណ្ឌិត យ៉ង សាំងកុមារ ប្រាប់​អាស៊ីសេរី​ថា ក្នុង​ជំនួប​រវាង​លោក និង​លោក កឹម សុខា ប៉ុន្មាន​ថ្ងៃនេះ​គឺ​លោក​ជា​អ្នក​អញ្ជើញ​លោក កឹម សុខា ឱ្យ​ទៅ​សិក្សា​ស្វែងយល់​ពី​តំបន់​ធម្មជាតិ​ភ្នំពេញ​ក្រវាញ​និង​ការ​ដាំដុះ​កសិកម្ម​របស់​កសិករ​នៅ​តំបន់​នេះ​។ លោក​យល់ថា ជំនួប​រវាង​លោក​និង​លោក កឹម សុខា​គឺ​ជា​រឿង​ល្អ និង​ជា​មូលដ្ឋានគ្រឹះ​នៃ​វិស័យ​កសិកម្ម​ទៅ​ពេល​ខាង​មុខ៖ «និយាយ​ទៅ​សំនួរ​ច្រើនជាង​ចម្លើយ ហើយ​ជាទូទៅ​យើង​មិនបាន​ជជែក​គ្នា​ច្រើន​ទេ ប៉ុន្តែ​ជា​រួម​ខ្ញុំ​គិត​ថា​ការ​ល្អ​ដែរ​ដែល​ខ្ញុំ​និង​គាត់​(​លោក កឹម សុខា​) បាន​ជជែក​គ្នា​ស្វែង​យល់​ពី​គ្នា»

ថ្នាក់ដឹកនាំ​មន្ត្រី​ជាន់ខ្ពស់​គណបក្ស​ប្រជាធិបតេយ្យ​មូលដ្ឋាន​រូប​នេះ​ឱ្យ​ដឹង​ទៀត​ថា លោក​បាន​ចោទ​ជា​សំនួរ​មួយ​ចំនួន​ទៅ​លោក កឹម សុខា ថាបើ​លោក កឹម សុខា មាន​សេរីភាព​ឡើងវិញ តើ​លោក​នឹង​គិត​យ៉ាងម៉េច​ចំពោះ​ស្ថានការណ៍​ឆ្នាំ​២០២២ និង​ឆ្នាំ​២០២៣ ឬ​ត្រូវ​ទុក​ស្ថានការណ៍​ដូច​កាលពី​ឆ្នាំ​២០១៨​ឬ​យ៉ាងណា​? ប៉ុន្តែ​លោក​ថា កឹម សុខា មិន​បាន​បញ្ចេញ​យោបល់​អ្វី​ឡើយ ។ លោក យ៉ង សាំងកុមារ ឱ្យ​ដឹង​ទៀត​ថា ចំពោះ​ទស្សនៈ​លោក​ផ្ទាល់​គឺ​លោក​នឹង​ចូលរួម​ការបោះឆ្នោត​ឆ្នាំ​២០២២​និង​ឆ្នាំ​២០២៣ ដើម្បី​ជា​ការ​ជម្រុញ​ឱ្យ​មាន​ពហុបក្ស​ចូលរួម​ក្នុង​ការ​បោះឆ្នោត​នៅ​កម្ពុជា៖ «តើ​អាច​មាន​សេណារីយោ​អី​ខ្លះ​ទៅ​ណា សេណារីយោ​ដូច​ឆ្នាំ​២០១៨ សេណារីយោ​ចូលរួម​បោះឆ្នោត​ក្នុង​រូបភាព​យ៉ាង​ម៉េចៗ ប៉ុន្តែ​គាត់​(​លោក កឹម សុខា​) មិន​បញ្ចេញយោបល់​អី​ទេ គ្រាន់តែ​ជា​ការ​គិត​ហើយ​ណាមួយ​ខ្ញុំ​យល់​ពី​បញ្ហា​របស់​គាត់​យើង​មិន​បង្ខំ​ឱ្យ​គាត់​ឆ្លើយ​ទេ ប៉ុន្តែ​ជា​រួម​យើង​ត្រូវតែ​ចាប់ផ្ដើម​គិត​ព្រោះ​យើង​មិន​អាច​ទុក នេះ​ជា​ទស្សនៈ​ខ្ញុំ​ទេ​ណា»

ទាក់​ទឹង​នឹង​ជំនួប​នេះ មន្ត្រី​ខុទ្ទកាល័យ លោក កឹម សុខា លោក មុត ចន្ថា ឱ្យ​អាស៊ីសេរី​ដឹង​ថា ការ​ធ្វើ​ដំណើរ​របស់​លោក កឹម សុខា គឺ​ដើម្បី​ស្វែងយល់​ដក​ពិសោធ​អំពី​វិស័យ​កសិកម្ម និង​កសិឧស្សាហកម្ម។

កាលពី​ថ្ងៃ​ទី​០៦ ខែ​វិច្ឆិកា​នេះ លោក កឹម សុខា បាន​បង្ហោះ​រូបភាព​ជាច្រើន​សន្លឹក​ពី​ទិដ្ឋភាព​ដែល​ធ្វើ​ដំណើរ​កាត់​ព្រៃ​នៃ​ជួរ​ភ្នំក្រវាញ​ក្នុង​ខេត្ត​កោះកុង និង​ខេត្ត​ពោធិ៍សាត់​ក្នុង​រូបភាព​នោះ​ក៏​ឃើញ​មាន​រូប​លោក កឹម សុខា និង​លោក​បណ្ឌិត យ៉ង សាំងកុមារ ពិនិត្យ​ភោគផល​កសិកម្ម​នៅ​តំបន់​នោះ​ដែរ​។ លោក កឹម សុខា បាន​សរសេរ​លើ​ហ្វេសប៊ុក​លោក​ថា គួរ​ងាក​ក្រោយ​សម្លឹង​មើល​ការខុសឆ្គង គឺជា​មេរៀន​អាក្រក់​និង​ល្អ​មិនមែន​សម្រាប់​តែ​ទិតៀន​ដើម្បី​បង្កជម្លោះ​នោះ​ទេ តែ​ផ្ទុយទៅវិញ​គួរណា​តែ​នាំគ្នា​សម្លឹង​នូវ​ភាព​វិជ្ជមាន​គឺ​កសាង​អនាគត​ឲ្យ​ប្រសើរ​ឡើង។ លោក​សរសេរ​បន្ថែម​ទៀត​ថា យើង​ត្រូវតែ​រួមគ្នា​ថែរក្សា​ការពារ​ធនធាន​ដែល​នៅ​មាន​ទាំងនោះ​សម្រាប់​ជា​ប្រយោជន៍​ជាតិ​ឲ្យ​បាន​ផល​ដល់​ប្រជាពលរដ្ឋ​ខ្មែរ​ទូទៅ មិន​សំដៅ​តែ​អ្នកមាន​លុយ ឬ​មានអំណាច​។ លោក កឹម សុខា ចង់​ឃើញ​សម្បត្តិ​ធម្មជាតិ នៅតែ​ជា​របស់​ខ្មែរ ដើម្បី​ខ្មែរ ជាពិសេស​ទុកជា​ប្រយោជន៍​ដល់​អ្នក​ជំនាន់​ក្រោយ។

អ្នកស្រាវជ្រាវ​ការអភិវឌ្ឍន៍​សង្គម​បណ្ឌិត សេង សារី យល់​ថា ជំនួប​រវាង​លោក កឹម សុខា និង​លោក យ៉ង សាំង​កុមារ ក៏​ជា​សញ្ញា​ល្អ​រវាង​អ្នក​ប្រជាធិបតេយ្យ​ដែល​មាន​ទាំង​អ្នកនយោបាយ និង​ជំនាញ​កសិកម្ម​។ ទោះ​យ៉ាងណា​លោក​ថា ក្នុង​បរិបទ​ដែល​លោក កឹម សុខា កំពុង​ជាប់​បម្រាម​នយោបាយ​បែបនេះ​ជំនួប​នេះ​អាច​ជា​ការ​ជួបគ្នា​ក្នុង​​នាម​ជា​មិត្ត​ចាស់៖ «បើសិនជា​ក្នុង​ករណី​ការ​ជួបគ្នា​ដោយ​ចៃដន្យ ទោះបី​មាន​ផែនការ​ក្ដី​ជា​សញ្ញា​នៃ​ការ​រួមគ្នា​នៃ​អ្នក​ប្រជាធិបតេយ្យ​អាហ្នឹង​ខ្ញុំ​មើល​ទៅជា​រឿង​ល្អ គួរតែ​ដល់​ពេល​អ្នក​ដែល​មាន​និន្នាការ​ប្រជាធិបតេយ្យ​ចូលរួម​គ្នា​ទាំង​អ្នកបច្ចេកទេស​ស្រលាញ់​ប្រជាធិបតេយ្យ និង​ទាំង​អ្នកនយោបាយ​ស្រលាញ់​ប្រជាធិបតេយ្យ»

លោក កឹម សុខា ត្រូវ​បាន​សមត្ថកិច្ច​ចាប់ខ្លួន​ដោយ​ចោទប្រកាន់​ពី​បទ​ក្បត់ជាតិ​កាលពី​ឆ្នាំ​២០១៧​។ ប៉ុន្តែ​កាល​ពី​ឆ្នាំ​២០១៩ តុលាការ​បាន​បន្ធូរបន្ថយ​ការ​ត្រួត​ពិនិត្យ​ខ្លះ​ដោយ​អនុញ្ញាត​ឲ្យ​លោក​អាច​ឱ្យ​ធ្វើដំណើរ​ក្នុង​ប្រទេស ប៉ុន្តែ​ហាម​ធ្វើ​នយោបាយ​និង​ចេញ​ក្រៅ​ប្រទេស​។ តុលាការ​បាន​ពន្យារពេល សវនាការ លោក កឹម សុខា ចាប់​តាំង​ពី​ដើម​ឆ្នាំ ២០២០ ហើយ លោក ហ៊ុន សែន អះអាង​ថា នឹង​បន្ត​ពន្យារពេល​រហូតដល់​ឆ្នាំ​២០២៤។ មន្ត្រី​បក្ស​ប្រឆាំង និង​អ្នកវិភាគ​ថា ការ​ពន្យារ​ពេលនេះ ជា​យុទ្ធសាស្ត្រ​របស់​គណបក្ស​កាន់អំណាច ដើម្បី​បំបែក លោក សម រង្ស៊ី ប្រធាន​ស្តីទី​គណបក្ស និង​លោក កឹម សុខា ឲ្យ​បែកបាក់​សាមគ្គី ប៉ុន្តែ​លោក សម រង្ស៊ី ថា លោក និង​លោក កឹម សុខា ជា​មនុស្ស​តែមួយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល