ក្រុម​ការងារ​១០០​រាត្រី​ត្រៀម​ផ្សាយ​របាយការណ៍​ស្ដីពី​​ស្ថានភាព​ការពារ​ព្រំដែន​របស់​កម្ពុជា

ដោយ សុ ជីវី
2019-06-13
អ៊ីម៉ែល
មតិ
Share
បោះពុម្ព
ប៉ុស្តិ៍​ប៉ូលិស​ព្រំដែន​ខ្មែរ​នៅ​ភូមិ​ពាមមន្ទារ ឃុំ​ពាមមន្ទារ ស្រុក​កំពង់ត្របែក ខេត្ត​ព្រៃវែង ជាប់​ព្រំដែន​វៀតណាម ថ្ងៃ​ទី​២៨ ខែ​វិច្ឆិកា ឆ្នាំ​២០១៦។
ប៉ុស្តិ៍​ប៉ូលិស​ព្រំដែន​ខ្មែរ​នៅ​ភូមិ​ពាមមន្ទារ ឃុំ​ពាមមន្ទារ ស្រុក​កំពង់ត្របែក ខេត្ត​ព្រៃវែង ជាប់​ព្រំដែន​វៀតណាម ថ្ងៃ​ទី​២៨ ខែ​វិច្ឆិកា ឆ្នាំ​២០១៦។
RFA

ក្រុម​យុវជន​១០០​រាត្រី ដែល​បន្ត​បេសកកម្ម​ពី​លោក បណ្ឌិត កែម ឡី គ្រោង​ផ្សាយ​របាយការណ៍​ស្រាវជ្រាវ​រាត្រី​ទី ៤៥ ស្ដីពី​សមត្ថភាព​ការពារ​ព្រំដែន របស់​កម្ពុជា ទន់ខ្សោយ ដែល​មិន​អាច​ធានា​បាន​ថា កម្ពុជា​នឹង​មិន​បាត់បង់​ទឹកដី​ទៀត ទៅ​វៀតណាម​នា​ថ្ងៃ​អនាគត។ ការ​លាតត្រដាង​របាយ​ការណ៍​នេះ ក្រោយពី​ពួកគេ​បាន​ចុះ​សិក្សា ស្រាវជ្រាវ​ជាង ១ ឆ្នាំ ដោយ​បាន​ចុះ​ប្រមូល​ព័ត៌មាន ពី​ពលរដ្ឋ និង​សមត្ថ​កិច្ចការពារ​ព្រំដែន​ខ្មែរ និង​ឯកសារ​ពាក់ព័ន្ធ​នានា។

របាយការណ៍ ក្រុម​យុវជន​១០០​រាត្រី បាន​លាតត្រដាង ពី​ហានិភ័យ​ជាច្រើន ដែល​រុញ​ឱ្យ​កម្ពុជា ប្រឈម​របូត​ទឹកដី ទៅ​វៀតណាម​គ្រប់គ្រង​ជា​បន្តបន្ទាប់ បូករួម​ទាំង​ការ​ហូរ​ចូល​ជនអន្តោប្រវេសន៍​វៀតណាម​ខុសច្បាប់ និង​យុទ្ធសាស្ត្រ​ជាច្រើន ជា​ល្បិច​ឈ្លានពាន​រយៈពេល​វែង​របស់​រដ្ឋាភិបាល​វៀតណាម។ លើស​ពី​នេះ សមត្ថភាព​ការពារ​ព្រំដែន​របស់​សមត្ថកិច្ច​កម្ពុជា មិន​ត្រឹមតែ​ខ្វះខាត​ច្រើន​នោះ​ទេ អ្វី​ដែល​ប្រឈម​ខ្លាំង​ជាងគេ គឺ​រដ្ឋាភិបាល​មិន​យកចិត្តទុកដាក់​ដោះស្រាយ​ទាល់តែសោះ គឺ​ជីវភាព​ប្រជាជន​រស់នៅ​តាម​ព្រំដែន​ធ្លាក់​ចុះ​ខ្លាំង ដោយសារ​គ្មាន​ការ​អភិវឌ្ឍ​តាម​ព្រំដែន ជាច្រើន​ទសវត្សរ៍​មក​ហើយ។

ខ្លឹមសារ​របាយការណ៍​បង្ហាញ ពី​ចំណុច​ស្នូល​មួយ​ចំនួន​បង្ហាញ​ពី​សមត្ថភាព​ការពារ​ព្រំដែន​របស់​កម្ពុជា​ទន់​ខ្សោយ​ខ្លាំង បើ​ធៀប​ប្រទេសជិតខាង​រួមមាន អគារ​ត្រួតពិនិត្យ​តាម​ព្រំដែន​ផ្នែក​កម្ពុជា​គ្មាន​ស្តង់ដារ ទាហាន​ព្រំដែន​កម្ពុជា​មាន​ប្រាក់ខែ​ទាប​ជាង ទាហាន​វៀតណាម និង​គ្មាន​យន្តការ​បំបាត់​អំពើពុករលួយ​នៅ​តាម​ព្រំដែន និង​បញ្ហា​សំខាន់ៗ​មួយ​ចំនួន​ទៀត​។​

សមាជិក​ក្រុមការងារ ១០០​រាត្រី លោក មួង សូនី និយាយ​ថា វៀតណាម​ប្រើ​រូបភាព​ជាច្រើន ក្នុង​បំណង​ឈ្លានពាន​កម្ពុជា​គ្រប់​កាលៈទេសៈ​រួមមាន ការ​ជះ​លុយ​ទិញ​មន្ត្រី​កម្ពុជា ប្រើ​ស្រី​ស្អាត​ទិញ​ទឹកចិត្ត​មន្ត្រី​ខ្មែរ គំរាមកំហែង​សមត្ថកិច្ច​កម្ពុជា​តាម​ព្រំដែន និង ញុះញង់​ឱ្យ​ថ្នាក់ដឹកនាំ​ខ្មែរ​បែកបាក់​ផ្ទៃក្នុង​ជាដើម។ លោក​ថា វៀតណាម លើកទឹកចិត្ត​ឱ្យ​ប្រជាជន​គេ​ចូល​ដី​ខ្មែរ ធ្វើ​កសិកម្ម និង​ទិញ​ដី​ខ្មែរ​តាម​បណ្ដោយ​ព្រំដែន​រស់នៅ ព្រមទាំង​បញ្ជូន​ប្រជាជន​គេ​មក​រស់នៅ កៀក​ព្រំដែន រំកិល​ចូល​ដី​ខ្មែរ​បន្តិច​ម្តងៗ ខណៈ​ដែល​ព្រំដែន​កម្ពុជា​គ្មាន​ការ​អភិវឌ្ឍ​អ្វី​ទាំងអស់​។ លោក មួង សូនី បន្ថែម​ថា រដ្ឋាភិបាល​កម្ពុជា​ហាក់​គ្មាន​ទំនួល​ខុសត្រូវ ចំពោះ​ភារកិច្ច​របស់​ខ្លួន​ដឹកនាំ​ប្រទេស ដែល​ធានា​ថា នឹង​រក្សា​ការពារ​ដី​ខ្មែរ​ឱ្យ​គង់វង្ស​នោះ​ទេ​៖ «សមត្ថភាព​ការពារ​ព្រំដែន​របស់​រដ្ឋាភិបាល​នៅ​មាន​កម្រិត​ខ្សោយ​ណាស់ ដែល​មិន​អាច​ទទួល​យក​បាន មិន​មាន​ភាព​ប្រាកដ​និយម ដែល​មិន​អាច​ធានា​បាន​ថា យើង​នឹង​មិន​អាច​បាត់បង់​ទឹកដី​តាម​បណ្ដោយ​កម្ពុជា និង​វៀតណាម​ទៀត នៅ​ថ្ងៃ​អនាគត និង​បណ្ដោយ​ព្រំដែន​កម្ពុជា​គ្មាន​ការអភិវឌ្ឍន៍​ចំណុច​ទាំងពីរ នេះ វា​នឹង​ធ្វើ​ឱ្យ​កម្ពុជា​បាត់បង់​ទឹកដី​ទៅ​វៀតណាម​ទៀត នៅ​ថ្ងៃ​អនាគត»

ខ្លឹមសារ​របាយការណ៍​បន្ថែម​ថា ការសិក្សា​ស្រាវជ្រាវ​នេះ ធ្វើឡើង​នៅ​ខេត្ត​ចំនួន ៦ ជាប់​ព្រំដែន​វៀតណាម គឺ​ខេត្ត​ត្បូងឃ្មុំ ខេត្ត​តាកែវ កំពត ព្រៃវែង ស្វាយ​រឿង និង​ខេត្ត​កណ្តាល ដែល​រៀបរាប់​ពី​ស្ថានភាព ព្រំដែន​របស់​កម្ពុជា​- វៀតណាម​គ្មាន​របង​។ របាយការណ៍​បន្ថែម​ថា នៅ​ខេត្ត​តាកែវ ក្នុងស្រុក​ចំនួន ២ គឺ​ស្រុក​បូរី​ជលសារ និង​ស្រុក​គិរីវង្ស មាន​ច្រក​ព្រំដែន​អន្តរជាតិ​ភ្នំ​ដិន ច្រក​របៀង​កំណប់ និង​ច្រក​ថ្ម​បី​ដុំ ឋិត​នៅ​ចន្លោះ​បង្គោល​ព្រំដែន​លេខ​២៦៥ ដល់​បង្គោល​លេខ ២៧៥ គឺ​ស្ថានភាព​ព្រំដែន​នៅ​តំបន់​នោះ គ្មាន​ការ​អភិវឌ្ឍ​នោះ​ទេ សូម្បីតែ​ប្រជាជន​ខ្មែរ ធ្វើ​ចំណាកស្រុក​ស្ងាត់​ភូមិ ស្រូវ​ស្រែ​ខ្លះ​គ្មាន​អ្នកធ្វើ និង​ជួល​ឱ្យ​វៀតណាម ដែល​ផ្ទុយគ្នា​ដាច់​ស្រឡះ​ពី​ប្រទេស​វៀតណាម មាន​ហេដ្ឋារចនាសម្ព័ន្ធ និង​ប្រជាជន​រស់នៅ​ច្រើន​ស្អេកស្កះ​។ លើស​ពី​នេះ នៅ​តាម​បណ្ដោយ​ព្រំដែន​ខេត្ត​ព្រៃវែង និង​ស្រុក​ចន្ទ្រា ស្រុក​កំពង់រោទិ៍​ខេត្ត​ស្វាយរៀង និង​ខេត្ត​ត្បូងឃ្មុំ ក៏​ទិដ្ឋភាព​ព្រំដែន​ដូចគ្នា​ដែរ។

លោក មួង សូនី មើល​ឃើញ​ថា រដ្ឋាភិបាល​កម្ពុជា ហាក់​គ្មាន​ឆន្ទៈ ការពារ​ព្រំដែន​ទាល់តែសោះ បើ​ទោះ​បី​ជា គណបក្សប្រឆាំង អង្គការ​សង្គម​ស៊ីវិល និង​ពលរដ្ឋ​ខ្មែរ បាន​ត្អូញត្អែរ និង​បារម្ភ ពី​ការឈ្លានពាន​ទឹកដី​ខ្មែរ ពី​សំណាត់​វៀតណាម​ក្តី​។ លោក​សង្កេត​ឃើញ​ថា បើ​ទោះ​បី​ជា ពលរដ្ឋ​សំណូមពរ​ជាច្រើន​ក្ដី ក៏​រដ្ឋាភិបាល​មិន​រវល់​ទាល់តែសោះ​ចំពោះ​ការ​អភិវឌ្ឍ​តាម​បណ្ដោយ​ព្រំដែន​៖ «វៀតណាម​ប្រើ​រូបភាព​ច្រើន​ណាស់​ឈ្លានពាន​កម្ពុជា​ទៅតាម​កាលៈទេសៈ​ស្រប​ដែល​គេ​អាច​ធ្វើ​បាន តាំងពី​ប្រើ​លុយ​ទិញ​មន្ត្រី​ខ្មែរ ប្រើ​ស្រី​ស្អាត​ទិញ​ទឹកចិត្ត​មន្ត្រី ប្រើការ​គំរាមកំហែង​ធ្វើ​ឱ្យ​មន្ត្រី​ភ័យខ្លាច ការ​ញុះញង់​បែកបាក់​គ្នា​ចំពោះ​ថ្នាក់ដឹកនាំ​ខ្មែរ ហើយ​គេ​យក​នេះ​ពុំ​មែន​តែ​វិធី ឈ្លានពាន​យក​តែ​មួយ​មុខ​ទេ សូម្បី​តែមួយ មី​លី​ម៉ែត្រ​ដែល​គេ​អាច​យក​បាន​ក៏​គេ​យក​ដែរ សូម្បី​រូបភាព​បាក់​ច្រាំង​ក៏​គេ​អាច​យក​បាន​រូបភាព ជួល​ដី និង​ទិញ​ដី​ខ្មែរ​តាម​ព្រំដែន រូបភាព​គេ​បញ្ជូន​ប្រជាជន​គេ​មក​នៅ​តាម​ព្រំដែន គេ​យក​ម្ដង ១​ហិកតារ និង ២​ហិកតារ»

អ្នកនាំពាក្យ​ទីស្ដីការ​គណៈរដ្ឋមន្ត្រី លោក ទិត្យ សុធា បដិសេធ​មិន​អធិប្បាយ​ពី​របាយការណ៍​ក្រុមការងារ ១០០​រាត្រី​ទេ ដោយ​លោក​រុញ​ឱ្យ​សួរ ក្រសួងមហាផ្ទៃ​វិញ​។

អាស៊ីសេរី​បាន​ទូរស័ព្ទ​ទៅ អ្នកនាំពាក្យ​ក្រសួងមហាផ្ទៃ លោក ខៀវ សុភគ៌ តែ​លោក​ឆ្លើយ​ថា ច្រឡំ​លេខ។ ចំណែក​អ្នកនាំពាក្យ​រដ្ឋាភិបាល លោក ផៃ ស៊ីផាន មិន​លើក​ទូរស័ព្ទ។

ទោះជា​យ៉ាងណា អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥសាន ចាត់​ទុក​​របាយការណ៍​នេះ គ្រាន់តែ​ជា​ការ​យល់ឃើញ​ពី​មនុស្ស​មួយ​ក្រុម​តូច​ប៉ុណ្ណោះ។ លោក​ថា រដ្ឋាភិបាល កំពុង​ខិតខំ​ចរចា​កំណត់​ខណ្ឌសីមា​ព្រំដែន​ជាមួយ​ប្រទេសជិតខាង​ឱ្យ​រួចរាល់ ដើម្បី​ការពារ​អធិបតេយ្យភាព​កម្ពុជា​។ លើស​ពី​នេះ ច្រក​ព្រំដែន​កម្ពុជា​មួយ​ចំនួន មាន​មូលដ្ឋាន​សំណង់​ធំៗ និង​កាស៊ីណូ​ជាច្រើន ដែល​មិន​អាច​រំកិល​ព្រំដែន​បាន ដែល​លោក​ចាត់ទុកថា ពុំ​មែន​គិតគូរ​តែ​ផ្នែក​សេដ្ឋកិច្ច​ទេ ដើម្បី​ការពារ​ទឹកដី​កម្ពុជា​ផង។ ចំពោះ​សំនួរ​ដែល​សួរ​ថា តើ​របាយការណ៍​របស់​ក្រុមការងារ ១០០​រាត្រី ស្រាវជ្រាវ​នេះ តើ​រដ្ឋាភិបាល​ឬ​គណបក្ស​ប្រជាជន នឹង​យក​មក​ជា​មូលដ្ឋាន​ដោះស្រាយ​ឬទេ​? លោក​សុខ ឥសាន ឆ្លើយ​ថា លោក​មិន​ប្រាកដ​ថា របាយការណ៍​នេះ​ត្រឹមត្រូវ​ឬ​យ៉ាង​ណា​ទេ ប៉ុន្តែ​បើ​ពិនិត្យ​ឃើញ​ថា របាយការណ៍​នេះ​សមស្រប រដ្ឋាភិបាល​នឹង​យក​ជា​មូលដ្ឋាន​ដោះស្រាយ​៖ «ការ​បោះ​បង្គោល​ព្រំដែន ព្រោះ​ខ្លាច​កិល​ចុះឡើង បានជា​រាជរដ្ឋាភិបាល​លោក​ខិតខំ​ណាស់ បោះ​បង្គោល​ព្រំដែន​ឱ្យ​បានសម្រេច​លទ្ធផល​។ ទ្វារ​អន្តរជាតិ​នីមួយៗ សុទ្ធ​តែ​មាន​បង្គោល​ច្បាស់លាស់​ណាស់ សុទ្ធ​មាន​មូលដ្ឋាន​សំណង់​ធំៗ ដូច​កាស៊ីណូ មិន​អាច​កិល​បានទេ។ នេះ​ហើយ​ជា​គោល​គំនិត​ពុំ​មែន​តែ​ក្នុង​ន័យ​សេដ្ឋកិច្ច​ទេ វា​គំនិត​ការពារ​បូរណភាព​ទឹកដី»

លោក សុខ ឥសាន បន្ថែម​ថា កម្ពុជា​ជា​ប្រទេស​ក្រីក្រ និង​ធ្លាប់​ឆ្លងកាត់​សង្គ្រាម ខុស​ពី​វៀតណាម​គ្មាន​សង្គ្រាម ហេតុនេះ ការ​អភិវឌ្ឍ​តាម​បណ្ដោយ​ព្រំដែន​របស់​វៀតណាម​ជឿនលឿន​ជាង​កម្ពុជា​។ នៅ​ពេល​ដែល​សួរ​ថា ក្រុម​យុវជន​ចង់​ឱ្យ​រដ្ឋាភិបាល​ប្រុងប្រយ័ត្ន​ក្នុង​កិច្ច​គាំពារ​ព្រំដែន ខណៈ​វៀតណាម​ពុំ​មាន ភាព​ស្មោះត្រង់​កំណត់​បង្គោល​ព្រំដែន​ជាមួយ​កម្ពុជា លោក សុខ ឥសាន ឆ្លើយ​ផ្ដាំ​ទៅ​យុវជន​ថា សូម​កុំ​វាយតម្លៃ​វៀតណាម​ដូច្នេះ​មិន​ត្រឹមត្រូវ​ទេ បើ​គ្រាន់តែ​ទៅ​ដេក ២​ទៅ បី​យប់​៖ «បើ​ពិនិត្យ​ឃើញ​ថា សមស្រប​អាហ្នឹង​រដ្ឋាភិបាល​លោក​យក​មក ជា​មូលដ្ឋាន​មក​ជជែក តែ​កុំ​ដាក់​កំហិត​ថា ត្រូវតែ​យក អស់លោក​ប្អូនៗ​គ្មាន​សិទ្ធិ​អី​មក​បង្ខំ​រដ្ឋាភិបាល​ទេ»

ទោះជា​យ៉ាង​នេះ​ក្តី លោក មួង សូនី បបួល លោក សុខ ឥសាន ឆ្លើយ​តទល់​ជា​សាធារណៈ​ទាក់ទិន​រឿង​ព្រំដែន​ដែល​លោក​អះអាង​ថា ក្រុមការងារ ១០០​រាត្រី មាន​ភស្តុតាង និង​របាយការណ៍​ជាក់លាក់ ដែល​បញ្ជាក់​ថា វៀតណាម​ឈ្លានពាន​កម្ពុជា​គ្រប់​រូបភាព និង​មាន​ដី​ខ្មែរ​មួយ​ចំនួន របូត​ទៅ​វៀតណាម​គ្រប់គ្រង នៅ​រយៈពេល​ប៉ុន្មាន​ឆ្នាំ​ចុង​នេះ៖ «បើ​ទោះ​បី​ជា​លោក សុខ ឥសាន លើកឡើង​ថា មិន​ជឿ ថា​ក្រុមការងារ ១០០​រាត្រី អាច​សិក្សា​ផ្ដល់​ព័ត៌មាន​ពិតប្រាកដ លោក គួរតែ​ជួប​ជាមួយ​ក្រុមការងារ ១០០​រាត្រី ហើយ​គាត់​គួរតែ​ធ្វើ​កម្មវិធី​តុ​មូល ដើម្បី​ជជែក​ជាមួយ​ក្រុមការងារ ១០០​រាត្រី»

ទេសរដ្ឋមន្ត្រី​ទទួលបន្ទុក​បេសកកម្ម​ពិសេស​កិច្ចការ ព្រំដែន លោក វ៉ា គឹមហុង ប្រាប់​អាស៊ីសេរី​ថា គណៈកម្មការ​ព្រំដែន មាន​តួនាទី​បច្ចេកទេស ការចរចា កំណត់​ខណ្ឌសីមា និង​បោះ​បង្គោល​ព្រំដែន រវៀង​ប្រទេស​កម្ពុជា និង​ប្រទេសជិតខាង​។ រីឯ សុវត្ថិភាព​ច្រក​ចេញចូល និង​ការ​អភិវឌ្ឍ​តាម​បណ្ដោយ​ព្រំដែន ជា​ភារកិច្ច​របស់​ក្រសួងមហាផ្ទៃ​គ្រប់គ្រង។ លោក​បន្ថែម​ថា មក​ទល់​ពេល​នេះ ការ​បោះបង្គោល​កំណត់​ខណ្ឌ​សីមា​ព្រំដែន​ជាមួយ​វៀតណាម សម្រេច​បាន ៨៤​ភាគរយ និង​ជាមួយ​ឡាវ​សម្រេច​បាន ៨៦​ភាគរយ ហើយ​ចំណុច​ដែល​នៅ​សេសសល់​កំពុង​ចរាចរ ដោះស្រាយ ដោយ​ទ្វេ​ភាគី​៖ «កម្ពុជា​ចង់​ឱ្យ​បោះ​បង្គោល​ព្រំដែន ចប់​ឆ្នាំ ២០១៩ ក៏​មិន​អាច​ចប់​បាន​ដែរ បើ​ភាគី​ម្ខាង​ទៀង​មិន​ចង់​ក៏​យើង​មិន​ដឹង​ធ្វើ​ម៉េច​ដែរ​។ នេះ​ជា​ការ​ចរចា​ទ្វេភាគី​រវាង​ប្រទេស និង​ប្រទេស ដូច្នេះ​យើង​មិន​អាច​និយាយ​បាន​ថា ត្រូវ​ចប់​ពេលណា»

យុវជន​រស់នៅ​រាជធានី​ភ្នំពេញ លោក សឺន ពិសិទ្ធិ ដែល​តែង​ចុះ​ពិនិត្យ​ស្ថានភាព​ព្រំដែន សង្កេត​ឃើញ​ថា ការកំណត់​បង្គោល​ព្រំដែន របស់​រដ្ឋាភិបាល​កម្ពុ​ជា​ចាញ់​ប្រៀប​ជាង វៀតណាម​គ្រប់កន្លែង ក្នុង​នោះ​បង្គោល​ព្រំដែន​ខ្លះ​បោះ​ចូល​ដី​ខ្មែរ​ជាច្រើន​គីឡូម៉ែត្រ ដូចជា​នៅ​ស្រុក​ចន្ទ្រា ខេត្ត​ស្វាយរៀង​ជាដើម​។ លោក​អំពាវនាវ​ឱ្យ​រដ្ឋាភិបាល ត្រូវ​ភ្ញាក់ខ្លួន​ឡើងវិញ និង​ត្រូវ​គិត​បញ្ហា​ព្រំដែន​ជា​ចំណុច​សំខាន់ ដែល​ធានា​ថា ទឹកដី​ខ្មែរ​មិន​ឱ្យ​បាត់បង់​ជា​បន្ត​ទៀត​៖ ៖ «រដ្ឋាភិបាល​ដូច​អត់​មាន​ឆន្ទៈ​ធ្វើ​រឿង​ហ្នឹង ជា​រឿង​របស់​ជាតិ​។ ខ្ញុំ​គិត​ថា របៀប​ធ្វើ​ការងារ​របស់​រដ្ឋាភិបាល​យើង​អីចឹង ទៅ​ថ្ងៃមុខ​យើង​នឹង​បាត់បង់​ទឹកដី​ខ្មែរ​ផ្នែក​ណាមួយ នៃ​បូរណភាព​ទឹក​ដី ដែល​ដូនតា​យើង​បន្សល់ទុក​មក ។ អីចឹង​ខ្ញុំ​ព្រួយបារម្ភ​ខ្លាំង​មែនទែន​វា​អាច​ប៉ះពាល់​អ្នក​ជំនាន់​ក្រោយ​ទៀត»

ក្រុមការងារ ១០០​រាត្រី បន្ថែម​ថា ពួកគេ​នឹង​យក​របាយការណ៍​នេះ ចម្លង​ជូន គណៈកម្មការ​កិច្ចការ​ព្រំដែន​កម្ពុជា រាជបណ្ឌិត្យសភា ក្រសួងមហាផ្ទៃ និង​ទីស្តីការ​គណៈរដ្ឋមន្ត្រី ដោយ​រុញ​ឱ្យ​ស្ថាប័ន​កំពូល​ទាំងនេះ ត្រូវ​បង្ហាញ​ឆន្ទៈ​រឹងមាំ និង​ទំនួល​ខុសត្រូវ ក្នុង​កិច្ច​គាំពារ​ព្រំដែន​កម្ពុជា​ឱ្យ​គង់វង្ស​ស្របតាម​ច្បាប់​ជាតិ និង​អន្តរជាតិ​។ ពួកគេ​បារម្ភ​ថា វៀតណាម​នៅតែ​មហិច្ឆតា​ឈ្លានពាន​កម្ពុជា​គ្រប់​ទម្រង់ ទាំង​ផ្នែក​សេដ្ឋកិច្ច ប្រជាជន​ច្រើន និង​ការ​អភិវឌ្ឍ​តាម​បណ្ដោយ​ព្រំដែន​របស់​គេ​មាន​សន្ទុះ​ខ្លាំង ជាពិសេស​គេ​បញ្ជូន​ប្រជាជន​វៀតណាម​រាប់​សែន​នាក់ មក​រស់នៅ​ច្រើន​ស្អេកស្កះ​ដោយ​ខុសច្បាប់​ក្នុង​ទឹកដី​កម្ពុជា កើតកូន​ពូន​ជា​ចៅ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល