យុវជន​សង្គម​ថា ជំនួប​រវាង​លោក ហ៊ុន សែន ជាមួយ​ឡាវ​នឹង​ផ្ដល់​ប្រយោជន៍​តិចតួច​ដល់​កម្ពុជា

យុវជន​សង្គម​លើកឡើង​ថា ជំនួប​រវាង​នាយករដ្ឋមន្ត្រី ហ៊ុន សែន និង​ប្រធាន​រដ្ឋ​នៃ​សាធារណរដ្ឋ​ឡាវ នឹង​ផ្ដល់​ប្រយោជន៍​តិចតួច​ដល់​កម្ពុជា។

ការ​លើកឡើង​នេះ​នៅ​បន្ទាប់ពី​លោក ហ៊ុន សែន ជួប​ជាមួយ​ប្រធាន​រដ្ឋ​នៃ​សាធារណរដ្ឋ​ឡាវ លោក​ថងលូន ស៊ីសុលីត (Thongloun Sisoulith) កាលពី​ថ្ងៃទី​៤ ឧសភា នៅ​វិមាន​សន្តិភាព ដើម្បី​ទស្សនកិច្ច​ផ្លូវរដ្ឋ និង​ចូលរួម​ពិធី​បើក​ព្រឹត្តិការណ៍​ស៊ី​ហ្គេម​លើក​ទី​៣២ តាម​ការ​អញ្ជើញ​របស់​លោក​ហ៊ុន សែន។

ក្នុង​ជំនួប​នេះ ថ្នាក់​ដឹកនាំ​ប្រទេស​កម្ពុជា និង​ឡាវ លើកឡើង​អំពី​ទំនាក់ទំនង​ល្អ​រវាង​ប្រទេស​ទាំងពីរ និង​ស្វែងរក​កិច្ច​សហប្រតិបត្តិការ​បន្ថែម​លើ​វិស័យ​ទេសចរណ៍ វិស័យ​វិនិយោគ វិស័យ​សន្តិសុខ ដើម្បី​ត្រៀម​ដោះស្រាយ​គ្រោះមហន្តរាយ​ជាយថាហេតុ។ លោក ហ៊ុន សែន ឯកភាព​ជាមួយ​ថ្នាក់ដឹកនាំ​នៃ​ប្រទេស​ឡាវ លើ​ទំនាក់ទំនង​នៃ​ប្រទេស​ទាំងពីរ ហើយ​លោក ហ៊ុន សែន ស្នើសុំ​ឲ្យ​ប្រទេស​ទាំងពីរ​រួមគ្នា​រៀបចំ​កិច្ចព្រមព្រៀង​មិន​យក​ពន្ធ​ត្រួត​គ្នា ដើម្បី​ជំរុញ​ការ​វិនិយោគ​ប្រទេស​ទាំង​ពីរ។

ប្រធាន​សមាគម​សម្ព័ន្ធ​និស្សិត​បញ្ញវ័ន្ត​ខ្មែរ​លោក កើត សារ៉ាយ យល់ឃើញ​ថា ជំនួប​រវាង​មេដឹកនាំ​ប្រទេស​ទាំងពីរ ជា​រឿង​ល្អ ព្រោះ​ប្រទេស​ទាំងពីរ​ជា​ប្រទេស​ដែល​នៅ​ជាប់​ព្រំដែន​គ្នា​។ ទោះជា​យ៉ាងណា​លោក​ថា ឡាវ​មិនមែន​ជា​ប្រទេស​ដែល​ជា​ទីផ្សារ​គោលដៅ​របស់​កម្ពុជា និង​នាំ​ឲ្យ​កម្ពុជា​មាន​កំណើន​សេដ្ឋកិច្ច​ខ្ពស់​នោះ​ឡើយ។

លោក កើត សារ៉ាយ៖ «យើង​ឃើញថា​ឡាវ​មិនមែន​ជា​ប្រទេស ដែល​យើង​អាច​រំពឹង​ក្នុង​ការ​ធ្វើ​ពាណិជ្ជកម្ម ឬក៏​ធ្វើ​កិច្ច​សហប្រតិបត្តិការ​ណា​មួយ​ដែល​អាច​នាំ​កម្ពុជា​ទៅ​រក​កំណើនសេដ្ឋកិច្ច​ខ្ពស់​អ្វី​នោះ​ទេ គ្រាន់តែ​ថា បើ​មាន​កិច្ច​សហប្រតិបត្តិការ​ល្អ អា​នឹង​ក៏​អាច​រក្សា​ស្ថិរភាព​នយោបាយ​របស់​ប្រទេសជិតខាង​នឹង​គ្នា អា​នឹង​វា​មាន​ផលប្រយោជន៍​របស់​វា ប៉ុន្តែ​ដូច​ខ្ញុំ​ថា អ៊ីចឹង​ផលប្រយោជន៍ មិន​ផល​ប្រយោជន៍​វា​ត្រូវតែ​មើល​លើ​ចេតនា​របស់​ថ្នាក់ដឹកនាំ​ក្នុង​ការ​ជួបគ្នា​ដែរ ជួបគ្នា​នោះ​ទៅ​ជា​ផ្ដល់ ផលប្រយោជន៍​ប្រជាពលរដ្ឋ​ជា​សំខាន់ ផលប្រយោជន៍​ជាតិ​ជា​សំខាន់ ឬក៏​ទៅលើ​ប្រធានបទ​អ្វី​ផ្សេង​ជា​លក្ខណៈ​បក្សពួក​អ្វី​ផ្សេងៗ អា​នឹង​យើង​ត្រូវ​មើល»។

រីឯ​អ្នកវិភាគ​ឯករាជ្យ​លោក គឹម សុខ ថា រដ្ឋាភិបាល​កម្ពុជា​គួរតែ​ពិនិត្យមើល​រឿង​សន្តិសុខ និង​អំពើ​ខុសច្បាប់​ឆ្លងដែន ដោយ​ស្នើ​ដល់​ពលរដ្ឋ​ខ្មែរ​គួរតែ​ប្រយ័ត្ន និង​តាមដាន​បញ្ហា​ព្រៃឈើ គ្រឿងញៀន ការ​ជួញដូរ​មនុស្ស ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។