១ . លោក ហ៊ុន សែន ទទួលស្គាល់ថា ប្រធានាធិបតីអាមេរិកប្រាប់ឱ្យកែលំអស្ថានភាពសិទ្ធិមនុស្ស មុនការបោះឆ្នោតឆ្នាំ២០២៣ ខាងមុខ
លោកនាយករដ្ឋមន្ត្រី ហ៊ុន សែន ទទួលស្គាល់ថា ជំនួបទ្វេភាគីរវាងលោកជាមួយប្រធានាធិបតីអាមេរិកលោក ចូ បៃឌិន (Joe Biden) កាលពីក្នុងកិច្ចប្រជុំកំពូលអាស៊ាន គឺលោក ចូ បៃឌិន បានប្រាប់លោកទៅឱ្យបើកលំហប្រជាធិបតេយ្យសម្រាប់ការបោះឆ្នោតឆ្នាំ២០២៣ ឡើងវិញ។ អានព័ត៌មានពិស្តារ ...
២. ប្រមុខការពារជាតិអាមេរិក និងកម្ពុជា ជួបទ្វេភាគីផ្តោតលើកិច្ចសហប្រតិបត្តិការវិស័យការពារជាតិ និងសន្តិសុខ
ប្រមុខការពារជាតិអាមេរិកនិងកម្ពុជាជួបទ្វេភាគីផ្តោតលើកិច្ចសហប្រតិបត្តិការវិស័យការពារជាតិនិងសន្តិសុខស្របពេលដែលកម្ពុជាកំពុងរៀបចំកិច្ចប្រជុំរដ្ឋមន្ត្រីការពារជាតិអាស៊ានចង្អៀតលើកទី៩និងកិច្ចប្រជុំរដ្ឋមន្ត្រីការពារជាតិអាស៊ានបូកជាមួយប្រទេសដៃគូនៅឯខេត្តសៀមរាប។ អានព័ត៌មានពិស្តារ ...
៣ . ក្រុមអ្នកឃ្លាំមើល ជំរុញឱ្យកម្ពុជាលើកយកបញ្ហាសង្ស័យវត្តមានទ័ពចិននៅកំពង់ផែរាមទៅពិភាក្សាក្នុងកិច្ចប្រជុំរដ្ឋមន្ត្រីការពារជាតិអាស៊ានបូក
ក្រុមអ្នកឃ្លាំមើលជំរុញឱ្យកម្ពុជាលើកយកបញ្ហាសង្ស័យវត្តមានទ័ពចិននៅកំពង់ផែកងទ័ពជើងទឹករាមទៅពិភាក្សាជាចំហនៅក្នុងកិច្ចប្រជុំរដ្ឋមន្ត្រីការពារជាតិអាស៊ានបូកនៅខេត្តសៀមរាប។ ការជំរុញនេះកើតមានឡើងស្របពេលកម្ពុជាកំពុងធ្វើជាម្ចាស់ផ្ទះរៀបចំកិច្ចប្រជុំចង្អៀតនិងកិច្ចប្រជុំរដ្ឋមន្ត្រីការពារជាតិអាស៊ានបូក (ADMM Plus) លើកទី៩ ដោយមានក្រុមមេដឹកនាំកំពូលៗក្នុងវិស័យយោធាតំណាងប្រជាជនជាងពាក់កណ្តាលពិភពលោកមកចូលរួមក្នុងនោះក៏មានមហាអំណាចអាមេរិក និងចិន ផងដែរ។ អានព័ត៌មានពិស្តារ ...
៤ . AIPA គ្រោងបង្កើតគណៈកម្មការអន្តរសភាយុវជនអាស៊ានដើម្បីពង្រឹងវិស័យនយោបាយ
មហាសន្និបាតអន្តរសភាអាស៊ាន ហៅកាត់ថា (AIPA) លើកទី៤៣ ដែលរៀបចំឡើងនៅកម្ពុជា នៅថ្ងៃទី២២ ខែវិច្ឆិកានេះ បានសម្រេចជាគោលការណ៍ដើម្បីបង្កើតគណៈកម្មការអន្តរសភាយុវជនអាស៊ានដើម្បីពង្រឹងវិស័យនយោបាយ និងសេដ្ឋកិច្ច។
ក្រុមអ្នកវិភាគសាទរចំពោះការបង្កើតគណៈកម្មការនេះប៉ុន្តែអ្នកវិភាគលើកឡើងថាសម្រាប់ស្ថានភាពនយោបាយនៅកម្ពុជាបច្ចុប្បន្នមេដឹកនាំគួរតែបើកលំហរសិទ្ធិសេរីភាពពលរដ្ឋនិងនយោបាយទើបជាការបើកផ្លូវឲ្យយុវជនចូលរួមក្នុងវិស័យនយោបាយដោយគ្មានការភ័យខ្លាច។
អានព័ត៌មានពិស្តារ ...
៥. តុលាការលើកពេលកាត់ក្ដីស្ថាបនិកគណបក្សបេះដូងជាតិ លោក សៀម ភ្លុក
ចៅក្រមជំនុំជម្រះសាលាដំបូងរាជធានី ភ្នំពេញ លោក ឃុន សូណា សម្រេចលើកពេលសវនាការជំនុំជម្រះក្ដី សំណុំរឿងស្ថាបនិកគណបក្សបេះដូងជាតិ លោក សៀម ភ្លុក ទៅពេលក្រោយ ព្រោះអវត្តមានមេធាវីការពារក្ដី។ តុលាការក៏មិនទាន់កំណត់ថ្ងៃជាក់លាក់សម្រាប់ការកាត់ក្ដីសំណុំរឿង «ក្លែងបន្លំ និងប្រើប្រាស់លិខិតក្លែង» នេះនៅឡើយដែរ។ អានព័ត៌មានពិស្តារ ...
៦ . គណៈកម្មការទទួលបន្ទុកផ្នែកសេរីភាពសាសនាអន្តរជាតិសហរដ្ឋអាមេរិកជំរុញឱ្យឈប់ធ្វើទុក្ខបុកម្នេញសិទ្ធិសាសនាខ្មែរក្រោម
សហព័ន្ធខ្មែរកម្ពុជាក្រោមនិងពលរដ្ឋខ្មែរក្រោមស្វាគមន៍ស្ថាប័នការពារសិទ្ធិសេរីភាពផ្នែកសាសនារបស់សហរដ្ឋអាមេរិក ដែលបានស្នើឲ្យរដ្ឋាភិបាលលោកប្រធានាធិបតី (Joe Biden) អន្តរាគមន៍ទៅរដ្ឋាភិបាលកុម្មុយនិស្តវៀតណាមឲ្យបញ្ឈប់ការធ្វើទុក្ខបុកម្នេញសេរីភាពសាសនារបស់ជនជាតិដើមខ្មែរក្រោម។ សំណើនេះធ្វើឡើងដោយសារតែអាជ្ញាធរវៀតណាមកំពុងស្វែងរកគ្រប់វិធី ដើម្បីវាយកម្ទេច សាលាឆទានរបស់ពលរដ្ឋក្រោម ដែលបានកសាងដើម្បី ប្រតិបត្តិព្រះពុទ្ធសាសនា និងបង្រៀនអក្សរខ្មែរ។ អានព័ត៌មានពិស្តារ ...
៧. មេធាវីថា សុខភាព និងជំហរទាមទារយុត្តិធម៌របស់កញ្ញា សេង ធារី នៅតែរឹងមាំ
មេធាវីអះអាងថាស្ថានភាពសុខភាព កម្លាំងចិត្ត និងជំហរទាមទារយុត្តិធម៌របស់កញ្ញាសេង ធារីកាន់តែរឹងមាំ បន្ទាប់ពីអាជ្ញាធរពន្ធនាគារបន្ធូរបន្ថយលក្ខខណ្ឌរឹតត្បិតសិទ្ធិនៅក្នុងពន្ធគានាររបស់កញ្ញា។ ក្រុមយុវជន និងមន្រ្តីសិទ្ធិមនុស្សស្នើដល់រដ្ឋាភិបាលស្តារបញ្ហាប្រជាធិបតេយ្យនិងការគោរពមនុស្សឡើងវិញដោយផ្តើមចេញពីការដោះលែងកញ្ញា សេង ធារី និងសកម្មជនផ្សេងទៀតដើម្បីស្តារមុខមាត់រដ្ឋាភិបាលនិងផលប្រយោជន៍ជាតិ។ អានព័ត៌មានពិស្តារ ...
៨ . តុលាការខេត្តកណ្ដាលសម្រេចឱ្យពលរដ្ឋនៅខេត្តកណ្ដាល៩នាក់រួចខ្លួនពីការចោទប្រកាន់ក្នុងសំណុំរឿងពាក់ព័ន្ធនឹងជម្លោះដីធ្លីជាមួយក្រុមហ៊ុន OCIC
តុលាការខេត្តកណ្ដាលសម្រេចឱ្យពលរដ្ឋនៅខេត្តកណ្ដាល៩នាក់រួចខ្លួនពីការចោទប្រកាន់ក្នុងសំណុំរឿងពាក់ព័ន្ធនឹងជម្លោះដីធ្លីជាមួយក្រុមហ៊ុនវិវាទដីធ្លីជាមួយក្រុមហ៊ុនOCICរបស់ឧកញ៉ា ពុង ឃាវសែ។ អ្នកនាំពាក្យតុលាការខេត្តកណ្ដាល លោក សូ សារិន ប្រាប់សារព័ត៌មានក្នុងស្រុកថាតុលាការបានប្រកាសសាលក្រមកាលពីថ្ងៃទី២២ ខែវិច្ឆិកា ដោយឱ្យអ្នកទាំង៩បានមានសេរីភាពពីការចោទប្រកាន់។
ពលរដ្ឋទាំង៩នាក់ត្រូវចោទប្រកាន់ពីបទ “ហិង្សាដោយចេតនាមានស្ថានទម្ងន់ទោស” “ញុះញង់ឱ្យប្រព្រឹត្តបទឧក្រិដ្ឋជាអាទិ៍” និងបទ“ប្រឆាំងនឹងអ្នករាជការសាធារណៈមានស្ថានទម្ងន់ទោស”។
ពួកគេស្ថិតក្នុងចំណោមពលរដ្ឋ៣០នាក់ដែលត្រូវអាជ្ញាធរឃាត់ខ្លួនកាលពីថ្ងៃទី១២ ខែកញ្ញា ឆ្នាំ២០២១ នៅពេលដែលពួកគេនិងប្រជាពលរដ្ឋដែលជាម្ចាស់ដីបានប៉ះទង្គិចគ្នាជាមួយកងកម្លាំងប្រដាប់អាវុធក្នុងការតវ៉ាឱ្យក្រុមហ៊ុនOCICផ្ដល់សំណងសមរម្យដល់ពលរដ្ឋដែលរងផលប៉ះពាល់ពីគម្រោងកសាងព្រលានយន្ដហោះថ្មីស្ថិតនៅក្នុងខេត្តកណ្តាល។
៩ . អាជ្ញាធរក្រុងភ្នំពេញរងការចោទថារើសអើងនិន្នាការនយោបាយមិនផ្តល់ប័ណ្ណក្រីក្រជូនសកម្មជនបក្សប្រឆាំង
សកម្មជនគណបក្សប្រឆាំងចោទអាជ្ញាធរមូលដ្ឋានក្រុងភ្នំពេញមកពីគណបក្សកាន់អំណាចថាផ្ដល់ប័ណ្ណក្រីក្រជូនប្រជាពលរដ្ឋរើសអើងនិន្នាការនយោបាយ។ សកម្មជនគណបក្សភ្លើងទៀនបន្តអំពាវនាវឱ្យរដ្ឋាភិបាលដោះស្រាយបញ្ហានេះនិងបញ្ឈប់ការរើសអើងនិន្នាការនយោបាយធ្វើបាបពលរដ្ឋស្លូតត្រង់។ អានព័ត៌មានពិស្តារ ...
១០ . កសិករចិញ្ចឹមជ្រូកនៅខេត្តមួយចំនួនរិះគន់រដ្ឋាភិបាលថា អសមត្ថភាពទប់ស្កាត់ការនាំចូលសាច់ជ្រូកកកដែលប៉ះដល់អ្នកចិញ្ចឹមជ្រូកក្នុងស្រុក
កសិករចិញ្ចឹមជ្រូកនៅខេត្តមួយចំនួនរិះគន់រដ្ឋាភិបាលថាអសមត្ថភាពទប់ស្កាត់ការនាំចូលសាច់ជ្រូកកកដែលធ្វើអោយប៉ះពាល់ដល់កសិករចិញ្ចឹមជ្រូកក្នុងស្រុក។ការរិះគន់នេះបន្ទាប់ពីតម្លៃជ្រូករស់បន្តចុះថោកនិងលក់មិនបានប្រាក់ចំណេញដោះស្រាយជីវភាពគ្រួសារ។ អ្នកឯកទេសចិញ្ចឹមសត្វកម្ពុជាយល់ឃើញថា រដ្ឋាភិបាល និងក្រសួងពាក់ព័ន្ធគួរទប់ស្កាត់ការនាំចូលសាច់ជ្រូកកក (ក្លាសេ) ឬដំឡើងតម្លៃពន្ធនាំចូលសាច់ជ្រូកពីប្រទេសជិតខាងហើយជួយរកទីផ្សារលក់ជ្រូកនិងផ្សព្វផ្សាយវិធីសាស្ត្រកែច្នៃសាច់ជ្រូកដល់ពលរដ្ឋ។ អានព័ត៌មានពិស្តារ ...
១១. កសិករនៅខេត្តបាត់ដំបងនិងបន្ទាយមានជ័យនៅតែត្អូញត្អែរពីបញ្ហាតម្លៃស្រូវចុះថោក
ពាក់ព័ន្ធនឹងតម្លៃស្រូវចុះថោកវិញប្រជាកសិករនៅខេត្តបាត់ដំបងនិងខេត្តបន្ទាយមានជ័យអះអាងថាស្រូវនៅតែមានតម្លៃថោកដោយសារឈ្មួញនិងរោងម៉ាស៊ីនកិនស្រូវមួយចំនួនមិនទិញតាមតម្លៃដែលក្រសួងកសិកម្មបានកំណត់ឡើយ។ អ្នកជំនាញកសិកម្មជំរុញឱ្យក្រសួងកំណត់តម្លៃជាក់លាក់និងតាមដានការទិញដូររបស់ឈ្មួញចៀសវាងចេញតែសេចក្ដីប្រកាសតែការអនុវត្តគ្មានប្រសិទ្ធិភាព។ អានព័ត៌មានពិស្តារ ...
១២ . កម្ពុជាគ្រោងនាំចេញអង្ករទៅកាន់ប្រទេសបង់ក្លាដេសជំហានដំបូងក្នុងបរិមាណ២ម៉ឺន ៥ពាន់តោន
កម្ពុជាគ្រោងនាំចេញអង្ករទៅកាន់ប្រទេសបង់ក្លាដេស (Bangladesh) ជំហានដំបូងក្នុងបរិមាណ២ម៉ឺន៥ពាន់តោននាពេលឆាប់ៗខាងមុខ។
ការសម្រេចនាំអង្គរចេញជាង២ម៉ឺន៥ពាន់តោននេះធ្វើឡើងក្នុងជំនួបរវាងភាគីកម្ពុជានិងភាគីប្រទេសបង់ក្លាដេសដឹកនាំដោយលោក ស្សាកាវ៉ាត់ ហ៊ូសេន (Md. Shakhawat Hossain) អគ្គនាយកផ្នែកចំណីអាហារនៃក្រសួងចំណីអាហាររបស់ប្រទេសបង់ក្លាដេស។ចំណែកភាគីកម្ពុជាដឹកនាំដោយលោក ចាន់ សុខទី ប្រធានអគ្គនាយក ក្រុមហ៊ុនហ្គ្រីនត្រេ និងមានការចូលរួមពីប្រធានសហព័ន្ធស្រូវអង្ករកម្ពុជាលោក សុង សារ៉ន និងមន្ត្រីមួយចំនួនទៀត។
១៣ . ពលរដ្ឋប្រមាណ ៧៤គ្រួសារនៅខេត្តបាត់ដំបង សុំអន្តរាគមន៍ពីអាជ្ញាធរ ក្រោយទីប្រឹក្សាលោក យឹម ឆៃលី ធ្វើរបងដីបិទផ្លូវ
ពលរដ្ឋរស់នៅខេត្តបាត់ដំបងប្រមាណ ៧៤គ្រួសារ ស្នើអាជ្ញាធរឃុំតាគ្រៃ អន្តរាគមន៍បើកផ្លូវចេញចូលផ្ទះ ខណៈទីប្រឹក្សាឧបនាយករដ្ឋមន្ត្រី យឹម ឆៃលី គឺ លោក តូ ធានទឺ បានធ្វើរបងបិទផ្លូវមិនឱ្យពលរដ្ឋចេញចូល។ មន្ត្រីសង្គមស៊ីវិលយល់ថា លោក តួ ធានទឺ គួរបើកផ្លូវ ហើយអាជ្ញាធរពាក់ព័ន្ធគួរចុះទៅពិនិត្យជាក់ស្ដែង ដើម្បីសម្របសម្រួលបើកផ្លូវជូនដល់ពលរដ្ឋឡើងវិញ។ អានព័ត៌មានពិស្តារ ...
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។