ហេតុអ្វីបានជាលោក ហ៊ុន សែន មិនហ៊ានក្អកជាមួយវៀតណាមក្នុងរឿង CLV?
2024.09.16
ប្រធានរដ្ឋនៃសាធារណរដ្ឋសង្គមនិយមវៀតណាម លោក តូ ឡឹម(TÔ LÂM) (ឆ្វេង) និងលោក ហ៊ុន សែន ប្រធានព្រឹទ្ធសភាកម្ពុជា។
រូប៖ ហ្វេសប៊ុកលោក ហ៊ុន សែន
ខុសពីរឿងរ៉ាវព្រែកជីកហ្វូណនដែលលោក ហ៊ុន សែន និងរដ្ឋាភិបាលកូនរបស់លោក បានពន្យុះឱ្យមានចលនាជាតិនិយម ដោយអួតអាងថាមិនខ្ចីពឹងចម្រុះវៀតណាមដកដង្ហើមនោះ លោក ហ៊ុន សែន មិនហ៊ានធ្វើដូច្នេះឡើយក្នុងរឿងគម្រោងរកស៊ីចូលគ្នាក្នុងតំបន់ត្រីកោណអភិវឌ្ឍន៍ CLV។ លោកបែរជាបញ្ជាឱ្យរដ្ឋាភិបាលកូនរបស់លោកចាប់ចងពលរដ្ឋខ្មែរស្លូតត្រង់ដាក់គុកតាមទំនើងចិត្តជាបន្តបន្ទាប់ដោយចោទពួកគេថាចង់ផ្តួលរំលំរដ្ឋាភិបាល។ តើហេតុអ្វីបានជាលោក ហ៊ុន សែន មិនហ៊ានក្អកជាមួយវៀតណាមក្នុងរឿង CLV?
ឪនាយករដ្ឋមន្ត្រី លោក ហ៊ុន សែន ជាអ្នកដុតបញ្ឆេះឱ្យមានចលនាជាតិនិយមក្នុងរឿងរ៉ាវសាងសង់ព្រែកជីកហ្វូណន ក្រោយវៀតណាមមិនសប្បាយចិត្តអំពីផលប៉ះពាល់បរិស្ថាន និងថាចិនអាចប្រើប្រាស់ព្រែកជីកនេះសម្រាប់បម្រើឱ្យផលប្រយោជន៍យោធា។
លោក ហ៊ុន សែន៖ «អ៊ីចឹងបើវៀតណាមចង់ស្ងាត់ សូមវៀតណាមឱ្យបញ្ឈប់នូវការលើកនេះលើកនោះ។ កន្លងទៅ សុខ ទូច អី គាត់ដាក់ត្រលប់ទៅវិញ មនុស្សមួយចំនួនត្រលប់ទៅវិញដែរ។ អ៊ីចឹងខ្ញុំក៏ត្រូវនៅស្ងៀមដែរ ព្រោះវៀតណាមគាត់ធ្វើហើយ គាត់ហ៊ានឱ្យ Straight Times ផ្សាយទៀត។ ហេតុអីបានមេដឹកនាំវៀតណាមមិនព្រមដាក់វិន័យអាហ្នុង? ខ្ញុំអត់មានត្រូវដាក់ពិន័យអ្នកណាទេ។ ខ្ញុំបង្ខំចិត្តត្រូវនិយាយ ហើយក៏ផ្ញើសារទៅកាន់ប្រជាជនវៀតណាមឱ្យទទួលយកនូវផលប្រយោជន៍កម្ពុជាផង»។
លោក ហ៊ុន សែន ថែមទាំងបកអាក្រាតថា វៀតណាមអាចផ្តាច់ដង្ហើមសេដ្ឋកិច្ចកម្ពុជាពេលណាក៏បាន ប្រសិនបើកម្ពុជាមិនធ្វើព្រែកជីកហ្វូណន។
លោក ហ៊ុន សែន៖ «ពេលណាមួយ ខ្ញុំនិយាយដោយត្រង់ បើវៀតណាមមិនសប្បាយចិត្ត ទំនិញកម្ពុជាទាំងអស់ដឹកចេញតាមទន្លេមេគង្គអត់រួចទេ ខ្ញុំសូមប្រាប់អ្នកទាំងអស់គ្នាឱ្យច្បាស់។ បើមិនធ្វើព្រែកជីកហ្នឹងទេ កម្ពុជានៅតែពឹងដង្ហើមគេដក ដូចអុកស៊ីហ្សែនដែលត្រូវគេផ្តាច់ ក៏ផ្តាច់ គេឱ្យក៏ឱ្យ។ នេះក៏ជាសារដាស់តឿនចំពោះវៀតណាមថា មូលហេតុអ្វីបានជាកម្ពុជាត្រូវសម្រេចធ្វើដោយសារវាលំបាកពេក»។
ក៏ប៉ុន្តែ លោក ហ៊ុន សែន និងរដ្ឋាភិបាលកូនរបស់លោក មិនបានបញ្ឆេះឱ្យមានចលនាជាតិនិយមដូច្នេះឡើយ ក្នុងរឿងកិច្ចសហប្រតិបត្តិការតំបន់ត្រីកោណអភិវឌ្ឍន៍ CLV។
ពលរដ្ឋខ្មែរនៅក្រៅប្រទេសជាច្រើនពាន់នាក់ បានផ្ទុះការតវ៉ាធ្វើបាតុកម្មជាបន្តបន្ទាប់ទាមទារឱ្យដកកម្ពុជាចេញពីកិច្ចសហប្រតិបត្តិការនេះ ដោយសារពួកគេបារម្ភថាកម្ពុជាអាចបាត់បង់ទឹកដី ឬ អធិបតេយ្យទៅវៀតណាមនាពេលអនាគត។ ផ្ទុយទៅវិញ លោក ហ៊ុន សែន បានចេញមុខរំលោភអំណាចនាយករដ្ឋមន្ត្រីជាកូន ដោយបញ្ជាឱ្យតុលាការចាប់ខ្លួនពលរដ្ឋខ្មែរទាំងឡាយណាដែលហ៊ានរិះគន់ប្រឆាំងនឹងវៀតណាមក្នុងរឿងនេះ ដោយចោទពួកគេថា មានផែនការផ្តួលរំលំរដ្ឋាភិបាល។
លោក ហ៊ុន សែន៖ «មិនអាចមើលស្រាលបញ្ហានេះបានទេ។ ហើយខ្ញុំអំពាវនាវរាជរដ្ឋាភិបាលតាមស្រាវជ្រាវប្រមូលឱ្យអស់នូវក្រុមទាំងឡាយណាដែលបង្កើតរឿងនេះ ហើយដែលស្ថិតនៅក្នុងប្រទេស និងចងក្រងសំណុំរឿងទាំងឡាយនៃអ្នកដែលបញ្ចេញពីក្រៅប្រទេស។ ហើយត្រូវសិក្សាអំពីប្រវត្តិគ្រួសារនៅកន្លែងណា បើវានៅក្រៅប្រទេស ដើម្បីយើងងាយស្រួលក្នុងការគ្រប់គ្រង។ និយាយអ៊ីចឹង មិនមែនធ្វើដូចអាពតថា កូនក្បត់សម្លាប់ដល់ឪ ឪក្បត់សម្លាប់ដល់កូន អត់ទេ។ ប៉ុន្តែ យើងត្រូវស្គាល់អំពីប្រវត្តិរបស់ពួកគេ»។
ក្រោយការបញ្ជានេះ អាជ្ញាធរនៃរដ្ឋាភិបាលកូនរបស់លោក មិនញញើតនឹងចាប់ចងពលរដ្ឋខ្លួនឯង ជាពិសេសក្រុមអ្នកនិយាយរិះគន់រឿងរ៉ាវព្រំដែន និងកិច្ចសហប្រតិបត្តិការ CLV នេះដាក់គុកច្រវាក់ជិត១០០នាក់ចាប់តាំងពីចុងខែកក្កដាមក ក្នុងនោះមានរាប់ចាប់តាំងពីពលរដ្ឋសាមញ្ញ សកម្មជនសិទ្ធិមនុស្ស សកម្មជនសង្គម និងយុវជនជាដើម។ ពួកគេទាំងនោះមួយភាគធំក្រោយមកត្រូវបានដោះលែងឱ្យមានសេរីភាពវិញ ខណៈបច្ចុប្បន្ននៅសល់ប្រមាណ ១០នាក់ កំពុងជាប់ឃុំបណ្ដោះអាសន្នក្រោមបទចោទ«ញុះញង់បង្កឱ្យមានភាពវឹកវរដល់សន្តិសុខសង្គម» ឬ «រួមគំនិតក្បត់»ចង់ផ្តួលរំលំរដ្ឋាភិបាល ដែលក្រុមសិទ្ធិមនុស្សជាតិ និងអន្តរជាតិថា ជាបទចោទគ្មានភស្តុតាង។
អ្នកវិភាគនយោបាយ បណ្ឌិត សេង សារី ហៅចំណាត់ការរបស់រដ្ឋាភិបាលនេះថាជាការដើរបញ្ច្រាសចរន្តជាតិនិយមរបស់ប្រជាពលរដ្ឋខ្មែរ ជាពិសេសយុវជន។
បណ្ឌិតសេង សារី៖ «ប្រតិកម្មក្នុងការចាប់ខ្លួនរបស់យុវជន បានធ្វើឱ្យរដ្ឋាភិបាល មានន័យថាការចាប់ខ្លួន ឬការបង្ក្រាបមកលើយុវជនគឺស្មើនឹងរដ្ឋាភិបាលបង្ហាញខ្លួនឯងថាខ្លួនឯងកំពុងតែកាន់ជើងប្រទេសវៀតណាម។ នេះធ្វើឱ្យយុវជនចាប់ផ្តើមមើលឃើញថារដ្ឋាភិបាលហាក់ដូចជាអត់គិតគូររឿងក្តីបារម្ភរបស់ពលរដ្ឋទាល់តែសោះ នៅពេលដែលពលរដ្ឋបង្ហាញពីក្តីបារម្ភ បែរជាទៅកាន់ជើងអ្នកដទៃទៅវិញ»។
ជុំវិញចំណាត់ការកណ្តាប់ដៃដែករបស់អាជ្ញាធររដ្ឋាភិបាលក្រោមការបញ្ជារបស់លោក ហ៊ុន សែន នេះ ប្រធានស្តីទីគណបក្សសង្គ្រោះជាតិ លោក សម រង្ស៊ី ពន្យល់ថា លោក ហ៊ុន សែន មិនហ៊ានក្អកនឹងវៀតណាមក្នុងរឿង CLV នេះ គឺដោយសារតែចង់យកចិត្តវៀតណាមឱ្យជួយបន្តការពារអំណាចឱ្យកូនរបស់លោក។
លោក សម រង្ស៊ី៖ «នៅពេលណាឥទ្ធិពលចិនកើនឡើងនៅប្រទេសកម្ពុជា ប្រទេសវៀតណាមអត់សប្បាយចិត្តទេ ហើយ ហ៊ុន សែន ភ័យខ្លាចប្រទេសវៀតណាមប្រតិកម្មខ្លាំងដូចប្រទេសវៀតណាមបានទម្លាក់របប ប៉ុល ពត ហើយលើក ហ៊ុន សែន។ ខ្លាចក្រែងប្រទេសវៀតណាម មានប្រតិកម្មបែបហ្នឹង ទម្លាក់ ហ៊ុន សែន លើកអ្នកណាម្នាក់ទៀត។ អ៊ីចឹងហើយបាន ហ៊ុន សែន ភ័យបានទៅលួងចិត្តប្រទេសវៀតណាម ជាថ្នូរថាឱ្យចិនគ្រប់គ្រងខេត្តមួយចំនួនតាមឆ្នេរសមុទ្រ ហើយជាថ្នូរនោះគឺឱ្យទឹកដីប្រទេសកម្ពុជាមួយផ្នែកនៅឆ្ងាយពីសមុទ្រនៅភូមិភាគឥសានជាពិសេសខេត្តទាំង៤នោះ ឱ្យប្រទេសវៀតណាមគ្រប់គ្រង។ អ៊ីចឹង គេគ្រាន់តែប្រើជារូបភាពបោកបញ្ឆោត គេថាអភិវឌ្ឍរួម រកស៊ីរួមនោះ គឺជាការបោកបញ្ជោតទេ»។
លោក សម រង្ស៊ី ហៅទង្វើរបស់លោក ហ៊ុន សែន យ៉ាងដូច្នេះថា ជាការ«ក្បត់ជាតិ២ដង» តាមរយៈការត្រូវរ៉ូវជាមួយចិន និងវៀតណាមដែលលោកថាដើម្បីតែ«រក្សាអំណាច»ឱ្យត្រកូលហ៊ុន។
លោក សម រង្ស៊ី៖ «ទង្វើនេះជាទង្វើក្បត់ជាតិ។ ហ៊ុន សែន គឺឃើញព័ត៌មានដែលយើងស្តាប់ឮទាំងប៉ុន្មាន គឺគាត់ប្រព្រឹត្តិអំពើក្បត់ជាតិ។ ក្បត់ជាតិ២ដង ក្បត់ជាតិជាមួយចិនផង គឺខេត្តនៅតាមសមុទ្រតាមឆ្នេរសមុទ្រ គឺប្រគល់ឱ្យចិន ហើយខេត្តនៅភូមិភាគឥសានជាប់ព្រំប្រទល់ដែនជាមួយប្រទេសវៀតណាម គឺប្រគល់ឱ្យប្រទេសវៀតណាម។ គឺ ហ៊ុន សែន គាត់ធ្វើអីក៏ធ្វើដែរ គាត់កាត់ទឹកដី គាត់ធ្វើឱ្យប្រទេសកម្ពុជាបាត់បង់អធិបតេយ្យជាតិ បូរណភាពទឹកដី គឺគាត់ធ្វើឱ្យប្រទេសកម្ពុជាខូចខាតច្រើនណាស់ចំពោះចិនផង ចំពោះប្រទេសវៀតណាមផង។ គាត់ធ្វើអីក៏ធ្វើដែរ ឱ្យតែរក្សាអំណាចឱ្យត្រកូលគាត់»។
វិទ្យុអាស៊ីសេរី មិនអាចទាក់ទងអ្នកនាំពាក្យរដ្ឋាភិបាល លោក ប៉ែន បូណា ដើម្បីសុំការឆ្លើយតបជុំវិញរឿងនេះបានទេ កាលពីថ្ងៃទី១១ ខែកញ្ញា។ ទោះយ៉ាងណា កន្លងទៅ រដ្ឋាភិបាលបានបដិសេធយ៉ាងដាច់អហង្ការថា គ្មានឡើយការកាត់ទឹកដី៤ខេត្តទៅវៀតណាម ហើយក៏គ្មានការយកខេត្តទាំង៤ ទៅដាក់ហ៊ុន ឬអភិវឌ្ឍរួមគ្នាជាមួយប្រទេសជិតខាងដែរ។
ថ្វីបើមានការបកស្រាយយ៉ាងនេះក៏ដោយ ក៏ពលរដ្ឋកម្ពុជាមួយចំនួននៅតែមិនទុកចិត្តរដ្ឋាភិបាលត្រកូលហ៊ុនឡើយ ខណៈវៀតណាមធ្លាប់លើកបន្តុបលោក ហ៊ុន សែន ឱ្យឡើងកាន់អំណាច និងធ្លាប់ជាសត្រូវប្រវត្តិសាស្ត្រលេបត្របាក់ទឹកដីកម្ពុជាក្រោមរបស់កម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា
អត្ថបទពេញនិយម
នយោបាយ
- សារលោក ហ៊ុន សែន បញ្ជាឲ្យកម្ទេចអ្នករិះគន់ «ជាភស្តុតាងអាចប្តឹងទៅតុលាការ ICC»
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- ពលរដ្ឋខ្មែរនៅប្រទេសនូវែលហ្សេឡង់ធ្វើបាតុកម្មប្រឆាំងគម្រោង CLV-DTA និងទាមទារស្ដារប្រជាធិបតេយ្យ
- ពលរដ្ឋខ្មែរនៅអូស្ត្រាលីធ្វើបាតុកម្មទាមទារឱ្យរដ្ឋាភិបាលកម្ពុជាដកគម្រោង CLV ទាំងស្រុង
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា