លោក កឹម សុខា បន្ត​លើក​ឡើង​ពី​ភាព​ស្អាតស្អំ និង​ជំហរ​អហិង្សា​របស់​លោក

ដោយ សុជីវី
2020-10-29
Share
កឹម សុខា លោក កឹម សុខា ប្រធាន​គណបក្ស​សង្គ្រោះ​ជាតិ កាល​ពី​មិន​ទាន់​ជាប់​ឃុំឃាំង។
រូប៖ ហ្វេសប៊ុក​លោក កឹម សុខា

លោក កឹម សុខា ប្រធាន​គណបក្ស​សង្គ្រោះ​ជាតិ បន្ត​លើក​ឡើង​ពី​ភាព​ស្អាតស្អំ​របស់​លោក និង​អរគុណ​ដល់​ក្រុម​ប្រទេស​ប្រជាធិបតេយ្យ និង​ប្រជាពលរដ្ឋ​ខ្មែរ ដែល​ឈឺឆ្អាល​នឹង​សុខទុក្ខ​របស់​លោក​ ក្នុង​ពេល​លោក​កំពុង​ជាប់​បម្រាម​នយោបាយ។ អ្នក​តាម​ដាន​ស្ថានការណ៍​យល់​ថា មេ​បក្ស​ប្រឆាំង​រូប​នេះ​ត្រូវ​តែ​ធ្វើសកម្មភាព​ឱ្យ​បាន​ច្រើន ដើម្បី​រក្សា​ប្រជាប្រិយភាព។

លោក កឹម សុខា បង្ហោះសារលើហ្វេសប៊ុកនៅថ្ងៃទី២៩ តុលា ដោយ​លើក​យក​ពាក្យ​ទំនៀម​ខ្មែរ​មួយ​ឃ្លា​ថា «មាស​ទឹក​ដប់ ទោះបី​គេ​ទម្លាក់​ក្នុង​ភក់​ជ្រាំ ក៏​នៅ​តែ​មាស​ទឹក​ដប់ នៅ​តែ​មាន​តម្លៃ​ដដែល»។ លោក​បកស្រាយ​ថា មនុស្ស​បរិសុទ្ធ​មាន​គុណ​តម្លៃ​ពិត ទោះ​ជា​រង​ការ​ចោទ​ប្រកាន់ មួលបង្កាច់ ជេរប្រមាថ​ លាប​ពណ៌ មាន ឬ​គ្មាន​តួនាទី ឬ​ឋានៈ​បុណ្យស័ក្ដិ​ធ្លាក់​ដល់​ណា​ក៏ដោយ ក៏​អ្នក​ទាំងឡាយ​ដែល​ជា​គតិ​បណ្ឌិត​ពិត នៅ​តែ​ស្វះស្វែង​ទទួល​ស្គាល់ ផ្តល់​តម្លៃ និង​គោរព​ដល់​បុគ្គល​ដែល​តម្កល់​នូវ​គុណ​តម្លៃ​នោះ​ដែរ។

លោក​ កឹម សុខា ក៏បាន​ថ្លែង​អំណរគុណ​ដល់​ពលរដ្ឋ​ខ្មែរ​ទាំង​ក្នុង​ និង​ក្រៅ​ប្រទេស ដែល​គាំទ្រ​ជំហរ​អហិង្សា ការ​មិន​យក​ខ្មែរ​ណា​ជា​សត្រូវ និង​ភាព​តស៊ូ​អត់​ធ្មត់​របស់​លោក ព្រម​ទាំង​គោរព​ស្រឡាញ់​រូបលោក​ ដោយ​ការ​មក​សួរ​សុខទុក្ខ​ដល់​គេហដ្ឋាន ស្កាត់​ជួប​នៅ​ទី​សាធារណៈ និង​ផ្ញើ​សារ​ពី​ចម្ងាយ​ ជាដើម។ ជាង​នេះ​ទៅទៀត លោក​អរគុណ​ដល់​ក្រុម​ប្រទេស​ប្រជាធិបតេយ្យ​ដែល​នៅ​តែ​គោរព និង​ផ្តល់​តម្លៃ​ដល់​រូបលោក​ តាម​រយៈ​ការ​ចាត់​ឱ្យ​មន្ត្រីទូត​តំណាង​ប្រទេស​របស់​ខ្លួន​ ទៅ​ជួប​លោក​ដល់​គេហដ្ឋាន ឬ​ទៅ​ជួប​នៅ​ស្ថាន​ទូត ដើម្បី​សួរ​សុខទុក្ខ និង​សម្ដែង​កង្វល់​ចំពោះ​ស្ថានភាព​សិទ្ធិ​សេរីភាព និង​សុវត្ថិភាព​របស់​លោក​រូបលោក។

មួយ​រយៈពេល​ចុងក្រោយ​នេះ លោក កឹម សុខា តែង​បង្ហោះ​រូបភាព និង​វីដេអូ​លើ​បណ្តាញ​សង្គម​ជា​ញឹកញាប់​ស្ដី​អំពី​ការ​ងារ​មនុស្ស​ធម៌​របស់​លោក​ និង​ជំនួប​ជាមួយ​មន្ត្រីទូត​បរទេស​ទាំងឡាយ។ សារ​របស់​លោក​ កឹម សុខា អម​ជាមួយ​រូបភាព​ទាំង​នោះ ច្រើន​តែ​ផ្ដោត​ទៅ​លើ​គុណធម៌​មេដឹកនាំ ​ការ​ចង់​ឃើញ​ខ្មែរ​រួបរួម​គ្នា ការ​បញ្ឈប់​វប្បធម៌​លាប​ពណ៌ និង​ការ​សងសឹក គោលការណ៍​អហិង្សា និង​ភាព​ស្អាត​ស្អំ​របស់​លោក​ក្នុង​នាម​ជា​មេ​ដឹក​នាំ​បក្ស​ប្រឆាំង។

ទោះ​ជា​យ៉ាង​ណា សារ​សន្តិភាព​របស់​លោក កឹម សុខា ទាំង​នេះ ហាក់​មិន​ទាន់​អាច​បន្ទន់​ចិត្ត​របប​ក្រុង​ភ្នំពេញ ឱ្យ​លើក​លែង​ការ​ចោទ​ប្រកាន់ និង​ផ្តល់​សេរីភាព​ពេញលេញ​ដល់​រូបលោក​វិញ​នៅ​ឡើយ​ទេ។ ផ្ទុយ​ទៅវិញ កាល​ពី​ពេល​ថ្មីៗនេះ លោក​នាយក​រដ្ឋមន្ត្រី ហ៊ុន សែន បាន​ប្រកាស​ជា​ថ្មី​ម្ដង​ទៀត​ថា លោក​នឹង​មិន​ចរចា​ជាមួយ​គណបក្ស​ប្រឆាំង​នោះ​ឡើយ ព្រោះ​លោក​ថា ជា​គណបក្ស​ខុស​ច្បាប់។ បុរស​ខ្លាំង​រូប​នេះ​បញ្ជាក់​ថា មន្ត្រី​បក្ស​ប្រឆាំង​ណា ដែល​កំពុង​ជាប់​បណ្ដឹង ឬ​ត្រូវ​តុលាការ​កាត់​ទោស​រួច​ហើយ​នោះ ត្រូវ​តែ​ប្រឈម​មុខ​នឹង​ផ្លូវ​ច្បាប់​ជាមុន​សិន ទើប​អាច​និយាយ​គ្នា​ជា​មួយ​លោក​បាន៖ «ខ្ញុំ​មិន​ត្រូវ​ការ​ចរចា​ជាមួយ​អ្នកណា​ទាំងអស់​។ អ្នក​ដែល​ធ្វើ​ខុសច្បាប់ គឺ​មានតែ​តុលាការ​មួយ​គត់ ហើយ​អ្នក​ដែល​បាន​តុលាការ​កាត់ទោស​ហើយ ត្រូវ​មក​ជាប់គុក​សិន​។ បន្ទាប់ពី​ជាប់គុក​ហើយ អាហ្នឹង​ចាំ​និយាយ​គ្នា​។ អ្នកឯង​រួចផុត​ពី​គុក បង្កើត​បក្ស​នយោបាយ អាហ្នឹង​ជា​សិទ្ធិ​របស់​អ្នកឯង​។ អ៊ីចឹង​មនុស្ស​មួយ​ចំនួន​ថា រង់ចាំ​ដំណោះស្រាយ​នយោបាយ ខ្ញុំ​ប្រកាស​ថា អត់​មាន​។ ស៊ីសង​លើ​អា​សែន មិន​និយាយ​រក​ ចប់»។

តុលាការ​របប​លោក ហ៊ុន សែន ចោទ​ប្រកាន់​លោក កឹម សុខា ពី​បទ“សន្ទិដ្ឋិភាព” ឬ​​ការ​​ត្រូវ​រ៉ូវ​គ្នា​​​ជាមួយ​បរទេស​ ដើម្បី​ផ្ដួល​រំលំ​រដ្ឋាភិបាល។ លោក​បាន​ជាប់​ឃុំ​ក្នុង​ពន្ធនាគារ​ និង​ក្នុង​ផ្ទះប្រមាណ២ ឆ្នាំ មុន​នឹង​ត្រូវ​បាន​តុលាការ​បន្ធូរបន្ថយ​បម្រាម​មួយ​ចំនួន​។ តុលាការ​បាន​អនុញ្ញាត​​ឱ្យ​លោក​មាន​សេរីភាព​ធ្វើ​ដំណើរ​នៅ​ក្នុ​ង​ប្រទេស ប៉ុន្តែ​ហាម​ដាច់​ខាត​មិន​ឱ្យ​លោក​ធ្វើ​សកម្មភាព​នយោបាយ​ឡើយ។ ​ចំណែក សវនាការ​សំណុំ​រឿង​របស់​លោក​វិញ តុលាការ​បាន​ផ្អាក​ជាច្រើន​ខែ​មក​ហើយ ដោយ​មិន​ទាន់​កំណត់​ពេល​ជា​ថ្មី​ទៀត​នៅ​ឡើយ ទោះ​ជា​មាន​សំណើ​ផ្លូវ​ការ​ពី​ក្រុម​មេធាវី​លោក កឹម សុខា យ៉ាង​ណា​ក្តី។

សហស្ថាបនិក​វិទ្យាស្ថាន​ប្រជាធិបតេយ្យ​កម្ពុជា បណ្ឌិត សេង សារី ថ្លែង​ថា ​មក​ទល់​ពេល​នេះ គណបក្ស​កាន់​អំណាច​មិន​ព្រម​បន្ធូរបន្ថយ​បរិយាកាស​នយោបាយ​នៅ​ឡើយ​ទេ ដូច្នេះ​សកម្មភាព​របស់​លោក កឹម សុខា ហាក់​មិន​បាន​ហុច​ផ្លែផ្កា​អ្វី​នោះ​ឡើយ។ លោក​ជឿ​ថា បើ​ចង់​ឱ្យ​គណបក្ស​កាន់​អំណាច​វិល​មក​រក​តុចរចា ទាល់តែ​ថ្នាក់​ដឹក​នាំ​បក្ស​សង្គ្រោះ​ជាតិ​បែក​បាក់​គ្នា ប៉ុន្តែ​នេះ​មិន​មែន​ជា​ជម្រើស​ល្អ​ឡើយ​សម្រាប់​មេ​បក្ស​ប្រឆាំង៖ «ខ្ញុំ​មើល​ឃើញ​ថា សកម្មភាព​បែបនេះ​មិន​អាច​បន្ទន់​ចិត្ត​មេដឹកនាំ​គណបក្ស​កាន់​អំណាច​បាន​ទេ។ អ្វី​ដែល​បន្ទន់​ចិត្ត​មេដឹកនាំ​គណបក្ស​កាន់អំណាច​បានហ្នឹង គឺ​ការ​បង្ហាញ​ពី​សញ្ញាណ​បែក​បាក់​រវាង​លោក កឹម សុខា និង​លោក សម រង្ស៊ី។ អា​ហ្នឹង គឺជា​ចំណុច​មួយ​ដែល​អាច​បន្ទន់​ចិត្ត​ឱ្យ​មាន​ការ​បន្ធូរ​បន្ថយ​​បរិយាកាស​នយោបាយ​បាន ក៏​ប៉ុន្តែ​ជម្រើស​មួយ​នេះ​ជា​ជម្រើស​អត្តឃាត​នយោបាយ»។

ទោះជាយ៉ាងណា បណ្ឌិត សេង សារី មាន​ប្រសាសន៍​ថា លោក​ កឹម សុខា ​ត្រូវ​តែ​ធ្វើ​សកម្មភាព​ឱ្យ​កាន់​តែ​ច្រើន តាម​ដែល​អាច​ធ្វើ​ទៅ​បាន ដូច​ជា សកម្មភាព​មនុស្ស​ធម៌ និង​សាសនា​ជាដើម ដើម្បី​បង្ហាញ​អំពី​ទឹក​ចិត្ត​របស់​លោក និង​​រក្សា​ប្រជាប្រិយភាព។ ក្រុម​ប្រទេស​ប្រជាធិបតេយ្យ​នៅ​តែ​ទទួល​ស្គាល់​ថា ​លោក កឹម សុខា ជា​មនុស្ស​ស្អាតស្អំ និង​រង​ការ​ចោទ​ប្រកាន់​ដោយ​អយុត្តិធម៌។ ពួក​គេ​ទទូច​ដល់​របប​លោក ហ៊ុន សែន ទម្លាក់​ចោល​បទ​ចោទ​ប្រកាន់ និង​ផ្តល់​សេរីភាព​ពេញលេញ​ដល់​លោក កឹម សុខា វិញ ដើម្បី​លោក​បន្ត​ជីវិត​​នយោបាយ​ក្នុង​នាម​ជា​មេ​ដឹក​នាំ​បក្ស​ប្រឆាំង​​ធំ​ជាង​គេ​នៅ​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។