មន្ត្រីអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ជំរុញឱ្យអាមេរិកលុបចោលកិច្ចប្រជុំកំពូលពិសេសអាស៊ាន-អាមេរិក ដែលគ្រោងធ្វើនៅរដ្ឋធានីវ៉ាស៊ីនតុន (Washington) នាពេលខាងមុខនេះ។ មន្ត្រីរូបនោះថា សហរដ្ឋអាមេរិកគួរតែធ្វើដូច្នេះ ដោយសារតែក្រុមមេដឹកនាំអាស៊ានមួយចំនួន ក្នុងនោះរួមមានទាំងមេដឹកនាំកម្ពុជា លោកនាយករដ្ឋមន្ត្រី ហ៊ុន សែន ផង មិនសាកសមនឹងទទួលបានការស្វាគមន៍នៅសេតវិមានប្រធានាធិបតីអាមេរិក (White House) នោះទេ ដោយសារតែពួកគេមានប្រវត្តិរំលោភសិទ្ធិមនុស្ស។
នាយករងប្រចាំតំបន់អាស៊ីនៃអង្គការ យូមែន រ៉ៃត៍ វ៉ច្ឆ លោក ហ្វីល រ៉ូប៊ើតសុន (Phil Robertson) ប្រាប់វិទ្យុអាស៊ីសេរី តាមសារអេឡិចត្រូនិកកាលពីពេលថ្មីៗនេះថា រដ្ឋបាលលោកប្រធានាធិបតី បៃឌិន (Biden Administration) កំពុងព្យាយាមធ្វើឱ្យក្រុមមេដឹកនាំអាស៊ានចាប់អារម្មណ៍ដោយអញ្ជើញពួកគេឱ្យមកចូលរួមកិច្ចប្រជុំកំពូលពិសេសនេះនៅសេតវិមានប្រធានាធិបតីក្នុងរដ្ឋធានីវ៉ាស៊ីនតុន និងផ្តល់ឱ្យពួកគេនូវកិត្យានុភាពប្រកៀកគ្នានឹងប្រធានាធិបតី និងក្រុមអ្នកធ្វើគោលនយោបាយជាន់ខ្ពស់របស់អាមេរិក។
មន្ត្រីអង្គការយូមែន រ៉ៃត៍ វ៉ច្ឆ រូបនេះថា ក្រុមមេដឹកនាំភាគច្រើននៃប្រទេសសមាជិកអាស៊ានទាំងនេះ មានដូចជា ប្រធានាធិបតីហ្វីលីពីន (The Philippines) លោក រូឌ្រីហ្គូ ឌូទែរតេ (Rodrigo Duterte) នាយករដ្ឋមន្ត្រីកម្ពុជាលោក ហ៊ុន សែន និងមេដឹកនាំផ្តាច់ការនៃប្រទេសកុម្មុយនិស្តវៀតណាម (Vietnam) និងឡាវ (Laos) ជាដើម មិនសាកសមនឹងទទួលបាននូវការទទួលស្វាគមន៍ដោយកម្រាលព្រំក្រហមនោះទេ ដោយសារតែពួកគេមានប្រវត្តិប្រព្រឹត្តអំពើរំលោភសិទ្ធិមនុស្ស ហើយពួកគេមួយចំនួនក៏មានបាតដៃប្រឡាក់ឈាមដែរ។
លោក ហ្វ៊ីល រ៉ូប៊ើតសុន គូសបញ្ជាក់ថា ការអញ្ជើញក្រុមមេដឹកនាំអាស៊ានទាំងនោះឱ្យមកចូលរួមកិច្ចប្រជុំកំពូលពិសេសនេះ ស្មើនឹងការបង្កើតឱ្យមានជា «កិច្ចប្រជុំកំពូលប្រឆាំងនឹងលទ្ធិប្រជាធិបតេយ្យ» ដែលលោកថា ផ្ទុយគ្នាទៅនឹងសន្និសីទប្រជាធិបតេយ្យ ដែលសហរដ្ឋអាមេរិកទើបបានធ្វើកាលពីខែធ្នូ ឆ្នាំទៅ។
លោក ហ្វ៊ីល រ៉ូប៊ើតសុន បន្តថា ការរៀបចំធ្វើកិច្ចប្រជុំកំពូលពិសេសនេះនៅសេតវិមានប្រធានាធិបតី មានន័យថា រដ្ឋបាលលោក បៃឌិន នឹងផ្តល់ឱ្យក្រុមមេដឹកនាំមកពីរដ្ឋាភិបាលផ្តាច់ការទាំងនេះ នូវការយល់ឃើញខុសដែរថា ពួកគេអាចធ្វើអ្វីៗបានស្រេចតែអំពើចិត្ត ទៅលើក្រុមអ្នកនយោបាយបក្សប្រឆាំង និងសកម្មជនសង្គមស៊ីវិល ហើយពួកគេនូវតែអាចទទួលបាននូវការស្វាគមន៍ដោយកម្រាលព្រំក្រហមដដែល។
នាយករងប្រចាំតំបន់អាស៊ីនៃអង្គការ យូមែន រ៉ៃត៍ វ៉ច្ឆ លោក ហ្វីល រ៉ូប៊ើតសុន ស្នើឱ្យរដ្ឋបាលលោកប្រធានាធិបតី បៃឌិន គួរលុបចោលកិច្ចប្រជុំកំពូលពិសេសអាស៊ាន-អាមេរិកនេះ ឬយ៉ាងហោចណាស់ គួរផ្លាស់ប្តូរទីតាំងរៀបចំកិច្ចប្រជុំនេះចេញពីរដ្ឋធានីវ៉ាស៊ីនតុន ដោយជ្រើសរើសយកទីតាំងដទៃទៀត ដូចជានៅរដ្ឋនៅតាមឆ្នេរខាងលិចនៃសហរដ្ឋអាមេរិក ដូចដែលរដ្ឋបាលលោក បារ៉ាក់ អូបាមា (Barak Obama) ធ្លាប់បានធ្វើកាលពីឆ្នាំ២០១៦ កន្លងទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។