ពលរដ្ឋ និង​សកម្មជន ចង់​ឃើញ​វត្តមាន​លោក សម រង្ស៊ី ជា​ថ្មី​ម្តង​ទៀត នៅ​កម្ពុជា

ដោយ ទីន ហ្សាការីយ៉ា
2020-09-21
អ៊ីម៉ែល
មតិ
Share
បោះពុម្ព
លោក សម រង្ស៊ី និង​លោក កឹម សុខា ថតរូប​ជាមួយ​ប្រជាពលរដ្ឋ និង​អាជីវករ​ផ្សារលើ ​ខេត្ត​សៀមរាប កាល​ពី​អំឡុង​​ឆ្នាំ​២០១៤។
លោក សម រង្ស៊ី និង​លោក កឹម សុខា ថតរូប​ជាមួយ​ប្រជាពលរដ្ឋ និង​អាជីវករ​ផ្សារលើ ​ខេត្ត​សៀមរាប កាល​ពី​អំឡុង​​ឆ្នាំ​២០១៤។
Photo: RFA

ពលរដ្ឋ​ចង់​ឃើញ​វត្តមាន​លោក សម រង្ស៊ី នៅ​កម្ពុជា តាម​ការ​ប្រកាស​ធ្វើ​មាតុ​ភូមិ​និវត្តន៍​ជា​លើក​ទី២ ​របស់​លោក​ប្រកាស កាល​ពី​យប់​ថ្ងៃ​ទី១៩ ខែកញ្ញា។ ពួកគេ​ចង់​ឲ្យ​រដ្ឋាភិបាល​បន្ធូរ​បន្ថយ​ការ​ចាប់​ចង​សកម្មជន ឬ​ប្រជា​ពលរដ្ឋ បន្ទាប់​ពី​មាន​ការ​ប្រកាស​ធ្វើ​មាតុ​ភូមិ​និវត្តន៍​របស់​មេ​បក្ស​ប្រ​ឆាំង​រូប​នេះ។

បុគ្គលិក​ក្នុង​រោងចក្រ​មួយ​នៅ​ខេត្ត​ព្រះសីហនុ លោក សៅ វណ្ណារ៉ា ឲ្យ​ដឹងថា ការ​ប្រកាស​ធ្វើ​មាតុ​ភូមិ​និវត្តន៍​ជា​លើក​ទី២ របស់​លោក សម រង្ស៊ី គឺ​ជា​រឿង​ល្អ​សម្រាប់​អ្នក​គាំ​ទ្រគណបក្ស​សង្គ្រោះ​ជាតិ និង​ប្រជា​ពលរដ្ឋ ប៉ុន្តែ​លោក​​ចង់​ឃើញ​មេបក្ស​ប្រឆាំង​រូបនេះ ធ្វើ​តាម​ការ​ប្រកាស​របស់​ខ្លួន បើ​ទោះ​បី​ជា​មាន​ការ​រារាំង​ណា​មួយពី​គណបក្ស​កាន់​អំណាច​ក៏ដោយ។ លោក​បន្តថា​ ការ​ប្រកាស​បែប​នេះ​កន្លង​មក គឺ​តែង​មាន​សកម្មជន​គណបក្ស​សង្គ្រោះ​ជាតិ​មួយ​ចំនួន​ត្រូវ​បាន​អាជ្ញាធរ​បង្ក្រាប​ដាក់​ពន្ធ​នាគារ ដូច្នេះ លោក​ចង់​ឲ្យ​លោក សម រង្ស៊ី ធ្វើ​យ៉ាង​ណា វិល​មក​ឲ្យ​ដល់​កម្ពុជា​ពិត​ប្រាកដ ដើម្បី​ដោះ​ស្រាយ​បញ្ហា​នយោបាយ​នេះ និង​ជួយ​ដល់​ប្រជា​ពលរដ្ឋ៖ «ធ្វើការ​ធ្វើ​អី​ក៏​ដោយ សំខាន់​មាន​មេ មាន​ក្បាល មាន​កន្ទុយ ហើយ​ខ្ញុំ​គិត​ថា បើ​មាន​ក្បាល​មក​ហើយ អា​កន្ទុយ ខ្លួន វា​ចាំ​តែ​តាម​ក្រោយ​ទេ ម្នាក់ ២នាក់ ៣នាក់ ១០នាក់ ជួន​កាល រាប់​លាន​នាក់​នៅ​តាម​ក្រោយ​គាត់។ មើល​មិន​ឃើញ​ទេ ប៉ុន្តែ​ឲ្យ​មាន​ក្បាល​សិន ពីព្រោះ​មនុស្ស​ម្នាក់ៗ ជឿ​ទៅ​លើ​គាត់ ប៉ុន្តែ​បើ​គាត់​បាន​ប្រកាស​ហើយ ម្ដង​ហើយ​ម្ដង​ទៀតៗ នៅ​ក្នុង​ស្រុក​មាន​ចាប់​មាន​ចង នៅ​ពេល​ដែល​គាត់​ប្រកាស​ថា មក​ម្តងៗ គេ​រឹត​បន្តឹង»

ពលរដ្ឋ​នៅ​ខេត្ត​ព្រះសីហនុ ម្នាក់​ទៀត គឺ​លោក ភិន សារ៉ាត់ បញ្ជាក់​ថា លោក​គាំទ្រ​ចំពោះ​មាតុ​ភូមិ​និវត្តន៍​លើក​ទី២ របស់​លោក សម រង្ស៊ី ដោយ​សារ​លោក​ជឿ​ថា លោក សម រង្ស៊ី អាច​ធ្វើ​ឲ្យ​សេដ្ឋកិច្ច​នៅ​កម្ពុជា​មាន​ដំណើរ​ការ​ឡើង​វិញ​​​ដែល​អាច​ជួយ​ដល់​ប្រជា​ពលរដ្ឋ​ជាច្រើន​ឲ្យ​មាន​ការងារ​ ស្ដារ​លទ្ធិ​ប្រជាធិបតេយ្យ និង​មាន​ដំណោះ​ស្រាយ​នយោបាយ​មួយ ដើម្បី​ជួយ​ដល់​អ្នក​ដែល​កំពុង​ជាប់​ឃុំ​នៅ​ពន្ធ​នាគារ​ផង​ដែរ។ លោក​ជឿ​ថា លោក សម រង្ស៊ី អាច​ធ្វើ​ឲ្យ​សហភាព​អឺរ៉ុប​ផ្តល់​ប្រព័ន្ធ​អនុគ្រោះ​ពន្ធ EBA២០% មក​ឲ្យ​កម្ពុជា​វិញ និង​អាច​ទាក់​ទាញ​វិនិយោគិន​នៅ​ក្រៅ​ប្រទេស​មក​វិនិយោគ​នៅ​កម្ពុជា​បាន​ផង​ដែរ៖ «រាល់​ថ្ងៃ​អត់​មាន​គណបក្ស​ប្រឆាំង​សម្រាប់​ប្រឆាំង​នៅ​ក្នុង​រដ្ឋសភា​ក៏​អត់​មាន​អី ​ងងឹត​ឈឹង​ហ្មង។ ខ្ញុំ​សំណូមពរ​ឲ្យ​រដ្ឋា​ភិបាល​បើក​ផ្លូវ សម្រួល​ផ្លូវ​ឲ្យ​លោក​ប្រធាន​វិល​ចូល​ស្រុក​ខ្មែរ​ឲ្យ ឲ្យ​បាន​ជោគ​ជ័យ​កុំ​ឲ្យ​មាន​កង​កម្លាំង​ប្រដាប់​អាវុធ​រារាំង​ផ្លូវ​ដូច​កាលពី ០៩ វិច្ឆិកា បិទ​ផ្លូវ បិទ​ចរាចរ​មិន​ឲ្យ​ប្រជា​ពលរដ្ឋ​ធ្វើ​ដំណើរ ឬ​ក៏​ទៅ​ទទួល​លោក​ប្រធាន សម រង្ស៊ី វិល​ចូល​ស្រុក​ខ្មែរ​វិញ»

ប្រធាន​ស្តី​ទី​គណបក្ស​សង្រ្គោះ​ជាតិ លោក សម រង្ស៊ី ដែល​កំពុង​និរទេស​ខ្លួន​នៅ​ប្រទេស​បារាំង ថ្លែង​​តាម​បណ្ដាញ​សង្គម​ហ្វេសប៊ុក (facebook) នៅ​យប់​ទី១៩ ខែកញ្ញា ថា​ផែនការ​មាតុភូមិនិវត្តន៍​របស់​លោក​ជា​លើក​ទី២​ នឹង​កើតមាន​ជាថ្មី​ម្ដង​ទៀត​នៅ​ពេល​ខាងមុខ ដើម្បី​ជួយ​សង្គ្រោះ​ប្រទេស​កម្ពុជា​ឱ្យ​រួច​ពី​ការ​គ្រប់​គ្រង​បែប​ផ្ដាច់​ការ​របស់​លោក ហ៊ុន សែន សព្វ​ថ្ងៃ។ លោក សម រង្ស៊ី អះអាង​ថា​ ផែនការ​មាតុ​ភូមិ​និវត្ត​លើក​ទី២ នេះ ​គឺ​លោក​មិន​ប្រាប់​ពី​មធ្យោបាយ​ឱ្យ​ដឹង​មុន​ទេ​ដូច​លើក​ទី១ ឡើយ ​ដោយ​លោក​នឹង​មាន​វត្តមាន​នៅ​ប្រទេស​កម្ពុជា​តែម្ដង។ លោក​ក៏​ស្នើ​អ្នក​គាំទ្រ​លោក ត្រៀម​ខ្លួន​រួម​កម្លាំង​គ្នា​កម្ចាត់​របប​លោក ហ៊ុន សែន ពេល​លោក​ទៅដល់​កម្ពុជា ដោយ​ចោទ​ថា លោក ហ៊ុន សែន កំពុង​សម្លាប់​ជាតិ​ខ្មែរ។

អនុ​ប្រធាន​ប្រតិបត្តិ​នៃ​គណៈកម្មការ​គណបក្ស​សង្គ្រោះ​ជាតិ ស្រុក​ក្រគរ ខេត្ត​ពោធិ៍សាត់ មាន​ប្រសាសន៍​ថា ដំណើរ​មាតុ​ភូមិ​និវត្ត​ជា​លើក​ទី២ របស់​លោក សម រង្ស៊ី គឺ​ជា​រឿង​ល្អ​ប្រសើរ ដែល​អាច​ជួយ​ដល់​ប្រជា​ពលរដ្ឋ​កំពុង​រង​គ្រោះ​ដោយសារ​របប​លោក ហ៊ុន សែន។ លោក​បន្ត​ថា ប្រជា​ពលរដ្ឋ​ទាំង​អស់​ទាំង​នៅ​ក្នុង​ស្រុក និង​នៅ​ក្រៅ​ស្រុក គួរ​ស្រុះ​ស្រួល​គ្នា ជំនះ​រាល់​ការ​រារាំង​របស់​រដ្ឋាភិបាល ហើយ​នាំគ្នា​វិល​ចូល​ស្រុក​ទាំង​អស់​គ្នា៖ «ប្រសិន​បើ​ការ​វិល​ចូល​នេះ​បាន​ទទួល​ជោគជ័យ និង​ការ​គាំទ្រ​ពី​ប្រជាពលរដ្ឋ​ខ្មែរ វា​គឺ​ជា​ប្រវត្តិ​សាស្ត្រ​មួយ​របស់​ប្រទេស​កម្ពុជា​យើង​ក្នុង​ការ​រក​ដំ​ណោះ​ស្រាយ​រវាង​​ទំនាស់​ខ្មែរ​និង​ខ្មែរ​​ហ្នឹង​ឲ្យ​ជាសះស្បើយ​នឹងគ្នា​ឡើង​វិញ។ ប្រជា​ពលរដ្ឋ​ខ្មែរ​ទូទាំង​ពិភព​លោក ឬ​ក៏​ឯ​នាយ​សមុទ្រ​ហ្នឹង គឺ​ចាំ​តែ​ការ​ឲ្យ​សញ្ញា​ពី​លោក​ប្រធាន សម រង្ស៊ី ច្បាស់​ថា នឹង​ចូល​ទេ ពីព្រោះ​គាត់​នឹង​ត្រៀម​កម្លាំង ហើយ​ជាពិសេស​ គឺ​មាន​ការ​ត្រេកអរ​ខ្មែរ​ទាំង​អស់​គ្នា មិន​ថា អ្នក​គាំទ្រ​អ្នក​កាន់​អំណាច​ផ្តាច់​ការ​ទេ គឺ​ថា មាន​ការ​ត្រេកអរ​ទាំងអស់​គ្នា​ទូទាំង​ប្រទេស ហើយ​រង់ចាំ​ការ​វិល​ត្រឡប់​របស់​លោក​ប្រធាន​ទាំង​អស់​​គ្នា។

ពលករ​ធ្វើការ​នៅ​ប្រទេស​កូរ៉េ លោក ផាន់ ផារ៉ា លើក​ឡើង​ថា លោក​ចង់​ឲ្យ​លោក សម រង្ស៊ី វិល​ចូល​ស្រុក​វិញ​ឲ្យ​បាន​ឆាប់ ដើម្បី​ជួយ​ដល់​ប្រជា​ពលរដ្ឋ។ លោក​ថា លោក​នឹង​វិល​ទៅ​ប្រទេស​កម្ពុជា​វិញ​ ដើម្បី​រង់ចាំ​ទទួល​លោក សម រង្ស៊ី ធ្វើ​មាតុ​ភូមិ​និវត្តន៍​លើក​ទី២។ លោក​បន្ត​ថា ប្រសិន​បើ លោក សម រង្ស៊ី មិន​វិល​ចូល​ប្រទេស​កម្ពុជា​ដូច​ការ​ប្រកាស​របស់​លោក​ទេ លោក​គ្មាន​ជំនឿ​ចិត្ត​លើ​លោក សម រង្ស៊ី នោះ​ឡើយ៖ «ខ្ញុំ​មើល​ឃើញ​ថា បើ​គាត់​ចូល​ស្រុក​វិញ​កាន់​តែ​ឆាប់​កាន់​តែ​ល្អ ព្រោះ​អី​ខ្ញុំ​មើល​ឃើញ​ថា ស្ថានភាព​ស្រុក​ខ្មែរ​នៅ​ពេល​នេះ​គឺ​កាន់​តែ​ដុន​ដាប​ទៅៗ ព្រោះ​អី​នៅ​ខ្មែរ​ឥឡូវ ការ​រំលោភ​សិទ្ធិ​មនុស្ស​ហ្នឹង​កាន់​តែ​ធ្ងន់ធ្ងរ​ទៅៗ ចឹង។ គាត់​(លោក សម រង្ស៊ី) តែង​តែ​ព្យាយាម​ការពារ​ឆ្នាំង​បាយ​ប្រជា​ពលរដ្ឋ កុំឲ្យ​បាត់​បង់​ការងារ​ដោយសារ​រដ្ឋាភិបាល​គាត់​មិន​ខ្វល់​ អើពើ​នឹង​ប្រជា​ពលរដ្ឋ​អញ្ចឹង»

លោក​សម រង្ស៊ី​ ធ្លាប់​បាន​ប្រកាស​ម្ដង​រួច​មក​ហើយ​ពី​ដំណើរ​ធ្វើ​មាតុ​ភូមិ​និវត្តន៍​លើក​ទី១ ជាមួយ​ក្រុម​អ្នក​គាំទ្រ​របស់​​លោក​ កាល​ពី​ថ្ងៃ​ទី៩ ខែ​វិច្ឆិកា ឆ្នាំ២០១៩ ​កន្លង​ទៅ ដើម្បី​ស្ដារ​លទ្ធិ​ប្រជាធិបតេយ្យ​នៅ​កម្ពុជា ប៉ុន្តែ​មិន​ទទួល​បាន​ជោគ​​ជ័យ​នោះទេ ដោយសារ​លោក​ហ៊ុន សែន រារាំង​ដោយ​ដាក់​កម្លាំង​ទ័ព​បិទ​ច្រក​ព្រំដែន និង​ព្រមាន​ក្រុម​ហ៊ុន​យន្ត​ហោះ​មិន​ឱ្យ​ដឹក​លោក សម រង្សី ចូល​ក្នុង​ទឹកដី​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

 

ព័ត៌មាន (0)
Share
គេហទំព័រ​ទាំងមូល