អ្នកវិភាគ​ថា ការ​បន្ត​ពន្យារ​ពេល​សវនាការ​លោក កឹម សុខា គឺ​ដើម្បី​រង់ចាំ​បក្ស​ប្រឆាំង​បែក​បាក់

ដោយ ហេង រស្មី
2020-11-07
Share
កឹម សុខា ៩២២ លោក កឹម សុខា ប្រធាន​គណបក្ស​សង្គ្រោះជាតិ ក្នុង​ថ្ងៃ​សវនាការ នា​សាលាដំបូង​រាជធានី​ភ្នំពេញ នៅ​ថ្ងៃ​ទី១៥ ខែ​មករា ឆ្នាំ​២០២០។
RFA

អ្នកវិភាគ​នយោបាយ​សង្កេត​ឃើញ​ថា ការ​បន្ត​ពន្យារ​ពេល ឬ​ផ្អឹប​សំណុំរឿង​លោក កឹម សុខា មិន​បន្ត​សវនាការ​ជម្រះ​ក្ដី គឺជា​ការ​ទិញ​ពេលវេលា​របស់​គណបក្ស​កាន់អំណាច​ ដោយ​រង់ចាំ​មេ​បក្ស​ដឹកនាំ​គណបក្សប្រឆាំង​បែកបាក់​គ្នា​សិន​។ ប៉ុន្តែ​លោក សម រង្ស៊ី អះអាង​ថា លោក និង​លោក កឹម សុខា នៅតែ​ជា​មនុស្ស​តែមួយ។

អ្នកស្រាវជ្រាវ​ការអភិវឌ្ឍន៍​សង្គម​បណ្ឌិត សេង សារី យល់ថា ការ​បន្ត​ពន្យារ​ពេល​សវនាការ​លោក កឹម សុខា ជា​យុទ្ធសាស្ត្រ​គណបក្ស​កាន់អំណាច​ ដោយ​មាន​ចេតនា​មិន​ឱ្យ​គណបក្ស​សង្គ្រោះ​ជាតិ​រស់​ឡើងវិញ​។ លោក​សង្កេត​ឃើញ​ថា អ្វី​ដែល​គួរ​ឱ្យ​ចាប់អារម្មណ៍​ គឺ​មកដល់ពេលនេះ​ មិន​ទាន់​មាន​សញ្ញា​ណាមួយ​បង្ហាញ​ថា លោក កឹម សុខា បែកបាក់​ពី​លោក សម រង្ស៊ី នោះ​ទេ បើ​ទោះ​ជា​​ម្នាក់​នៅក្នុង​ស្រុក និង​ម្នាក់ទៀត​នៅ​ក្រៅ​ស្រុក​ក្ដី៖ «បច្ចុប្បន្ន​នេះ​យើង​មើល​ឃើញ​ថា ទោះបីជា​មានការ​សង្ស័យ​ ទោះ​មាន​ភាព​រកាំរកូស​ផ្ទៃក្នុង​រវាង​មេដឹកនាំ​អតីត​មេដឹកនាំ​គណបក្សប្រឆាំង​ទាំងពីរ​ក៏ដោយ ​ប៉ុន្តែ​យើង​អត់​ទាន់​​ឃើញ​មាន​សញ្ញា​បែកបាក់​គ្នា​ជា​ផ្លូវការ​នៅឡើយ​ទេ។ ដូច្នេះ ​គណបក្ស​កាន់អំណាច​លោក​ប្រយ័ត្នប្រយែង​រឿង​ហ្នឹង​ណាស់»

ទាក់ទិន​នឹង​បញ្ហា​នេះ ប្រធាន​ស្ដីទី​គណបក្ស​សង្គ្រោះជាតិ​លោក សម រង្ស៊ី មាន​ប្រសាសន៍​នៅ​ក្នុង​វេទិការ​អ្នក​ស្ដាប់​វិទ្យុ​អាស៊ីសេរី កាលពី​ថ្ងៃ​ទី​៦ វិច្ឆិកា​ថា លោក និង​លោក កឹម សុខា មិន​បែកបាក់​គ្នា​ទេ ហើយ​លោក​ទាំងពីរ​នៅតែ​ជា​មនុស្ស​តែមួយ​ដដែល។

រីឯ​នាយករង​ទទួលបន្ទុក​ផ្នែក​ឃ្លាំមើល​នៃ​សិទ្ធិមនុស្ស លីកាដូ លោក អំ សំអាត យល់ថា ការ​បន្ត​ពន្យារ​ពេល​សំណុំរឿង​លោក កឹម សុខា បែបនេះ អាច​ធ្វើ​​ឱ្យ​សាមីខ្លួន​រង​ភាព​អយុត្តិធម៌​។ លោក​សង្កេត​ឃើញ​ថា សព្វថ្ងៃ​រដ្ឋមន្ត្រី​ក្រសួង​យុត្តិធម៌ គឺ​លោក កើត រិទ្ធ កំពុង​ពន្លឿន​ដោះស្រាយ​ការ​កកស្ទះ​សំណុំរឿង​ក្ដី​នៅ​តុលាការ។ ដូច្នេះ​លោក​ថា សំណុំរឿង​លោក កឹម សុខា គួរ​ទទួល​បាន​ការ​យ​ក​ចិត្ត​ទុកដាក់​ដូច​សំណុំរឿង​ផ្សេង​ទៀត​ដែរ៖ «អ៊ីចឹង​ខ្ញុំ​យល់ថា​ ដើម្បី​បំបាត់​ភាព​សង្ស័យ​ទាំងអស់​នេះ ​តុលាការ​គួរតែ​កំណត់​កាលបរិច្ឆេទ​នៃ​សវនាការ​ទៅ​ ដើម្បី​ឱ្យ​អ្នក​ដែល​តាម​ដាម​រឿង​ហ្នឹង​បាត់​ចម្ងល់​ នៅ​ពេល​ដែល​​មាន​សាលក្រម​ពី​តុលាការ»

ការ​លើក​ឡើង​របស់​អ្នកវិភាគ និង​មន្ត្រី​សង្គម​ស៊ីវិល​បែបនេះ ខណៈ​សាលាដំបូង​រាជធានី​ភ្នំពេញ នៅតែ​ផ្អាក​ការ​ជម្រះក្ដី​សំណុំរឿង​លោក កឹម សុខា បើ​ទោះជា​ក្រុម​មេធាវី លោក គឹម សុខា បាន​ស្នើ​សុំ​ម្ដង​ហើយ​ម្ដងទៀត ឱ្យ​តុលាការ​ជម្រះក្ដី​សំណុំរឿង​លោក កឹម សុខា ឡើងវិញ​។ សាលាដំបូង​រាជធានី ភ្នំពេញ​បានសម្រេច​ផ្អាក​សវនាការ​លោក កឹម សុខា ដោយ​គ្មាន​កាលកំណត់ ​ព្រោះ​វិបត្តិ​ជំងឺឆ្លង​កូ​វីដ​-១៩ កាលពី​ខែ​មីនា​។​

ជុំវិញ​ករណី​នេះ​អាស៊ីសេរី​បាន​ព្យាយាម​សុំ​ការ​បំភ្លឺ​ពី​ប្រធាន​និង​លេខាធិការដ្ឋាន​សាលាដំបូង​រាជធានី​ភ្នំពេញ លោក អ៊ី រិន្ទ នៅ​ថ្ងៃទី​០៦ ខែវិច្ឆិកា ប៉ុន្តែ​ទូរស័ព្ទ​ហៅ​ចូល​គ្មាន​អ្នកទទួល​។ ទោះបីជា​យ៉ាងណា កាសែត (Khmer Times) បាន​ចុះផ្សាយ​កាលពី​ខែ​កញ្ញា​ថា ក្នុង​កិច្ចប្រជុំ​បិទទ្វារ​មួយ​នៅ​ទីស្តីការ​គណៈរដ្ឋមន្ត្រី លោកនាយក​រដ្ឋមន្ត្រី លោក ហ៊ុន សែន បាន​និយាយ​ថា សំណុំរឿង​របស់​លោក កឹម សុខា អាច​ពន្យារពេល​រហូត​ដល់​ឆ្នាំ​២០២៤​។​

កាល​ពី​ថ្ងៃ​ទី​២៤ ខែ​តុលា មេធាវី លោក កឹម សុខា ផែង ហេង ប្រាប់​អាស៊ីសេរី​ថា ក្រុម​មេធាវី មិន​ទាន់​ទទួល​លិខិត​ឆ្លើយតប​ពី​តុលាការ​វិញ​នៅឡើយ​ទេ ពី​សំណើសុំ​ជម្រះក្ដី​លោក កឹម សុខា ឡើងវិញ​បាន​មេធាវី​បាន​ស្នើ​ឡើង​។ លោក​មេធាវី ផែង ហេង ចង់​ឃើញ​តុលាការ​ពន្លឿន​សំណុំ​រឿង​នេះ​ដូច​សំណុំរឿង​ផ្សេងទៀត ​ដែល​ក្រសួងយុត្តិធម៌​យកចិត្តទុកដាក់​ដោះស្រាយ​ពន្លឿន​នីតិវិធី។

ទោះ​យ៉ាង​ណា​ក្ដី អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥសាន យល់​ថា តុលាការ​គ្មាន​ចេតនា​ណាមួយ​ក្នុង​ការ​ផ្អឹប​ទុក​ករណី​លោក កឹម សុខា នេះ​ទេ ហើយ​ផ្ទុយទៅវិញ​ តុលាការ​ចង់តែ​បញ្ចប់​រឿង​នេះ​ទៅវិញ​ទេ​។ លោក​ថា បញ្ហា​ដែល​ធ្វើ​តុលាការ​មិន​អាច​ទាន់​ជម្រះក្ដី​រឿង​នេះ​ ព្រោះ​បញ្ហា​ជំងឺ​កូ​វីដ​១៩ និង​បញ្ហា​ទឹកជំនន់ ​ដែល​កម្ពុជា​កំពុង​ជួបប្រទះ​៖ «ព្រោះ​ឯកឧត្ដម​ក្រសួងយុត្តិធម៌​ថ្មី ​គឺ​​គាត់​​ចង់​បញ្ចប់​រឿង​នានា​ កុំ​ឱ្យ​វែងឆ្ងាយ​តទៅទៀត​។ គាត់​ខិតខំ​ដោះស្រាយ​បាន​ច្រើន​សំណុំរឿង​ហើយ ខ្ញុំ​យល់ថា ដោះស្រាយ​បាន​ច្រើន​សំណុំរឿង​ហើយ ខ្ញុំ​យល់ថា ករណី​ កឹម សុខា រដ្ឋមន្ត្រី​ក៏​មិន​អាច​ជ្រែ​ត​ជ្រែក​បាន​ដែរ​ស្ថិត​ក្នុង​ដំណើរការ​នីតិវិធី​តុលាការ»។

អ្នកវិភាគ​ជើងចាស់​ ​បណ្ឌិត ឡៅ ម៉ុងហៃ សរសេរ​លើ​ហ្វេសប៊ុក​លោក​ថា កា​រ​ពន្យារ​សំណុំរឿង​លោក កឹម សុខា ដល់​ឆ្នាំ​២០២៤ ជា​ការ​បំពាន​សិទ្ធិ​មួយ​របស់​ជនជាប់ចោទ គឺ​សិទ្ធិ "​ត្រូវ​បាន​ជំនុំ​ជំ​រះ​ដោយ​ឥត​ពន្យារពេល​យូរ​ហួស​"​។ លោក​បន្ត​ថា យក​ល្អ​សម្រាប់​ឯករាជ្យ​ភាព​តុលាការ​ និង​ការបែងចែក​អំណាច ដូច​មាន​ចែង​ក្នុង​រដ្ឋធម្មនុញ្ញ រដ្ឋាភិបាល​គួរ​គោរព​អនុវត្ត​ច្បាប់ ហាម​លើកឡើង​នូវ​សំណុំរឿង​តុលាការ​ដែល​ស្ថិត​នៅ​ក្រោម​នីតិវិធី​ជំនុំ​ជម្រះ។ លោក កឹម សុខា ប្រធាន​គណបក្ស​សង្គ្រោះ​ជាតិ ​ត្រូវ​បាន​សមត្ថកិច្ច​ចាប់ខ្លួន​ដោយ​ចោទប្រកាន់​ពី​បទ​ក្បត់ជាតិ កាលពី​ឆ្នាំ​២០១៧​។ ប៉ុន្តែ​កាលពី​ឆ្នាំ​២០១៩ តុលាការ​បាន​បន្ធូរបន្ថយ​ការ​ត្រួតពិនិត្យ​ខ្លះ​ ដោយ​អនុញ្ញាត​ឲ្យ​លោក​អាច​ឱ្យ​ធ្វើដំណើរ​ក្នុង​ប្រទេស​បាន ប៉ុន្តែ​ហាម​ធ្វើ​នយោបាយ ​និង​ចេញ​ក្រៅ​ប្រទេស​។ លោក កឹម សុខា កាលពី​កាល​ពី​ខែ​​កញ្ញា បាន​អំពាវនាវ​ដល់​តុលាការ​ទម្លាក់​បទ​ចោទ និង​ផ្ដល់​សិទ្ធិ​ពេញលេញ​ដល់​រូបលោក​វិញ​។ លោក​ធ្លាប់​លើក​ឡើង​ថា មាស​សុទ្ធ មិន​ខ្លាច​ភ្លើង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល