ជុំវិញដំណឹងពីការវិលចូលស្រុកខ្មែរវិញរបស់អតីតមេបក្សប្រឆាំង រដ្ឋមន្ត្រីក្រសួងមហាផ្ទៃនៃរបបក្រុងភ្នំពេញ លោក ស ខេង ថា ការប្រកាសរបស់លោក សម រង្ស៊ី បែបនោះ គ្រាន់តែជាលើកការទឹកអ្នកគាំទ្របក្សសង្គ្រោះជាតិនៅក្នុងប្រទេស និងសហគមន៍អន្តរជាតិ ឱ្យបន្តជឿជាក់លើខ្លួនតែប៉ុណ្ណោះ ព្រោះថា មកដល់ពេលនេះ លោក សម រង្ស៊ី ធ្វើនយោបាយអស់ផ្លូវដើរហើយ។
ចំណែក អ្នកវិភាគយល់ថា ប្រសិនបើ លោក សម រង្ស៊ី វិលចូលស្រុកដូចការគ្រោងទុកមែននោះ នឹងមានកម្លាំងមហាជនចូលរួមគាំទ្រលោក ហើយចរន្តនេះនឹងធ្វើឱ្យរបបលោក ហ៊ុន សែន នឹងពិបាកទប់ស្កាត់។
រដ្ឋមន្ត្រីក្រសួងមហាផ្ទៃ លោក ខេង លើកឡើងថា ការប្រកាសវិលចូលកម្ពុជាវិញរបស់លោក សម រង្ស៊ី នៅពេលខាងមុខ គឺមិនដូចទៅនឹងពេលដែលប្រធានស្ដីទីបក្សសង្គ្រោះជាតិរូបនេះ វិលចូលស្រុកខ្មែរ កាលពីខែកក្កដា ឆ្នាំ២០១៣ នោះទេ ដោយហេតុថាកាលនោះ មានការលើកលែងទោសពីព្រះមហាក្សត្រ។ លោក ស ខេង ក៏ចោទជាសំនួរ ថា តើលោក សម រង្ស៊ី វិលចូលស្រុកវិញ ដោយរបៀបណា នរណាជាអ្នកជូនមក ហើយអ្នកណាទៅទទួល?។
ទោះបីជាយ៉ាងណាក៏ដោយ លោក ស ខេង នៅតែយល់ថា ការប្រកាសនេះ ជាល្បិចកលនយោបាយរបស់លោក សម រង្ស៊ី ដែលធ្លាប់ធ្វើកាលពីពេលកន្លងមក ដើម្បីរក្សាកម្លាំងនិងការគាំទ្រនៅក្នុងប្រទេស ឱ្យនៅមានក្ដីសង្ឃឹមថា អតីតប្រធានបក្សប្រឆាំងរូបនេះ នៅតែជាមេដឹកនាំរបស់ពួកគេ៖ «លើកនេះ សម រង្ស៊ី មក មកតាមណា។ មកតាមយន្តហោះ ផ្លូវទឹក ឬក៏ផ្លូវគោក។ ហ្នឹងជាចលនាមួយដែលនាំឱ្យប្រទេសមានអស្ថិរភាព។ សម រង្ស៊ី គឺអស់ក្រឡាហើយ បើគាត់មិនសម្រេចចិត្តអ៊ីចឹង ហើយគាត់មិនចូលចប់។ គាត់អាចគិតឃើញអ៊ីចឹង អន្តរជាតិក៏ចប់ ផ្ទៃក្នុងក៏ចប់ ក្នុងពេលដែលគាត់ធ្វើតេស្ត ប្រជុំនៅអាមេរិក។ ប្រជុំហើយ គាត់ផ្សាយដើម្បីស្វែងរកការគាំទ្រនៅខាងក្នុង។ ដល់អ៊ីចឹង អន្តរជាតិក៏អស់ ខាងក្នុងក៏អស់ ពេលហ្នឹងបើខ្លួនមិនធ្វើសកម្មភាពទេ អស់ហើយ អាចនឹងនឹកឃើញច្រកហ្នឹង។ អ៊ីចឹង បានប្រថុយប្រថានថាមក»។
ការលើកឡើងរបស់រដ្ឋមន្ត្រីក្រសួងមហាផ្ទៃនេះ ធ្វើឡើងនៅក្នុងពិធីផ្សព្វផ្សាយលទ្ធផលនៃសន្និបាតគណៈកម្មាធិការកណ្ដាលលើកលើកទី៤១ អាណត្តិទី៥ របស់បក្សកាន់អំណាច នៅខេត្តបាត់ដំបង កាលពីថ្ងៃទី២៦ ខែមករា។
ចំណែកអ្នកវិភាគបញ្ហាសង្គម និងនយោបាយ លោក គឹម សុខ យល់ថា ទោះបីជាលោក សម រង្ស៊ីប្រកាសហើយ បែរជាមិនវិលចូលកម្ពុជាវិញក្ដី ក៏នយោបាយរបស់លោក សម រង្ស៊ី មិនអស់ផ្លូវដើរ ដូចការលើកឡើងរបស់លោក ស ខេង នោះទេ ពីព្រោះកម្លាំងនយោបាយរបស់បក្សប្រឆាំងបច្ចុប្បន្ន គឺពឹងផ្អែកទាំងស្រុងទៅ លោក សម រង្ស៊ី និងលោក កឹម សុខា។ លោក គឹម សុខ គិតថា លោក ស ខេង ហាក់ទទួលស្គាល់ឥទ្ធិពលរបស់លោក សម រង្ស៊ី វិលចូលប្រទេសវិញ ដែលអាចជាចរន្តមួយ បង្កឱ្យការរង្គោះរង្គើការកាន់អំណាចរបស់លោក ហ៊ុន សែន៖ «បើសិនជាគាត់មិនចូល វាអាចធ្វើឱ្យស្ថានការណ៍នយោបាយ ស្ថិតនៅក្នុងស្ថានភាពស្ងប់ស្ងាត់ ការដែលលោក ហ៊ុន សែន មានប្រៀបគ្រប់គ្រងប្រទេសកម្ពុជា។ ក៏ប៉ុន្តែបើគាត់ចូល នោះស្ថានការណ៍វានឹងប្រែប្រួល។ បើគាត់ចូល ប្រជារាស្ត្រជាម្ចាស់អំណាចនឹងចូលរួមជាមួយគាត់ ក្នុងការតវ៉ាប្រឆាំងរដ្ឋាភិបាលខុសច្បាប់របស់លោក ហ៊ុន សែន នោះធ្វើឱ្យមានការប្រែប្រួលដំណើរនយោបាយនៅក្នុងប្រទេសកម្ពុជា ដែលអាចផ្លាស់ប្ដូរលឿន ឬក៏ឆាប់ជាងការរំពឹងទុក ក្នុងករណីដែលលោក សម រង្ស៊ី មិនចូល»។
ជុំវិញដំណឹងវិលចូលស្រុកវិញរួមនឹងការអំពាវនាវរបស់លោក លោក សម រង្ស៊ី ទៅកងកម្លាំងប្រដាប់អាវុធ សារកុំឱ្យស្ដាប់តាមការបញ្ជារបស់ជនផ្ដាច់ការ ក៏បង្កឱ្យមានប្រតិកម្មតបតជាហូរហែពីសំណាក់ជួរទ័ពគ្រប់តំបន់ មេទ័ពគ្រប់ជាន់ថ្នាក់ នៃរបបក្រុងភ្នំពេញ ដោយព្រមានកម្ចាត់មេបក្សប្រឆាំងប្រសិនបើវិលចូលស្រុកវិញនោះ។
អ្នកវិភាគបញ្ហាសង្គម និងនយោបាយ លោក គឹម សុខ យល់ថា ប្រសិនបើ លោក សម រង្ស៊ី វិលចូលស្រុកដូចការគ្រោងទុកមែន នោះនឹងមានកម្លាំងមហាជនចូលរួមគាំទ្រលោក ហើយចរន្តនេះនឹងធ្វើឱ្យរបបលោក ហ៊ុន សែន ពិបាកទប់ស្កាត់ និងគ្រប់គ្រងស្ថានការណ៍។ លោក គឹម សុខ ព្យាករណ៍ថា បើមានវត្តមានលោក សម រង្ស៊ី ក្នុងប្រទេសកម្ពុជាប្រាកដមែន នោះព្រឹត្តិការណ៍ដែលនឹងកើតឡើងក្នុងប្រទេសកម្ពុជា ទំនងជាដូចទៅនឹងប្រទេសវេណេហ្ស៊ុយអេឡា ក្នុងទ្វីបអាមេរិកឡាទីន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។