ប្រធានចលនា សង្គ្រោះជាតិ លោក សម រង្ស៊ី នៅថ្ងៃទី៨ កក្កដា បានបង្ហោះសារក្នុងហ្វេសប៊ុក (Facebook) របស់លោករិះគន់សាជាថ្មី ប្រដូចគណបក្សប្រជាជនកម្ពុជាថា ជាគណបក្សលក់ជាតិ បំផ្លាញជាតិ និងក្បត់ជាតិ។ ចំណែកគណបក្ស១៩ផ្សេងទៀតដែលចូលរួមបោះឆ្នោតជ្រើសតាំងតំណាងរាស្ត្រនៅថ្ងៃខាងមុខថា ជាគណបក្សមានតែក្បាលអត់ខ្លួន ឬជាគណបក្សអំពិលអំពែក។ ចំណែកលោក ហ៊ុន សែន វិញ ធ្លាប់បានអះអាងថា ការបោះឆ្នោតនេះ ដំណើរការតាមបែបប្រជាធិបតេយ្យសេរីពហុបក្ស ត្រឹមត្រូវ និងយុត្តិធម៌។
ប្រធានចលនា សង្គ្រោះជាតិ បានបង្ហោះសារវាយប្រហារដំណើរការបោះឆ្នោតនេះជាបន្តបន្ទាប់។ សារចុងក្រោយនេះ លោក សម រង្ស៊ី បានចាត់ទុកគណបក្សលេខរៀងទី២០ គឺជាគណបក្សលក់ជាតិ បំផ្លាញជាតិ និងក្បត់ជាតិ។ ចំណែកគណបក្សតូចៗ ដែលមានលេខរៀងពីទី១ ដល់ទីលេខទី១៩ គឺជាគណបក្សអាប ដែលមានតែក្បាលអត់ខ្លួន ឬគណបក្សអំពិលអំពែក ដែលកើតចេញមកព្រោងព្រាត ពេលរដូវបោះឆ្នោតម្តងៗ តែរលត់បាត់ទៅវិញអស់ក្រោយថ្ងៃបោះឆ្នោត។ លោកថា គណបក្សទាំង ១៩នោះ គ្រាន់តែជាគណបក្សមកបង្គ្រប់កិច្ចប៉ុណ្ណោះ ឲ្យគណបក្សប្រជាជនកម្ពុជា ដែលលេខរៀងទី២០ ដែលជាអ្នករៀបចំការបោះឆ្នោតក្លែងក្លាយនៅថ្ងៃទី២៩ កក្កដា ២០១៨។ លោក សម រង្ស៊ី ថាការបោះឆ្នោតនេះ ជាឆាកល្ខោន ដើម្បីកម្ចាត់គណបក្ស សង្គ្រោះជាតិ សម្លាប់លទ្ធិប្រជាធិបតេយ្យ និងប្រថាប់ត្រា ឲ្យគណបក្ស ប្រជាជនកម្ពុជា ឈ្នះ ១០០ភាគរយ ហើយមានលេសកាន់អំណាច បំផ្លាញជាតិ តទៅទៀត ហើយគណបក្សគណបក្សអំពិលអំពែកទាំង ១៩ នោះ មិនគួរចូលមកលេងល្បែងដ៏ថោកទាបបែបនេះសោះ ពីព្រោះជាការចូលដៃជាមួយគណបក្សប្រជាជនកម្ពុជា ក្នុងការសម្លាប់ជាតិមាតុភូមិកម្ពុជារបស់យើងទាំងអស់គ្នា។
លោកថា ទោះបីជាគណបក្សអាប ឬអំពិលអំពែកណាមួយ អាចទៅជាគណបក្សខ្លាំងគួរសម ដែលអាចយកឈ្នះលើគណបក្ស ប្រជាជនកម្ពុជា ក៏ដោយពេលនោះ លោក ហ៊ុន សែន ច្បាស់ជានឹងរំលាយគណបក្សនោះ ដូចគណបក្សសង្គ្រោះជាតិជាពុំខាន។ លោក សម រង្ស៊ី បន្តថា ពិភពលោកដឹងហើយថា ពេលនេះថា លោក ហ៊ុន សែន មិនហ៊ានលេងល្បែងប្រជាធិបតេយ្យទៀតទេ ពីព្រោះគាត់ដឹងថា គាត់ច្បាស់ជាចាញ់គណបក្សប្រឆាំងដែលបានរីកធំ ដូចគណបក្ស សង្គ្រោះជាតិ បើមានការបោះឆ្នោតត្រឹមត្រូវពិតប្រាកដនោះ។
ទោះជាមានការរិះគន់យ៉ាងនេះក្ដី កន្លងមកលោក ហ៊ុន សែន អះអាងថា ការបោះឆ្នោតខាងមុខដំណើរការប្រកបដោយប្រជាធិបតេយ្យសេរីពហុបក្សពហុបក្ស ហើយមានគណបក្សនយោបាយចំនួន ២០គណបក្ស ចូលរួមប្រកួតប្រជែង គឺមែនជាគណបក្សអាប ឬគណបក្សអំពិលអំពែកដូចការចោទប្រកាន់របស់លោក សម រង្ស៊ី នោះទេ។ «»
មន្ត្រីជាន់ខ្ពស់អង្គការ ខុមហ្រ្វែល (Comfrel) លោក កន សាវាង្ស សុំមិនអត្ថាធិប្បាយច្រើនជុំវិញការបង្ហោះសាររិះគន់នេះទេ ប៉ុន្តែលោកអះអាងថា សាររិះគន់មួយចំនួននៅអំឡុងពេលបោះឆ្នោត គឺអាចជះឥទ្ធិពលដល់ប្រជាពលរដ្ឋទាំងមូលបាន។ «»
លោក សម រង្ស៊ី ក៏បានអំពាវនាវដល់ប្រជាពលរដ្ឋដែលស្រលាញ់ជាតិ ស្រលាញ់សេរីភាព និងស្រលាញ់យុត្តិធម៌ មិនត្រូវទៅចូលរួមបោះឆ្នោត ថ្ងៃទី២៩ កក្កដា ខាងមុខនេះទេ ដើម្បីបង្ហាញពិភពលោកថា ហ៊ុន សែន ជាជនក្បត់ជាតិ អស់លក្ខណ៍ហើយ ពីព្រោះប្រជារាស្ត្រខ្មែរត្រូវការដូរគាត់ចេញ ដើម្បីមានការផ្លាស់ប្ដូរជាវិជ្ជមាន។ ដោយឡែកនៅថ្ងៃយុទ្ធនាការថ្ងៃទី២ ការឃោសនារកសំឡេងឆ្នោតរបស់គណបក្សនយោបាយ ទាំងគណបក្សតូចៗនិងគណបក្សកាន់អំណាចហាក់មិនសូវមានសកម្មភាពខ្លាំងក្លាដូចការឃោសនាបោះឆ្នោតកាលពីអាណត្តិមុនៗ នោះទេ៕
