សមត្ថកិច្ចខេត្តព្រះសីហនុឃាត់ជនជាតិចិនចំនួន ២០នាក់ ហើយបានបញ្ជូនទៅតុលាការ ពីបទជនសង្ស័យបង្ខាំងមនុស្សខុសច្បាប់ ដើម្បីជំរិតទារប្រាក់។ សង្គមស៊ីវិលថា ឱ្យដឹងថា មានជនជាតិចិនមួយចំនួនបានចាញ់ល្បែង ប៉ុន្តែគ្មានលុយសង ទើបម្ចាស់កាស៊ីណូ បញ្ជាឱ្យជនជាតិចិនផ្សេងទៀតបង្ខាំងជនរងគ្រោះដើម្បីសងលុយ។
ស្នងការនគរបាលខេត្តព្រះសីហនុលោក ជួន ណារិន្ទ បានប្រាប់អាស៊ីសេរីនៅថ្ងៃព្រហស្បត៍ ទី២១ វិច្ឆិកា នេះថាជនសង្ស័យទាំងនេះ បានបង្ខាំងជនជាតិចិនដូចគ្នាចំនួន ២៧នាក់ ដើម្បីជំរិតទារលុយ។
លោក ជួន ណារិន្ទ បញ្ជាក់ថា ជនសង្ស័យចំនួន ១១នាក់ ដែលជាជនជាតិចិនក្នុងនោះមានស្រីម្នាក់ បានបង្ខាំងជនជាតិចិនដូចគ្នាចំនួន ១១នាក់ កាលពីថ្ងៃទី១៥ ខែវិច្ឆិកា នៅសង្កាត់លេខ៤ ក្រុងព្រះសីហនុ ហើយបានទារលុយពីជនរងគ្រោះចំនួន ប្រមាណជិត ២ម៉ឺនដុល្លារ សម្រាប់ជាថ្នូរនៃការដោះលែង។
លោកបានប្រាប់ថា ការចាប់ខ្លួននេះបានធ្វើឡើងបន្ទាប់ពីបានទទួលពាក្យបណ្តឹងពីសាច់ញាតិរបស់ជនរងគ្រោះ ហើយកម្លាំងសមត្ថកិច្ចរបស់លោកបើកការស្រាវជ្រាវ បន្ទាប់មកបានឈានទៅដល់ការបង្ក្រាបជនល្មើសទាំងអស់នេះ។
លោកបញ្ជាក់ថា ជនរងគ្រោះខ្ចីលុយជនសង្ស័យ ដើម្បីយកទៅលេងល្បែងនៅកាស៊ីណូ ប៉ុន្តែបានចាញ់អស់ ទើបជនសង្ស័យចាប់បង្ខាំងទុក ដើម្បីបង្ខំឱ្យគ្រួសារជនរងគ្រោះ យកលុយមកសងពួកគេវិញ។
លោក ជួន ណារិន ប្រាប់ឱ្យដឹងដែរថា នគរបាលខេត្ត ក៏បានឃាត់ខ្លួនជនជាតិចិនចំនួន៩នាក់ផ្សេងទៀត ដោយសារជនសង្ស័យបានឃាត់ជនជាតិចិន ១៦នាក់ ហើយបានជំរិតទារប្រាក់ នៅថ្ងៃទី១៧ ខែវិច្ឆិកា សង្កាត់លេខ៣ ក្រុងព្រះសីហនុ៖ «វាបង្ខាំង វាមិនមែនចាប់ជំរិតទេ វាបង្ខាំងដោយសារជំពាក់លុយអ៊ីចឹងទៅវារបៀបដោះស្រាយក្រៅប្រព័ន្ធតុលាការហ្នឹងណាស់»។
លោកបន្តថា សមត្ថកិច្ចបានបញ្ជូនជនល្មើសទាំងអស់នេះទៅតុលាការ ប៉ុន្តែលោកមិនទាន់ដឹងថាជនសង្ស័យទាំង២០នាក់ត្រូវបានចោទពីបទអ្វីនៅឡើយទេ។
អាស៊ីសេរីបានព្យាយាមទាក់ទងអ្នកនាំពាក្យតុលាការខេត្តលោក លឹម ប៊ុនហេង នៅថ្ងៃព្រហស្បតិ៍ នេះ ប៉ុន្តែទូរស័ព្ទចូលមិនមានអ្នកទទួល។
ក្នុងការឃាត់ខ្លួនជនជាតិចិនទាំងនោះ សមត្ថកិច្ចបានដកហូតកាំភ្លើងខ្លីម៉ាក K54 ចំនួន ២ដើម និងមានគ្រាប់មួយចំនួនផងដែរ។ សមត្ថកិច្ចក៏បានដកហូតខ្នោះដៃចំនួន ២៣គូ និងកូនសោរខ្នោះមួយចំនួន ព្រមទាំងដំបង ញញួរមួយចំនួនទៀត ដែលជនសង្ស័យប្រើប្រាស់សម្រាប់ធ្វើទារុណកម្មជនរងគ្រោះ។
អ្នកសម្របសម្រួលសមាគមអាដហុកប្រចាំខេត្តព្រះសីហនុ អ្នកស្រី ជៀប សុធារី មានប្រសាសន៍ថា អ្នកស្រីតែងតែសង្កេតឃើញមានការចាប់បង្ខាំងមនុស្សខុសច្បាប់ជាញឹកញាប់ប្រព្រឹត្តឡើងដោយជនជាតិចិន ចាប់តាំងពីមានកាស៊ីណូច្រើននៅខេត្ត៖ «យើងឃើញភាគច្រើនគឺគាត់លេងល្បែងហ្នឹងហ្មង ព្រោះចង់និយាយថា ពួកគាត់អត់មានជំពាក់លុយគ្នាគាត់ ដោយសារយកមករកស៊ី ដូចជាអត់ដែលលឺទេ ឃើញតែគាត់លេងល្បែងកាស៊ីណូ»។
អ្នកស្រីបន្តថា ជាទូទៅមានមនុស្សចូលលេងល្បែងនៅកាស៊ីណូច្រើន ហើយភាគច្រើន គឺជាជនជាតិចិន។ អ្នកស្រីថា អ្នកទេសចរដែលមកលេងខេត្តនេះមានការថយចុះច្រើន ដោយសារខ្លាចការចាប់ជំរិតនេះ ព្រោះអំពើចាប់ជំរិតតែងតែកើតមានឡើងជាញឹកញាប់ នៅពេលពួកគេចាញ់ល្បែង។
សព្វថ្ងៃជនជាតិចិនគ្រប់គ្រង កាស៊ីណូ ៤៨កន្លែង។ កន្លងមកអគ្គនាយកដ្ឋានអន្តោប្រវេសន៍ក្រសួងមហាផ្ទៃ បានបញ្ជូនជនល្មើសជាជនជាតិចិនចំនួន ៩០៦នាក់ ក្នុងនោះមានស្រី ១៧២នាក់ក្នុងរយៈពេល ៩ខែដើមឆ្នាំនេះ។
ជនជាតិចិនដែលបានបញ្ជូនត្រឡប់ទៅប្រទេសចិនវិញនោះ មួយចំនួនមានជាប់ពាក់ព័ន្ធបទល្មើសសេដ្ឋកិច្ចនៅប្រទេសចិន ហើយបានមកលាក់ខ្លួននៅប្រទេសកម្ពុជា និងមួយចំនួនទៀតជាប់ពាក់ព័ន្ធទៅនឹងបទល្មើសល្បែងភ្នាល់គ្នាតាមប្រព័ន្ធអ៊ីនធឺណិតខុសច្បាប់ និងមួយចំនួនទៀតពាក់ព័ន្ធនឹងបទដែលក្លែងបន្លំឆបោកតាមរយ:ទូរគមនាគមន៍នៅកម្ពុជា (VOIP)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។