អ្នកឃ្លាំមើល​ថា លោក កឹម សុខា ចេញ​ក្រៅ​ផ្ទះ​ចំណេញ​ជាង​នៅ​ក្នុង​ផ្ទះ

ដោយ សុជីវី
2020-07-20
អ៊ីម៉ែល
មតិ
Share
បោះពុម្ព
លោក កឹម សុខា (រូប​បង់ក​ក្រមា​ខ្នូត​ខៀវ) ប្រធាន​គណបក្សសង្គ្រោះជាតិ ចុះជួបពលរដ្ឋ នៅ​ខាង​មុខ​ប្រាសាទ​អង្គរវត្ត នៅ​ខែ​កក្កដា ឆ្នាំ​២០២០។
លោក កឹម សុខា (រូប​បង់ក​ក្រមា​ខ្នូត​ខៀវ) ប្រធាន​គណបក្សសង្គ្រោះជាតិ ចុះជួបពលរដ្ឋ នៅ​ខាង​មុខ​ប្រាសាទ​អង្គរវត្ត នៅ​ខែ​កក្កដា ឆ្នាំ​២០២០។
រូប​ពី​ហ្វេសប៊ុក​ Kem Sokha

អ្នកឃ្លាំមើល​ថា លោក កឹម សុខា ចេញ​ក្រៅ​ផ្ទះ​ចំណេញ​ជាង​នៅ​ក្នុង​ផ្ទះ និង​ជា​ការ​សម្រេច​ចិត្ត​ត្រឹមត្រូវ​។ ការ​លើក​ឡើង​បែបនេះ ខណៈ​ប្រធាន​គណបក្ស​សង្គ្រោះ​ជាតិ លោក កឹម សុខា បាន​ធ្វើ​ដំណើរ​ទៅ​ខេត្ត​មួយ​ចំនួន ក្នុង​នោះ​មាន ខេត្ត​បន្ទាយមានជ័យ ពោធិ៍សាត់ ត្បូងឃ្មុំ និង​ខេត្ត​សៀមរាប។

អ្នកស្រាវជ្រាវ​ការ​អភិវឌ្ឍ​សង្គម បណ្ឌិត សេង សារី សង្កេត​ឃើញ​ថា ចាប់​តាំង​ពី​លោក កឹម សុខា បាន​ចូលរួម​ពិធី​បុណ្យ​សព​ម្ដាយក្មេក លោក ហ៊ុន សែន រួចមក ឃើញ​ថា លោក កឹម សុខា បាន​ធ្វើ​ដំណើរ​ចេញ​ក្រៅ​ផ្ទះ​ច្រើនដង​។ អ្នក​វិភាគ​រូប​នេះ​យល់ថា ការសម្រេចចិត្ត​ចេញ​ក្រៅ​របស់​លោក កឹម សុខា ហាក់​យឹត​ពេល​បន្តិច ប៉ុន្តែ​ជា​ការ​សម្រេចចិត្ត​មួយ​ត្រឹមត្រូវ​។ ទោះ​យ៉ាង​ណា​ក្តី បណ្ឌិត សេង សារី យល់​ថា ទោះ​នេះ​ជា​សិទ្ធិ​របស់​លោក​ក្ដី លោក កឹម សុខា ក៏​ត្រូវ​មានការ​ប្រុងប្រយ័ត្ន​ផ្លូវច្បាប់​ជៀសវាង​មាន​ការ​ចោទប្រកាន់​ណាមួយ​ពី​តុលាការ៖ «ធ្វើ​ឱ្យ​អ្នកគាំទ្រ​ឃើញ​សកម្មភាព​គាត់​(​លោក កឹម សុខា​) របស់​គាត់​ផង យ៉ាងហោចណាស់​ឃើញ​គាត់​ដើរ​បាន​ឡើងវិញ ទី​៣ បង្ហាញ​អំពី​បង្ហាញ​ការ​ធ្វើ​ការ​នយោបាយ​បែប​សកម្ម​អហិង្សា​បែប​សកម្ម​ឱ្យ​អ្នកគាំទ្រ​ឃើញ​មុខ​ឃើញ​សកម្មភាព​ទោះបី​សកម្មភាព​ហ្នឹង​មិនមែន​ជា​សកម្មភាព​នយោបាយ​ក៏ដោយ ប៉ុន្តែ​ទស្សនៈ​របស់ខ្ញុំ​ឱ្យ​តែ​អ្នកនយោបាយ​ទោះ​អង្គុយ​ផឹក​កាហេ្វ​ហ្នឹង ក៏​ជា​សកម្មភាព​នយោបាយ​ដែរ»

អនុប្រធាន​សមាគម​និស្សិត​បញ្ញវន្ត​ខ្មែរ​លោក មាន ព្រហ្មមុនី យល់​ថា ការ​ចេញ​ក្រៅ​ផ្ទះ​របស់ កឹម សុខា នៅ​រយៈពេល​ចុងក្រោយ​នេះ ក្រៅ​តែពី​ការប្រើប្រាស់​សិទ្ធិ​ដែល​តុលាការ​បាន​កំណត់ គឺ​អាច​ធ្វើ​ឱ្យ​លោក កឹម សុខា មានឱកាស​ជួប​ពលរដ្ឋ​ទូទៅ ឬ​សកម្មជន​របស់​លោក និង​អាច​ធ្វើ​ឱ្យ​អ្នកគាំទ្រ​របស់​ខ្លួន​បាន​ឃើញ​វត្តមាន​របស់​លោក។ អ្នកឃ្លាំមើល​រូប​នេះ​យល់ថា ការ​ចេញ​ធ្វើដំណើរ​តាម​បណ្ដា​ខេត្ត​របស់​លោក កឹម សុខា អាច​ចំណេញ​ជាង​ពេល​លោក​នៅតែ​ក្នុង​ផ្ទះ៖ «ប្រជាពលរដ្ឋ​នឹក​គាត់​(​លោក កឹម សុខា​) គាត់​នឹក​ប្រជាពលរដ្ឋ​អ៊ីចឹង​ជា​រឿង​របស់​អ្នកនយោបាយ​ហើយ ប៉ុន្តែ​មិនមែន​ជា​សេរីភាព​ធ្វើ​នយោបាយ​ទេ ប៉ុន្តែ​គាត់​ចង់​ឱ្យ​ប្រជាពលរដ្ឋ​ឃើញ​គាត់​កុំ​ភ្លេច​មុខ​គាត់»

ប្រធាន​គណបក្ស​សង្គ្រោះ​ជាតិ លោក កឹម សុខា ដែល​កំពុង​រង​បទ​ចោទ​ពី​តុលាការ បាន​ធ្វើ​ដំណើរ​ទៅ​មើល​ចម្ការ​មួយ​កន្លែង​នៅ​ខេត្ត​ត្បូងឃ្មុំ ទៅ​សួរ​សុខទុក្ខ​អតីត​សហការី​របស់​លោក​នៅ​ស្រុក​មង្គលបុរី ខេត្ត​បន្ទាយមានជ័យ ឈ្មោះ ហង់ សំចិត្ត ដែល​កំពុង​មាន​ជំងឺ ហើយ​លោក​ក៏បាន​ទៅ​អុជ​ធូប​បួងសួង​នៅ​រមណីយដ្ឋាន​ឧកញ៉ា​ឃ្លាំងមឿង​ក្នុង​ខេត្ត​ពោធិ៍សាត់ រួច​ក៏​បន្ត​ដំណើរ​ឈៀង​ចូល​មើល​ប្រាសាទ​បុរាណ​ក្នុង​ខេត្ត​សៀមរាប ជាដើម។

សកម្មភាព​នៃ​ការ​ធ្វើដំណើរ​របស់​មេ​បក្ស​ប្រឆាំង​រូប​នេះ ភាគច្រើន​ត្រូវ​បាន​បង្ហោះ​ចែករំលែក​ដោយ មនុស្ស​ជំនិត​របស់​លោក គឺ លោក មុត ចន្ថា ដែល​ជា​មន្ត្រី​ខុទ្ទកាល័យ​របស់​លោក កឹម សុខា​។ រួម​ដំណើរ​ជាមួយ​លោក កឹម សុខា មាន​ភរិយា​របស់​លោក ក្រុម​មេធាវី​ការពារ​ក្ដី មន្ត្រី​ជាន់ខ្ពស់​របស់​លោក កឹម សុខា ដូចជា លោក យ៉ែម បុញ្ញឫទ្ធិ ជាដើម​។ ក្នុង​ដំណើរ​ទស្សនកិច្ច​នេះ គេ​ឃើញ​លោក កឹម សុខា ជួប​សំណេះសំណាល​ជាមួយ​ពលរដ្ឋ អាជីវករ អ្នកធ្វើការ​ផ្នែក​អនាម័យ និង​ឆ្មាំ​ការពារ​ប្រាសាទ​ជាដើម។

មេធាវី​ការពារ​ក្ដី​លោក កឹម សុខា ម្នាក់ អ្នកស្រី ម៉េង សុភារី ឱ្យ​អាស៊ីសេរី​ដឹង​ថ្ងៃ​ទី​១៩ ខែ​កក្កដា ថា ចាប់​តាំង​ពី​តុលាការ​អនុញ្ញាត​ឱ្យ​លោក កឹម សុខា អាច​ធ្វើ​ដំណើរ​ចេញ​ក្រៅ​ផ្ទះ​បាន​ពី​ឆ្នាំ​២០១៩​មក យូរៗ​ម្ដង លោក កឹម សុខា បាន​ចេញ​ក្រៅ​ផ្ទះ​ដែរ ប៉ុន្តែ​មិន​បាន​ផ្សព្វផ្សាយ​ជា​សាធារណៈ​។ អ្នកស្រី​មេធាវី​បន្ត​ថា ការ​ចេញ​ក្រៅ​ផ្ទះ​លោក កឹម សុខា ពេលនេះ គឺ​លោក​ចង់​ឃើញ​ការរស់នៅ​របស់​ពលរដ្ឋ​និង​ចង់​ស្រូប​យក​ខ្យល់អាកាស​ខាងក្រៅ៖ «ធម្មតា​មនុស្ស​យើង​នៅ​ក្នុង​ផ្ទះ​យូរ គឺ​តប់ប្រមល់​ហើយ​ណាមួយ​គាត់​ចេញ​ក្រៅ​ផ្ទះ មើល​ទេសភាព​មើល​អី​មើល​ជីវភាព​ប្រជាពលរដ្ឋ​ផង ហើយក៏​ចង់​ស្រូប​ខ្យល់​អាកាស​បរិសុទ្ធ​អី​ផង​ដើម្បី​សុខភាព»

ប្រធាន​គណបក្ស​សង្គ្រោះជាតិ លោក កឹម សុខា ត្រូវ​សមត្ថកិច្ច​សម្រុក​ចូល​ចាប់​ខ្លួន​ទាំង​កណ្ដាល​អធ្រាត្រ​ថ្ងៃ​ទី​០២ ឈាន​ចូល​ថ្ងៃ​ទី​០៣ កញ្ញា ឆ្នាំ​២០១៧ ក្នុងពេលដែល​លោក​កំពុង​មាន​អភ័យ​ឯកសិទ្ធិសភា​។ ប៉ុន្តែ​កាល​ពី​នៅ​ថ្ងៃ​ទី​១០ ខែ​វិច្ឆិកា ឆ្នាំ​២០១៩ តុលាការ​ក្រុង​ភ្នំពេញ​បានសម្រេច​កែប្រែ​លក្ខខណ្ឌ​នៃ​កាតព្វកិច្ច​មួយ​ចំនួន​សម្រាប់​លោក កឹម សុខា​។ តុលាការ​បាន​អនុញ្ញាត​ឱ្យ​លោក កឹម សុខា អាច​ធ្វើ​ដំណើរ​បាន​នៅ​ក្នុង​ប្រទេស ប៉ុន្តែ​មិន​ឱ្យ​ហួស​ពី​ព្រំប្រទល់​ដែន​របស់​កម្ពុជា​បាន​ឡើយ ហើយក៏​មិន​ឱ្យ​លោក​ធ្វើ​សកម្មភាព​នយោបាយ​បាន​នោះ​ដែរ​។ ក្រៅ​ពី​នេះ តុលាការ​បាន​តម្រូវ​ឱ្យ​លោក​ឆ្លើយតប​នឹង​ការ​កោះហៅ​ពី​គ្រប់​សមត្ថកិច្ច។

បន្ទាប់ពី​ទទួល​បាន​សេរីភាព​ខ្លះៗ​ឯកអគ្គរដ្ឋទូត​ប្រទេស​ប្រជាធិបតេយ្យ​ធំៗ​ក្នុង​ពិភពលោក​បាន​បណ្ដាក់​គ្នា​ចូល​ជួប​សួរសុខទុក្ខ​ជា​បន្តបន្ទាប់ និង​ទាមទារ​រដ្ឋាភិបាល​លោក ហ៊ុន សែន ទម្លាក់​ចោល​បទចោទប្រកាន់​លើ​លោក កឹម សុខា និង​ផ្ដល់​សិទ្ធិ​នយោបាយ និង​សេរីភាព​ពេញលេញ​ដល់​មេ​បក្ស​ប្រឆាំង​រូប​នេះ។

លោក មុត ចន្ថា បាន​សរសេរ​លើ​ហ្វេសប៊ុក​លោក​ថា លោក​ប្រធាន កឹម សុខា តែងតែ​ផ្សា​ខ្លួន​ភ្ជាប់​ជាមួយ​នឹង​ជីវិត​រស់នៅ​ផ្ទាល់​របស់​ប្រជាពលរដ្ឋ​ខ្មែរ ទោះបី​ស្ថិតនៅ​ក្នុង​ស្ថានភាព​ណា​ក៏​ដោយ ឱ្យ​តែ​គាត់​មាន​លទ្ធភាព និង​មាន​ឱកាស៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល