អ្នកវិភាគនយោបាយ និងមន្ត្រីបក្សប្រឆាំងរិះគន់ថា កូនប្រុសពៅលោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ានី មានចរិតហិង្សាដូចឪពុករបស់ខ្លួន។ ប្រតិកម្មបែបនេះ ក្រោយពេលសមាជិកវ័យក្មេងគណបក្សកាន់អំណាចរូបនេះព្រមានចាត់វិធានការតាមផ្លូវច្បាប់ លើអ្នកតវ៉ា និងប្រកាស ការពារសន្តិភាពបើទោះជាត្រូវលះបង់ក្នុងតម្លៃណាក៏ដោយ។
កូនប្រុសពៅលោក ហ៊ុន សែន គឺលោក ហ៊ុន ម៉ានី ថ្លែងថា «បើចង់ប្រកួតប្រជែងប្រជាធិបតេយ្យ ត្រូវទៅបោះឆ្នោត តែបើចេញមកតាមផ្លូវដោយខុសច្បាប់ នឹងត្រូវអនុវត្តតាមច្បាប់» ប៉ុន្តែ ទន្ទឹមនឹងការថ្លែងរបស់លោកដូច្នេះ គណបក្សភ្លើងទៀន ដែលជាគណបក្សប្រឆាំងចុងក្រោយបែរជាត្រូវបាន គ.ជ.ប ដែលស្ថិតក្រោមឥទ្ធិពលគណបក្សកាន់អំណាច ហាមឃាត់មិនចូលរួមការបោះឆ្នោតថ្ងៃទី២៣ ខែកក្កដា ខាងមុខនេះទេ។ វីដេអូមានរយៈពេលជិត ២នាទីរបស់លោក ហ៊ុន ម៉ានី ដែលបង្ហោះតាមហ្វេសប៊ុកបង្ហាញថា សារនយោបាយរបស់លោក ហ៊ុន ម៉ានី ពោរពេញដោយព្រមានប្រើហិង្សាលើការទាមទាររបស់ពលរដ្ឋលើបញ្ហាបោះឆ្នោត។ អ្នកបន្តវេនត្រកូល ហ៊ុន រូបនេះ ព្យាយាមធ្វើទឹកមុខមាំ និងពេលនិយាយលើកដៃចុះឡើង ដូចទៅនឹងឪពុករបស់ខ្លួនដែរ និងបញ្ចេញសារនយោបាយហិង្សាដូចឪពុកដែរថា ទោះក្នុងតម្លៃណាក៏ដោយ គឺត្រូវការពារសន្តិភាពឱ្យបាន។
លោក ហ៊ុន ម៉ានី៖«គ្រាន់តែថា មេរៀននៃការប៉ុនប៉ងធ្វើបដិវត្តន៍ពណ៌ ពិតជាមានពិតប្រាកដ។ តែក៏សូមបញ្ជាក់ថា បទពិសោធន៍ឆ្នាំ២០១៣ ឆ្នាំ២០១៤ បានបង្រៀនយើងច្បាស់ ដែលបញ្ជាក់ថា ក្នុងតម្លៃណាក៏ដោយ យើងត្រូវការពារសន្តិភាព ហើយមិនអាចឱ្យត្រឡប់មកវិញនូវការប៉ុនប៉ងធ្វើបដិវត្តន៍ពណ៌នោះទេ ទោះបីក្នុងតម្លៃណាក៏ដោយចង់ប្រកួតប្រជែងលទ្ធិប្រជាធិបតេយ្យទៅបោះឆ្នោត តែបើចេញមកលើ តើតាមផ្លូវហើយ គឺត្រូវការអនុវត្តច្បាប់ហើយ សុំនិយាយគ្នាឱ្យត្រង់ៗ»។
លោក ហ៊ុន ម៉ានី ថ្លែងដូច្នេះ ក្នុងពិធីជួបសមាជិកគណបក្សប្រជាជនកម្ពុជា កាលពីពេលថ្មីៗនេះ។
មន្ត្រីជាន់ខ្ពស់គណបក្សសង្គ្រោះជាតិប្រចាំខេត្តកំពង់ឆ្នាំងដែលកំពុងភៀសខ្លួននៅប្រទេសថៃ លោក ដួង ចន្ត្រា សង្កេតឃើញថា សារនយោបាយរបស់លោក ហ៊ុន ម៉ានី បែបនេះជាការព្រមានប្រើហិង្សាលើពលរដ្ឋ។ មន្ត្រីបក្សប្រឆាំងរូបនេះរិះគន់ថា លោក ហ៊ុន ម៉ានី មិនទាន់មានអំណាចកាន់ពេញដៃផង ហ៊ានព្រមានប្រើហិង្សាដូច្នេះទៅហើយ ទម្រាំនៅពេល កូនប្រុសពៅលោក ហ៊ុន សែន រូបនេះកាន់តួនាទីធំក្នុងស្ថាប័នជាតិឬស្ថាប័នគ្រប់គ្រងកម្លាំងប្រដាប់អាវុធ លោក ហ៊ុន ម៉ានី នឹងបង្កគ្រោះថ្នាក់ដល់ពលរដ្ឋ ឬក្រុមអ្នកប្រជាធិបតេយ្យមិនខានឡើយ។
លោក ដួង ចន្ត្រា៖«បើយើងសិក្សាពីវ័យ វ័យរបស់មនុស្សក្នុងដំណាក់កាលនេះ យើងឃើញថា ហ៊ុន ម៉ានី ដែលជាកូនពៅរបស់លោក ហ៊ុន សែន គឺនៅវ័យក្មេង ប៉ុន្តែ រាល់អាកប្បកិរិយាគឺឃោរឃៅសឹងតែលើសឪពុកទៀតហើយ ចុះទម្រាំបើអាយុកាលកាន់តែចាស់ដូចឪពុកគាត់ទៀត ទង្វើរបស់គាត់ឃោរឃៅ ជាងលោក ហ៊ុន សែន ទៀត នេះបញ្ជាក់ថា ត្រកូលនេះបន្តកាន់អំណាចបន្តទៅទៀត ធ្វើឱ្យប្រជាពលរដ្ឋខ្មែររងគ្រោះនូវអំពើហិង្សារបស់ថ្នាក់ដឹកនាំមកលើពលរដ្ឋហើយ»។
ស្រដៀងគ្នានេះដែរ អ្នកវិភាគនយោបាយ លោក គឹម សុខ សង្កេតឃើញថា សមាជិកក្រុមគ្រួសារ ត្រកូល ហ៊ុន តែងតែមានចរិតផ្ដាច់ការ និងហិង្សា បើទោះជាកូនប្រុសពៅបានទៅរៀនសូត្រនៅប្រទេសប្រជាធិបតេយ្យក្ដី។ លោកបន្តទៀតថា លោក ហ៊ុន ម៉ានី ប្រឹងរៀបឫកឱ្យដូចឪពុករបស់ខ្លួន ព្រោះកូនប្រុសពៅលោក ហ៊ុន សែន រូបនេះ នៅតែចិញ្ចឹមចិត្តចង់ធ្វើនាយករដ្ឋមន្ត្រី បើទោះជានៅពេលនេះ លោក ហ៊ុន សែន ផ្ដល់ឱកាសមាសមួយទៅកូនប្រុសច្បងគឺលោក ហ៊ុន ម៉ាណែត ហើយក៏ដោយ។
លោក គឹម សុខ៖«លោក ហ៊ុន ម៉ានី ដឹងច្បាស់ថា ឥទ្ធិពល នៃអំណាចក្រុមគ្រួសារហ៊ុន គឺបានពីការសម្លុតគំរាមកំហែងហើយនិងបំពានច្បាប់ម៉្លោះហើយមានតែបន្តធ្វើឫកខែងរ៉ែងបំពានច្បាប់សម្លុតប្រជាពលរដ្ឋតទៅទៀតទើបអាចរក្សាអំណាចបាន។ លោក ហ៊ុន ម៉ានី ដែលធ្វើត្រាប់តាមឪពុកកាន់តែស្រដៀងៗ ជាងលោក ហ៊ុន ម៉ាណែត នេះក៏ជាចរន្តមួយនៃនិន្នាការចង់ឪពុកហ្នឹងគិតឃើញអំពីគាត់ដែរក្នុងតំណែងជានាយករដ្ឋមន្ត្រី»។
ជុំវិញការរិះគន់នេះ វិទ្យុអាស៊ីសេរីមិនអាចសុំការឆ្លើយតបពីអ្នកនាំពាក្យគណបក្សប្រជាជនកម្ពុជា លោក សុខ ឥសាន បានទេនៅថ្ងៃទី១៣ ខែកក្កដា។ លោក ហ៊ុន ម៉ានី ជាបេក្ខភាពតំណាងរាស្ត្រគណបក្សប្រជាជនកម្ពុជា ប្រចាំមណ្ឌលកំពង់ស្ពឺ។ បើទោះជាលោក ហ៊ុន ម៉ានី មិនមែនជាបេក្ខភាពនាយករដ្ឋមន្ត្រី បន្ទាប់ពីលោក ហ៊ុន សែន តែកូនប្រុសពៅ លោក ហ៊ុន សែន រូបនេះ ក៏មានកម្លាំងនយោបាយ និងមានយុវជនតាមហែហមមិនចាញ់បងប្រុសរបស់លោកដែលជាបេក្ខជននាយករដ្ឋមន្ត្រីបន្តវេនរបស់គណបក្សប្រជាជនកម្ពុជា គឺលោក ហ៊ុន ម៉ាណែត នោះឡើយ។ លោក ហ៊ុន ម៉ានី ក៏ជាប្រធានសហភាពសហព័ន្ធយុវជនកម្ពុជា។
កន្លងទៅក៏ធ្លាប់មានការបែកធ្លាយរឿងរ៉ាវអាស្រូវផ្លូវភេទបែបហិង្សានិយម របស់លោក ហ៊ុន ម៉ានី ទៅលើស្ត្រីខ្មែរមួយចំនួន ដែលធ្វើឱ្យកក្រើកបណ្ដាញសង្គមដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។