តុលាការខេត្តកំពង់ឆ្នាំងចោទប្រកាន់សកម្មជនបក្សប្រឆាំងម្នាក់ពីបទសមគំនិតចូលរួមប្រព្រឹត្តបទល្មើសនេសាទ។ រីឯមន្ត្រីសង្គមស៊ីវិលដែលតាមឃ្លាំមើលសំណុំរឿងនេះថា ជាការជាប់ពាក់ព័ន្ធរឿងនយោបាយច្រើនជាងករណីប្រព្រឹត្តបទល្មើស។
កូនប្រុសរបស់អ្នកស្រី ជុំ ស៊ីនឿន ឲ្យអាស៊ីសេរីដឹងនៅល្ងាចថ្ងៃទី២៣ ខែធ្នូថា ពេលនេះតុលា ការសម្រេចឃុំខ្លួនម្ដាយរបស់លោកក្នុងពន្ធនាគារបណ្ដោះអាសន្ន ក្រោយមានការចោទប្រកាន់ថា បានសមគំនិតចូលរួមប្រព្រឹត្តបទល្មើសនេសាទ។ កូនប្រុសសកម្មជនគណបក្សសង្គ្រោះជាតិ ដែលសុំមិនបញ្ចេញឈ្មោះ ព្រោះបារម្ភពីសុវត្ថិភាពលើកឡើងថា ការចោទប្រកាន់នេះ ជារឿងអយុត្តិធម៌ ព្រោះម្ដាយលោកជាមនុស្សកាន់សីលជាង ២០ឆ្នាំមកហើយ។ ដូច្នេះ គាត់មិនប្រព្រឹត្តទង្វើណា ដែលល្មើសច្បាប់នោះទេ៖ «គេប្រាប់ថា ឃុំខ្លួនបណ្ដោះអាសន្នសិនគេស៊ើបអង្កេតថែមទៀត សូមសំណូមពរដល់អង្គការសិទ្ធិមនុស្សជាតិ អន្តរជាតិឲ្យដឹងឮផង ព្រោះករណីម្តាយខ្ញុំជាការធ្វើបំពានច្បាប់តែម្តងច្បាប់នៅលើមាត់អាជ្ញាធរ។
លោកបញ្ជាក់ទៀតថា មុនពេលសមត្ថកិច្ចចាប់ខ្លួនម្ដាយលោក កាលពីពេលថ្មីៗ នេះសមត្ថកិច្ចខេត្តកំពង់ឆ្នាំងបានចាប់ខ្លួនបងថ្លៃរបស់លោកម្នាក់រួចទៅហើយ ដោយចោទប្រកាន់ថា បានប្រព្រឹត្តបទល្មើសនេសាទ។
ជុំវិញការចាប់ខ្លួន និងការបញ្ជូនសកម្មជនគណបក្សប្រឆាំងរូបនេះទៅតុលាការ អាស៊ីសេរីបានទូរស័ព្ទសុំការបំភ្លឺពីស្នងការនគរបាលខេត្តកំពង់ឆ្នាំង លោក ខូវ លី ប៉ុន្តែលោកចុចបិទទូរស័ព្ទនៅពេលឮថាហៅពីអាស៊ីសេរី។
អ្នកសម្របសម្រួលអង្គការ អាដហុក ប្រចាំខេត្តកំពង់ឆ្នាំង លោក សំ ច័ន្ទគា សង្កេតឃើញថា ដំណើររឿងដំបូងនៃការចោទប្រកាន់កូនប្រសារបស់អ្នកស្រី ជុំ ស៊ីនឿន ករណីប្រព្រឹត្តបទល្មើសនេសាទនេះ ហាក់មិនត្រឹមត្រូវទេ ព្រោះលោកទទួលព័ត៌មានថា កូនប្រសាអ្នកស្រី ជុំ ស៊ីនឿន មិនបានប្រើប្រាស់ឧបករណ៍នេសាទខុសច្បាប់ ហើយក៏មិនបាននេសាទនៅតំបន់ហាមឃាត់នោះដែរ។ មន្ត្រីសង្គមស៊ីវិលរូបនេះថា ប្រសិនបើសាច់ញាតិសកម្មជនប្រឆាំងរូបនេះស្នើសុំជំនួយផ្លូវច្បាប់សមាគម អាដហុក នឹងផ្ដល់មេធាវីជូន៖ « អ្នកដែលនេសាទជាកូនប្រសារបស់គាត់ ( អ្នកស្រី ជុំ ស៊ីនឿន ) ទេ រឿងអីបានជាចាប់ខ្លួនគាត់មកភ្ជាប់នឹងរឿងហ្នឹងអ៊ីចឹងចំណុចទាំងអស់ហ្នឹងហើយដែលយើងសង្ស័យថា ជាការគំរាមកំហែងផ្នែកនយោបាយជាជាងការអនុវត្តច្បាប់»។
អនុប្រធានគណៈកម្មាធិការប្រតិបត្តិគណបក្សសង្គ្រោះជាតិខេត្តកំពង់ឆ្នាំង លោក ដួង ចន្ត្រា ដែលកំពុងភៀសខ្លួននៅប្រទេសថៃប្រាប់អាស៊ីសេរីថា សមត្ថកិច្ចបានព្យាយាមរឹតត្បិត មិនបានឲ្យសាច់ញាតិ ឬអ្នកពាក់ព័ន្ធបានជួប អ្នកស្រី ជុំ ស៊ីនឿន ឡើយចាប់តាំងពីថ្ងៃចាប់ខ្លួន និងពេលបញ្ជូនទៅតុលាការ។ មន្ត្រីជាន់ខ្ពស់គណបក្សសង្គ្រោះជាតិរូបនេះ ស្នើទៅតុលាការឲ្យទម្លាក់ការចោទប្រកាន់លើសកម្មជនរបស់ខ្លួន ដោយអះអាងថា អ្នកស្រី ជុំ ស៊ីនឿន មិនបានប្រព្រឹត្តបទល្មើសអ្វីនោះទេ៖ «មិនត្រូវមានការចោទប្រកាន់ណាមួយ ដែលធ្វើកើតមានអយុត្តិធម៌លើមនុស្សទូទៅក៏ដូចជាលើអ្នកស្រី ជុំ ស៊ីនឿន ផងដែរ។ អ៊ីចឹងសុំឲ្យតុលាការលើកលែងការចោទប្រកាន់នេះទាំងស្រុងតែម្ដង»។
សកម្មជនគណបក្សសង្គ្រោះជាតិនៅខេត្តកំពង់ឆ្នាំង អ្នកស្រី ជុំ ស៊ីនឿន គឺជាគណៈកម្មាធិការប្រតិបត្តិស្រុក និងជាសមាជិកក្រុមប្រឹក្សាស្រុកជលគិរី ខេត្តកំពង់ឆ្នាំង ប៉ុន្តែក្រោយរដ្ឋាភិបាលរំលាយគណបក្សសង្គ្រោះជាតិ អ្នកស្រីមិនបានធ្វើសកម្មភាពនយោបាយអ្វីឡើយ។
អ្នកស្រីត្រូវសមត្ថកិច្ចចាប់ខ្លួនពេលជូនកូនទៅសម្រាលកូននៅមន្ទីរពេទ្យកាល់ម៉ែតក្នុងរាជធានីភ្នំពេញកាលពីថ្ងៃទី២២ ខែធ្នូ។ ការចោទប្រកាន់មកលើអ្នកស្រីនៅពេលនេះ ខណៈសកម្មជនគណបក្សសង្គ្រោះជាតិនៅតែកំពុងការធ្វើទុក្ខបុកម្នេញ តាមរយៈការចោទប្រកាន់ ការចាប់ខ្លួន និងការលួចវាយធ្វើបាបពីជនមិនស្គាល់មុខជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។