តុលាការ​ខេត្ត​សៀមរាប​ឃុំ​ជនជាតិ​ចិន​២​នាក់​ពី​បទ​បើក​កន្លែង​ភ្នាល់​ល្បែង​តាម​អ៊ីនធឺណិត

ដោយ អាស៊ីសេរី
2019-11-24
អ៊ីម៉ែល
មតិ
Share
បោះពុម្ព
រូបភាព​ជនជាតិចិន ដែល​ត្រូវ​សមត្ថកិច្ច​បន្ទាយមានជ័យ ចាប់ខ្លួន​ពី​បទ​សង្ស័យ​បើកកន្លែង​លេង​ល្បែងអនឡាញ​ខុសច្បាប់។
រូបភាព​ជនជាតិចិន ដែល​ត្រូវ​សមត្ថកិច្ច​បន្ទាយមានជ័យ ចាប់ខ្លួន​ពី​បទ​សង្ស័យ​បើកកន្លែង​លេង​ល្បែងអនឡាញ​ខុសច្បាប់។
Photo Handout / CAMBODIA POLICE / AFP

សមត្ថកិច្ច​ឱ្យ​ដឹង​ថា ចៅក្រម​សាលាដំបូង​ខេត្ត​សៀមរាប បាន​បង្គាប់​ឱ្យ​ឃុំខ្លួន​ជនជាតិ​ចិន ២​នាក់​ភ្លាមៗ នៅ​រសៀល​ថ្ងៃ​ទី​២៤ វិច្ឆិកា ក្រោយ​ពេល​នគរបាល​អន្តោប្រវេសន៍ បាន​បញ្ជូន​ពួកគេ ទៅ​តុលាការ ពី​បទ​បើក​កន្លែង​ភ្នាល់​ល្បែង​តាម​ប្រព័ន្ធ​អ៊ីនធឺណិត​។

ស្នងការ​រង​នគរបាល​ខេត្ត​សៀមរាប ទទួល​បន្ទុក​ជន​អន្តោប្រវេសន៍ លោក ជា គឹមសាន ប្រាប់​អាស៊ីសេរី ថា ជនជាតិ​ចិន​ទាំង​២​នាក់ នោះ ត្រូវ​បាន​សមត្ថកិច្ច​ឆ្មក់​ចាប់​បាន ក្នុង​ប្រតិបត្តិ​ការ​បង្ក្រាប​ល្បែងភ្នាល់​តាម​អ៊ីនធឺណិត កាលពី​ថ្ងៃ​ទី​២៣ វិច្ឆិកា នៅ​ភូមិ​វិហារចិន សង្កាត់​ស្វាយដង្គុំ ក្រុង​សៀមរាប។ ចំណែក​អ្នក​ពាក់ព័ន្ធ​ផ្សេង​ទៀត ខ្លះ​គេចខ្លួន​ទៅ​ដល់​ប្រទេស​ចិន​វិញ​ហើយ។ តែ​យ៉ាងណា លោក​ថា ចៅក្រម​ស៊ើបសួរ បាន​ចេញ​ដីកា​ចោទ​ប្រកាន់​អ្នក​ពាក់ព័ន្ធ​ទាំងនោះ​រួច​ហើយ។

គេហទំព័រ​អគ្គស្នងការ​នគរបាល​ជាតិ ចុះផ្សាយ​ថា ជនសង្ស័យ​ទាំងពីរ​នាក់ បាន​ប្រាប់​សមត្ថកិច្ច​ថា ពួកគេ​មានមុខ​ងារ​ជា​ភ្នាក់ងារ​បើក​គណនេយ្យ​ឱ្យ​ភ្ញៀវ​ជនជាតិ​ចិន​រស់នៅ​កម្ពុជា ដែល​មាន​បំណង​លេងល្បែង​ស៊ីសង​តាម​ប្រព័ន្ធ​អ៊ីនធឺណិត។ ដោយឡែក កាលពី​ថ្ងៃ​ទី​២០ វិច្ឆិកា សមត្ថកិច្ច​ខេត្ត​បន្ទាយមានជ័យ បាន​ចាប់ខ្លួន​ជនបរទេស​ចំនួន ៦​សញ្ជាតិ សរុប​មាន​គ្នា ១៩៧​នាក់ ពី​បទ​ល្បែងស៊ីសង​តាម​ប្រព័ន្ធ​អ៊ីនធឺណិត​ខុសច្បាប់ នៅ​សង្កាត់​ប៉ោយប៉ែត​ហើយ​បាន​បញ្ជូន​ទៅ​នគរបាល​ជំនាញ​អន្តោប្រវេសន៍។

មក​ដល់​ពេល​នេះ មិន​ទាន់​មាន​តួលេខ​ផ្លូវការ​ពី​ការ​ចាប់ខ្លួន ឬ​បង្ក្រាប​ជនជាតិ​បរទេស ចំពោះ​ការ​លួច​បើក​ភ្នាល់​ល្បែងស៊ីសង​តាម​ប្រព័ន្ធ​អ៊ីនធឺណិត​ឡើយ​។ រដ្ឋាភិបាល​កម្ពុជា បាន​បញ្ជា​ឱ្យ​បិទ និង​បង្ក្រាប​ល្បែងស៊ីសង​តាម​អ៊ីនធឺណិត​ទាំងអស់ ចាប់ពី​ខែ​សីហា​មក ព្រោះ​សង្កេត​ឃើញ​ថា ក្រុម​ឧក្រិដ្ឋជន​បរទេស​មួយ​ចំនួន បាន​ប្រើប្រាស់​ល្បែង​នេះ ដើម្បី​បោកប្រាស់​ជំរិត​ទារ​ប្រាក់​ពី​ជនរងគ្រោះ​ទាំង​ក្នុង និង​ក្រៅ​ប្រទេស៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល