សកម្មជន​បក្ស​ភ្លើង​ទៀន​មួយ​ចំនួន​ត្រូវ​បាន​ជន​មិន​ស្គាល់​មុខ​វាយ​ធ្វើ​បាប ជិះ​ម៉ូតូ​ដេញ​បុក ​និង​គប់​ដុំ​ថ្ម​ចូល​ផ្ទះ

ដោយ សុជីវី
2022.04.13
Share on WhatsApp
Share on WhatsApp
សកម្មជន​បក្ស​ភ្លើង​ទៀន​មួយ​ចំនួន​ត្រូវ​បាន​ជន​មិន​ស្គាល់​មុខ​វាយ​ធ្វើ​បាប ជិះ​ម៉ូតូ​ដេញ​បុក ​និង​គប់​ដុំ​ថ្ម​ចូល​ផ្ទះ សមាជិក​គណបក្ស​ភ្លើងទៀន​នាំ​គ្នា​ថតនៅ​ខាង​មុខ​ស្លាក​គណបក្ស​របស់​ខ្លួន នៅ​ក្នុង​ស្រុក​តំបែរ ខេត្ត​ត្បូងឃ្មុំ កាល​ពី​ថ្ងៃ​ទី២៦ ខែមករា ឆ្នាំ២០២២។
រូប៖ ហ្វេសប៊ុកគណបក្សភ្លើងទៀនខេត្តត្បូងឃ្មុំ

សកម្មជន​គណបក្ស​ភ្លើង​ទៀន​មួយ​ចំនួន​ត្រូវ​បាន​ជន​មិន​ស្គាល់​មុខ​វាយ​ធ្វើ​បាប ​គប់​ដុំ​ថ្ម​ចូល​ផ្ទះ​ និង​ជិះ​ម៉ូតូ​​ដេញ​បុក ​​ខណៈ​ការ​បោះ​ឆ្នោត​ឃុំ​សង្កាត់​កាន់​តែ​ខិត​ជិត​ចូល​មក​ដល់។ មន្ត្រី​ជាន់​ខ្ពស់​គណបក្ស​ភ្លើង​ទៀន​ចាត់​ទុក​ទង្វើ​ទាំង​នេះ​ថា ជា​ការ​គំរាម​កំហែង​ផ្នែក​នយោបាយ​ ហើយ​គណបក្ស​នេះ​កំពុង​រៀបចំ​ភស្តុតាង​ពាក់ព័ន្ធ​ដាក់​ជូន​ក្រសួង​មហាផ្ទៃ​ដើម្បី​វែក​មុខ​រក​ជន​ល្មើស​មក​ផ្ដន្ទាទោស​តាម​ច្បាប់។​

នៅ​ពេល​ការ​បោះ​ឆ្នោត​ឃុំ​សង្កាត់​កាន់តែ​ជិត​​មក​ដល់​សកម្មជន​បក្ស​ភ្លើង​មួយ​ចំនួន​កំពុង​រង​ការ​គំរាមកំហែង​ដល់​ជីវិត​ពី​ជន​មិន​ស្គាល់​មុខ។ រូបភាព​បែប​នេះ តែងតែ​កើត​ឡើង​នៅ​ពេល​ការ​បោះ​ឆ្នោត​ជិត​ចូល​មក​ដល់។ សមត្ថកិច្ច​មិន​ទាន់​ឃើញ​ជន​ប្រព្រឹត្តិ​ណា​មួយ​ក្នុង​ករណី​ទាំង​នោះ​ ដើម្បី​យក​មក​ផ្ដន្ទាទោស​នៅ​ឡើយ​ទេ។

បេក្ខជន​លេខ​ទី២ នៃ​ឃុំ​កណ្ដោល​ជ្រុំ ស្រុក​ពញាក្រែក ខេត្ត​ត្បូងឃ្មុំ លោកស្រី ខន ទន់ ត្រូវ​បាន​ជន​មិន​ស្គាល់​មុខ​លប់​គប់​ដុំ​ថ្ម​ដល់​ក្នុង​ផ្ទះ​កាល​ពី​យប់​ទី​១១ ខែ​មេសា​កន្លង​ទៅ។ លោក​ស្រី ខន ទន់ ឲ្យ​វិទ្យុ​អាស៊ី​សេរី​ដឹង​នៅ​ថ្ងៃ​ទី១៣ មេសា​ថា ពេល​នេះ​លោកស្រី​បាន​ប្ដឹង​ទៅ​សមត្ថកិច្ច​មូលដ្ឋានរួច​ហើយ។ លោក​ស្រី​ឲ្យ​ដឹង​ទៀត​ថា​ សមត្ថកិច្ច​សន្យា​ថា នឹង​ស្វែងរក​ជន​ប្រព្រឹត្តិ​នោះ​មក​ផ្ដន្ទាទោស​តាម​ច្បាប់ ប៉ុន្តែ លោកស្រីថា​​មក​ដល់​ពេល​នេះ ​សមត្ថកិច្ច​មិន​ទាន់​បង្ហាញ​តម្រុយ​ជន​ល្មើស​នៅ​ឡើយ​ទេ៖ «ខ្ញុំ​កំពុង​ហូប​បាយ​ក៏​មិន​ឃើញ​មនុស្ស​អី​ដែរ​ ​តែ​ពេល​ដែល​ខ្ញុំ​ចេញ​មក​ពី​ក្នុង​ផ្ទះ​​នៅ​មុខ​ផ្ទះ​ក៏​គប់​ដុំ​ថ្ម​អត់​ត្រូវ​ខ្ញុំ​ទេ​ តែ​ត្រូវ​ការុង​ស្រូវ​ហើយ​ពេល​ហ្នឹង​ខ្ញុំ​ស្ទុះ​​រក​មើល​អត់​ឃើញ​មនុស្ស​​ទេ​ តែ​លឺ​សម្រឹប​ជើង។ សម្រាប់​ខ្ញុំ​ផ្ទាល់​​គឺ​ជា​ការ​គំរាម​កំហែង​នយោបាយ​​​ដោយសារ​ខ្ញុំ​ឈរ​បេក្ខជន​ឃុំ​គណបក្ស​ភ្លើង​ទៀន»

Khorn_Tun_Tbaung_Khmum_1.jpg
អ្នកស្រី ខន ទន់ បេក្ខជន​លេខរៀង​ទី២ នៃ​ឃុំ​កណ្ដោល​ជ្រុំ ស្រុក​ពញាក្រែក ខេត្ត​ត្បូងឃ្មុំ។ រូបឯកសារ

ករណី​ហិង្សា​មួយ​ទៀត​ក៏​បាន​កើតឡើង​លើ​សកម្មជន​គណបក្ស​ភ្លើង​ទៀន នៅ​រាជធានី​ភ្នំពេញ​ដែរ កាល​ពី​ថ្ងៃ​ទី៩ មេសា​កន្លង​ទៅ។ ប្រធាន​យុវជន​ខណ្ឌ​កំបូល រាជធានី​ភ្នំពេញ គណបក្ស​ភ្លើង​ទៀន និង​ជា​អតីត​ចៅសង្កាត់​រង​ទី១ គណបក្ស​សង្គ្រោះ​ជាតិ លោក ប្រាក់ សីហា ត្រូវ​បាន​ជន​មិន​ស្គាល់​មុខ​មួយ​ក្រុម ព្រួត​វាយ​ធ្វើ​បាប​បណ្ដាល​ឲ្យ​រង​របួស​បែក​មុខ​បែក​មាត់។ នេះ​ជា​លើក​ទី២ ដែល​លោក​ ប្រាក់​ សីហា​ ត្រូវ​ជន​មិន​ស្គាល់​មុខ​វាយ​ធ្វើ​បាប​បែប​នេះ​កាលពី​ខែ​កុម្ភៈ ឆ្នាំ២០២១ កន្លង​ទៅ។

ស្រដៀង​គ្នា​នេះ​ដែរ ប្រធាន​គណបក្ស​ភ្លើង​ទៀន​ខេត្ត​ប៉ៃលិន លោក ខឹម មុនីកុសល ត្រូវ​ជន​មិន​ស្គាល់​មុខ ប៉ង​សម្លាប់​ដោយ​ជិះ​ម៉ូតូ​ដេញ​បុក ក្នុង​ពេល​ដែល​លោក​ធ្វើ​ដំណើរ​តាម​ផ្លូវ​នៅ​ក្នុង​ខេត្ត​នេះ កាល​ពី​ព្រឹក​ថ្ងៃ​ទី១១ មេសា។

Khoem_Muny_Kosal_Pailin_042322.jpg
លោក ខឹម មុនីកុសល ប្រធាន​គណបក្ស​ភ្លើង​ទៀន​ខេត្ត​ប៉ៃលិន។ រូបពីហ្វេសប៊ុកគណបក្ស​ភ្លើង​ទៀន​ខេត្ត​ប៉ៃលិន

ក្រៅ​ពី​នេះ អនុ​ប្រធាន​ប្រតិបត្តិ​គណបក្ស​ភ្លើង​ទៀន​នៅ​ខណ្ឌ​ច្បារ​អំពៅ រាជធានី​ភ្នំពេញ បាន​ស្លាប់​ដោយ​​សារ​គ្រោះថ្នាក់​ចរាចរណ៍​កាល​ពី​ពេល​ថ្មីៗ នេះ។ គ្រួសារ​ជន​រង​គ្រោះ​សង្ស័យ​ការ​ស្លាប់​របស់​លោក ជឿន សារឹម ជាប់​ពាក់ព័ន្ធ​រឿង​នយោបាយ ព្រោះ​ជន​រង​គ្រោះ​រូប​នេះ​ធ្លាប់​ទទួល​រង​ការ​គំរាម​កំហែង​ពី​សំណាក់​អាជ្ញាធរ និង​រង​ការ​លប​វាយ​ប្រហារ​នឹង​ដំបង​ពី​ជន​មិន​ស្គាល់​មុខ​ដោយសារ​​សកម្ម​ភាព​គាំទ្រ​គណបក្ស​សង្គ្រោះ​ជាតិ និង​បន្ត​គាំទ្រ​គណបក្ស​ភ្លើង​ទៀន។

អនុប្រធាន​​គណបក្ស​ភ្លើង​ទៀន លោក ថាច់ សេដ្ឋា និង​ជា​អ្នក​នាំ​ពាក្យ​គណបក្ស​នេះ ឲ្យ​វិទ្យុ​អាស៊ី​សេរី​ដឹង​ថា សមត្ថកិច្ច​មិន​ទាន់​រក​ឃើញ​ជន​ប្រព្រឹត្តិ​​លើ​ករណី​​​វាយ​ធ្វើ​បាប​ និង​ការ​ទុក្ខ​ទុក​ម្នេញ​លើ​សកម្មជន​គណបក្ស​ភ្លើង​ទៀន​ទាំង​នោះ​បាន​នៅ​ឡើយ​ទេ​ គិត​ត្រឹម​ថ្ងៃ​ទី១៣ ខែ​មេសា។ លោក​ឲ្យ​ដឹង​ទៀត​ថា ក្រៅ​ពី​ករណី​ទាំង​នោះ នៅ​ខេត្ត​ពោធិ៍សាត់​ កាល​ពី​ថ្ងៃ​ទី១២ ខែ​មេសា សមត្ថកិច្ច​​បាន​ចាប់​សកម្មជន​គណបក្ស​ភ្លើង​ទៀន​ម្នាក់​ពាក់ព័ន្ធ​នឹង​រឿង​នយោបាយ។ លោក ថាច់ សេដ្ឋា ឲ្យ​ដឹង​ទៀត​ថា ពេលនេះ​ គណបក្ស​កំពុង​ប្រមូល​ភស្តុតាង​នានា​បញ្ជូន​ទៅ​ក្រសួង​មហាផ្ទៃ ដើម្បី​ឲ្យ​ក្រសួង ​ស៊ើប​អង្កេត និង​ចាត់​វិធានការ​តាម​ច្បាប់៖ «ទាល់តែ​មាន​អ្នក​ក្រោយ​ខ្នង​បង្គាប់​បញ្ជា​បាន​មាន​ហេតុ​ការណ៍​ហ្នឹង​កើត​ឡើង ព្រោះ​សុទ្ធ​តែ​ជា​អំពើ​គំរាម​កំហែង​សកម្មជន​នយោបាយ ហើយ​នយោបាយ​យើង​​ដឹង​ហើយ​ការ​ប្រកួតប្រជែង​ទៅ​គណបក្ស​ណា​ដែល​មាន​សក្ដានុពល​ហើយ​​ដែល​ឃើញ​ប្រៀប​ចាញ់ ប្រៀប​ឈ្នះ​ជា​មួយ​គណបក្ស​ប្រឆាំង​នៅ​តាម​មូលដ្ឋាន​នោះ មិន​មែន​នៅ​សុខៗ មនុស្ស​អត់​ស្គាល់​គ្នា​ទៅ​គប់​គ្នា​ម៉េច​ទេ

ទាក់ទង​ករណី​នេះ វិទ្យុ​អាស៊ី​សេរី​មិន​អាច​សុំ​ការ​ឆ្លើយ​តប​ពី​អ្នក​នាំ​ពាក្យ​ក្រសួង​មហាផ្ទៃ លោក ខៀវ សុភ័គ និង​អ្នក​នាំ​ពាក្យ​នគរបាល​ជាតិ​ លោក​ ឆាយ​ គឹមខឿន​ បាន​ទេ​នៅ​ថ្ងៃ​ទី១៣ ខែ​មេសា។

ទោះ​យ៉ាង​ណា​ក្ដី លោក​នាយក​រដ្ឋមន្ត្រី ហ៊ុន សែន និង​រដ្ឋមន្ត្រី​ក្រសួង​មហាផ្ទៃ លោក​ ស ខេង​ ធ្លាប់​ណែនាំ​មន្ត្រី​ថ្នាក់​ក្រោម និង​អាជ្ញាធរ​មូលដ្ឋាន ឲ្យ​បង្ក​ភាព​ងាយស្រួល​ដល់​គ្រប់​គណបក្ស​នយោបាយ​ក្នុង​ការ​ធ្វើសកម្មភាព​នយោបាយ និង​ការ​ចូលរួម​បោះ​ឆ្នោត​នា​ពេល​ខាង​មុខ។

នាយក​ប្រតិបត្តិ អង្គការ​ឃ្លាំមើល​ការ​បោះឆ្នោត​នៅ​កម្ពុជា ហៅ​កាត់​ថា និចហ្វិច (Nicfec) លោក សំ គន្ធាមី យល់​ថា ទង្វើ​មក​លើ​សកម្មជន​គណបក្ស​ភ្លើង​ទៀន​បែប​នេះ ធ្វើ​ឲ្យ​ប៉ះពាល់​ដំណើរ​ការ​បោះ​ឆ្នោត ព្រោះ​រូប​នេះ​បែប​នេះ ជា​ការ​ដាក់​សម្ពាធ​លើ​សកម្មជន​គណបក្ស​ភ្លើង​ទៀន​មិន​អាច​ចូលរួម​ការ​បោះ​ឆ្នោត ដោយ​សេរី ត្រឹមត្រូវ និង​យុត្តិធម៌។ មន្ត្រី​សង្គម​ស៊ីវិល​រូប​នេះ​ជំរុញ​ទៅ​សមត្ថកិច្ច​ និង​ស្ថាប័ន​ពាក់ព័ន្ធ​ ស្វែង​រក​ជន​ប្រព្រឹត្តិ​យក​មក​ផ្ដន្ទាទោស​តាម​ច្បាប់ ដើម្បី​ការ​បោះ​ឆ្នោត​អាច​ដំណើរការ​បាន​រលូន៖ «ដាក់​សម្ពាធ​លើ​សកម្មជន ដែល​គេ​ចូលរួម​គណបក្ស​នោះ គេ​មាន​បាន​ធ្វើ​សកម្មភាព​ចូលរួម​សេរី ត្រឹមត្រូវ​ឯណា​ ព្រោះ​រង​ការ​គាបសង្កត់​ រង​ការ​គំរាម​ហែង​សព្វ​បែប​យ៉ាង។ បាទ​យើង​នឹង​តាម​ដាន បើ​សិន​គណបក្ស​ពាក់ព័ន្ធ មាន​ភស្តុតាង មាន​ឯកសារ​ដាក់​ទៅ​ក្រសួង​ចាំ​មើល​ក្រសួង​គេ​ចាត់​ការ​របៀប​ម៉េច? លទ្ធផល​ក្រសួង​ចេញ​មក​របៀប​ម៉េច យើង​រង់ចាំ​មើល​ទាំង​អស់​គ្នា​បាទ»

កំណើន​នៃ​ការ​ធ្វើ​ទុក្ខ​បុក​ម្នេញ​លើ​សកម្មជន​គណបក្ស​ភ្លើង​ទៀន​បែប​នេះ​ស្រប​ពេល​ដែល​ការ​បោះ​ឆ្នោត​ជ្រើសរើស​ក្រុម​ប្រឹក្សា​ឃុំ​សង្កាត់ ថ្ងៃ​ទី៥ ខែមិថុនា នៅ​តែ​ជិត​ពីរ​ទៀត​ប៉ុណ្ណោះ។ ក្រុម​អ្នក​ឃ្លាំមើល​សង្កេត​ឃើញ​ថា គណបក្ស​នយោបាយ​ទាំង១៧ ដែល​ចូល​រួម​ការ​បោះ​ឆ្នោត​នេះ គណបក្ស​ភ្លើង​ទៀន គឺ​ជា​គូ​ប្រកួតប្រជែង ដែល​មាន​កម្លាំង​ប្រហាក់ប្រហែល​នឹង​គណបក្ស​ប្រជាជន​កម្ពុជា​ដែល​កំពុង​កាន់​អំណាច៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។