មន្ត្រីអង្គការសង្គមស៊ីវិលព្រួយបារម្ភពីសុខភាពរបស់មេធាវី និងជាអ្នកជំនាញវិទ្យាសាស្ត្រនយោបាយអន្តរជាតិ កញ្ញា សេង ធារី នៅក្នុងពន្ធនាគារ ក្នុងពេលកញ្ញាធ្វើកូដកម្មបង្អត់អាហារទាមទារឱ្យតុលាការដោះលែងអស់រយៈពេលជិត ១សប្ដារហ៍មកហើយអ្នកនាំពាក្យអគ្គនាយកដ្ឋានពន្ធនាគារអះអាងថា សុខភាពរបស់កញ្ញា សេង ធារី ចាប់ផ្ដើមចុះខ្សោយ ប៉ុន្តែ គ្រូពេទ្យបានត្រៀមឧបករណ៍ពេទ្យ ដើម្បីជួយដល់កញ្ញាហើយ។
មន្ត្រីសង្គមស៊ីវិលលើកឡើងថា ការបង្អត់អាហាររបស់កញ្ញា សេង ធារី នេះ ប្រឈមនឹងគ្រោះថ្នាក់ធ្ងន់ធ្ងរដល់សុខភាព ដែលមន្ត្រីពន្ធនាគារគួរតែយកចិត្តទុកដាក់ឱ្យបានខ្ពស់។
ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា ប្រាប់វិទ្យុអាស៊ីសេរីនៅថ្ងៃទី១២ ធ្នូថា ការធ្វើកូដកម្មបង្អត់អាហារជាសិទ្ធិសេរីភាពរបស់កញ្ញា សេង ធារី ដោយសារមិនពេញនឹងតុលាការ ដែលបានចោទប្រកាន់កញ្ញាដោយអយុត្តិធម៌។ មន្ត្រីសង្គមស៊ីវិលរូបនេះ ព្រួយបារម្ភខ្លាចការបង្អត់អាហារច្រើនថ្ងៃប៉ះពាល់ដល់សុខភាពធ្ងន់ធ្ងរ។
លោក នី សុខា៖ «អ៊ីចឹងកម្រណាស់ កម្រមានមនុស្ស ដែលហ៊ានលះបង់បែបនឹងណាស់។ អ៊ីចឹងហើយបានយើងទទូចឱ្យរដ្ឋាភិបាលយកចិត្តទុកដាក់ក្នុងការពិចារណានិងធ្វើការដោះស្រាយបញ្ហានេះរួមផ្សំនឹងអ្វី ដែលជាការស្នើឡើងរបស់សហភាពអឺរ៉ុប និងសហរដ្ឋអាមេរិកថ្មីនេះ ដែលស្នើឱ្យដោះស្រាយលែងកញ្ញា សេង ធារី និងកញ្ញា ឈឹម ស៊ីធរ និងអ្នកទោសមនសិការដទៃទៀត»។
ក្ដីបារម្ភរបស់មន្ត្រីសង្គមស៊ីវិលនេះក្នុងពេលដែលកញ្ញា សេង ធារី កំពុងធ្វើកូដកម្មអត់អាហាររយៈពេល ១០ថ្ងៃក្នុងពន្ធនាគារព្រៃស ចាប់ពីថ្ងៃទី៧ ទៅដល់ថ្ងៃទី១៦ ធ្នូ ដើម្បីទាមទារឱ្យសាលាឧទ្ធរណ៍ភ្នំពេញផ្ដល់សេរីភាពដល់កញ្ញាវិញ។ ការធ្វើកូដកម្មបង្អត់អាហារខ្លួនឯងនេះ នៅមុនពេលសាលាឧទ្ធរណ៍នឹងបើកសវនាការជំនុំជម្រះក្ដី សំណុំរឿងរបស់កញ្ញា នៅថ្ងៃទី១៣ ធ្នូ។
វិទ្យុអាស៊ីសេរីមិនទាន់អាចទាក់ទងអ្នកនាំពាក្យសាលាឧទ្ធរណ៍ភ្នំពេញលោក ឃុន លាងម៉េង ដើម្បីសាកសួរជុំវិញបញ្ហានេះបានទេនៅថ្ងៃទី១២ ធ្នូ។
ប៉ុន្តែអ្នកនាំពាក្យអគ្គនាយកដ្ឋានពន្ធនាគារ លោក នុត សាវនា ប្រាប់វិទ្យុអាស៊ីសេរីថា កញ្ញា សេង ធារីមិនទទួលយកអាហារគ្រប់យ៉ាង លើកលែងតែទឹកនិងក្រូចឆ្មារប៉ុណ្ណោះ។ លោកបញ្ជាក់ថា ចាប់តាំងពីបង្អត់អាហារមកសុខភាពរបស់កញ្ញា បានចុះខ្សោយជាងមុន ដែលគួរឱ្យព្រួយបារម្ភ ប៉ុន្តែ គ្រូពេទ្យប្រចាំនៅពន្ធនាគារបានតាមដានសុខភាពរបស់កញ្ញាយ៉ាងដិតដល់ហើយ។
លោក នុត សាវនា៖ «បើសិនជាគាត់ឆ្លើយថាទទួលយើងសប្បាយចិត្តណាស់នឹងចាក់ឱ្យគាត់និងឱ្យគាត់លេបអីជាដើមនឹង។ មានទាំងសេរ៉ូមមានទាំងថ្នាំកម្លាំងជំនួយសុខភាពអីផ្សេងៗ មួយកំផ្លេ មានទាំងទឹកដោះគោ មានទាំងផ្លែឈើ មានទាំងអាហារអីផ្សេងៗ នឹងគឺយើងរៀបចំជូនគាត់ជារៀងរាល់ថ្ងៃ។អីចឹងគាត់ហូបមិនហូបវាជាសិទ្ធិរបស់គាត់អា ហ្នឹងគឺបានត្រៀមអស់ហើយ តែសំខាន់គាត់មិនទទួលទេ»។
ទោះជាយ៉ាងណាក្ដី នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ (Licadho) លោក អំ សំអាត មានប្រសាសន៍ថា បើទោះបីជាមន្ត្រីពន្ធនាគារបានយកចិត្តទុកដាក់មើលថែសុខភាពរបស់កញ្ញា សេង ធារី បែបនេះក្ដី ក៏លោកនៅតែព្រួយ និងមានបរិយាកាសមិនសូវល្អដូចនៅខាងក្រៅឡើយ។ លោកថា សាលាឧទ្ធរណ៍គួរតែដោះលែងកញ្ញា សេង ធារី ឱ្យមានសេរីភាពវិញតាមការស្នើសុំ។
លោក អំ សំអាត៖ «សកម្មភាពកន្លងមករបស់កញ្ញា សេង ធារី នឹងជាសិទ្ធិសេរីភាពជាមូលដ្ឋាន ជាការតស៊ូមតិ ដើម្បីឱ្យមានកំណែទម្រង់ទៅលើប្រព័ន្ធយុត្តិធម៌នៅក្នុងប្រទេសកម្ពុជា មិនមែនជាបទល្មើសទេ។ ដូច្នេះហើយបានគេទាមទារឱ្យមានការដោះលែងកញ្ញា សេង ធារី ហ្នឹង។ អ៊ីចឹង យើងសង្ឃឹមថា សាលាឧទ្ធរណ៍សវនាការនៅថ្ងៃស្អែកនេះនឹងពិនិត្យពិចារណាលើរឿងនេះ ហើយសង្ឃឹមថាកញ្ញា សេង ធារី នឹងមានសេរីភាព»។
សមត្ថកិច្ចក្រុងភ្នំពេញ បានចាប់ខ្លួនកញ្ញា សេង ធារី កាលពីថ្ងៃទី១៤ ខែមិថុនា ឆ្នាំ២០២២ នៅខាងមុខតុលាការក្រុងភ្នំពេញ ក្រោយតុលាការប្រកាសសាលក្រមកាត់ទោសកញ្ញាឱ្យជាប់ពន្ធនាគារ ៦ឆ្នាំ ដោយចោទពីបទ "រួមគំនិតក្បត់" ក្នុងសំណុំរឿងវិលចូលស្រុករបស់លោក សម រង្ស៊ី កាលពីឆ្នាំ២០១៩។ មួយថ្ងៃបន្ទាប់មកតុលាការបានបញ្ជូនកញ្ញាទៅឃុំខ្លួននៅពន្ធនាគារខេត្តព្រះវិហារ។ ប៉ុន្តែ កាលពីថ្ងៃទី២៣ ខែកញ្ញា អាជ្ញាធរបានផ្ទេរអ្នកជំនាញនយោបាយអន្តរជាតិរូបនេះទៅឃុំខ្លួននៅពន្ធនាគារព្រៃស ក្នុងរាជធានីភ្នំពេញវិញ ក្រោយលោកនាយករដ្ឋមន្ត្រី ហ៊ុន ម៉ាណែត បានជួបជាមួយមន្ត្រីសហរដ្ឋអាមេរិកផ្ទួនៗ គ្នាទាំងនៅក្នុងប្រទេសកម្ពុជានិងនៅលើទឹកដីអាមេរិក។
កាលពីពេលថ្មីៗ នេះ សហរដ្ឋអាមេរិកបានជំរុញឱ្យលោក ហ៊ុន ម៉ាណែត និងរដ្ឋាភិបាលថ្មីបើកលំហសិទ្ធិសេរីភាពពលរដ្ឋវិញ ដើម្បីធានាថា ពលរដ្ឋខ្មែរទាំងអស់អាចចូលរួមបានដោយសេរីក្នុងដំណើរការនយោបាយ ហើយដោះលែងសកម្មជននយោបាយ រួមទាំងសកម្មជនសិទ្ធិមនុស្សសញ្ជាតិខ្មែរអាម៉េរិកាំង គឺកញ្ញា សេង ធារី ផងដែរ។
កាលពីថ្ងៃទី១០ ធ្នូ ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា លោក បាទ្រីក ម័រហ្វី (Patrick Murphy) ក៏បានថ្លែងក្នុងពេលចូលរួមទិវាសិទ្ធិមនុស្សអន្តរជាតិ នៅទីលានប្រជាធិបតេយ្យក្នុងរាជធានីភ្នំពេញទាមទារឱ្យតុលាការខ្មែរដោះ លែងកញ្ញា សេង ធារី ឱ្យមានសេរីភាពឡើងវិញដែរ៕