ខណៈតុលាការកំពុងដំណើរការក្តី ប្រធានគណបក្សសង្គ្រោះជាតិ លោក កឹម សុខា លោកនាយករដ្ឋមន្ត្រី ហ៊ុន សែន ព្រមានចាប់ប្រធានបក្សប្រឆាំងរូបនេះដាក់គុកវិញ ក្រោយពេលតុលាការបញ្ចប់ការជម្រះក្ដី និងរកឃើញថាមានទោស។ មន្ត្រីសង្គមស៊ីវិលចាត់ទុកការលើកឡើងរបស់លោក ហ៊ុន សែន នេះថា ជាសារនយោបាយបំភិតបំភ័យ និងគ្របសង្កត់កិច្ចការតុលាការ។
លោកនាយករដ្ឋមន្ត្រី ហ៊ុន សែន ប្រកាសជាថ្មីទៀតថា រដ្ឋាភិបាលរបស់លោកមិនអាចយកអធិបតេយ្យរបស់កម្ពុជាប្ដូរយកការអនុគ្រោះពន្ធEBA របស់សហភាពអឺរ៉ុប ដើម្បីមិនកាត់ទោសប្រធានគណបក្សសង្គ្រោះជាតិ លោក កឹម សុខា បានឡើយ។ មេដឹកនាំប្រទេសជិត៤០ឆ្នាំរូបនេះ ហាក់និយាយប្រាប់ទៅតុលាការដោយប្រយោលទៀតថា លោក កឹម សុខា ពិតជាមានទោសមិនអាចប្រកែកបាន ហើយលោកហាក់ថែមទាំងដឹងមុនសេចក្ដីសម្រេចរបស់តុលាការទៀតថា លោក កឹម សុខា និងត្រូវកាត់ឱ្យជាប់ទោស ពីព្រោះលោកបានត្រៀមពន្ធនាគារមួយផ្សេងទៀត ដែលលោក កឹម សុខា មិនដែលធ្លាប់ជាប់នៅពេលកន្លងទៅ៖ «អាមុនបោះឆ្នោតអាឯងឃោសនាដូរមិនដូរ ហ្អែងឃោសនាត្រូវហើយ ដូរមិនដូរ ដូរហ្នឹងមុនបោះឆ្នោត។ តែបោះឆ្នោតរួចហើយហ្អែងមកទារដូរ អាហ្នឹងស្អី ? ។ ផែនការដែលផ្ដួលរំលំចុងក្រោយ ដែលថ្ងៃផ្ដាច់ព្រ័ត្រទី២៩ ខែធ្នូ ឆ្នាំ២០១៣ អាហ្នឹងជាស្អី ? ដែលជាចុងបំផុត នាំដល់មនុស្សស្លាប់នឹងរបួសនៅផ្លូវ វេង ស្រេង អាហ្នឹងជាស្អី ? ។ គិតមិនឱ្យគេកាត់ទោស ឬស្អី ត្រូវតែកាត់ ហើយម្ដងនេះ មិនមែនគុកត្រពាំងផ្លុងទេ ប្រាប់ឱ្យហើយ គឺកន្លែងផ្សេង។ តែសាលក្រមចេញគ្រឹបហើយ គឺដាក់ហើយ គ្មានទៅទុកទេ » ។
អាស៊ីសេរីមិនអាចទាក់ទងសហមេធាវី របស់លោក កឹម សុខា ដើម្បីសុំអត្ថាធិប្បាយជុំវិញការលើកឡើងរបស់លោកហ៊ុន សែន នេះបានទេនៅថ្ងៃទី១០មីនា ដោយទូរស័ព្ទចូលជាច្រើនដងពុំមានអ្នកទទួល។
ប៉ុន្តែកន្លងទៅសហមេធាវីការពារក្ដីលោក កឹម សុខា ធ្លាប់មានប្រសាសន៍ថា ការចោទប្រកាន់មកលើកូនក្ដីនេះជារឿងអយុត្តិធម៌ និងស្នើតុលាការទម្លាក់ការចោទប្រកាន់នេះ។ ចំណែកការជម្រះក្ដីសំណុំរឿងលោក កឹម សុខា ជាបន្តបន្ទាប់មកនេះមេធាវីលោក អាង ឧត្ដម ធ្លាប់ប្រាប់អាស៊ីសេរីថា បើតុលាការ ឈរលើគោលការណ៍សច្ចៈយុត្តិធម៌ពិតប្រាកដ កូនក្ដីរបស់លោក នឹងត្រូវតុលាការរកឃើញថា គ្មានកំហុសអ្វីទាំងអស់។
លោក កឹម សុខា ត្រូវបានសមត្ថកិច្ចរបបក្រុងភ្នំពេញចាប់ខ្លួនកាលពីថ្ងៃទី៣ កញ្ញា ឆ្នាំ២០១៧ ដោយចោទប្រកាន់ពីបទត្រូវរ៉ូវគ្នាជាមួយបរទេស ដើម្បីផ្ដួលរំលំរដ្ឋាភិបាលក្រុងភ្នំពេញ។ ប៉ុន្តែអង្គការជាតិនិងអន្តរជាតិ ដែលឃ្លាំមើលនយោបាយ និងសិទ្ធិមនុស្សនៅកម្ពុជា មើលឃើញថា ការចាប់ខ្លួន និងចោទប្រកាន់មេបក្សប្រឆាំងនេះ ជារឿងនយោបាយ ដោយសារលោក ហ៊ុន សែន ខ្លាចចាញ់ឆ្នោតកាលពីឆ្នាំ២០១៨ កន្លងទៅ។
ទាក់ទងនឹងការលើកឡើងរបស់លោក ហ៊ុន សែននេះ ប្រធានផ្នែកសិទ្ធិមនុស្សនៃសមាគមការពារសិទ្ធិមនុស្សអាដហុក (Adhoc) លោក នី សុខា លើកឡើងថា នេះគ្រាន់តែជាសារនយោបាយរបស់មេដឹកនាំក្រុងភ្នំពេញ ដើម្បីបំភិតបំភ័យដល់មន្ត្រីគណបក្សប្រឆាំងឱ្យចុះខ្សោយ។ ទោះជាយ៉ាងនេះក្ដី លោកថា សម្ដីរបស់លោក ហ៊ុន សែននេះ បានប៉ះពាល់យ៉ាងខ្លាំងនីតិវិធី និងសេចក្ដីសម្រេចរបស់តុលាការ ធ្វើឱ្យចៅក្រមភ័យខ្លាច បណ្ដាលឱ្យមិនអាចបំពេញការងារតាមវិជ្ជាជីវៈប្រកបដោយយុត្តិធម៌។ ឧទាហរណ៍កន្លងទៅមានករណីមួយចំនួនក្រោយពីលោក ហ៊ុន សែន និយាយ តុលាការក៏ធ្វើតាម ដូចជា ករណីធ្វើទុក្ខបុកម្នេញលើសកម្មជនគណបក្សសង្គ្រោះជាតិ និងចាប់ខ្លួនជិត ១០០នាក់ អំឡុងយុទ្ធនាការបង្ក្រាបបក្សប្រឆាំងកាលពីឆ្នាំ២០១៩ ហើយបន្ទាប់មកត្រូវបានដោះលែងភ្លាមៗ បន្ទាប់ពីលោក ហ៊ុន សែន ប្រកាសឱ្យលើកលែងពួកគេវិញនោះ៖ «ហើយអ្វីដែលសំខាន់នោះ មិនមែនទៅលើរឿងលោកនាយករដ្ឋមន្ត្រីអ្នកសម្រេច ឬក៏ប្រកាសអីចឹងទេ វាត្រូវតែមានការសម្រេចពីតុលាការ។ បើសិនជាយើងនិយាយពីប្រទេសនីតិរដ្ឋមែនទែននោះគឺថា ការសម្រេចសេចក្ដី គឺឆន្ទានុសិទ្ធិរបស់តុលាការ។ ដូច្នេះគឺលោក ហ៊ុន សែន មិនគួរណាយករឿងដែលកំពុងតែនៅក្នុងតុលាការយកមកធ្វើអត្ថាធិប្បាយទេ គឺវាមានឥទ្ធិពលណាស់ទៅដល់ស្ថាប័នតុលាការ » ។
មន្ត្រីសង្គមស៊ីវិលរូបនេះ បន្ថែមថា ការលើកឡើងរបស់ប្រមុខរដ្ឋាភិបាលក្រុងភ្នំពេញ នឹងធ្វើឱ្យនយោបាយរបស់កម្ពុជាកាន់តែអាក្រក់ទៅ និងធ្វើឱ្យខាតបង់ដល់សេដ្ឋកិច្ចជាតិ ដោយសារសហភាពអឺរ៉ុបនឹងផ្ដាច់ពន្ធEBA ជាផ្លូវការនៅពេលដ៏ខ្លីខាងមុខនេះ។ លោក នី សុខា បន្តថា សហភាពអឺរ៉ុបផ្ដាច់ពន្ធ EBA នឹងធ្វើឱ្យកម្ពុជាមានឈ្មោះមិនល្អនៅលើឆាកអន្តរជាតិ ដោយសារតែប្រទេសមួយនេះរំលោភ និងពុំមានប្រជាធិបតេយ្យពេញលេញ ហើយនឹងធ្វើឱ្យអ្នកវិនិយោគទុកមិនចង់មករកស៊ីនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។