អាជ្ញាធរ​ខេត្ត​កណ្ដាល​ថា វៀតណាម​រុះរើ​តង់​២៦​កន្លែង​នៅ​ជាប់​ព្រំដែន​ខេត្ត​កណ្ដាល

ដោយ អាស៊ីសេរី
2020-11-25
Share
ទាហានវៀតណាមនៅព្រំដែន​ខេត្តកណ្ដាល 042620 នគរបាល​ខេត្ត​កណ្ដាល ចុះ​ទៅ​ប្រាប់​ទាហាន​វៀតណាម​ឱ្យ​រុះរើ​តង់​ស្នាក់នៅ​ចំនួន ៩កន្លែង បោះ​នៅ​ចំណុច​ដំបូក​ចែវ ខេត្ត​កណ្ដាល នៅ​ថ្ងៃ​ទី២៦ ខែ​មេសា ឆ្នាំ២០២០ ដែល​ជា​តំបន់​ស​មិន​ទាន់​បាន​ឯកភាព​គ្នា​វាស់​ចែក​ខណ្ឌ​សីមា និង​បោះ​បង្គោល​នៅ​ឡើយ។
រូប៖ ស្នងការដ្ឋាន​នគរបាល​ខេត្ត​កណ្ដាល

អាជ្ញាធរ​ខេត្ត​កណ្ដាល​ឲ្យ​ដឹង​ថា វៀតណាម បាន​រុះរើ​តង់​ចំនួន​២៦​កន្លែង​អស់​ហើយ ដែល​បាន​បោះ​ទីតាំង​នៅ​ជាប់​ព្រំដែន​ខេត្ត​កណ្ដាល គិត​ត្រឹម​រសៀល​ថ្ងៃ​ទី​២៥ ខែ​វិច្ឆិកា។

អភិបាលខេត្ត​កណ្ដាល លោក គង់ សោភ័ណ្ឌ មាន​ប្រសាសន៍​ប្រាប់​អាស៊ីសេរី នៅ​ថ្ងៃ​ទី​២៥ ខែ​វិច្ឆិកា​ថា ការ​រុះរើ​តង់​ទាំងនេះ​ធ្វើឡើង​តែមួយ​ថ្ងៃ​ប៉ុណ្ណោះ បន្ទាប់ពី​មានការ​សន្ទនា​តាម​ប្រព័ន្ធ​វីដេអូ រវាង​លោក​នាយករដ្ឋមន្ត្រី ហ៊ុន សែន និង​លោក ង្វៀង សួនហ្វុក (Nguyen Suon Phok) នាយករដ្ឋមន្ត្រី​វៀតណាម កាលពី​ថ្ងៃ​ទី​២៤ ខែ​វិច្ឆិកា។ លោក​បន្ត​ថា អាជ្ញាធរ​កម្ពុជា រួម​ទាំង​រូបលោក​ផង បាន​ចុះទៅ​ត្រួត​ពិនិត្យមើល​ការ​រុះរើ​តង់​ទាំងនោះ៖ «មកដល់​ម៉ោង​នេះ ខាង​ភាគី​វៀតណាម ខេត្ត​អាងយ៉ាង បាន​រុះរើ​អស់ហើយ មាន​តង់​ជាប់​ដី និង​តង់សង់​ខ្ពស់​ពី​ដី ប្រក់​ស័ង្កសី​ទាំងអស់​២៦​តង់ ចាប់ពី​ព្រឹក​រហូត​ដល់​ឥឡូវនេះ​។ យើង​បាន​ទៅ​ពិនិត្យ​មើល ហើយ​កងកម្លាំង​របស់​យើង នៅ​តាម​ព្រំដែន​មាន​ប៉ូលិស យោធា អភិបាលស្រុក​ជាដើម បាន​ទៅ​មើល​និង​ថតរូប​ទៀត​ផង»

កាលពី​ចុង​ខែ​កក្កដា​កន្លង​ទៅ អគ្គ​ស្នងការ​រង និង​ជា​អ្នកនាំពាក្យ​អគ្គស្នងការដ្ឋាន​នគរ​បាល​ជាតិ លោក ឆាយ គឹមខឿន ប្រាប់​អាស៊ីសេរី ថា វៀតណាម​បាន​បោះតង់​ចំនួន ២៨៧​កន្លែង នៅ​តំបន់​ដែល​មិនទាន់​ឯកភាព​បោះ​បង្គោល​ព្រំដែន​ក្នុង​ខេត្ត​កណ្ដាល តាកែវ ព្រៃវែង ស្វាយរៀង កំពត ត្បូងឃ្មុំ រតនគិរី និង​ខេត្ត​មណ្ឌលគិរី។

អាស៊ីសេរី នៅ​មិន​ទាន់​អាច​សុំ​ការ​បញ្ជាក់​បន្ថែម ពី​អភិបាលខេត្ត​មួយ​ចំនួន​ទៀត នៅ​ជាប់​ព្រំដែន​វៀតណាម​បាន​នៅ​ឡើយ​ទេ ជុំវិញ​ករណី​វៀតណាម បោះតង់​នៅ​តាម​ព្រំដែន ហើយ​កន្លែង​ខ្លះ បាន​ប្រែក្លាយ​ជា​សំណង់​រឹងមាំ។ ដូចនេះ ការ​រើរុះ​តង់​ទាំង​២៦​កន្លែង​នេះ គឺ​នៅ​ខេត្ត​កណ្តាល​មួយ​តែ​ប៉ុណ្ណោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល