គណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជូនបញ្ជីឈ្មោះបេក្ខជនតំណាងរាស្ត្រគណបក្សនយោបាយដែលនឹងទទួលបានជ័យភណ្ឌនៃការរម្លាយគណបក្សសង្គ្រោះជាតិ ទៅរដ្ឋសភានៅថ្ងៃទី២៣ វិច្ឆិកា។ គ.ជ.ប កាលពីថ្ងៃទី២២ វិច្ឆិកា បានសម្រេចបែងចែងអាសនៈសភារបស់គណបក្សសង្គ្រោះជាតិទាំង ៥៥អាសនៈ ទៅឲ្យគណបក្សនយោបាយចំនួន៥ ដែលមិនត្រូវបានពលរដ្ឋបោះឆ្នោតឲ្យកាលពីឆ្នាំ២០១៣។ គណបក្សដែលទទួលបានអាសនៈបក្សប្រឆាំងនោះរួមមាន គណបក្សហ៊្វុនស៊ិនប៉ិច ដឹកនាំដោយទ្រង់ នរោត្តម រណឫទ្ធិ នឹងទទួលបាន ៤១អាសនៈ គណបក្សសញ្ជាតិកម្ពុជាបាន ២អាសនៈ និងគណបក្សខ្មែរអភិវឌ្ឍន៍សេដ្ឋកិច្ច បាន ១អាសនៈ និងគណបក្សសម្ព័ន្ធដើម្បីប្រជាធិបតេយ្យបាន ៦អាសនៈ ប៉ុន្តែគណបក្សបានប្រកាសមិនទទួលជ័យភណ្ឌនៃការរម្លាយបក្សប្រឆាំងនោះទេ។ គ.ជ.ប នឹងធ្វើការបែកចែកអាសនៈនៅសល់ទៅឲ្យគណបក្សផ្សេងទៀតនៅពេលក្រោយ។
ដោយឡែកការសម្រេចបែងចែកអាសនៈក្រុមប្រឹក្សាឃុំសង្កាត់ របស់គណបក្សសង្គ្រោះជាតិ ជាង ៥ពាន់អាសនៈ ទៅឲ្យបក្សនយោបាយផ្សេងៗនោះ នឹងត្រូវធ្វើឡើងនៅខែធ្នូខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។