ក្រុម​យុវជន​ថា របប​ក្រុង​ភ្នំពេញ​កំពុង​បំផ្លាញ​សន្តិភាព​ដោយ​ខ្លួន​ឯង

ដោយ ជាតិ ចំណាន
2020-09-19
អ៊ីម៉ែល
មតិ
Share
បោះពុម្ព
កញ្ញា លី ស្រីស្រស់ ប្រធាន​ក្រុម​អ្នក​វិភាគ​វ័យ​ក្មេង។
កញ្ញា លី ស្រីស្រស់ ប្រធាន​ក្រុម​អ្នក​វិភាគ​វ័យ​ក្មេង។
រូប​ហ្វេសប៊ុក Sreysors Ly

យុវជន​មួយ​ចំនួន​​យល់​ឃើញ​ស្រប​គ្នា​ថា របប​លោក ហ៊ុន សែន កំពុង​បំផ្លាញ​សន្តិភាព​ដោយ​ខ្លួន​ឯង មិនមែន​គណបក្ស​ប្រឆាំង ឬ​ក៏​ក្រុម​សកម្មជន​នោះ​ទេ។ ពួក​គេ​ថា សន្តិភាព​ពេល​នេះ​បាន​ក្លាយ​ជា​ពាក្យ​មួយ​ដែល​របប​ក្រុង​ភ្នំពេញ​យក​មក​ប្រើ​ជា​លេស ដើម្បី​បង្ក្រាប​សំឡេង​រិះគន់ និង​សំឡេង​ឯករាជ្យ។ ទោះ​ជា​យ៉ាង​ណា មន្ត្រី​ជាន់ខ្ពស់​បក្ស​កាន់​អំណាច​អះអាង​ថា ពលរដ្ឋ​កំពុង​តែ​ទទួល​បាន​ផ្លែផ្កា​ពី​សន្តិភាព​ដ៏​រឹងមាំ​របស់​រដ្ឋាភិបាល។

ក្រុម​យុវជន​អ្នក​ឃ្លាំមើល​បញ្ហា​សង្គម បន្ត​រិះគន់​ថា សន្តិភាព​ដែល​របប​ក្រុង​ភ្នំពេញ​ប្រកាស​ក្ដែងៗ នោះ មិន​មែន​ជា​សន្តិភាព​ពិត​ប្រាកដ​ឡើយ។

ប្រធាន​ក្រុម​អ្នក​វិភាគ​វ័យ​ក្មេង ​កញ្ញា លី ស្រីស្រស់ មាន​ប្រសាសន៍​ថា សន្តិភាព​ពិត​ប្រាកដ​ មិន​អាច​កើត​មាន​នោះ​ទេ បើ​គ្មាន​យុត្តិធម៌​សង្គម។ ​កញ្ញា​ថា រដ្ឋាភិបាល​កំពុង​ចោទ​ប្រកាន់​ដោយ​ខុស​ឆ្គង​​ថា ក្រុម​គណបក្ស​ប្រឆាំង អ្នក​វិភាគ ឬ​អ្នក​នៅ​ក្រៅ​ស្រុក​ ព្យាយាម​បំផ្លាញ​សន្តិភាព។ កញ្ញា​ជឿ​ថា គ្រប់​ភាគី​ទាំងអស់​សុទ្ធ​តែ​ចង់​បាន​សន្តិភាព ប៉ុន្តែ​សន្តិភាព​នោះ​ត្រូវ​ផ្សារភ្ជាប់​នឹង​ការ​គោរព​សិទ្ធិ និង​ផ្តល់​យុត្តិធម៌​ស្មើភាព​គ្នា​ដល់​ពលរដ្ឋ​គ្រប់រូប៖ «រដ្ឋាភិបាល​កំពុង​តែ​អនុវត្ត​ទៅ ធ្វើ​ឱ្យ​ប្រទេស​មាន​ភាព​អយុត្តិធម៌ ធ្វើ​ឱ្យ​ប្រទេស​មាន​ការ​រំលោភ​សិទ្ធិមនុស្ស អា​ហ្នឹង​ហើយ​រដ្ឋាភិបាល​ហាក់​ដូច​ជា​កំពុង​រំលាយ​សន្តិភាព​ខ្លួន​ឯង​អ៊ីចឹង។ មិន​មែន​ពួក​ប្រឆាំង ឬ​អ្នក​វិភាគ​​ទេ ពីព្រោះ​ពួក​​យើង​មិន​បាន​ធ្វើ​ឱ្យ​មាន​រឿង​ទាំងអស់​ហ្នឹង​ទេ។ អ្នក​ដែល​ធ្វើ​ គឺ​រដ្ឋាភិបាល​ហ្នឹង​ហើយ​ មាន​ការ​ចាប់​ចង​អ្នក​មាន​មតិ​យោបល់​យល់​ខុស (គ្នា) អ្វី​ជា​ដើម​ហ្នឹង»

ចំណែក​យុវជន​គណបក្ស​សង្គ្រោះ​ជាតិ​ខេត្ត​សៀម​រាប​ដែល​កំពុង​ភៀស​ខ្លួន​នៅ​ក្រៅ​ប្រទេស លោក ឈុន វាន មើល​ឃើញ​ថា របប​លោក ហ៊ុន សែន កំពុង​បំផ្លាញ​សន្តិភាព​ដោយ​ខ្លួន​ឯង តាម​រយៈ​ការ​ចាប់​ចង​ពលរដ្ឋ​តាម​ទំនើង​ចិត្ត និង​ការ​តាម​ធ្វើ​ទុក​បុក​ម្នេញ​លើ​សកម្មជន​នយោបាយ​គណបក្ស​ប្រឆាំង។ លោក​បន្ត​ថា សូម្បីតែ​លោកនាយក​រដ្ឋ​មន្ត្រី ហ៊ុន សែន ក៏​មិន​ទុក​ចិត្ត​សន្តិភាព​ក្រោម​របប​ដឹក​នាំ​របស់​គាត់​ដែរ ព្រោះ​ពេល​ចេញ​ទៅ​ទី​សាធារណៈ​ម្ដង លោក​ប្រើ​កងកម្លាំង​ប្រដាប់​អាវុធ​ច្រើន​ស្អេក​ស្កះ៖ «លោក ហ៊ុន សែន ទេ​ដែល​ជា​អ្នក​បំផ្លាញ​សន្តិភាព​ដោយ​ខ្លួន​ឯង ព្រោះ​គាត់​បាន​បញ្ចេញ​នូវ​ទង្វើ​ដ៏​ព្រៃផ្សៃ​ ចាប់​ចង​មនុស្ស​ដោយ​រំលោភ​បំពាន​ទៅលើ​ច្បាប់​នៅ​ក្នុង​ប្រទេស​កម្ពុជា​ ហើយ​ធ្វើ​ឱ្យ​ប្រទេស​កម្ពុជា​ធ្លាក់​ដុន​ដាប​រហូត​ដល់​មាន​ទណ្ឌកម្ម​ជា​បន្ត​បន្ទាប់ មាន​សេចក្ដី​ថ្លែង​ការណ៍​ថ្កោល​ទោស​ពី​បណ្ដា​ប្រទេស​លើ​ពិភពលោក​កាន់​លទ្ធិ​​ប្រជាធិបតេយ្យ​ដែល​គេ​គោរព​សិទ្ធិ​មនុស្ស​នោះ»

មតិ​រិះគន់​របស់​ក្រុម​យុវជន​នេះ គឺ​ដោយ​សារ​អាជ្ញាធរ​របប​ក្រុង​ភ្នំពេញ​បាន​ប្រើ​ហេតុ​ផល​ការពារ​សន្តិភាព ដើម្បី​ចាប់​ខ្លួន​ពលរដ្ឋ​ដាក់​ពន្ធនាគារ​ជា​បន្តបន្ទាប់ ដោយ​គ្រាន់​តែ​ពួក​គេ​បញ្ចេញ​មតិ​រិះគន់ ឬ​ចង់​ប្រមូល​ផ្ដុំ​ធ្វើ​បាតុកម្ម​ដោយ​សន្តិវិធី ហើយ​មន្ត្រី​គ្រាក់ៗ នៃ​របប​ក្រុង​ភ្នំពេញ​ អះអាង​ដដែលៗ ថា ចំណាត់​ការ​ទាំងនេះ គឺ​ជា​ការ​អនុវត្ត​ច្បាប់។

ជា​ពិសេស​ថ្មីៗ នេះ កូន​ប្រុស​ច្បង​លោក ហ៊ុន សែន គឺ​លោក ហ៊ុន ម៉ាណែត ដែល​ត្រូវ​បាន​មជ្ឈដ្ឋាន​ទូទៅ​ជឿ​ថា ជា​អ្នក​ឡើង​ស្នង​តំណែង​ពី​ឪពុក​នោះ បាន​ប្រកាស​ជំហរ​ថា នឹង​មិន​អនុញ្ញាត​ឱ្យ​ជន​ណា​ម្នាក់​បំផ្លាញ​សុខ​សន្តិភាព​​បាន​ឡើយ។ មេទ័ព​ជើងគោក​រូប​នេះ​បាន​ចោទ​ប្រកាន់​ក្រុម​អ្នក​រិះគន់ និង​អ្នក​ធ្វើ​សកម្មភាព​ដើម្បី​យុត្តិធម៌​សង្គម​ថា ជា​ក្រុម​ប៉ុនប៉ង​បំផ្លាញ​សន្តិភាព ដែល​មិន​អាច​អត់​ឱន​ឱ្យ​បាន​ឡើយ។

លោក​នាយករដ្ឋ​មន្ត្រី ហ៊ុន សែន បាន​បំផុស​ពាក្យ​ថា អរគុណ​សន្តិភាព ហើយ​ពាក្យ​ស្លោក​នេះ ត្រូវ​បាន​ស្ថាប័ន​រដ្ឋ និង​សាលារៀន បោះ​ពុម្ព​ជា​ផ្ទាំង​ធំ​បិទ​តាម​ទីតាំង​រៀងៗ ខ្លួន។

អ្នក​នាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន អះអាង​​ថា ពលរដ្ឋ​ជឿជាក់​លើ​ការ​ដឹក​នាំ​របស់​រដ្ឋាភិបាល ព្រោះ​ពួកគាត់​ទទួល​បាន​សុខ​សន្តិភាព​ពេញលេញ​ លើក​លែង​តែ​ក្រុម​អ្នក​ប្រឆាំង​ប៉ុណ្ណោះ៖ «ប្រជាជន​លោក​ស្វាគមន៍ លោក​សាទរ​ចំពោះ​សន្តិភាព​ដែល​កំពុង​តែ​មាន​បច្ចុប្បន្ន​ ហើយ​យ៉ាង​រឹងមាំ​ទៀត អត់​មាន​រង្គោះរង្គើ​ទេ។ អ៊ីចឹង គឺ​ការ​អនុវត្ត​វិធានការ​ផ្លូវ​ច្បាប់​ចំពោះ​ក្រុម​ឧទ្ទាម​ក្រៅច្បាប់ អា​ហ្នឹង​ជា​ការ​ចាំបាច់​នៅ​ក្នុង​ការ​ពង្រឹង​លទ្ធិ​ប្រជាធិបតេយ្យ​ និង​នីតិរដ្ឋ​នៅ​កម្ពុជា»

ផ្ទុយ​ពី​ការ​អះអាង​នេះ អគ្គលេខាធិការ​សហព័ន្ធ​និស្សិត​បញ្ញវន្ត​កម្ពុជា លោក គៀន ពន្លក ពិនិត្យ​ឃើញ​ថា ការ​ចាប់​ចង​ពលរដ្ឋ​ដោយ​អយុត្តិធម៌ និង​ការ​ធ្វើ​ទុក​បុក​ម្នេញ​ឥត​ស្រាកស្រាន្ត​លើ​​អ្នក​មាន​ទស្សនៈ​នយោបាយ​ផ្ទុយ​នោះ មិនមែន​ជា​ការ​អនុវត្ត​ច្បាប់​ត្រឹម​ត្រូវ​ឡើយ។ លោក​បន្ត​ថា វិធានការ​ទាំងនេះ​ជា​ការ​ធ្វើ​ឱ្យ​ពលរដ្ឋ​មាន​កំហឹង​កាន់​តែ​ខ្លាំង​ និង​ក្រោក​ឡើង​ប្រឆាំង​នឹង​រដ្ឋាភិបាល។ លោក​ថា ត្រង់​នេះ​ហើយ​ដែល​បញ្ជាក់​ថា រដ្ឋាភិបាល​កំពុង​បំផ្លាញ​សន្តិភាព​ដោយ​ខ្លួន​ឯង៖ «ពេល​ដែល​មាន​ការ​ចាប់​សកម្ម​នយោបាយ សកម្មជន​សិទ្ធិមនុស្ស សកម្មជន​បរិស្ថាន ធ្វើ​ឱ្យ​ក្រុម​គ្រួសារ​របស់​សកម្មជន​ទាំងនោះ​ មាន​ការ​បែក​បាក់។ មិន​ត្រឹម​តែ​ប៉ុណ្ណឹង​ទេ បញ្ហា​ជាតិ​កំពុង​តែ​កើត​កាន់​តែ​ច្រើន​ទៅៗ អ៊ីចឹង​នៅ​ពេល​នោះ​ហើយ​ដែល​មា​ន​ការ​ក្រោក​ប្រឆាំង​ជាមួយ​នឹង​រដ្ឋាភិបាល»

ចំណែក ឧត្ដម​ស្នងការ​សិទ្ធិមនុស្ស​អង្គការ​សហប្រជាជាតិ​បាន​ចេញ​កំណត់​ត្រា​សង្ខេប​នៅ​ពេល​ថ្មីៗ នេះ​ថា ស្ថានភាព​នា​ពេល​បច្ចុប្បន្ន​នេះ បង្ហាញ​យ៉ាង​ច្បាស់​ថា រដ្ឋាភិបាល​លោក ហ៊ុន សែន មិន​អត់ឱន​ចំពោះ​គំនិត​ផ្ទុយ​ពី​ខ្លួន​ឡើយ។ ម្យ៉ាង​វិញ​ទៀត នេះ​ក៏​ស្ដែង​ឱ្យ​ឃើញ​ពី​ការ​គាប​សង្កត់​ទៅលើ​សិទ្ធិ​សេរីភាព​ក្នុង​ការ​បញ្ចេញ​មតិ​ ការ​ជួប​ជុំ​ដោយ​សន្តិវិធី និង​ការ​ចង​ក្រង​ជា​សមាគម​ផង​ដែរ។

ក្រុម​យុវជន​ថា ប្រសិន​បើ​របប​លោក ហ៊ុន សែន ចង់​បាន​សន្តិភាព​ពិត​ប្រាកដ​មែន នោះ​របប​នេះ​ត្រូវ​គោរព​សិទ្ធិមនុស្ស និង​ស្ដារ​ប្រជាធិបតេយ្យ​ឡើងវិញ ជាពិសេស​ត្រូវ​ពង្រឹង​ប្រព័ន្ធ​យុត្តិធម៌​ឱ្យ​មាន​​ឯករាជ្យ​ត្រឹម​ត្រូវ។ បើ​ពុំ​ដូច្នេះ​ទេ សន្តិភាព​ដែល​របប​នេះ​ទន្ទេញ​រត់មាត់​នោះ គ្រាន់តែ​ជា​សន្តិភាព​ក្លែង​ក្លាយ និង​ជា​លេស​ដើម្បី​បង្ក្រាប​ក្រុម​អ្នក​មាន​ទស្សនៈ​ផ្ទុយ​ប៉ុណ្ណោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល