អ្នក​ចូលរួម​យុទ្ធនាការ​លុប​បំបាត់​អំពើ​និទណ្ឌភាព កើន​ឡើង​ជិត ៨ពាន់​នាក់

ដោយ ខែ សុណង
2020-07-29
អ៊ីម៉ែល
មតិ
Share
បោះពុម្ព
ផ្ទាំងរូបភាពសម្រាប់យុទ្ធនាការលុបបំបាត់វប្បធម៌និទណ្ឌភាព​នៅកម្ពុជា
ផ្ទាំងរូបភាពសម្រាប់យុទ្ធនាការលុបបំបាត់វប្បធម៌និទណ្ឌភាព​នៅកម្ពុជា
Screenshot from Change.org

យុទ្ធនាការ​បញ្ចប់​អំពើ​និទណ្ឌភាព មាន​អ្នកចូលរួម​ចុះហត្ថលេខា ៧.៩៩៥ពាន់​នាក់ គិត​មក​ត្រឹម​យប់​ថ្ងៃ​ទី២៩ ខែ​កក្កដា។

ប្រជាពលរដ្ឋ និង​សកម្មជន​គណបក្ស​សង្គ្រោះ​ជាតិ​ទាំង​ក្នុង និង​នៅ​ក្រៅ​ប្រទេស គាំទ្រ​យុទ្ធនាការ​បញ្ចប់​និទណ្ឌភាព ឬ​ភាព​គ្មាន​ទោសពៃរ៍​នៅ​កម្ពុជា​នេះ ដោយ​គ្រោង​ប្រមូល​ស្នាមមេដៃ​ប្រជាពលរដ្ឋ​ប្រមាណ​កន្លះ​លាន​នាក់ ដើម្បី​ដាក់​ញត្តិ​ទៅ​តុលាការ​អន្តរជាតិ​នានា ឲ្យ​ជួយ​រក​យុត្តិធម៌​ជូន​ក្រុម​ជន​រង​គ្រោះ​មួយ​ចំនួន ដែល​រួមមាន អ្នកស្រី ពិសិដ្ឋ ពីលីកា ដែល​ជា​តារា​ភាពយន្ត និង​ជា​សាស្ត្រាចារ្យ​សាលា​វិចិត្រ​សិល្បៈ ព្រះតេជព្រះគុណ សំ ប៊ុនធឿន លោក ជា វិជ្ជា ប្រធាន​សហជីពកម្មករ លោក ឈុត វុទ្ធី សកម្មជន​ព្រៃ​ឈើ និង​អ្នក​សារព័ត៌មាន សកម្មជន​នយោបាយ និង​មន្ត្រី​សហជីព ព្រម​ទាំង​ប្រជាពលរដ្ឋ​ផ្សេង​ទៀត ដែល​បាន​ស្លាប់​ដោយ​អយុត្តិធម៌ ក្រោម​របប​គ្រប់គ្រង​របស់​លោក ហ៊ុន សែន។

ថ្មីៗ នេះ អង្គការ និង​សមាគម​អន្តរជាតិ​ចំនួន ៣៣ ដែល​រួមមាន អង្គការ​ឃ្លាំមើល​សិទ្ធិមនុស្ស​អន្តរជាតិ (Human Rights Watch) និង​គណៈកម្មការ​អ្នក​ច្បាប់​អន្តរជាតិ (ICJ) បាន​អំពាវនាវ​ឲ្យ​រដ្ឋាភិបាល នៃ​ប្រទេស​ប្រជាធិបតេយ្យ​ជា​ច្រើន រួម​ដៃ​គ្នា​ជាមួយ​សហគមន៍​អឺរ៉ុប ដើម្បី​ទាមទារ​ឲ្យ​របប​ក្រុង​ភ្នំពេញ ស្ដារ​សិទ្ធិ​មនុស្ស និង​ប្រជាធិបតេយ្យ​ឡើង​វិញ។ ក្នុង​ចំណោម​អង្គការ និង​សមាគម​ទាមទារ​ទាំង ១២ចំណុច​នោះ ក៏​មាន​ការ​បញ្ចប់​វប្បធម៌​និទណ្ឌភាព ដោយ​បើក​ការ​ស៊ើប​អង្កេត​ឯករាជ្យ លើ​ករណី​ឃាតកម្ម​ធំៗ ដូចជា ឃាតកម្ម​ឃាតកម្ម​លើ​បណ្ឌិត កែម ឡី នេះ​ដែរ។

គណបក្ស​សង្គ្រោះ​ជាតិ បាន​ធ្វើ​យុទ្ធនាការ​ប្រមូល​ស្នាម​មេដៃ ឬ​ហត្ថលេខា​គាំទ្រ​នេះ លើ​បណ្ដាញ​អ៊ិនធើណិត តាម​គេហទំព័រ change.org ក្រោម​ប្រធាន​បទ​ជា​ភាសា​អង់គ្លេស​ថា “Together We Fight to End Impunity” ឬ​ប្រែ​ថា យើង​រួម​គ្នា​តស៊ូ​លុបបំបាត់​អំពើ​និទណ្ឌភាព” បាន​ចាប់​ផ្ដើម​ធ្វើ​កាល​ពី​ថ្ងៃ​ទី១០ ខែ​កក្កដា គឺ​ចំ​ថ្ងៃ​ប្រារព្ធ​ពិធីបុណ្យ​ខួប​គម្រប់ ៤ឆ្នាំ នៃ​ឃាតកម្ម​លើ​បណ្ឌិត កែម ឡី។ ចំពោះ​អ្នក​ចង់​ចូលរួម​គាំទ្រ ឬ​ចុះ​ហត្ថលេខា​ក្នុង​យុទ្ធនាការ​នេះ អាច​ស្វែងរក​ឃ្លា “Together We Fight to End Impunity” នេះ នៅ​លើ​អ៊ិនធើណិត៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល