តុលាការ​បដិសេធ​សំណើ​លោក កឹម សុខា ដែល​សុំ​ឱ្យ​បើក​សេរីភាព​ខ្លះ​ជួប​ជុំ​គ្រួសារ​​ពេល​បុណ្យ​ចូល​ឆ្នាំ

0:00 / 0:00

តុលាការ​បដិសេធ​សំណើ​របស់​ប្រធាន​គណបក្ស​សង្គ្រោះជាតិ លោក កឹម សុខា ដែល​ស្នើ​សុំ​ចៅក្រម​បើក​សេរីភាព​ខ្លះ​ដល់​លោក ដើម្បី​ជួប​ជុំ​គ្រួសារ​ អំឡុង​ពេល​ពិធី​បុណ្យ​ចូល​ឆ្នាំ​ខាង​មុខ​នេះ។

ការ​ស្នើ​នេះ គឺ​បន្ទាប់​ពី​សាលាឧទ្ធរណ៍ បាន​បន្ត​បើក​សវនាការ​លើក​ទី​៥ លើ​បណ្ដឹង ជំទាស់​លោក កឹម សុខា ប្រឆាំង​សេចក្ដី​សម្រេច​របស់​សាលាដំបូង​រាជធានី​ភ្នំពេញ ដែល​កាត់​ឱ្យ​លោក​មាន​ទោស​ក្បត់​ជាតិ ២៧​ឆ្នាំ និង​ដាក់​ឃុំ​ក្នុង​ផ្ទះ រួម​ទាំង​ ដាក់​បម្រាម​មិន​ឱ្យ​ជួប​បរទេស លើកលែង​តែ​មាន​ការ​អនុញ្ញាត​ពី​តុលាការ។

មេធាវី​ការពារ​ក្ដី​លោក កឹម សុខា គឺ​អ្នកស្រី ម៉េង សុភារី ប្រាប់​អ្នកសារព័ត៌មាន​នៅ​ថ្ងៃទី២១ មីនា ថា អ្វី​ដែល​តុលាការ​សួរ​ដេញ​ដោល​នៅ​ថ្ងៃ​នេះ ពាក់ព័ន្ធ​នឹង​ការ​ធ្វើ​បាតុកម្ម​នៅ​ទីលាន​ប្រជាធិបតេយ្យ ដែល​ត្រូវ​បាន​តុលាការ​ចោទ ថា ជា​លេស​បង្កើត​ឱ្យ​មាន​អំពើ​ហិង្សា បើ​ទោះបីជា​បាតុកម្ម​ពេល​នោះ ទាមទារ​ឱ្យ​បង្កើត​គណៈកម្មការ​បោះឆ្នោត​ឯករាជ្យ​ក៏ដោយ។

អ្នកស្រី​ថា កូន​ក្ដី​របស់​អ្នកស្រី​បាន​បញ្ជាក់​ទៅ​ចៅក្រម​នៅ​ក្នុង​អង្គ​សវនាការ​ រាល់​សកម្មភាព​របស់​លោក​មិន​បាន​ប្រឆាំង​នឹង​រដ្ឋាភិបាល និង​បង្កើត​ឱ្យ​មាន​អំពើ​ហិង្សា ដូច​ចោទ​ប្រកាន់​ឡើយ។

លើស​ពី​នេះ ក្រោយ​ការ​ធ្វើ​បាតុកម្ម​អហិង្សា​នៅ​ពេល​នោះ ក៏​មាន​ការចរចា​គ្នា ក្នុង​ការ​កែ​ទម្រង់​ការ​បោះឆ្នោត​ជា​ដើម។

អ្នកស្រី ម៉េង សុភារី៖ «សកម្មភាព​ទាំងអស់​ហ្នឹង​ហើយ វា​អត់​មាន​អំពើ​ហិង្សា​កើត​ឡើង​អត់​មាន​អី​ហ្នឹង​ហើយ ដែល​វា​ស៊ីសង្វាក់​ដែល​ថា នោះ​ហើយ​ដែល​ជា​ការ​ទាមទារ​ទាក់ទង​នឹង​ទៅ ការ​បង្កើត​គណៈកម្មការ​ទាក់ទង​នឹង​ការ​បោះឆ្នោត​ពិត​មែន។ អត់​មាន​ថា ជា​លេស ដើម្បី​បង្កើត​ឱ្យ​អំពើ​ប្រទូសរាយ ដើម្បី​ច្បាម​យក​អំណាច​ខុស​ច្បាប់​ ដើម្បី​ទៅ​ធ្វើ​ផ្ដួលរំលំ​រដ្ឋាភិបាល​ស្រប​ច្បាប់​អី​គឺ​អត់​ទេ ហើយ​ក៏​បាន​បញ្ជាក់​ដែរ​ថា ការ​បង្កើត​គណបក្ស​សង្គ្រោះជាតិ​ក៏ដោយ ក្នុង​គោល​បំណង​តែ​មួយ​គត់ គឺ​ដើម្បី​ចូល​រួម​ការ​បោះឆ្នោត មិន​មែន​ទៅ​ច្បាម​អំណាច​ខុស​ច្បាប់​នោះ​ទេ»។

សាលាដំបូង​រាជធានី​ភ្នំពេញ​កាល​ពី​ថ្ងៃ​ទី៣ ខែមីនា ឆ្នាំ២០២៣ បាន​ផ្ដន្ទាទោស​ លោក កឹម សុខា ដាក់​ពន្ធនាគារ​រយៈពេល ២៧ឆ្នាំ ពី​បទ«សន្ទិដ្ឋភាព​ជាមួយ​បរទេស ឬ​ឃុបឃិត​ត្រូវ​រ៉ូវ​គ្នា​ជាមួយ​បរទេស» ដែល​ត្រូវ​បាន​ចោទ​ប្រកាន់​តាំង​ពីឆ្នាំ២០១៧។ តុលាការ​បាន​ដាក់​បម្រាម មិន​ឱ្យ​លោក កឹម សុខា ធ្វើ​នយោបាយ មិន​ឱ្យ​ចេញ​ពី​ផ្ទះ មិន​ឱ្យ​ជួប​បរទេស លើកលែង​តែ​មាន​ការ​អនុញ្ញាត​ពី​តុលាការ។

យ៉ាងណា ក្នុង​អង្គ​សវនាការ​នៅ​ថ្ងៃនេះ លោក កឹម សុខា បាន​ស្នើ​ទៅ​ប្រធាន​ក្រុម​ប្រឹក្សា​ជំនុំជម្រះ​សាលាឧទ្ធរណ៍ បើក​សិទ្ធិ​សេរីភាព​ដល់​រូប​លោក​ខ្លះ ដើម្បី​បាន ជួប​ជុំ​គ្រួសារ ស្រប​ពេល​ពិធី​បុណ្យ​ចូល​ឆ្នាំ​ជិត​មក​ដល់។ ប៉ុន្តែ​សំណើ របស់​លោក កឹម សុខា ត្រូវ​បាន​ប្រធាន​ក្រុម​ប្រឹក្សា​ជំនុំជម្រះ លោក អ៊ឹម វណ្ណៈ បដិសេធ​ដោយ​ឱ្យ​លោក​អនុវត្ត​តាម​សាលក្រម​របស់​សាលាដំបូង​រាជធានី​ភ្នំពេញ។

មន្ត្រី​សមាគម​ការពារ​សិទ្ធិ​មនុស្ស​អាដហុក (Adhoc)លោក យី សុខសាន្ត ដែល​ឃ្លាំមើល​ ក្នុង​សវនាការ​នៅ​ថ្ងៃនេះ ​កត់​សម្គាល់​ថា សវនាការ​ហាក់​មិន​មាន​ភាព​ជឿនលឿន​ ដោយ​សួរ​ដេញ​ដោល​តែ​រឿង​បាតុកម្ម។ ចំណែក​ការ​សួរ​ដេញដោល ពាក់ព័ន្ធ​នឹង​បទ​ចោទ​ ប្រកាន់ «ឃុបឃិត​ត្រូវ​រ៉ូវ​គ្នា​ជាមួយ​រដ្ឋ​បរទេស » លោក​ថា ហាក់​ដូច​ជា​មិន​ទាន់​ច្បាស់លាស់​នៅ​ឡើយ។

លោក យី សុខសាន្ត ថា ប្រសិន​បើ​រឿង​នេះ ពាក់ព័ន្ធ​នឹង​រឿង​នយោបាយ គួរ​តែ​មាន​ការ​បន្ធូរបន្ថយ​ខ្លះ។

លោក យី សុខសាន្ត៖ «ទាំងអស់​គ្នា គឺ​សុទ្ធ​តែ​ភាគី​ ដែល​ធ្វើ​ម៉េច​ជួយ​ឱ្យ​ប្រទេស​កម្ពុជា​យើង​មាន​សន្តិភាព ក៏​ដូច​ជា ពលរដ្ឋ​យើង​រួច​ចាក​ការ​អត់​ឃ្លាន ហើយ​មាន​កិត្តិយស​ស្មើ​មុខ​ស្មើ​មាត់​ដូច​ប្រទេស​ដែល​គេ​ជឿន​លឿន។ ខ្ញុំ​គិត​ថា ប្រសិន​ជា​លោក​ប្រធាន​ក្រុមប្រឹក្សាជំនុំ​ជម្រះ បើ​សិន​អនុញ្ញាត​ឱ្យ​គាត់​មាន​សេរីភាព​បន្តិច ដូច​ជា​ការ​ព្យួរ ពីព្រោះ​គាត់​នៅ​ក្នុង​ផ្ទះ ប៉ុន្តែ​អត់​បាន​ជួប​គ្រួសារ វា​រឿង​មួយ​ដែល​ធ្វើ​ឱ្យ​នៅ​ក្នុង​សង្គម​គ្រួសារ​មិន​សប្បាយ​នៅ​ពេល​ក្នុង​ពិធី​បុណ្យ​ចូល​ឆ្នាំ»។

ទោះជា​យ៉ាង​ណា សហគមន៍​ជាតិ និង​អន្តរជាតិ​ចាត់​ទុក​ថា សំណុំ​រឿង​នេះ ជា​រឿង​នយោបាយ និង​ទាមទារ​ឱ្យ​លុប​ចោល​ការ​ចោទ​ប្រកាន់ និង​ប្រគល់​សេរីភាព​ពេញលេញ​ជូន​មេ​បក្ស​ប្រឆាំង​រូប​នេះ​វិញ។

ក្រោយ​បើក​សវនាការ​ពេញ​មួយ​ព្រឹក ប្រធាន​ក្រុម​ប្រឹក្សា​ជំនុំជម្រះ លោក អ៊ឹម វណ្ណៈ កំណត់​នៅ​ថ្ងៃទី៤ ខែ​មេសា ដើម្បី​បន្ត​សវនាការ​ជា​លើក​ទី៦ ខណៈ​សំណុំ​រឿង លោក កឹម សុខា នៅ​សាលាឧទ្ធរណ៍​នេះ​ចៅក្រម​ថា អាច​នឹង​បញ្ចប់​នៅ​ខែ​ឧសភា ឆ្នាំ២០២៤៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។