អ្នកឃ្លាំមើលសិទ្ធិមនុស្ស និងមន្ត្រីជាន់ខ្ពស់គណបក្សប្រឆាំងថ្កោលទោសអាជ្ញាធររបបលោក ហ៊ុន សែន ដែលចាប់ និងឃុំខ្លួនកុមារាអាយុ ១៥ឆ្នាំ ជាកូនប្រុសសកម្មជនបក្សប្រឆាំងម្នាក់ ដែលកំពុងតែជាប់ពន្ធនាគារ។ ក្មេងប្រុសរូបនោះ ត្រូវបានចាប់ខ្លួនខណៈចូលទៅរើសទង់គណបក្សសង្គ្រោះជាតិនៅសង្កាត់ចាក់អង្រែលើ។ ម្ដាយរបស់កុមាររូបនេះ បញ្ជាក់ថា មកដល់យប់មិញនេះនគរបាលមិនទាន់ដោះលែងកូនរបស់គាត់វិញនៅឡើយ។
ភរិយាសកម្មជនគណបក្សប្រឆាំង លោក កាក់ កុម្ភារ ដែលកំពុងជាប់ពន្ធនាគារនោះ ឲ្យដឹងថា នគរបាលប៉ុស្តិ៍ចាក់អង្រែលើ បានចាប់ខ្លួនកូនប្រុសរបស់អ្នកស្រី ឈ្មោះ កាក់ សុវណ្ណឆៃ អាយុ ១៥ឆ្នាំ យកទៅឃុំខ្លួននៅប៉ុស្តិ៍នគរបាលចាក់អង្រែលើ ខណ្ឌមានជ័យ រាជធានីភ្នំពេញ។
អ្នកស្រី ព្រំ ចន្ថា បានរៀបរាប់ថា នគរបាលបានហៅអ្នកស្រីឲ្យទៅជួបកូននៅប៉ុស្តិ៍នគរបាល វេលា ម៉ោងជាង ៤ល្ងាច ថ្ងៃទី៤ តុលា ដោយប្រាប់ថា អាជ្ញាធរឃាត់ខ្លួនកូនអ្នកស្រី ដោយសារតែគាត់បានចូលទៅក្នុងទីស្នាក់ការគណបក្សសង្គ្រោះជាតិ ហើយបានប្រមូលទង់គណបក្សនៅទីនោះ ដែលជាតំបន់ហាមឃាត់។ អ្នកស្រី បញ្ជាក់ថា កូនរបស់អ្នកស្រី មានជំងឺអូទីហ្សឹម (Autism) តាំងពីកំណើត។ អ្នកស្រី បន្ថែមថា ខួរក្បាលកូនប្រុសអ្នកស្រីពេលខ្លះខុសពីប្រក្រតី៖ «នៅពេលគាត់ស្រឡាញ់អ្វីមួយអារម្មណ៍គាត់ដិតជាប់ខ្លាំង ដូច្នេះហើយគាត់ឃើញទង់គណបក្សសង្គ្រោះជាតិជ្រុះរប៉ាត់រប៉ាយគាត់បានចូលទៅរើស ហើយត្រូវបានសមត្ថកិច្ចឃាត់ខ្លួនភ្លាមៗ តែម្ដង ដូចជា គាត់ឃើញទង់គណបក្សគាត់ស្រលាញ់ គាត់ចូលទៅរើសយកតែម្ដង » ។
ក្រុមគ្រូពេទ្យជំនាញកុមារ ឱ្យដឹងថា ជំងឺអូទីហ្សឹម គឺជាប្រភេទពិការភាពម្យ៉ាង កើតមានចំពោះកុមារ ដែលនាំឱ្យប៉ះពាល់ទៅលើការលូតលាស់រាងកាយ សតិបញ្ញាស្មារតី ប៉ះពាល់ទៅលើផ្នែកទំនាក់ទំនងសង្គម និងការស្ដែងចេញនូវអាកប្បកិរិយារបស់កុមារ។ កុមារអូទីហ្សឹម ពិបាកក្នុងការប្រាស្រ័យទាក់ទងជាមួយអ្នកដទៃ រួមមាន ឪពុកម្ដាយ បងប្អូន និងកុមារដទៃ ដោយបង្ហាញកាយវិការ ចរិតឫកពា ខុសប្លែកពីមនុស្សធម្មតា។
អ្នកស្រីបន្ថែមថា កូនរបស់គាត់បានចេញទៅរើសយកទង់ជាតិគណបក្សនេះ មកទុកម្ដងរួចមកហើយ កាលពីថ្ងៃទី៣ តុលា ដោយមិនបានប្រាប់ឲ្យដឹងជាមុនឡើយ។ នៅថ្ងៃទី៤ តុលា កូនបានជិះម៉ូតូចេញក្រៅទៀត ប្រាប់ថា ទៅទិញចំណីហូប ទីបំផុតស្រាប់តែអ្នកស្រីទទួលទូរស័ព្ទពីមន្ត្រីនគរបាលមួយរួបថា កូនរបស់អ្នកស្រីគេចាប់ខ្លួនហើយ៖ «គេមិនឲ្យខ្ញុំជួបកូនខ្ញុំទេ ខ្ញុំមើលឃើញពីខាងក្រៅឃើញកូនខ្ញុំជាប់ខ្នោះដៃ ខ្ញុំស្រណោះណាស់»។
អាស៊ីសេរីមិនអាចទាក់ទងនាយប៉ុស្តិ៍នគរបាលចាក់អង្រែ ដើម្បីសួរអំពីបញ្ហានេះបានទេ កាលពីយប់មិញ ថ្ងៃទី៤ តុលា។
អនុប្រធានគណបក្សសង្គ្រោះជាតិ លោក អេង ឆៃអ៊ាង ថ្កោលទោសសមត្ថកិច្ចចាប់ខ្លួនកុមារមិនទាន់គ្រប់អាយុបែបនេះថា ជារឿងខុសច្បាប់។ លោក អេង ឆៃអ៊ាង អះអាងថា កុមារ កាក់ សុវណ្ណឆៃ មិនបានប្រព្រឹត្តិបទល្មើសអ្វីទាំងអស់ ដោយគ្រាន់តែចូលទៅរើសទង់គណបក្សយកមកទុកនោះ៖ « ទីស្នាក់ការគណបក្សសង្គ្រោះជាតិ ដែលជួលអគារគណបក្សភ្លើងទៀននេះ មានចោរចូលគាស់យកសម្ភារៈជាច្រើនបែរជាសមត្ថកិច្ចមិនចាប់ទៅវិញ»។
កុមារា កាក់ សុវណ្ណឆៃ អាយុ ១៥ឆ្នាំរៀនថ្នាក់ទី៩ ជាកូនប្រុសសមាជិកក្រុមប្រឹក្សាជាប់ឆ្នោតរាជធានីភ្នំពេញនៃគណបក្សសង្គ្រោះជាតិ គឺលោក កាក់ កុម្ភារ ដែលតុលាការចាប់ខ្លួនកាលថ្ងៃទី៣១ ខែឧសភា ឆ្នាំ២០២០ ហើយបច្ចុប្បន្នកំពុងជាប់ឃុំនៅពន្ធនាគារព្រៃស។ តុលាការចោទប្រកាន់លោកពីបទញុះញង់ និងរួមគំនិតក្បត់ ដែលជាសំណុំរឿងចាស់កាលពីឆ្នាំ២០១៩។ រីឯកុមារា កាក់ សុវណ្ណឆៃ ត្រូវបានអាជ្ញាធរ រូបថតដៃជាប់ខ្នោះ និងត្រូវបានចែកចាយពេញបណ្ដាញសង្គមហ្វេសប៊ុក ដែលលោក អេង ឆៃអ៊ាង ថ្កោលទោសថា ជាទង្វើរំលោភសិទ្ធិអនីតិជន និងរំលោភច្បាប់៖ «គាត់យកក្មេងមកដាក់ខ្នោះថតបង្ហាញវាមិនត្រឹមត្រូវទេ ហើយក្មេងនេះមិនបានសម្លាប់មនុស្សបទឧក្រិដ្ឋអ្វីដែរ ហើយបើថា តំបន់នោះ ( ទីស្នាក់ការបក្ស ) ជាតំបន់ហាមឃាត់គ្រាន់តែណែនាំទៅបានហើយ»។
មាត្រា១៥ នៃច្បាប់ស្ដីពីយុត្តិធម៌អនីតិជនចែងថា នគរបាលយុត្តិធម៌អាចចាប់ខ្លួនអនីតិជន ដែលមានអាយុចាប់ពី ១៤ឆ្នាំដល់ក្រោម ១៨ឆ្នាំ តែក្នុងករណីដែលអនីតិជនប្រព្រឹត្តិបទល្មើសមជ្ឈិម ឬបទឧក្រិដ្ឋជាក់ស្ដែងតែប៉ុណ្ណោះ។ ប៉ុន្តែអនីតិជន ដែលមានអាយុចាប់ពី ១៤ឆ្នាំដល់ក្រោមអាយុ ១៦ឆ្នាំ ការចាប់ខ្លួនអាចធ្វើទៅបានតែក្នុងករណី ដែលអនីតិជននោះប្រព្រឹត្តិបទមជ្ឈិមដោយចេតនា។ រាល់ការចាប់ខ្លួនអនីតិជនត្រូវរាយការណ៍ជូនព្រះរាជអាជ្ញាភ្លាម។
ការអនុវត្តការចាប់ខ្លួន នគរបាលយុត្តិធម៌ ត្រូវចៀសវាងការធ្វើឲ្យអាម៉ាស់មុខ និងបាត់បង់សេចក្ដីថ្លៃថ្នូររបស់អនីតិជន និងត្រូវបញ្ជូនអនីតិជនទៅឲ្យផ្នែក ឬអង្គភាព ដែលមាននគរបាលយុត្តិធម៌ជំនាញទទួលបន្ទុកការងារអនីតិជនដែលជិតបំផុត។
ទីប្រឹក្សាអង្គការខុមហ្រ្វែល លោក គល់ បញ្ញា បានចាត់ទុកការចាប់ខ្លួនអនីតិជននេះជារឿងខុសច្បាប់ ពីព្រោះថា កុមារារូបនេះគ្មានប្រព្រឹត្តិបទល្មើសអ្វីទេ ដោយគ្រាន់តែគេប្រមូលទង់គណបក្សយកមកទុកនោះ។ លោកបញ្ជាក់ថា សកម្មភាពបែបនេះ ជារឿងរំលោភសិទ្ធិមនុស្សធ្ងន់ធ្ងរ៖ «ការចាប់យុវជនក្រោមអាយុ ១៨ឆ្នាំហ្នឹង គេមិនចាប់ទោសអូសដំណើរអ្វីទេ យុវជនបញ្ចេញមតិ ឬឈឺឆ្អាលរឿងសង្គមនេះគេលើកទឹកចិត្តណាស់»។
អាជ្ញាធររបបលោក ហ៊ុន សែន បានបង្កើនចាប់ខ្លួនយុវជន និងសកម្មជនគណបក្សប្រឆាំងជាបន្តបន្ទាប់ ក្រោយពី ការចាប់ខ្លួនលោក រ៉ុង ឈុន កាលពីចុងខែកក្កដាមក។ មកទល់ពេលនេះ អាជ្ញាធរចាប់សកម្មជននយោបាយ និងសកម្មជនសង្គមចំនួន ២៣នាក់ ចោទប្រកាន់ពីបទញុះញង់ ដែលក្រុមអង្គការសិទ្ធិមនុស្សថា ជាការចាប់មនុស្សដាក់គុកតាមអំពើចិត្ត។
ភរិយាលោក កាក់ កុម្ភារ ត្រូវជាម្ដាយ កុមារា កាក់ សុវណ្ណឆៃ ឲ្យដឹងថា មកទល់ពេលនេះ អ្នកស្រីមិនដឹងពីមូលហេតុនៃការចាប់ខ្លួនកូនអ្នកស្រីអ្វីក្រៅពីមន្ត្រីប៉ូលិសប្រាប់ថា កូនរបស់អ្នកស្រីបានចូលទៅក្នុងបរិវេណគណបក្សសង្គ្រោះជាតិនៅសង្កាត់ចាក់អង្រែលើ ដែលប៉ូលិសអះអាងថា ជាតំបន់ហាមឃាត់នោះឡើយ។ អ្នកស្រីអំពាវនាវឲ្យសមត្ថកិច្ចដោះលែងកូនអ្នកស្រីវិញជាបន្ទាន់ ព្រោះកូនអ្នកស្រីជាក្មេងមិនទាន់គ្រប់អាយុ និងកំពុងនៅវ័យសិក្សា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។