អ្នកវិភាគ៖ លោក ហ៊ុន សែន សុំកុំឲ្យលោក សម រង្ស៊ី ធ្វើបាបគ្រាន់តែជាយុទ្ធសាស្ត្រ
2015.04.26
លោកនាយករដ្ឋមន្ត្រី ហ៊ុន សែន (ឆ្វេង) និងលោក សម រង្ស៊ី។
អ្នកវិភាគយល់ថា ការលើកឡើងរបស់លោកនាយករដ្ឋមន្ត្រី ហ៊ុន សែន ដែលសុំកុំឲ្យលោក សម រង្ស៊ី ធ្វើបាបនៅពេលលោកអស់អំណាចនោះ វាគ្រាន់តែជាយុទ្ធសាស្ត្ររបស់លោក ហ៊ុន សែន បង្ហាញភាពជិតស្និទ្ធជាមួយគណបក្សសង្គ្រោះជាតិ ដើម្បីធ្វើឲ្យគណបក្សប្រឆាំង ថយប្រជាប្រិយភាពប៉ុណ្ណោះ។
ល្បឿននៃវប្បធម៌សន្ទនារវាងលោកនាយករដ្ឋមន្ត្រី ហ៊ុន សែន និងលោក សម រង្ស៊ី ប្រធានគណបក្សសង្គ្រោះជាតិ ហាក់បានស្ទុះលឿនទៅមុខគួរឲ្យកត់សម្គាល់ ពិសេសចាប់តាំងពីគណបក្សប្រជាជនកម្ពុជា និងគណបក្សសង្គ្រោះជាតិ បានឯកភាពគ្នាបង្កើតសមាសភាព គ.ជ.ប ថ្មី និងនៅក្រោយមានការដោះលែងសកម្មជនបក្សសង្គ្រោះជាតិ កាលពីពេលថ្មីៗនេះ។
ថ្នាក់ដឹកនាំបក្សទាំង២ ដែលពីមុនមកធ្លាប់ពាក់មុខយក្សដាក់គ្នា ហើយដែលពេលនេះ បានប្រែក្លាយជាផ្អែមល្ហែមជាមួយគ្នាវិញនោះ បានសម្ដែងមោទនភាពចំពោះគុណតម្លៃនៃវប្បធម៌សន្ទនារបស់ខ្លួននៅពេលនេះ។ ពួកគេមិនត្រឹមតែផ្សព្វផ្សាយអំពីតម្លៃនៃវប្បធម៌សន្ទនា ចំពោះមុខពលរដ្ឋទូទៅនៅក្នុងប្រទេសនោះទេ តែកាលពីថ្ងៃទី២៥ មេសា ពួកគេបានដឹកដៃគ្នាទៅថ្លែងអំពីវប្បធម៌សន្ទនា នៅចំពោះមុខនិស្សិត ពលករ កម្មករខ្មែរនៅប្រទេសម៉ាឡេស៊ី ទៀតផង។ ទង្វើបែបនេះ វាមិនដែលកើតឡើងទេពីមុនមក។
ពីមុនមកគេធ្លាប់តែឮលោកនាយករដ្ឋមន្ត្រី ហ៊ុន សែន និងលោក សម រង្ស៊ី ថ្លែងឲ្យលុបបំបាត់ឲ្យអស់នូវវប្បធម៌ទឹកឡើងត្រីស៊ីស្រមោចទឹកហោចស្រមោចស៊ីត្រី។ ប៉ុន្តែគេមិនដែលឮលោក ហ៊ុន សែន ថ្លែងឲ្យចំៗមិនឲ្យគណបក្សប្រឆាំងធ្វើបាបលោកពេលលោកអស់អំណាចនោះទេ៖ «ឥឡូវខ្ញុំនៅធ្វើជានាយករដ្ឋមន្ត្រីទាំងអស់គ្នានៅជាមួយបាន ប៉ុន្តែស្រាប់តែដល់ពេលណាមួយ ស្រាប់តែឯកឧត្ដម សម រង្ស៊ី ធ្វើជានាយករដ្ឋមន្ត្រីម្ដង ឧទាហរណ៍ទេណា! ស្រាប់តែដល់ពេលហ្នឹងឯកឧត្ដមអត់ឲ្យខ្ញុំរស់នៅ ស្រាប់តែទៅធ្វើបាបខ្ញុំ»។
ទោះជាយ៉ាងណាក្ដី លោក ហ៊ុន សែន ក៏បានបញ្ជាក់ប្រាប់លោក សម រង្ស៊ី ដែរថា ប្រសិនបើមានការធ្វើបាបលោកនៅពេលអស់អំណាចមែន កម្លាំងដែលគាំទ្រលោកក៏ប្រាកដជាវាយបកទៅវិញ មិនអាចធ្វើឲ្យលោក សម រង្ស៊ី នៅបានសុខនោះដែរ ព្រោះលោកថា គ្រប់គណបក្សទាំងអស់សុទ្ធតែមានអ្នកគាំទ្ររៀងៗខ្លួន ទោះតិច ឬច្រើនក្តី។
យ៉ាងណាក៏ដោយ លោក ហ៊ុន សែន អះអាងថា វប្បធម៌ប្រទូសរ៉ាយគ្នាមិនផ្ដល់ផលល្អដល់កម្ពុជា នោះទេ ព្រោះថា វាបានធ្វើឲ្យខ្មែរជួបនូវទុក្ខវេទនាអស់ជាច្រើនរយឆ្នាំមកហើយ ហើយក៏បានធ្វើឲ្យខ្មែរបាត់បង់ទឹកដីអស់ជាច្រើនដែរ។ លោកថា រាល់ដំណោះស្រាយប្រទេសជាតិ វាទាមទារឲ្យមានការចូលរួមពីខ្មែរគ្រប់រូប។
ចំពោះការលើកឡើងរបស់លោក ហ៊ុន សែន ដូចនេះ ត្រូវបានអ្នកវិភាគយល់ថា វាគ្រាន់តែជាយុទ្ធសាស្ត្រនយោបាយប៉ុណ្ណោះ។
អ្នកវិភាគព្រឹត្តិការណ៍សង្គមឯករាជ្យលោកបណ្ឌិត កែម ឡី មានប្រសាសន៍ថា លោកនាយករដ្ឋមន្ត្រី ហ៊ុន សែន ដឹងខ្លួនថា គណបក្សប្រជាជនកម្ពុជា របស់លោក អាចនឹងមិនឈ្នះឆ្នោតក្នុងពេលខាងមុខ។ លោកថា ការដែលលោក ហ៊ុន សែន បង្ហាញភាពស្និទ្ធស្នាលជាមួយលោក សម រង្ស៊ី នៅពេលនេះ វាអាចជាយុទ្ធសាស្ត្រមួយដើម្បីបង្កើនប្រជាប្រិយភាពបក្សរបស់ខ្លួន ហើយធ្វើឲ្យប្រជាប្រិយភាពរបស់គណបក្សសង្គ្រោះជាតិថយចុះខ្សោយ។
លោក កែម ឡី ហាក់ពុំសូវមានសុទិដ្ឋិនិយមចំពោះភាពស្និទ្ធស្នាលរបស់លោក ហ៊ុន សែន និងលោក សម រង្ស៊ី នៅពេលនេះឡើយ ព្រោះលោកយល់ថា វាគ្រាន់តែជាភាពស្និទ្ធស្នាលមួយរយៈពេលប៉ុណ្ណោះ។
លោកបន្តថា នៅពេលដែលប្រជាប្រិយភាពរបស់បក្សប្រឆាំងធ្លាក់ចុះ ឬនៅក្រោយពេលដែលបក្សកាន់អំណាចខ្ចីដៃបក្សប្រឆាំងអនុម័តច្បាប់មួយចំនួនដែលបក្សកាន់អំណាចចង់បានរួចហើយ ពេលនោះវប្បធម៌សន្ទនាអាចនឹងបាត់បង់ទៅវិញ៖ «ប៉ុន្តែបើវប្បធម៌ហ្នឹងវាអ៊ីចឹងមែន ធ្វើការជាមួយគ្នាវាត្រូវមានផែនការយុទ្ធសាស្ត្រច្បាស់លាស់ថា តើវប្បធម៌ហ្នឹងអាចដោះស្រាយជនអន្តោប្រវេសន៍បានដោយប្រសិទ្ធភាព ឬទេ វប្បធម៌ហ្នឹងអាចរៀបចំអភិបាលកិច្ចបំបាត់អំពើពុករលួយបាន ឬទេ វប្បធម៌ហ្នឹងអាចថែរក្សាព្រៃឈើ ព្រៃឡង់ ព្រៃអារ៉ែង ហ្នឹងបានដែរ ឬទេ។ វប្បធម៌ហ្នឹងអាចធានាថា កោះទាំងឡាយដែលនៅជាធរមានការពារគង់វង្ស ឬទេ? អាហ្នឹងវាចំជាផែនការយុទ្ធសាស្ត្រ ជាយន្តការធ្វើការជាមួយគ្នា»។
កន្លងមកលោក ហ៊ុន សែន ប្រកាសថា វប្បធម៌សន្ទនារវាងលោកនិងលោក សម រង្ស៊ី គឺមានគោលដៅតែ ២ប៉ុណ្ណោះ គឺដើម្បីថែរក្សាសន្តិភាព និងការអភិវឌ្ឍប្រទេស វាមិនមែនជាការទៅស៊ុមគ្រលុំគ្នាដើម្បីប្រព្រឹត្តអំពើអាក្រក់នោះឡើយ។
យ៉ាងណាក៏ដោយ លោក កែម ឡី បញ្ជាក់ថា ប្រសិនបើវប្បធម៌សន្ទនានេះ បង្កើតឡើងគ្រាន់តែជាការបំបិទការរិះគន់ដើម្បីស្ថាបនា នោះវាមិនអាចដោះស្រាយបញ្ហាបានឡើយ គឺវាគ្រាន់តែជាយុទ្ធសាស្ត្រនយោបាយដើម្បីផ្ដួលរំលំភាគីម្ខាងទៀតប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ ផ្ដន្ទាទោសមន្ត្រីគណបក្សកម្លាំងជាតិ លោក គា វិសាល ឲ្យជាប់ពន្ធនាគារ ២ឆ្នាំកន្លះ
- ស្តូបមិត្តភាពកម្ពុជាវៀតណាមនៅខេត្តសៀមរាបរងការបំផ្លាញដោយគ្រាប់បែក ក្នុងពេលពលរដ្ឋបារម្ភបាត់បង់ដីទៅវៀតណាម ដោយសារគម្រោង CLV
- សង្គមស៊ីវិលបារម្ភថា កសាងស្តូបមិត្តភាព-កម្ពុជាវៀតណាមជាង ២០ខេត្ត/ក្រុង ជានិមិត្តរូបបំបែកបំបាក់សាមគ្គីខ្មែរ
- ពលរដ្ឋខ្មែរនៅកូរ៉េត្រៀមចេញធ្វើបាតុកម្មទ្រង់ទ្រាយធំប្រឆាំងគម្រោង CLV ជាលើកទី២
- សាលាដំបូងរាជធានីភ្នំពេញបើកការស៊ើបសួរ លោក គុយ វ៉ាត អតីតនាយកប្រតិបត្តិ CIC
អត្ថបទពេញនិយម
នយោបាយ
- ពលរដ្ឋខ្មែរនៅកូរ៉េខាងត្បូងប្រមាណ៣ពាន់ ធ្វើមហាបាតុកម្មប្រឆាំង CLV ម្តងទៀត
- លោក ហ៊ុន សែន ស្នើតែងតាំងលោក គុយ សុផល ភ្លាមៗ «ខ្លាចព្រះមហាក្សត្រយកមនុស្សក្រៅពីបក្ខពួកខ្លួន»
- អ្នកឃ្លាំមើលថា កូនៗ លោក ហ៊ុន សែន ជាគ្រាប់គ្រោះក្នុងសារពាង្គកាយខ្មែរ
- អ្នកឃ្លាំមើល៖ រដ្ឋាភិបាល ហ៊ុន ម៉ាណែត នឹងដួលរលំដោយសារកម្លាំងមហាជន បើនៅតែមិនដោះស្រាយបញ្ហាសង្គម
- លោក ហ៊ុន ម៉ាណែត អះអាងថា យុវជន ៩នាក់ ដែលកំពុងជាប់ឃុំ ពាក់ព័ន្ធនឹង «គម្រោងផ្ដួលរំលំរដ្ឋាភិបាល»