គណបក្សនយោបាយចំនួន៥ រួមមាន គឺគណបក្ស អំណាចខ្មែរ គណបក្ស ភ្លើងទៀន គណបក្ស មហាសាមគ្គីជាតិខ្មែរ គណបក្ស សិទ្ធិមនុស្ស និងគណបក្ស ជាតិនិយម ដែលបានចេញសេចក្តីថ្លែងការណ៍ធ្វើពហិការការបោះឆ្នោតអាណត្តិទី៦ បានប្រកាសមិនទទួលស្គាល់លទ្ធផលឆ្នោត។ គណបក្សនយោបាយទាំង ៥នោះ យល់ឃើញស្រដៀងនឹងគណបក្សប្រឆាំងដែរ គឺការបោះឆ្នោតលើកនេះ មិនមែនជាការបោះឆ្នោតត្រឹមត្រូវ សេរី យុត្តិធម៌ អព្យាក្រឹត្យ ដែលអាចទទួលយកបានទេ។ ពួកគេចាត់ទុកថា ការបោះឆ្នោតនេះ គ្រាន់តែជាការបោះឆ្នោតជ្រកក្រោមស្លាកលទ្ធិប្រជាធិបតេយ្យក្លែងក្លាយ ដើម្បីអាចឲ្យគណបក្ស ប្រជាជនកម្ពុជា បន្ដអំណាច។
អ្នកនាំពាក្យគណបក្សអំណាចខ្មែរ លោក យិន ឈឿន ឲ្យអាស៊ីសេរីដឹងថា គណបក្ស អំណាចខ្មែរនឹងចេញសេចក្តីថ្លែងការណ៍មិនទទួលស្គាល់លទ្ធផលឆ្នោត និងប្រកាសប្រឆាំងការបោះឆ្នោតអាណត្តិទី៦នេះ។
គណបក្ស អំណាចខ្មែរ បានចេញសេចក្តីថ្លែងការណ៍របស់ខ្លួន លើកទី១ កាលពីថ្ងៃទី២៧ ខែមេសា ដើម្បីបញ្ជាក់ជំហរ មិនចូលរួមការបោះឆ្នោតក្លែងក្លាយ។ អតីតប្រធានគណបក្ស អំណាចខ្មែរ គឺ លោក សួន សេរីរដ្ឋា បច្ចុប្បន្នកំពុងជាប់ពន្ធនាគារ ដោយសារលោកនាយករដ្ឋមន្ត្រី ហ៊ុន សែន បញ្ជាឲ្យសមត្ថកិច្ចចាប់ឃុំខ្លួន កាលពីខែសីហា ឆ្នាំ២០១៧ ក្រោមបទញុះញង់កងទ័ពកុំឲ្យស្ដាប់បញ្ជា។ គណបក្សនេះ បានបង្ខំចិត្តធ្វើសមាជផ្លាស់ប្ដូរប្រធានគណបក្ស ដើម្បីកុំឲ្យរងការរំលាយចោល។ បច្ចុប្បន្ន ប្រធានគណបក្ស អំណាចខ្មែរ គឺលោក សួង សុភ័ណ្ឌ ជាអតីតបេក្ខជនតំណាងរាស្ត្រមណ្ឌលប៉ៃលិន របស់គណបក្ស សង្គ្រោះជាតិ ដែលរបបលោក ហ៊ុន សែន រំលាយចោល។
ចំណែកប្រធានគណបក្សភ្លើងទៀន ឬអតីតគណបក្ស សម រង្ស៊ី ដែលត្រូវបានរដ្ឋសភាឯកបក្ស នៃរបបលោក ហ៊ុន សែន តាក់តែងច្បាប់បង្ខំឲ្យប្ដូរឈ្មោះ កាលពីខែកក្កដា ឆ្នាំ២០១៧ លោក ទាវ វណ្ណុល ឲ្យដឹងថា ដើមហេតុដែលគណបក្ស ភ្លើងទៀន មិនចូលរួមការបោះឆ្នោត គឺដោយសារគណបក្សនេះ បានបដិសេធលទ្ធផលឆ្នោតរួចទៅហើយ។ លោកបញ្ជាក់ថា សម្រាប់ការបោះឆ្នោតមួយ ដែលមិនឆ្លុះបញ្ចាំងពីឆន្ទៈពលរដ្ឋពិតប្រាកដ គណបក្ស ភ្លើងទៀន មិនទទួលយកលទ្ធផលទេ៖ «»
គណបក្ស ភ្លើងទៀន បានចេញសេចក្តីថ្លែងការណ៍មិនចូលរួមការបោះឆ្នោត អាណត្តិទី៦ កាលពីថ្ងៃទី៣ ខែឧសភា។ ក្នុងសេចក្តីថ្លែងការណ៍កាលណោះ គណបក្ស ភ្លើងទៀន ទាមទារឲ្យមានការដោះស្រាយវិបត្តិនយោបាយ ដើម្បីធានាដល់ការបោះឆ្នោតដោយសេរី ត្រឹមត្រូវ និងយុត្តិធម៌ និងឆ្លុះបញ្ចាំងពីឆន្ទៈរាស្ត្រពិតប្រាកដសិន។
មិនខុសពីគណបក្ស ភ្លើងទៀន និងអ្នកនាំពាក្យគណបក្ស អំណាចខ្មែរ ទេ ប្រធានគណបក្ស មហាសាមគ្គីជាតិខ្មែរ លោក ញ៉ែម វណ្ណថន ឲ្យដឹងថា មានមូលហេតុចំនួន ៣ ដែលគណបក្សលោកមិនចូលរួមការបោះឆ្នោត និងប្រកាសទាត់ចោលលទ្ធផលឆ្នោត ដោយសារតែ គ.ជ.ប មិនឯករាជ្យ សភាឯកបក្សនៃរបបលោក ហ៊ុន សែន បង្កើតច្បាប់ថ្មី មិនបម្រើឲ្យប្រយោជន៍សាធារណៈ និងការតម្រូវឲ្យបង់ថវិកាតម្កល់ចូលរដ្ឋច្រើនសន្ធឹកសន្ធាប់៖ «»
ចំណែកគណបក្ស សិទ្ធិមនុស្ស ដែលមានស្ថាបនិកជាប្រធានគណបក្ស សង្គ្រោះជាតិ គឺលោក កឹម សុខា បានចេញសេចក្តីថ្លែងការណ៍បញ្ជាក់ជំហរមិនចូលរួមការបោះឆ្នោត កាលពីថ្ងៃទី៩ ខែឧសភា។ អាស៊ីសេរី មិនទាន់អាចសុំការបញ្ជាក់បន្ថែមពីប្រធានគណបក្ស សិទ្ធិមនុស្ស គឺលោក សឺន ស៊ូប៊ែរ្តិ៍ បានទេ ជុំវិញជំហរទទួលស្គាល់ ឬមិនទទួលស្គាល់លទ្ធផលបោះឆ្នោត នៅថ្ងៃទី២៩ ខែកក្កដានោះ ដោយសារទូរស័ព្ទមិនចូល។ តែយ៉ាងណាក្ដី លោក សឺន ស៊ូប៊ែរ្តិ៍ ធ្លាប់ឲ្យអាស៊ីសេរីដឹងកន្លងមកថា គណបក្សនេះ ក៏ទាមទារឲ្យមានការដោះស្រាយវិបត្តិនយោបាយជាមុនសិន។
គណបក្សដែលប្រកាសជំហរមិនទទួលស្គាល់លទ្ធផលឆ្នោតមួយទៀត គឺគណបក្ស ជាតិនិយម។ ក្នុងសេចក្តីថ្លែងការណ៍បញ្ជាក់ជំហរមិនចូលរួមការបោះឆ្នោត ចេញកាលពីថ្ងៃទី១១ ខែឧសភា គណបក្ស ជាតិនិយម អះអាងថា គណបក្សនេះ ធ្លាប់ចូលរួមការបោះឆ្នោតនៅអាណត្តិកន្លងមក ហើយទទួលបានអសនៈរដ្ឋសភា នៅឆ្នាំ២០០៨ និងក្រុមប្រឹក្សារាជធានី ខេត្ត ក្រុង ស្រុក ខណ្ឌ នៅឆ្នាំ២០០៩ ហើយធ្លាប់ជាប់ជាក្រុមប្រឹក្សាឃុំសង្កាត់ កាលពីឆ្នាំ២០០៧ និងឆ្នាំ២០១២។
អគ្គលេខាធិការគណបក្សជាតិនិយម គឺលោក សុខ សាវណ្ណ បញ្ជាក់ថា គោលការណ៍របស់គណបក្សបានសម្រេចថា មិនត្រឹមតែមិនចូលរួមការបោះឆ្នោតទេ គណបក្ស ជាតិនិយម ក៏មិនទទួលយកលទ្ធផលឆ្នោត ដែលរៀបចំដោយ គ.ជ.ប នៅពេលខាងមុខដែរ ព្រោះជាការបោះឆ្នោតក្លែងក្លាយ មិនត្រឹមត្រូវតាមគោលការណ៍ប្រជាធិបតេយ្យ។ លោក សុខ សាវណ្ណ ឲ្យដឹងថា គណកម្មការអចិន្ត្រៃយ៍បក្ស ជាតិនិយម នឹងប្រជុំថា គួរចេញសេចក្តីថ្លែងការណ៍ទាត់ចោលលទ្ធផលបោះឆ្នោត ឬយ៉ាងណា៖ «»
ការបោះឆ្នោតដ៏ចម្រូងចម្រាស នៅអាណត្តិទី៦ រៀបចំដោយរបបលោក ហ៊ុន សែន រងការតិះតៀនពីគណបក្សទាំង៥ ថា នៅក្រោមការបង្គាប់បញ្ជារបស់គណបក្សកាន់អំណាច។ ប៉ុន្ដែសម្រាប់ គ.ជ.ប វិញ តែងបដិសេធ ហើយអះអាងថា គ.ជ.ប ធ្វើការតាមតែច្បាប់កំណត់។
អ្នកនាំពាក្យ គ.ជ.ប លោក ហង្ស ពុទ្ធា ធ្លាប់បញ្ជាក់ប្រាប់សារព័ត៌មានថា ការធ្វើពហិការ ឬការមិនទទួលស្គាល់លទ្ធផលឆ្នោត មិនអាចប៉ះពាល់ដល់ដំណើរការបោះឆ្នោតដែរ ខណៈដែលលោក ហ៊ុន សែន ប្រធានគណបក្សកាន់អំណាចអួតថា របបលោករៀបចំការបោះឆ្នោតបានត្រឹមត្រូវ ដោយសារមានបក្សច្រើនបានចូលរួមប្រកួត។
សមាជិកក្រុមអ្នកវិភាគវ័យក្មេង លោក បុង ដែត យល់ថា នៅពេលដែលគណបក្សកាន់តែច្រើនប្រកាសទាត់ចោលលទ្ធផលឆ្នោតបែបនេះ គណបក្សផ្សេងទៀត ដែលចូលរួមការប្រកួត ហើយមិនទទួលបានអាសនៈរដ្ឋសភា ក៏អាចនឹងប្រកាសមិនទទួលស្គាល់លទ្ធផលដែរ៖ «»
គណបក្សនយោបាយទាំង៥ ដែលប្រកាសទាត់ចោលលទ្ធផលឆ្នោតឲ្យដឹងថា ប្រសិនបើរបបក្រុងភ្នំពេញរៀបចំឲ្យមានការបោះឆ្នោតត្រឹមត្រូវ សេរី យុត្តិធម៌ មានការចូលរួមពីគ្រប់ភាគីពាក់ព័ន្ធនោះ ពួកគេនឹងប្រកាសចូលរួម ឬគាំទ្រលទ្ធផលឆ្នោតវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។