អង្គការ​សមាគម​ខ្មែរ​កម្ពុជា​ក្រោម ស្នើ​របប​ក្រុងភ្នំពេញ​លើក​សំណើ​ប្រាប់​មេដឹកនាំ​វៀតណាម​ ឲ្យ​គោរព​សិទ្ធិ​មនុស្ស និង​វប្បធម៌​របស់​ពលរដ្ឋ​ខ្មែរ​កម្ពុជា​ក្រោម

ដោយ ហេង រស្មី
2019-02-26
អ៊ីម៉ែល
មតិ
Share
បោះពុម្ព
លោក សឺន ជុំជួន អគ្គលេខាធិការ​សមាគម​ខ្មែរ​កម្ពុជា​ក្រោម ដើម្បី​សិទ្ធិ​មនុស្ស និង​អភិវឌ្ឍន៍។
លោក សឺន ជុំជួន អគ្គលេខាធិការ​សមាគម​ខ្មែរ​កម្ពុជា​ក្រោម ដើម្បី​សិទ្ធិ​មនុស្ស និង​អភិវឌ្ឍន៍។
រូបថត៖ ហ្វេសប៊ុក SC Chuon

ពលរដ្ឋ​ខ្មែរ​ក្រោម​អះអាង​ថា អាជ្ញាធរ​វៀតណាម នៅ​តែ​រំលោភ​បំពាន​សិទ្ធិ​ពលរដ្ឋ​ខ្មែរ​ក្រោម បើ​ទោះ​ជា​វៀតណាម គឺ​ជា​សមាជិក​នៃ​អង្គការ​សហប្រជាជាតិ ដែល​មាន​កាតព្វកិច្ច​គោរព​សិទ្ធិ​ជនជាតិ​ដើម​ដែល​ចែង​ដោយ​អង្គការ​សហប្រជាជាតិ​ក្ដី។ ទាក់ទង​បញ្ហា​នេះ អង្គការ-សមាគម​ខ្មែរ​កម្ពុជា​ក្រោម​នៅ​កម្ពុជា ស្នើ​ដល់​មេដឹកនាំ​របប​ក្រុងភ្នំពេញ ជួយ​លើក​ឡើង​អំពី​បញ្ហា​សិទ្ធ​មនុស្ស ការ​រឹតត្បិត​សិទ្ធិ​សេរីភាព​ខាង​ការ​សិក្សា​អប់រំ​ភាសាខ្មែរ ទំនៀម​ទម្លាប់​ ប្រពៃណី វប្បធម៌​របស់​ពលរដ្ឋ​ខ្មែរ​ដើម​នៅ​កម្ពុជា​ក្រោម ក្នុង​ជំនួប​ជាមួយ​មេដឹកនាំ​វៀតណាម ដែល​នឹង​មក​ទស្សនកិច្ច​រយៈពេល​២ថ្ងៃនៅ​កម្ពុជា។

អគ្គលេខាធិការ សមាគម​ខ្មែរ​កម្ពុជា​ក្រោម ដើម្បី​សិទ្ធិ​មនុស្ស និង​អភិវឌ្ឍន៍ លោក សឺន ជុំជួន ឲ្យដឹង​ថា រដ្ឋាភិបាល​វៀតណាម នៅ​តែ​បន្ត​រឹត​ត្បិត​ការ​សិក្សា​អប់រំ​ភាសាខ្មែរ ដែល​មាន​បង្រៀន​តាម​ទី​វត្ត​អារាម​នានា​ ជា​ពិសេស​នៅ​ក្នុង​ខេត្ត​ដែល​មាន​ជនជាតិ​ខ្មែរ​ដើម​រស់​នៅ​ច្រើន ដូចជា​ខេត្ត​ព្រះត្រពាំង និង​ខេត្ត​ឃ្លាំង។ ក្រៅ​ពី​នេះ ក៏​នៅ​មាន​បញ្ហា​ចាប់​ព្រះសង្ឃ​ខ្មែរ​ក្រោម​ដាក់​គុក​ដោយសារ​តែ​ទាមទារ​ការ​គោរព​សិទ្ធិ​សេរីភាព និង​ការ​ព្យាយាម​បង្កើត​សាលារៀន​អក្សរ​ខ្មែរ​នៅ​ក្នុង​វត្ត។

លោក សឺន ជុំជួន បន្ត​ថា វៀតណាម មិន​អនុញ្ញាត​ឲ្យ​ខ្មែរ​ក្រោម​បាន​សិក្សា​អក្សរសាស្ត្រ ប្រវត្តិសាស្ត្រ ភូមិសាស្ត្រ​ខ្មែរ​ឲ្យ​បាន​ទូលំទូលាយ​ឡើយ។ ផ្ទុយ​ទៅ​វិញ វៀតណាម បាន​ឲ្យ​ខ្មែរ​ក្រោម​រៀន​ប្រវត្តិសាស្ត្រ​របស់​គេ ជាពិសេស​គឺ​ប្រវត្តិ​របស់​លោក ហូ ជី មិញ។ លោក សឺន ជុំជួន ឲ្យ​ដឹង​ដែរ​ថា បច្ចុប្បន្ន​នេះ អាជ្ញាធរ​វៀតណាម​ តម្រូវ​ឲ្យ​ពលរដ្ឋ​ខ្មែរ​កម្ពុជា សុំច្បាប់​អនុញ្ញាត នៅ​ពេល​​ប្រារព្ធ​ពិធី​បុណ្យ​ ទៅ​តាម​ទំនៀមទម្លាប់​ប្រពៃណី​របស់​ខ្មែរ​ម្ដង​ៗ​។ បន្ថែម​ពី​នេះ អាជ្ញាធរ​វៀតណាម បន្ត​តាម​ដាន ឬ​កោះ​ហៅ​ពលរដ្ឋ​ខ្មែរ​ក្រោម​ទៅ​សួរ​នៅ​ពេល​ទៅ​លេង​ស្រុក​កំណើត​ជួបជុំ​គ្រួសារ​ម្តង​ៗ ជាពិសេស​អ្នក​ដែល​គេ​ដឹង​ថា​តែង​ធ្វើ​ការ​តស៊ូ​មតិ​ប្រឆាំង​ការ​រំលោភ​សិទ្ធិ​មនុស្ស​របស់​វៀតណាម នៅ​ក្រៅ​ប្រទេស។

លោក​ សឺន​ ជុំជួន ស្នើ​ដល់​រដ្ឋាភិបាល​កម្ពុជា ជួយ​លើក​ឡើង​អំពី​បញ្ហា​ប្រឈម​របស់​ពលរដ្ឋ​ខ្មែរ​កម្ពុជា​ក្រោម​ដាក់​ជូន​មេដឹកនាំ​វៀតណាម ខណៈ​ប្រធានាធិបតី​ប្រទេស​វៀតណាម លោក ង្វៀន ហ៊្វូជុង (Nguyen Phu Trong) កំពុង​បំពេញ​ទស្សនកិច្ច ២​ថ្ងៃ នៅ​ប្រទេស​កម្ពុជា​ នៅ​ថ្ងៃ​២៥ និង​ទី​២៦ ខែ​កុម្ភៈ៖ «តាម​រយៈ​ហ្នឹង​យើង​ក៏​ស្នើ​ដល់​រដ្ឋាភិបាល​កម្ពុជា​យើង ប្រមុខ​រដ្ឋ​កម្ពុជា​យើង​នៅ​ពេល​ដែល​ស្វាគមន៍ ប្រធាន​រដ្ឋ​វៀតណាម​ តាម​រយៈ​ហ្នឹង យើង​ក៏​សូម​ឲ្យ​គាត់​ជួយ​លើក​យក​បញ្ហា​ដែល​យើង​ធ្លាប់​តែ​ធ្វើ​របាយការណ៍​ដាក់​ជូន​រដ្ឋាភិបាល​រាល់​ដង​ហ្នឹង។ លើក​បញ្ហា​ប្រាប់​ដល់​ប្រធានាធិបតី​វៀតណាម​ហ្នឹង ពិចារណា​ក្នុង​ដោះស្រាយបញ្ហា​នានា​ ដែល​ពាក់ព័ន្ធ​បញ្ហា​សិទ្ធិមនុស្ស​នៅ​ឯ​កម្ពុជា​ក្រោម​។ ខ្ញុំ​សូម​ស្នើ​ឲ្យ​រដ្ឋាភិបាល​វៀតណាម អាជ្ញាធរ​វៀតណាម​គួរតែ​មានការ​យក​ចិត្ត​ទុកដាក់​ដូច​ដែល​រដ្ឋាភិបាល​កម្ពុជា​យក​ចិត្ត​ទុកដាក់​ប្រជាជន​របស់​ខ្លួន​នៅ​កម្ពុជា​អ៊ីចឹង»

អ្នកនាំពាក្យ​រដ្ឋាភិបាល លោក ផៃ ស៊ីផាន ប្រាប់​អាស៊ី​សេរី​ថា លោក​មិន​បាន​ដឹង​អំពី​សំណើ​របស់​អង្គការ-​សមាគម​ខ្មែរ​កម្ពុជាក្រោម​ ដាក់​មេដឹកនាំ​ប្រទេស​វៀតណាម តាម​រយៈ​ជំនួប​ទ្វេ​ភាគី ក្នុង​ដំណើរ​ទស្សនកិច្ច​របស់​ប្រធានាធិបតី​វៀតណាម​នេះ​ទេ។ ចំណែក​របាយការណ៍​អំពី​ការ​រំលោភ​សិទ្ធិពលរដ្ឋ​ខ្មែរ​កម្ពុជា​ក្រោម ដែល​សមាគម​ខ្មែរ​កម្ពុជា​ក្រោម ថា​បាន​ដាក់​ជូន​រដ្ឋាភិបាល​កម្ពុជា ក៏​លោក​មិន​បាន​ដឹង​ដែរ៖«ខ្ញុំ​អត់​ដឹង​សាច់​រឿង​ហ្នឹង​សោះ អត់​ដឹង។ មិន​ដឹង​ជា​បង​ប្អូន​ខ្មែរ​កម្ពុជា​ក្រោម លោក​ស្នើ​អ្វី​ខ្លះ អត់​ដឹង​អា​លីង។ ទី​១ ខ្ញុំ​អត់​បាន​ដឹង​ពី​ការ​ដាក់​របាយការណ៍​ជូន​រដ្ឋាភិបាល​កម្ពុជា។ គាត់​ដាក់​មក​ខាង​ណា ដាក់​ពី​ថ្ងៃ​ណា ខ្ញុំ​អត់​ដឹង។ ហើយ​ទាក់ទង​នឹង​ការ​ជជែក​គ្នា ក្នុង​ជំនួប​ថ្នាក់​ដឹកនាំ​កំពូល​របស់​វៀតណាម ក៏​ខ្ញុំ​មិន​ដឹង​ដែរ»

អង្គការ​ខ្មែរ​ក្រោម​ប៉ាន់ប្រមាណ​ថា បច្ចុប្បន្ន​មាន​ពលរដ្ឋ​ខ្មែរ​ក្រោម​ប្រមាណ​ពី ៨ ទៅ ១០​លាន​នាក់​កំពុង​រស់នៅ​លើ​ដែនដី​កម្ពុជា​ក្រោម ហើយ​មាន​វត្ត​អារាម​ជិត ៥៦០​វត្ត។

អង្គការ​-សមាគម​ខ្មែរ​កម្ពុជា​ក្រោម បញ្ជាក់​ជំហរ​ថា ដរាប​ណា​វៀតណាម មិន​គោរព​សិទ្ធិ​សេរីភាព​ខ្មែរ​ក្រោម​ឲ្យ​បាន​ពេញលេញ​នោះ​ទេ ខ្មែរ​ក្រោម​នឹង​នៅ​តែ​បន្ត​ការ​តវ៉ា​ទាមទារ​ឲ្យ​វៀតណាម គោរព​កាតព្វកិច្ច​របស់​ខ្លួន​ក្នុង​នាម​ជា​ប្រទេស​សមាជិក​នៃ​អង្គការ​សហប្រជាជាតិ។

ចំណែក សហព័ន្ធ​ខ្មែរ​កម្ពុជា​ក្រោម​ដែល​មាន​មូលដ្ឋាន​នៅ​សហរដ្ឋអាមេរិក បាន​រៀបចំ​យុទ្ធសាស្ត្រ​មួយ​ចំនួន​សម្រាប់​ឆ្នាំ២០១៩ ដើម្បី​ធ្វើការ​តស៊ូ​មតិ​នៅ​លើ​ឆាក​អន្តរជាតិ ដើម្បី​ធានា​ឱ្យ​រដ្ឋាភិបាល​វៀតណាម​ផ្ដល់​សិទ្ធិ​សេរីភាព​ពេញលេញ និង​សិទ្ធិ​ស្វ័យ​សម្រេច ដល់​ពលរដ្ឋ​ខ្មែរ​កម្ពុជា​ក្រោម ដែល​កំពុង​រស់​លើ​ទឹកដី​កំណើត​ដែល​កំពុង​គ្រប់គ្រង​ដោយ​វៀតណាម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល