តុលាការខេត្តសៀមរាបផ្ដន្ទាទោសសកម្មជនបក្សប្រឆាំង ៣នាក់ ឱ្យជាប់គុក ១៨ ខែ
2025.01.22
តុលាការខេត្តសៀមរាប កាលពីថ្ងៃទី២១ មករា ម្សិលមិញនេះ បានប្រកាសសាលក្រមផ្ដន្ទាទោសសកម្មជនគណបក្សប្រឆាំង ៣ នាក់ ឱ្យជាប់ពន្ធនាគារចំនួន ១៨ ខែ និងពិន័យជាប្រាក់ចំនួន ១៨ លានរៀល ពីបទ «គំរាមកំហែង និងគំរាមកំហែងដោយមានបញ្ជាឱ្យបំពេញលក្ខខណ្ឌអ្វីមួយ»។ អ្នកទាំង ៣ រួមមាន លោក ព្រហ្ម សុព្រឹក្ស លោក នង ធារ៉ា និងលោក អាំង សុផារិទ្ធ។
ភរិយារបស់លោក ព្រហ្ម សុព្រឹក្ស លោកស្រី គង់ ចន្ថា ប្រាប់វិទ្យុអាស៊ីសេរីកាលពីយប់ថ្ងៃទី២១ មករា ថា ការផ្ដន្ទាទោសស្វាមីរបស់អ្នកស្រី និងសហការីរបស់គាត់ពីរនាក់ទៀតនេះ គឺជារឿងអយុត្តិធម៌។
លោកស្រី គង់ ចន្ថា៖ «ខ្ញុំគិតថា វាអយុត្តិធម៌សម្រាប់ពួកគាត់ ព្រោះពួកគាត់ជាជនស្លូតត្រង់ ហើយមួយទៀតពួកគាត់ជាក្រុមប្រឹក្សាដែលជាប់ឆ្នោតដោយប្រជាពលរដ្ឋបោះឆ្នោតឱ្យពួកគាត់។ ពួកគាត់ធ្វើការរាល់ថ្ងៃ គឺបម្រើប្រជាពលរដ្ឋនៅតាមមូលដ្ឋានរៀងៗខ្លួនរបស់ពួកគាត់។ មួយទៀត ការទាមទារ និងតវ៉ាដល់មេគណបក្សភ្លើងទៀនហ្នឹង គឺពួកគាត់មិនមែនទាមទារដើម្បីតែពួកគាត់ ៣ នាក់ទេ គឺទាមទារដើម្បីបងប្អូនឯទៀត ដែលមេគណបក្សភ្លើងទៀនដកពួកគាត់ចេញ»។
លោក ព្រហ្ម សុព្រឹក្ស លោក នង ធារ៉ា និងលោក អាំង សុផារិទ្ធ សុទ្ធសឹងតែជាចៅសង្កាត់រងជាប់ឆ្នោតនៃគណបក្សភ្លើងទៀន នៅក្រុងសៀមរាប ខេត្តសៀមរាប។ លោក ព្រហ្ម សុព្រឹក្ស ជាចៅសង្កាត់រងទី ២ នៃសង្កាត់ជ្រាវ ឯលោក នង ធារ៉ា ជាចៅសង្កាត់រងទី២ នៃសង្កាត់សាលាកំរើក ហើយលោក អាំង សុផារិទ្ធ ជាចៅសង្កាត់រងទី ២ នៃសង្កាត់ទឹកវិល។
អាជ្ញាធរបានចាប់ខ្លួនពួកលោកទាំង ៣ នាក់ កាលពីខែសីហា ឆ្នាំ ២០២៤ តាមបណ្ដឹងរបស់ប្រធានគណៈកម្មាធិការប្រតិបត្តិគណបក្សភ្លើងទៀនខេត្តសៀមរាប អ្នកស្រី យឹម ផល្លី។ ក្ដីក្ដាំនេះ កើតឡើងក្រោយពេលអ្នកទាំង៣ បានបង្ហោះសាររិះគន់ជាបន្តបន្ទាប់លើថ្នាក់ដឹកនាំបក្សភ្លើងទៀន ដែលបានលុបឈ្មោះពួកលោកចេញពីគណបក្ស ដោយសារពួកលោកមាននិន្នាការគាំទ្រគណបក្សកម្លាំងជាតិ ដែលបែកចេញពីគណបក្សភ្លើងទៀន។
គិតមកដល់ពេលនេះ មានសកម្មជននយោបាយ មន្ត្រីសង្គមស៊ីវិល និងអ្នកបញ្ចេញមតិរិះគន់រដ្ឋាភិបាលចំនួនជាង ៩០ នាក់ កំពុងជាប់ឃុំក្នុងពន្ធនាគារ ក្រោមបទចោទដែលមានចរិតនយោបាយ ក្នុងនោះជិត ៨០ នាក់ ត្រូវបានចាប់ដាក់ពន្ធនាគារ ក្រោមរបបដឹកនាំរបស់លោក ហ៊ុន ម៉ាណែត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។