ពលរដ្ឋដែលនិយមតាមដានព័ត៌មានសោកស្ដាយនៅពេលដឹងថា ប្រមុខរដ្ឋាភិបាល លោក ហ៊ុន សែន ចេញបញ្ជាបិទសារព័ត៌មានសំឡេងប្រជាធិបតេយ្យ VOD យ៉ាងតក់ក្រហល់ កាលពីយប់ថ្ងៃទី១២ ខែកុម្ភៈម្សិលមិញ។ ស្របគ្នានេះពលរដ្ឋ ក្រុមអង្គការសង្គមស៊ីវិល និងអ្នកសារព័ត៌មានបានបង្ហោះសារនៅលើបណ្ដាញសង្គមហ្វេសប៊ុក (Facebook) ព្រោងព្រាតភ្លាមៗទាំងយប់ដែរ ស្នើសុំរដ្ឋាភិបាលកុំបិទសារព័ត៌មាន VOD នេះ។ ពួកគេចង់ឱ្យរដ្ឋាភិបាលរក្សាទុកស្ថាប័នព័ត៌មាន ដែលមានវ័យ២០ឆ្នាំនេះ ព្រោះពួកគេបានចាត់ទុកស្ថាប័ននេះថា បានបំពេញតួនាទីដោយឯករាជ្យ និងជាទីពំនាក់របស់ពលរដ្ឋ អ្នកមិនសូវមានសំឡេង និងភាគីដែលងាយរងគ្រោះនៅក្នុងសង្គម។
ការបង្ខំបិទស្ថាប័នព័ត៌មាន VOD យ៉ាងតក់ក្រហល់ពីសំណាក់លោក ហ៊ុន សែន ពុំបានការសាទរពីពលរដ្ឋទូទៅឡើយ ជាពិសេសអ្នកនិយមតាមដានព័ត៌មានសង្គម និងនយោបាយជាប្រចាំ ដោយពួកគេចាត់ទុកទង្វើនេះថាជាការផ្ដាច់ផ្តិលជីវិតសារព័ត៌មានឯករាជ្យឱ្យអស់ពីកម្ពុជា។
កសិកររស់នៅភូមិជើង ឃុំជាប់ ស្រុកមេមត់ ខេត្តត្បូងឃ្មុំ លោក ឆៃ វិត ប្រាប់វិទ្យុអាស៊ីថា លោកជាអ្នករស់នៅជាប់ព្រំដែនកម្ពុជា-វៀតណាម តែងតាមដានព័ត៌មាន VOD មិនលួសថ្ងៃព្រោះតែចង់ដឹងស្ថានការណ៍ពិតក្នុងសង្គម។ លោកថា ការបិទស្ថាប័នព័ត៌មានដែលផ្សាយព័ត៌មានពិតមួយនេះ ស្មើនឹងរដ្ឋាភិបាលបំបិទសិទ្ធិសេរីភាពពលរដ្ឋដែរ៖
«ពួកខ្ញុំរាល់ថ្ងៃនេះ ដែលជាប្រជាពលរដ្ឋតាមព្រំដែនតាមជនបទខំខ្នះខ្នែងណាស់ស្វែងរកព័ត៌មានឯករាជ្យសម្រាប់ពួកខ្ញុំស្ដាប់ និងតាមដានពីបញ្ហាប្រទេសជាតិ ពីបញ្ហាសង្គម និងនយោបាយ។ ខ្ញុំគិតថាការបិទសំឡេង វីអូឌី សំឡេងឯករាជ្យនេះ នៅពេលនេះគឺជាការសម្លាប់ទឹកចិត្តមួយរបស់ពួកខ្ញុំដ៏ធំណាស់ គឺជាការបិទសិទ្ធិមិនឱ្យពួកខ្ញុំដឹងក្នុងនាមខ្ញុំជាពលរដ្ឋ មិនឱ្យពួកខ្ញុំនៅតាមស្រុកស្រែចម្ការមិនឱ្យយល់ដឹងពីបញ្ហាពិតកើតឡើងនៅក្នុងសង្គម។ ខ្ញុំពិតជាសោកស្ដាយណាស់បង»។
បើតាមអ្វីដែលលោក ហ៊ុន សែន បង្ហោះនៅលើហ្វេសប៊ុកកាលពីយប់ថ្ងៃទី១២ ខែកុម្ភៈ លោកបង្ខំឱ្យវិទ្យុសំឡេងប្រជាធិបតេយ្យ វីអូឌី បញ្ចប់ការផ្សាយរបស់ខ្លួនត្រឹមម៉ោង១០ព្រឹក ថ្ងៃទី១៣ ខែកុម្ភៈនេះ។ លោក ហ៊ុន សែន ចេញបញ្ជាឱ្យរដ្ឋមន្ត្រីក្រសួងព័ត៌មានលុបចោលអាជ្ញាប័ណ្ណវិទ្យុ វីអូឌី តែម្ដង។ លោក ហ៊ុន សែន មិនត្រឹមតែមិនបានទុកពេលឱ្យ វីអូឌី តវ៉ារកការពិត ហេតុផលខុស ឬត្រូវប៉ុណ្ណោះទេ លោកថែមទាំងណែនាំឱ្យអ្នកនាំពាក្យរដ្ឋាភិបាល លោក ផៃ ស៊ីផាន ប្ដឹងស្ថាប័ននេះទៅតុលាការថែមទៀត។
ស្ត្រីជាពលរដ្ឋនៅភ្នំពេញ ស្រីនិច លើកឡើងថា អាជ្ញាធររដ្ឋគួរតែដោះស្រាយបញ្ហានេះ ដោយឱ្យសារព័ត៌មានផ្សាយព័ត៌មានកែតម្រូវ ឬចាត់វិធានការតាមច្បាប់សារព័ត៌មាន ដែលមិនគួរឈានដល់ការបិទមិនឱ្យ វីអូឌី ផ្សព្វផ្សាយព័ត៌មានតទៅទៀតបែបនេះឡើយ។ ស្រីនិចមើលឃើញថា វិទ្យុសំឡេងប្រជាធិបតេយ្យ វីអូឌី បានជួយច្រើនដល់ពលរដ្ឋដែលស្វែងរកព័ត៌មាន និងចំណេះដឹងតាមប្រព័ន្ធផ្សព្វផ្សាយ៖
«វីអូឌីបានផ្ដល់ព័ត៌មានដ៏ជាក់លាក់មួយដល់ពលរដ្ឋឱ្យគាត់មានការយល់ដឹងបញ្ហាសង្គម ព័ត៌មានទូទៅ ចំណេះដឹងទូទៅ ដែលពលរដ្ឋមិនមានឱកាសទៅចូលរួមផ្ទាល់ ឬបានបញ្ចេញមតិដោយផ្ទាល់។ ខ្ញុំមានការសោកស្ដាយខ្លាំង។ ខ្ញុំទទូចថា បើសិនជារដ្ឋាភិបាលជារដ្ឋាភិបាលមានយុត្តិធម៌ គតិធម៌គួរណាស់ប្រើនីតិវិធីមានការពិន័យធម្មតាតាមកិច្ចការរដ្ឋបាលមិនគួរណាបិទដោយតក់ក្រហល់បែបនេះ»។
ពាក់ព័ន្ធការឈានដល់បញ្ជាដកអាជ្ញាប័ណ្ណការផ្សាយរបស់វីអូឌីនេះ ដំបូងលោក ហ៊ុន សែន ទុកពេលឱ្យស្ថាប័ននេះ៧២ម៉ោង បន្ទាប់មកទុកពេល ២៤ម៉ោង ដោយឱ្យសុំទោសកូនប្រុស គឺលោក ហ៊ុន ម៉ាណែត និងរដ្ឋាភិបាលរបស់លោក។ តែទីបញ្ចប់ លោក ហ៊ុន សែន ក៏ប្រែប្រកាសទាំងកំរោលដកអាជ្ញាប័ណ្ណតែម្ដង នៅក្រោយថ្នាក់ដឹកនាំវីអូឌី ផ្ញើលិខិតទៅទីស្ដីការគណៈរដ្ឋមន្ត្រីដោយប្រើពាក្យថា «សោកស្ដាយ» និង«សូមអធ្យាស្រ័យ» ប្រសិនបើមានកំហុសដោយអចេតនានៅក្នុងការផ្សព្វផ្សាយព័ត៌មានកាលពីថ្ងៃទី៩ ខែកុម្ភៈ ដែលមានចំណងជើងថា «មន្ត្រីរដ្ឋាភិបាលថាការដែលលោក ហ៊ុន ម៉ាណែត ដើរតួនាទីជំនួសឪពុកក្នុងការផ្ដល់ជំនួយឱ្យតួគី មិនមែនជារឿងខុសឆ្គង»។
ទាក់ទងនឹងរឿងនេះ ព្រះតេជព្រះគុណ ប៉ម សុខៃវណ្ណៈ គង់នៅវត្តមួយក្នុងរាជធានីភ្នំពេញ មានថេរដីការថា នេះជារឿងមិនល្អទាល់តែសោះ ដែលរដ្ឋាភិបាលបង្ខំបិទការផ្សាយរបស់វិទ្យុសំឡេងប្រជាធិបតេយ្យ វីអូឌី នៅមុនពេលបោះឆ្នោតបែបនេះ។ ព្រះអង្គត្រៀមចូលរួមការទាមទារឱ្យរដ្ឋាភិបាលរក្សាទុកស្ថាប័ននេះឱ្យដំណើរការតទៅទៀត៖
«ពិតជាសំខាន់មែនទែនសំឡេងប្រជាធិបតេយ្យហ្នឹង រយៈពេល២០ឆ្នាំហើយ ដែលគាត់មានភាពឯករាជ្យខ្លួនឯង។ គាត់ផ្សាយព័ត៌មានពិតក្នុងសង្គមប្រជាធិបតេយ្យ និយាយការពិត មិនគួរណាបិទទេ។ អាត្មាភាពនឹងចូលរួមយុទ្ធនាការ ដើម្បីទទូចឱ្យរដ្ឋាភិបាលគិតពិចារណាឡើងវិញ»។
ស្របគ្នានេះពលរដ្ឋ ក្រុមអង្គការសង្គមស៊ីវិល និងអ្នកសារព័ត៌មានបានបង្ហោះសារនៅលើបណ្ដាញសង្គមហ្វេសប៊ុក (Facebook) ព្រោងព្រាតភ្លាមៗទាំងយប់ដែរ ស្នើសុំរដ្ឋាភិបាលកុំឱ្យបិទសារព័ត៌មាន VOD នេះ។ ពួកគេថែមទាំងចែករំលែកសារប្រហាក់ប្រហែលគ្នាថា សំឡេងប្រជាធិបតេយ្យ វីអូឌី សំខាន់ក្នុងសង្គមកម្ពុជាបច្ចុប្បន្ន។ ពលរដ្ឋជាច្រើនបង្ហោះរូប Logo VOD ដោយសរសេរសារភ្ជាប់ថា វីអូឌី ជាអ្នកនាំសារពិតជូនពលរដ្ឋ និងរដ្ឋាភិបាល។ សូមមេត្តាកុំបិទវីអូឌី។ សូមមេត្តាទុក វីអូឌី សម្រាប់អ្នកស្រេកឃ្លានព័ត៌មាន។
ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា សរសេរថា ការពិត ការបិទវីអូឌី គឺមិនខុសពីយកពូថៅទៅវាយបំបែកកញ្ចក់ទិព្វ ដែលឆ្លុះខ្លួនប្រាណយើងនោះទេ។ ចំណែកប្រធានមជ្ឈមណ្ឌលសិទ្ធិមនុស្សកម្ពុជាអ្នកស្រី ចក់ សុភាព ដែលទាមទារមិនឱ្យបិទវីអូឌី ដែរនោះ លើកឡើងថា អ្នកស្រីសង្ឃឹមថា នាយករដ្ឋមន្ត្រីនឹងបើកចិត្តទូលាយ ព្រោះការសម្រេចបិទ វីអូឌី ពិតជាប៉ះពាល់ខ្លាំងដល់សេរីភាពសារព័ត៌មាន។
ចំណែកព្រះតេជគុណ លួន សាវ៉ាត បានបង្ហោះសារថា បិទវីអូឌីដូចជា បិទភ្នែក បិទមាត់ពលរដ្ឋទាំងក្នុង និងក្រៅប្រទេស។
ទាក់ទងនឹងរឿងនេះ ពលករខ្មែរនៅប្រទេសកូរ៉េខាងត្បូង ដែលប្រើហ្វេសប៊ុក ឈ្នោះ បងចិត្ត ប្រាប់វិទ្យុអាស៊ីសេរីថា លោកបានដឹងព័ត៌មានពិតក្នុងប្រទេសដោយសារវីអូឌីផ្សព្វផ្សាយ ពោលគឺលោកបានដឹងព័ត៌មានដែលកំពុងកើតមានក្នុងប្រទេសទោះបីជាលោកទៅធ្វើការនៅស្រុកគេក្ដី៖
«ការធ្វើកូដកម្មនៅណាហ្គាវើដ៏ក៏គាត់បានទៅយកព័ត៌មាន ការធ្វើការតវ៉ាអីនៅទីលានប្រជាធិបតេយ្យក៏គាត់បានទៅយក។ ជាក់ស្ដែងខ្ញុំមិនបាននៅក្នុងស្រុក គឺខ្ញុំនៅខាងក្រៅក៏គាត់ទៅយកព័ត៌មានមកផ្សាយឱ្យខ្ញុំបានឃើញ»។
និយាយដល់ការតវ៉ារបស់ពលរដ្ឋដែលសារព័ត៌មានក្នុងស្រុកទូទៅមិនផ្សព្វផ្សាយនេះ កូដករនៅណាហ្គាវើលដ៍ (NagaWorld) កញ្ញា វ៉ាន់ រីណា បារម្ភថា ព័ត៌មានពិត ដែលជាទុក្ខសោកការឈឺចាប់របស់ពលរដ្ឋ ដែលរងការរំលោភបំពានផ្សេងៗ ដូចករណីណាហ្គាវើលដ៍ជាដើមនេះ នឹងមិនត្រូវបានផ្សព្វផ្សាយឱ្យបានទូលំទូលាយទៀតទេ៖
«ស្ថាប័នព័ត៌មានមួយ គឺប្រៀបបីដូចជាកញ្ចក់ឆ្លុះបញ្ចាំងពីតថភាពពិតក្នុងសង្គមរបស់យើង។ អ៊ីចឹងបើសិនជាបិទសារព័ត៌មានឯករាជ្យ វាស្មើហ្នឹងអាកញ្ចក់ ដែលឆ្លុះបញ្ចាំងហ្នឹងត្រូវបានផ្កាប់ ដល់ពេលចឹងយើងមិនអាចមើលឃើញអ្វីបានទៀតទេ»។
មិនខុសគ្នានេះអ្នកធ្លាប់រងគ្រោះដោយសារការរំលោភយកដីធ្លីនៅតំបន់បឹងកក់ អ្នកស្រី ទេព វន្នី ប្រាប់វិទ្យុអាស៊ីសេរីថា កន្លងទៅវីអូឌី តែងជួយផ្សព្វផ្សាយពីបញ្ហាដីធ្លី បញ្ហារបស់ពលរដ្ឋរងគ្រោះឱ្យពិភពលោកបានដឹង ដែលមិនគួរបិទស្ថាប័ននេះឡើយ។ អ្នកស្រី ទេព វន្នី មើលឃើញថា មន្ត្រីពាក់ព័ន្ធគួរមានការទទួលខុសត្រូវចំពោះការផ្ដល់ព័ត៌មានដល់អ្នកសារព័ត៌មាន ដែលមិនត្រូវទម្លាក់កំហុសលើអ្នកសារព័ត៌មានឡើយ៖
«កន្លងមក ដែលមានការពាក់ព័ន្ធការរំលោភសិទ្ធិមនុស្ស ដីធ្លី ការកាប់បំផ្លាញព្រៃឈើ ជារួមទៅឱ្យតែមានភាពអយុត្តិធម៌ក្នុងសង្គមគឺវិទ្យុរបស់ស្ថាប័ន វីអូឌី តែងតែជួយផ្សព្វផ្សាយយ៉ាងទូលំទូលាយ។ រឿងនេះខ្ញុំគិតថាជារឿងរសើបមួយ ហើយជារឿងរសើបមួយសម្រាប់ខាងរដ្ឋាភិបាល ដែលគាត់មិនគួរធ្វើរឿងហ្នឹងឡើង»។
បើទោះជាមានមតិពីពលរដ្ឋ និងពីអង្គការសង្គមស៊ីវិលថា មិនគាំទ្រឱ្យបិទវីអូឌីនេះក្ដី ក៏នៅពេលចូលទៅមើលខ្ទង់ខំមិន (Comment) របស់ហ្វេសប៊ុកលោក ហ៊ុន សែន វិញ ឃើញមានមតិសាទរគាំទ្រចំណាត់ការបិទ វីអូឌី ដោយលោក ហ៊ុន សែន នេះព្រោងព្រាតដែរ។
យ៉ាងនេះក្ដី ការចេញបទបញ្ជាបិទការផ្សាយ វីអូឌី នេះក៏ឆ្លុះបញ្ចាំងពីស្ថានភាពដូចគ្នានៅមុនការបោះឆ្នោតឆ្នាំ២០២៣នេះ ទៅនឹងការបោះឆ្នោតក្នុងឆ្នាំ២០១៨ ដែរ គឺយុទ្ធសាស្រ្តគាស់រំលើងស្ថាប័នព័ត៌មានរាជ្យនៅតែបន្ត។ ក្រុមអ្នកឃ្លាំមើលរិះគន់ថា ទាំងនេះក៏ដោយសារមេដឹកនាំ លោក ហ៊ុនសែន ខ្លាចការពិត ពីព្រោះការពិតអាចនឹងធ្វើឱ្យរង្គោះរង្គើការក្ដោបក្ដាប់អំណាច និងការផ្ទេរអំណាចតកូនតចៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។