ស្ត្រី ៥នាក់​រង​របួស ក្នុង​ហេតុការណ៍​អាជ្ញាធរ​រារាំង​សាច់ញាតិ​សកម្មជន​បក្ស​សង្គ្រោះ​ជាតិ​មិន​ឱ្យ​តវ៉ា​នៅមុខ​តុលាការ​​ភ្នំពេញ

ដោយ ជាតិ ចំណាន
2020-07-24
អ៊ីម៉ែល
មតិ
Share
បោះពុម្ព
សាច់ញាតិ​របស់​សកម្មជន​បក្ស​សង្គ្រោះ​ជាតិ តវ៉ា​​នៅ​មុខ​តុលាការ​ក្រុង​ភ្នំពេញ នៅ​ថ្ងៃ​ទី២៤ ខែ​កក្កដា ឆ្នាំ២០២០ ទាមទារ​ឱ្យ​ដោះលែង​សាច់​ញាតិ ១៧នាក់ ដែល​កំពុង​ជាប់​ឃុំ​នៅ​ពន្ធនាគារ។
សាច់ញាតិ​របស់​សកម្មជន​បក្ស​សង្គ្រោះ​ជាតិ តវ៉ា​​នៅ​មុខ​តុលាការ​ក្រុង​ភ្នំពេញ នៅ​ថ្ងៃ​ទី២៤ ខែ​កក្កដា ឆ្នាំ២០២០ ទាមទារ​ឱ្យ​ដោះលែង​សាច់​ញាតិ ១៧នាក់ ដែល​កំពុង​ជាប់​ឃុំ​នៅ​ពន្ធនាគារ។
រូប៖ ពលរដ្ឋ

អាជ្ញាធរ​រារាំង​ដោយ​ហិង្សា​លើ​ប្រពន្ធ​និង​កូន​របស់​សកម្មជន​គណបក្ស​សង្គ្រោះ​ជាតិ​ក្នុង​ពេល​ពួក​គេ​នាំគ្នា​តវ៉ា​នៅមុខ​សាលា​រាជធានី​ភ្នំពេញ បណ្ដាល​ឱ្យ​ស្ត្រី៥នាក់​រង​របួស នៅ​ព្រឹក​ថ្ងៃទី២៤កក្កដា។ មន្ត្រី​អង្គការ​សង្គម​ស៊ីវិល ចាត់ទុក​សកម្មភាព​របស់​អាជ្ញាធរ​នេះ ថា ជា​ការរំលោភ​បំពាន​លើ​សិទ្ធិ សេរីភាព​សម្ដែង​មតិ​របស់​ប្រជាពលរដ្ឋ។

ក្រុម​អ្នក​តវ៉ា​ប្រមាណ ៥០នាក់​ពាក់​អាវ​យឺត​ស​ដៃ​ខ្លី មាន​រូប​សកម្មជន​គណបក្ស​សង្គ្រោះ​ជាតិ ១៧នាក់ ដែល​កំពុង​ជាប់​ឃុំ បិទ​នៅ​មុខ​អាវ​បង្ហាញ​ដល់​សាធារណជន។ ការ​តវ៉ា​នេះ​ក្រុម​បាតុករ​ព្យាយាម​ឈរ​តវ៉ា​នៅមុខ​ច្រក​ទ្វារ​សាលាដំបូង​រាជធានី​ភ្នំពេញ ហើយ​នាំ​គ្នា​ស្រែ​ទាមទារ​ឱ្យ​តុលាការ​ដោះលែង​ប្ដី​និង​ឪពុក​របស់​ពួក​គេ​ជាបន្ទាន់​និង​ដោយ​គ្មាន​លក្ខខណ្ឌ។

ទោះ​ជា​យ៉ាង​ណា កង​សន្តិសុខ​សាលា​រាជធានី​ភ្នំពេញ​ប្រមាណ ៣០នាក់​ បាន​ចេញ​រារាំង និង​ចាប់​អូស​ស្ត្រី​ជា​ច្រើន​នាក់ លើ​ថ្នល់​កៅស៊ូ​ឆ្លង​មក​ម្ខាង​ផ្លូវ​ទាំង​កម្រោល ហើយ​អ្នកខ្លះ​ត្រូវ​បាន​ក្រុម​សន្តិសុខ​ចាប់​លើក​ទម្លាក់​ពីលើ​របង​ដែក​ម្ខាង​ផ្លូវ​ទល់មុខ​តុលាការ បណ្ដាល​ឱ្យ​ស្ត្រី​ចំនួន ៥នាក់​របួស​រលាត់​ដៃ​ចេញ​ឈាម គ្រេច​ជើង និង​គ្រេច​ចង្កេះ​ជា​ដើម។

ប្រពន្ធ​សមាជិក​ក្រុមប្រឹក្សា​រាជធានី​ភ្នំពេញ​ជាប់ឆ្នោត​គណបក្ស​សង្គ្រោះ​ជាតិ លោក កាក់ កុម្ភារ គឺ​លោកស្រី ព្រុំ ចាន់ថា ថ្លែង​ថា កង​សន្តិសុខ​ប្រមាណ ៤នាក់ បាន​ចាប់​លោកស្រី​លើក​ទម្លាក់​ពី​លើ​របង​ដូច​លើក​សត្វធាតុ បណ្ដាល​ឱ្យ​គ្រេច​ចង្កេះ​ឈឺ​ចុក​ចាប់​រាងកាយ ហើយ​ដើរ​មិន​ត្រង់​ផ្លូវ​នោះ​ទេ។លោកស្រី​បន្ត​ថា ភ្លាមៗ ក្រោយ​ពេល​ចប់​ការ​តវ៉ា លោកស្រី​ទៅ​រក​គ្រូពេទ្យ​របស់​អង្គការ​លីកាដូ (Licadho) ឱ្យ​ព្យាបាល​ជំងឺ​ដើម្បី​បំបាត់​ការ​ឈឺ​ចាប់៖ «ខ្ញុំ​ចង់​ឱ្យ​ពួក​គាត់​មាន​សេរីភាព​ត្រឡប់​មក​ជួប​មុខ​ប្រពន្ធ​កូន​វិញ។ និយាយ​ទៅ​ខ្មែរ​ដូចគ្នា​គឺ​ធ្វើអំពើ​ហិង្សា​មក​លើ​ពួក​ខ្ញុំ​ជា​ស្ត្រី ដែល​ខ្សោយ​ហើយ​អត់មាន​អាវុធ​ក្នុង​ដៃ ។វា​ហាក់​ដូច​ជា​ធ្វើ​បាប​ពួក​ខ្ញុំ​ហ្មង​អូស​ពួក​ខ្ញុំ​ហើយ​លើកដៃ​លើកជើង​ហើយ​បោះ​ខ្ញុំ​ដូច​សត្វ​ជ្រូក។ឥឡូវ​ចង្កេះ​ខ្ញុំ​វា​ឈឺ​ដោយសារ​គេ​បោះ​អុក​នឹង​ថ្មី»

ក្រោយ​រង​ហិង្សា​ពី​ក្រុម​សន្តិសុខ​សាលា​រាជធានី​ភ្នំពេញ ក្រុម​អ្នក​តវ៉ា​បាន​នាំគ្នា​ទៅ​ដាក់​ញត្តិ​នៅ​ស្ថានទូត​អង់គ្លេស (English) ដើម្បី​ឱ្យ​ជួយ​អន្តរាគមន៍​ពួក​គាត់ ហើយ​ស្ថានទូត​អនុញ្ញាត​ឱ្យ​តំណាង​អ្នក​តវ៉ា​ចំនួន ៥នាក់​ចូល​ដាក់​ញត្តិ ព្រម​ទាំង​បាន​សន្យា​ថា ស្ថានទូត​នឹង​ប្រជុំ​ជាមួយ​បណ្ដាល​ស្ថានទូត​ប្រទេស​ប្រជាធិបតេយ្យ​ដទៃ​ទៀត ដែល​ក្រុម​អ្នក​តវ៉ា​បាន​ដាក់​ញត្តិ​កន្លងទៅ ដើម្បី​ពិភាក្សា​រក​ដំណោះស្រាយ​លើ​រឿង​នេះ។ ក្រុម​អ្នក​តវ៉ា​គ្រោង​ប្រមូលផ្ដុំ​គ្នា​តវ៉ា​ជាថ្មី​ទៀត​នៅ​ថ្ងៃសុក្រ​សប្ដាហ៍​ក្រោយ ហើយនឹង​តវ៉ា​ទៅមុខ​ទៀត​រហូត​មាន​ដំណោះស្រាយ។

ឆ្លើយតប​នឹង​បញ្ហា​នេះ​ស្នងការ​នគរបាល​រាជធានី​ភ្នំពេញ​លោក ស ថេត ប្រាប់​អាស៊ី​សេរី​ថា កង​សន្តិសុខ​និង​ប៉ូលិស​ពុំ​បាន​រារាំង​ដល់​ក្រុម​បាតុករ​ដូច​ការ​ចោទ​ប្រកាន់​ឡើយ៖ «កម្លាំង​សមត្ថកិច្ច​ខ្ញុំ​ណែនាំ​ណាស់​ហើយ​ទាំង​ថ្នាក់ដឹកនាំ​ទាំងអស់​មិន​ឱ្យ​មានការ​ប្រើ​ហិង្សា​ទៅលើ​ប្រជាពលរដ្ឋ​ទេ។នៅ​រាល់​ការ​តវ៉ា​ផ្សេងៗ ពីព្រោះ​ពួក​គាត់​ក៏​មានការ​ថតរូប​ភាព​ទុក​ដែរ​មិនមែន​ដូច​តាម​ការចោទប្រកាន់​អីចឹង​ទេ។ដល់​ថ្នាក់​ថា​ទាញ​ទម្លាក់​ពីលើ​របង​នោះ​វា​ដូចជា​ហួសហេតុ​ពេក​ហើយ​ខ្ញុំ​ដូចជា​ទទួលយក​មិន​បាន​ទេ»

អាស៊ី​សេរី​មិន​អាច​ទាក់ទង​នាំ​ពាក្យ​សាលាដំបូង​រាជធានី​ភ្នំពេញ លោក អ៊ី រិន្ទ ដោយ​ទូរស័ព្ទ​ចូល​ជា​ច្រើន​ពុំ​មាន​អ្នក​ទទួល នៅ​ថ្ងៃ​ទី២៤ កក្កដា។

នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ (Licadho) លោក អំ សំអាត យល់​ថា ការ​បង្ក្រាប​ក្រុម​បាតុករ​នេះ ជា​ការរំលោភ​សិទ្ធិ​សេរី​សម្ដែង​មតិ​របស់​ប្រជាពលរដ្ឋ​ដោយ​ខុស​ច្បាប់។ លោក​បញ្ជាក់​ថា ប្រទេស​ប្រជាធិបតេយ្យ​ប្រជាពលរដ្ឋ​មាន​សិទ្ធិ​សេរី​តវ៉ា​ដោយសន្តិវិធី គឺ​ពុំ​ខុសច្បាប់​ឡើយ៖ «យើង​ជា​អង្គការ​សង្គម​ស៊ីវិល​យើង​គ្រាន់តែ​ថា ធ្វើ​យ៉ាង​ណា​កុំ​ឱ្យ​មាន​ការ​រិះគន់​បន្ថែម​ទៀត។ អីចឹង​ហើយ​បាន​ជា​យើង​ទទូច​ថា បើ​សិន​បើ​មានការ​ធ្វើ​បាតុកម្ម ឬ​ការ​តវ៉ា​ណា​មួយ​ដោយ​មិន​បាន​ជូន​ដំណឹង​តែ​ធ្វើ​ដោយ​អហិង្សា អាជ្ញាធរ​គួរតែ​ប្រើប្រាស់​នូវ​ការសម្រប​សម្រួល​ណា​មួយ​ដោយ​សន្តិវិធី​និង​ដោយ​អហិង្សា»

ការ​តវ៉ា​របស់​ក្រុម​ប្រជាពលរដ្ឋ ដោយសារ​ពួក​គាត់​មិន​ពេញចិត្ត​នឹង​អាជ្ញាធរ​ចាប់ខ្លួន​សកម្មជន​បក្ស​ប្រឆាំង ចំនួន ១៧នាក់ ដាក់​ពន្ធនាគារ​ព្រៃស ជា​បន្ត​បន្ទាប់ តាំង​ពី​ខែ​មករា​រហូត​មក ដោយ​ចោទ​ប្រកាន់​ពី​បទ​រួមគំនិតក្បត់ ញុះញង់​កុំ​ឲ្យ​យោធិន​ស្ដាប់​បង្គាប់ និង ញុះញង់​ឲ្យ​ប្រព្រឹត្ត​បទ ឧក្រិដ្ឋ​ជា​អាទិ៍ និង​ខ្លះ​ទៀត​ត្រូវ​បាន​ចោទប្រកាន់ ពី​បទ​ជេរប្រមាថ​ថ្នាក់ដឹកនាំ​រដ្ឋាភិបាល។ សាច់ញាតិ​ជន​ជាប់ឃុំ​ទាំងនោះ ចាត់​ទុក​ករណី​នេះ​ថា ជា​រឿង​អយុត្តិធម៌ ពីព្រោះ​អ្នក​ទាំង ១៧នាក់​នោះ មិនបាន​ប្រព្រឹត្តិ​ខុសច្បាប់​នោះ​ឡើយ

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល