ប្រពន្ធ​សមាជិក​បក្ស​ប្រឆាំង​ប្ដឹង​ទៅ​តុលាការ និង​អង្គការ​យូនីសេហ្វ រឿង​អាជ្ញាធរ​ឃុំ​ខ្លួន និង​ធ្វើ​ទារុណកម្ម​កុមារា កាក់ សុវណ្ណច្ឆ័យ

ដោយ មាន ឫទ្ធិ
2020-10-16
អ៊ីម៉ែល
មតិ
Share
បោះពុម្ព
ក្រុម​ប្រពន្ធ​កូន​របស់​សមាជិក​គណបក្ស​សង្គ្រោះ​ជាតិ កំពុង​ជាប់​ឃុំ ដែល​មាន​គ្នា​ជាង ១០នាក់ ព្យាយាម​ដើរ​ទៅ​ដាក់​បណ្ដឹង​ជូន​សាលាដំបូង​រាជធានី​ភ្នំពេញ ប៉ុន្តែ​ត្រូវ​កង​សន្តិ​សុខ​ខណ្ឌ ៧មករា​ជា​ច្រើន​នាក់​រារាំង នៅ​ព្រឹក​ថ្ងៃ​ទី១៦ ខែ​តុលា ឆ្នាំ២០២០។
ក្រុម​ប្រពន្ធ​កូន​របស់​សមាជិក​គណបក្ស​សង្គ្រោះ​ជាតិ កំពុង​ជាប់​ឃុំ ដែល​មាន​គ្នា​ជាង ១០នាក់ ព្យាយាម​ដើរ​ទៅ​ដាក់​បណ្ដឹង​ជូន​សាលាដំបូង​រាជធានី​ភ្នំពេញ ប៉ុន្តែ​ត្រូវ​កង​សន្តិ​សុខ​ខណ្ឌ ៧មករា​ជា​ច្រើន​នាក់​រារាំង នៅ​ព្រឹក​ថ្ងៃ​ទី១៦ ខែ​តុលា ឆ្នាំ២០២០។
រូប៖ ពលរដ្ឋ

ក្រុម​ប្រពន្ធ​កូន​របស់​សមាជិក​គណបក្ស​សង្គ្រោះ​ជាតិ​ដែល​កំពុង​ជាប់​ឃុំ ​នៅ​ព្រឹក​ថ្ងៃ​ទី១៦​ ខែ​តុលា ​នាំគ្នា​ដាក់​បណ្ដឹង​ទៅ​តុលា​ការ​ក្រុង​ភ្នំពេញ​ និង​ដាក់​ញត្តិ​ទៅ​អង្គការ​យូនីសេហ្វ (UNICEF) ពាក់ព័ន្ធ​ករណី​អាជ្ញាធរ​ក្រុងភ្នំពេញ ​បាន​ចាប់​ឃុំខ្លួន ​និង​ធ្វើ​ទារុណកម្ម​លើ​កុមារា​ កាក់​ សុវណ្ណច្ឆ័យ ​ដែល​ជា​កូន​ប្រុស​របស់​អ្នកទោស​នយោបាយ ​កាក់ កុម្ភារ។ ក្រុម​ស្ត្រី​អ្នក​តវ៉ា​ ក៏បាន​ស្រែក​តវ៉ា ​និង​លើក​បដា ​ទាមទារ​ឲ្យ​តុលាការ​ដោះ​លែង​ប្តី​របស់​ពួកគាត់​ឲ្យ​មាន​សេរីភាព​ឡើង​វិញ​ដែរ។ ​រីឯ​កង​កម្លាំង​សមត្ថកិច្ច ​និង​សន្តិ​សុខ​ខណ្ឌ ៧មករា​ ក៏​តាម​រារាំង​ក្រុម​អ្នក​តវ៉ា​ទាំង​នោះ​តាម​ទម្លាប់ ​ប៉ុន្តែ​ពុំ​មាន​អំពើ​ហិង្សា​កើតឡើង​ធ្ងន់ធ្ងរ​នោះ​ទេ។

ក្រុមស្ត្រី​អ្នកតវ៉ា​ដែល​មានគ្នា​ប្រមាណ​ជាង​១០នាក់​ បានជួបជុំគ្នា​នៅម្តុំអាង​ទឹកអូឡាំពិក ហើយ​នាំ​គ្នា​ដើរ​ទៅដាក់​បណ្តឹង​ជូន​សាលាដំបូង​រាជធានីភ្នំពេញ ​ប៉ុន្តែភ្លាមៗនោះ​ មានក្រុមសមត្ថកិច្ច ​និងសន្តិ​សុខ​ខណ្ឌ៧មករា​ជាច្រើននាក់ ​បាន​ព្យាយាម​រារាំង​ពួកគេមិន​ឲ្យចូល​ទៅមុខ​តុលាការ​នោះទេ។បន្ទាប់​មក​ក្រុមសន្តិសុខ ​និងសមត្ថកិច្ច ​អនុញ្ញាត​ឲ្យស្ត្រី​អ្នកតវ៉ា​ពីរនាក់​គឺប្រពន្ធរបស់​លោក​ ស៊ុន ​ធន ​និង​ប្រពន្ធ​របស់​លោក ​កាក់ ​កុម្ភារ ​ដែល​​ត្រូវជាម្តាយ​របស់កុមារា​ កាក់ ​សុវណ្ណច្ឆ័យ ​ ទៅដាក់​បណ្តឹងនៅ​តុលាការ។

ក្រោយដាក់​បណ្តឹងរួច ​ក្រុមស្ត្រីទាំងនោះ​ បាននាំគ្នាដើរស្រែ​កតវ៉ា​និងលើក​បដា​ទាមទារ​ឲ្យ​ដោះលែងស្វាមី​ ​និងទោស​មនិសការ​ទាំងអស់​ នៅតាម​ចញ្ចើមផ្លូវ​ឆ្ពោះទៅ​ដាក់ញត្តិ​នៅអង្គការ​យូ​នី​សេហ្វ​(UNI​CEF)។ ការដើរ​តវ៉ានេះ ​ត្រូវបាន​ក្រុមសមត្ថកិច្ច ​និងសន្តិសុខ​ខណ្ឌ៧មករា​ តាម​រារាំង​និងរុញច្រាន​​​ស្ត្រីទាំង​នោះ​ជាបន្តបន្ទាប់​ ដោយ​មិនអនុញ្ញាត​ឲ្យដើរ​ថ្មើជើង​នោះទេ ​ក្រោម​ហេតុ​ផលប៉ះពាល់​ស​ណ្តា​ប់​ធ្នាប់។ ការទប់ស្កាត់នេះ ​បណ្តាល​ឲ្យមានការ​ប៉ះទង្គិច​ពាក្យសម្តី ​តែមិន​បង្កឲ្យ​អំពើហិង្សា​នោះទេ ហើយ​ស្ត្រីទាំងនោះ ​សម្រេច​ចិត្តនាំគ្នា​ឡើង​ជិះមូតូកង​បី​ទៅអង្គការ​យូនីសេហ្វ ​ដើម្បី​បញ្ជៀស​អំពើ​ហិង្សា។

ប្រពន្ធ​របស់​អ្នកទោស​នយោបាយ​​ លោក​ កាក់​ កម្ភារ​ និង​ត្រូវជា​ម្តាយរបស់កុមារារងគ្រោះ ​កាក់​ សុ​វណ្ណ​ច្ឆ័យគឺ​ លោកស្រី​ ព្រហ្ម ចន្ថា​ រៀបរាប់ថា ​ការសម្រេច​ដាក់បណ្តឹងទៅតុលាការ​ និង​ដាក់ញត្តិសុំ​អន្តរាគមន៍​ពីអង្គការយូនីសេហ្វនេះ​ ព្រោះលោកស្រី​ ចង់ឲ្យ​តុលាការ​ផ្តន្ទាទោស​លើនគរបាលប៉ុស្តិ៍​​ចាក់​អង្រែលើ​ ក្នុងនោះមានមេប៉ុស្តិ៍ ​លោក​ ជា ​រតនា ​ដែលបាន​ចាប់ឃុំខ្លួន ​និងធ្វើទារុណកម្ម​លើកូន​ប្រុស​របស់​លោកស្រី។ លោកស្រី ​បញ្ជាក់ថា ​អង្គការយូនីសេហ្វ ​ដែលធ្វើការ​ការពារនិងលើកកម្ពស់ សិទ្ធិ ​និង​សុខ​ភាពកុមារ ​បាន​ទទួលយក​ញត្តិរបស់​លោកស្រី​ ហើយ​សន្យាផ្តល់​ចម្លើយ​ក្នុង​ពេលឆាប់​ៗ៖ «ខ្ញុំទាមទារឲ្យតុលាការរកយុត្តិធម៌ឲ្យពួកខ្ញុំវិញ។ ​ប្រសិនបើតុលាការមានភាពសុក្រិត មានភាពយុត្តិធម៌ពិតមែន ត្រូវតែយកអ្នកដែលធ្វើបាបកូនខ្ញុំ មកផ្តន្ទាទោស​តាមច្បាប់ ហើយខ្ញុំអត់មានទាមទារសំណងអីទេ។ ក្មេងអត់ទាន់គ្រប់អាយុទេ ហើយចាប់ពីបទស្អីគេ គ្រាន់តែទៅរើសទង់ជ័យបក្សដែលគេរំលាយចោល ហើយចោរចូលទៅធ្វើឲ្យបែកបាក់ និងលួចឆក់អស់រលីង គាស់អស់រលីងហើយ តែគ្រាន់តែកូនខ្ញុំចូលទៅរើសទង់ជ័យបក្សសោះខុសដែរ។ ខ្ញុំទាមទារឲ្យយកគាត់ប៉ុលិសនោះ មកផ្តន្ទាទោសតាមច្បាប់ ព្រោះអត់មានទៅចប់ក្មេង​អត់ទាន់​គ្រប់​អាយុ មកធ្វើបាបធ្វើទារុណកម្មលើកូនខ្ញុំចឹងទេ ហើយឃុំ៤៨ម៉ោងទៀត។ ខ្ញុំខឹងខ្លាំងណាស់ ព្រោះកូន​ខ្ញុំ គឺ​ខ្ញុំ​ស្រលាញ់ថ្នមដូចកែវមិនដែលធ្វើអីផង»

ម្តាយ​របស់​កុមារារងគ្រោះរូបនេះ​​បន្តថា ​ក្រោយ​ដោះលែង​មកវិញ កូនប្រុស​លោកស្រី​ មានសុខ​ភាព​ធម្មតា ​ប៉ុន្តែ​មានស្មារតី​ខុសប្រក្រតី​ជាងមុន​ដូចជា​មានអារម្មណ៍​ភ័យខ្លាច​ ក្រោយការ​ឃុំខ្លួន​នៅទី​ងងឹត​ម្នាក់ឯង​​ និងសម្លុត​សួរចម្លើយ​ ព្រមទាំង​ធ្វើទារុណកម្ម​លើរាង​កាយ​ជាដើម។

ទាក់ទងនឹងករណីនេះ ​អាស៊ីសេរី មិនអាច​សុំការឆ្លើយតប​ពីអ្នកនាំពាក្យ​ស្នងការដ្ឋាននគរបាលរាជ​ធានីភ្នំពេញ​ លោក ​សាន​ សុខសីហា​ និងអធិការនគរបាលខណ្ឌមានជ័យ​ លោក ​ម៉េង​ វិមានតារា​បានទេ​ ដោយ​ទូរស័ព្ទ​ចូល​ជាច្រើនដង​ តែពុំ​មានអ្នកទទួល ​នៅថ្ងៃទី​១៦​ តុលា។

ចំណែក​អ្នកនាំ​ពាក្យអគ្គស្នង​ការ​នគរបាលជាតិ ​លោក ឆាយ​ គឹមខឿន​ ថ្លែងថា ​ករណីនេះ​ មាន​​ព័ត៌មាន​តែពី​ភាគីម្ខាង​ ហើយ​ភាគីដើម​ចោទ​ ក៏បានប្តឹង​ទៅ​តុលាការ​រួចហើយ​ដែរ ​ដូច្នេះ​សមត្ថកិច្ច នឹង​មិនស៊ើប​អង្កេតករណី​នេះទេ ​ប្រសិនបើ​គ្មានបញ្ជា​ពី​តុលាការ៖ «ខ្ញុំដូចអត់មានអីទៅឆ្លើយតប​ជាមួយ​ពាក្យបណ្តឹតផ្តេសផ្តាស់ចឹងទេ  បើគាត់ប្តឹងទៅតុលាការ តើលោកឯងឲ្យខ្ញុំឆ្លើយតបថាម៉េច។បើប្តឹងមកខ្ញុំ អាហ្នឹងខ្ញុំឆ្លើយតប បាន។ បើតុលាការ លោកសម្រេចថា ហេតុផលត្រឹមត្រូវ លោកចេញ​ដីកាបង្គាប់បញ្ជាមកហើយ ខាងអាជ្ញាធរគេនឹងអនុវត្តតាមបង្គាប់របស់តុលាការហើយ»

កុមារា​ កាក់​ សុវណ្ណច្ឆ័យ គឺ​ជា​កូនប្រុស​របស់​សកម្មជន​គណបក្ស​សង្គ្រោះ​ជាតិ ​លោក ​កាក់ ​កុម្ភារ ដែល​កំពុង​ជាប់ឃុំក្នុង​ពន្ធនាគារ​ព្រៃស​ជាមួយ​សកម្មជន​បក្ស​ប្រឆាំង​ជាង​២០​នាក់ទៀត។ កុមារា​រូប​នេះ​ មាន​ជំងឺ​អូទីហ្សឹម​ពី​កំណើតដែលធ្វើឲ្យគាត់ធ្វើសកម្មភាពដដែលៗ និង និយាយទៅមុខទៅ​ក្រោយ។ ​អាជ្ញាធរ​របប​ក្រុងភ្នំពេញ ចាប់​ឃុំ​ខ្លួន​កុមារា កាក់ សុវណ្ណច្ឆ័យ អស់​រយៈពេល ២ថ្ងៃ​កាលពី​ដើម​ខែ​តុលា​នេះ ​ដោយសារតែ​បាន​ចូល​ទៅ​ប្រមូល​ទង់​គណបក្ស​សង្គ្រោះ​ជាតិ​នៅ​ឯ​ទីស្នាក់ការ​កណ្ដាល​គណបក្ស​នេះ។ នគរបាលប៉ុស្តិ៍​ចាក់អង្រែលើ ​បាន​ចាប់​កុមារា​រូប​នេះ ​ដាក់ខ្នោះ ​រួច​ថតរូប​កុមារា​រូប​នេះ​ផ្សព្វផ្សាយ​នៅ​លើ​បណ្ដាញ​សង្គម។ កាន់តែ​ធ្ងន់ធ្ងរ​ជាង​នេះ​ទៀត កុមារា​រូប​នេះ ប្រាប់​អាស៊ី​សេរី​ក្រោយ​ពេល​ដោះ​លែង​ថា មន្ត្រី​ប៉ូលិស​នៅ​ប៉ុស្តិ៍​នគរបាល​ចាក់អង្រែលើ​ ក្នុងខណ្ឌមានជ័យ​ បាន​វាយ​ដុំ​លើ​ខ្លួន​ប្រាណ និង​ដាល់​ផ្ទៃមុខ​ខ្លួន​ជា​ច្រើន​ដៃ​ក្នុង​ពេល​ឃុំខ្លួន។ ក្រោយ​ឃុំខ្លួននៅ​ក្នុងប៉ុស្តិ៍ នគរបាល​ចាក់អង្រែ​លើ១យប់រួច​ កុមាររូបនេះ​ ត្រូវបាន​បញ្ជូន​ទៅឃុំខ្លួន​និងសួរចម្លើយ​នៅស្នង​ការ​នគរបាលរាជធានីភ្នំពេញ​មួយយប់ទៀត ​មុននឹង​ដោះលែងវិញ ​ក្រោយបង្ខំឲ្យ​ធ្វើ​កិច្ច​សន្យា​សារភាព និង​ថតវីដេអូ​សុំទោស​ជាសាធារណៈ។

អ្នកនាំពាក្យ​សមាគមការពារ​សិទ្ធិមនុស្ស​អាដហុក ​លោក​ ស៊ឹង ​សែនករុណា​ ជំរុញឲ្យ​ស្ថាប័ន​ពាក់ព័ន្ធ​ទាំងអស់ ​ពន្លឿន​ការ​ស្រាវជ្រាវ​ករណី​ហិង្សានេះ ​និងចាត់​វិធានការ​ទៅតាម​ច្បាប់​ ដោយ​មិនគួរ​បែខ្នង​ដា​ក់​ប្រជាពលរដ្ឋ​នោះទេ។ លោក ​ពិនិត្យឃើញថា​ ទង្វើ​របស់​សមត្ថកិច្ច​ដែល​ថតរូបកុមារា ​កាក់ ​សុវណ្ណ​ច្ឆ័យ ​ទាំងដៃជាប់ខ្នោះ​ហើយបង្ហោះ​ក្នុងបណ្តាញសង្គម​ គឺជាទង្វើរំលោភសិទ្ធិកុមារ​ធ្ងន់ធ្ងរទៅហើយ ដូច្នេះ​ប្រសិនបើ​មានអំពើ​ហិង្សាលើ​កុមាររូបនោះ​ថែមទៀត ​គឺកាន់តែ​ល្មើស​ផ្លូវ​ច្បាប់​ធ្ងន់ធ្ងរ៖ «ប្រសិនបើតុលាការទទួលពាក្យបណ្តឹងហើយចាត់ការទៅ​តាមនីតិវិធី គឺ​ជា​រឿង​ល្អ​ប្រសើរ​បំផុត ដើម្បី​ធ្វើយ៉ាងណាបញ្ចប់​អំពើនិទណ្ឌភាព ហើយប្រសិនបើ​មិនមាន​​វិធានការ​រក​យុត្តិធម៌​ណា​មួយ​មក​ដល់កុមារទេ មកដល់ក្រុមគ្រួសារពួកគាត់ទេ គឺមានន័យថា​អំពើ​បែប​នេះ វា​នឹង​កើត​មាន​ត​ទៅ​ទៀត»

តាមក្រម​ព្រហ្មទណ្ឌ​មាត្រា ២១០ ​ចែង​ថា ទារុណកម្ម ឬ​អំពើ​ឃោរឃៅ ដែល​ប្រព្រឹត្ត​ទៅ​លើ​បុគ្គល​ណា​មួយ​នោះ ត្រូវ​ផ្ដន្ទាទោស​ដាក់​ពន្ធនាគារ​ពី ៧ឆ្នាំ​ដល់ ១៥ឆ្នាំ។ លើស​ពី​នេះ ប្រសិន​បើ​ការ​ប្រព្រឹត្ត​អំពើ​ទារុណកម្ម និង​អំពើ​ឃោរឃៅ​បែប​នេះ លើ​បុគ្គល​ទន់​ខ្សោយ​ដោយ​មូលហេតុ​នៃ​អាយុ លើ​ស្ត្រី​មាន​គភ៌ ឬ​លើ​បុគ្គល​ទន់​ខ្សោយ ពិសេស​ដោយ​ហេតុ​នៃ​ជំងឺ ឬ​ពិការភាព អាច​ផ្ដន្ទាទោស​ចាប់​ពី ១០ឆ្នាំ​ទៅ ២០ឆ្នាំ។

ពាក់ព័ន្ធ​នឹង​ករណី​ចាប់​ឃុំខ្លួន និងធ្វើទារុណកម្មលើ​កុមារា កាក់ សុវណ្ណច្ឆ័យ នេះដែរ ប្រធាន​ផ្នែក​ទំនាក់​ទំនង​នៃ​អង្គការ​យូនីសេហ្វ ដែល​ធ្វើការ​ពាក់ព័ន្ធ​នឹង​សិទ្ធិ​កុមារ អ្នកស្រី រូឌីណា វ៉ូចវ៉ូដា (Rudina Vojvoda) ប្រាប់​អាស៊ី​សេរី​តាម​សារ​អេឡិចត្រូនិក​ កាលពីដើម​សប្តាហ៍នេះ​ថា កុមារ​គ្រប់រូប​មិន​ត្រូវ​ប្រឈម​នឹង​អំពើ​ទារុណកម្ម ឬ​លក្ខខណ្ឌ​នៃ​ការ​ឃុំឃាំង​បែប​អមនុស្សធម៌​ឡើយ។ អ្នកស្រី​​ពន្យល់​ថា ការ​ឃុំ​ខ្លួន​កុមារ មាន​ន័យ​ថា ជា​ការ​ដក​សិទ្ធិ​សេរីភាព​ផ្ទាល់​ខ្លួន​របស់​ពួកគេ ហើយ​អាច​បំផ្លាញ​ដល់​សុខភាព និង​ការអ​ភិវឌ្ឍន៍​របស់​កុមារ។ អ្នកស្រី​បន្តថា ផលវិបាក​នៃ​ទង្វើ​នេះ ធ្វើ​ឲ្យ​កុមារ​បាត់បង់​កុមារភាព​របស់​ពួកគេ ហើយ​អាច​បន្សល់​ទុក​នូវ​ស្លាកស្នាម​ជ្រាលជ្រៅ​នៅ​ក្នុង​ជីវិត​របស់​កុមារ និង​ប៉ះពាល់​ដល់​គ្រួសារ និង​សង្គម​ទាំង​មូល៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល