មន្ត្រីសង្គមស៊ីវិលចាត់ទុកការផ្លាស់ប្ដូរអភិបាលខេត្តក្រចេះរបស់ក្រសួងមហាផ្ទៃ គឺជាការព្រមានដល់អភិបាលខេត្តផ្សេងទៀត ឲ្យយកចិត្តទុកដាក់បម្រើពលរដ្ឋឲ្យបានត្រឹមត្រូវ។
ការផ្លាស់ប្ដូរថ្នាក់ដឹកនាំខេត្តនេះ ក្រោយពេលមានផ្ទុះការតវ៉ារបស់ប្រជាពលរដ្ឋជុំវិញរឿងជម្លោះដីធ្លីជាមួយក្រុមហ៊ុន រហូតមានការបង្ក្រាបដោយហិង្សាពីអាជ្ញាធរ ដោយប្រើអាវុធ បាញ់រះមកលើពលរដ្ឋតវ៉ា និងការរំលោភសិទ្ធិមនុស្សនៅខេត្តក្រចេះ បានផុសឡើងគួរឲ្យព្រួយបារម្ភ។
កាលពីពេលថ្មីៗនេះ អគ្គលេខាធិការនៃក្រសួងមហាផ្ទៃ លោក ប៉ោ ភក្តិ បានសរសេរលិខិតអញ្ជើញ មន្ត្រីជាន់ខ្ពស់នៃក្រសួងមហាផ្ទៃមួយចំនួនឲ្យចូលរួម ផ្ទេរតំណែងអភិបាលខេត្តក្រចេះ លោក សរ ចំរុង ជំនួសដោយអភិបាលរងខេត្តក្រចេះ លោក វ៉ា ថន ឲ្យកាន់តំណែងជាគណបញ្ជាការឯកភាពខេត្ត និងជាអភិបាលខេត្ត។ វិធីប្រកាសតែងតាំងនឹងធ្វើឡើងនៅព្រឹកថ្ងៃទី២៦ មេសា ខាងមុខនេះ ដោយមាន រដ្ឋមន្ត្រីក្រសួងមហាផ្ទៃ លោក ស ខេង ជាគណៈអធិបតី។
មន្ត្រីជាន់ខ្ពស់សមាគមអាដហុក (Adhoc) លោក សឹង សែនករុណា រំពឹងថា អភិបាលខេត្តក្រចេះថ្មី នឹងពិនិត្យមើលករណីដែលពលរដ្ឋដង្ហោយរកដំណោះស្រាយ រឿងវិបត្តិដីធ្លីរ៉ាំរ៉ៃនៅក្រចេះ និងបញ្ហាប្រឈមនានា ដែលពលរដ្ឋកំពុងរង់ចាំដំណោះស្រាយដោយយុត្តិធម៌។ លោកអង្កេតឃើញថា ការផ្លាស់ប្ដូរអភិបាលខេត្តថ្មីនេះ គឺស្របពេលដែលរបបក្រុងភ្នំពេញអំពាវនាវឲ្យអាជ្ញាធរពាក់ព័ន្ធ បម្រើពលរដ្ឋឲ្យបានត្រឹមត្រូវ។ លោកថា ការផ្លាស់ប្តូរអភិបាលខេត្តក្រចេះនេះ ក៏ជាសញ្ញាបង្ហាញឲ្យអភិបាលខេត្តផ្សេងទៀតពិនិត្យមើលចំណុចខ្វះខាតនៃកិច្ចការងាររបស់ខ្លួនឡើងវិញ និងកែទម្រង់ឲ្យបានត្រឹមត្រូវ៖ «ជារឿងមួយដែលពញ្ញាក់ស្មារតីដល់អភិបាលខេត្តផ្សេងទៀតដែរ ដែលខ្លួនមានតួនាទីទទួលខុសត្រូវទាំងសន្តិសុខ និងសណ្ដាប់ធ្នាប់ត្រូវតែមានដុតដៃជើង។ យើងរំពឹងថា អភិបាលខេត្តថ្មីនឹងពិនិត្យមើលពលរដ្ឋដង្ហោយហៅរកដំណោះស្រាយ និងកន្លងមកមានបញ្ហារ៉ាំរ៉ៃត្រូវតែពិនិត្យ»។
យ៉ាងណាពលរដ្ឋមានវិបត្តិដីធ្លីនៅខេត្តក្រចេះ សង្ឃឹមថា អភិបាលខេត្តថ្មីនឹងយកចិត្តទុកដាក់បម្រើពលរដ្ឋដោយមិនរើសអើង និងដោះស្រាយបញ្ហាប្រឈមនានាដែលអភិបាលខេត្តមុនៗធ្វើមិនបាន។ ពួកគេអំពាវនាវឲ្យអភិបាលខេត្តថ្មី បម្រើពលរដ្ឋកុំរើសអើងនិន្នាការនយោបាយ និងកុំប្រើកម្លាំងប្រដាប់អាវុធបាញ់រះមកលើពលរដ្ឋទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។