ជនជាតិប៉ាគីស្ថាន ៣នាក់ ដែលដើររៃអង្គាសប្រាក់តាមទីសាធារណៈត្រូវបញ្ជូនចេញពីកម្ពុជា
2018.11.06
អាជ្ញាធររបបក្រុងភ្នំពេញបានបណ្ដេញជនជាតិប៉ាគីស្ថាន ចំនួន៣នាក់ ក្នុងនោះមានម្នាក់ជាស្ត្រី ឱ្យត្រឡប់ទៅកាន់ប្រទេសកំណើតវិញ បន្ទាប់ពីអាជ្ញាធរបានរកឃើញថាពួកគេស្នាក់នៅ និងធ្វើការដោយខុសច្បាប់នៅកម្ពុជា។
សារព័ត៌មានក្នុងស្រុកបានដកស្រង់សម្ដីរបស់ប្រធាននាយកដ្ឋានស៊ើបអង្កេត និងអនុវត្តនីតិវិធី នៃក្រសួងមហាផ្ទៃ លោក អ៊ុក ហៃសីឡា បានថ្លែងថា ជនជាតិប៉ាគីស្ថានទាំងបីនាក់នេះ បានធ្វើឱ្យខូចខាតសណ្ដាប់ធ្នាប់សាធារណៈ ប៉ះពាល់សេចក្ដីថ្លៃថ្នូរ ដោយសារពួកគេបានជិះរថយន្តដើរសុំរៃអង្គាសប្រាក់ តាមទីសាធារណៈ និងតាមបណ្ដាសហគមន៍ឥស្លាមផងដែរ។
គេហទំព័ររបស់អគ្គស្នងការនគរបាលជាតិបានចុះផ្សាយថា ជនជាតិប៉ាគីស្ថានទាំងបីនាក់ បានសារភាពថាពិតជាបានដើរសុំលុយពីក្រុមឥស្លាម នៅក្នុងវិហារឥស្លាមពិតមែន បន្ទាប់ពីពួកគេត្រូវបាននគរបាលអន្តោប្រវេសន៍ នៃស្នងការដ្ឋាននគរបាលជាតិ ឃាត់ខ្លួន និងសាកសួរកាលពីថ្ងៃទី៣ ខែវិច្ឆិកា ឆ្នាំ២០១៨។
ជនជាតិប៉ាគីស្ថានទាំងបីនាក់នេះ បានចូលមកកម្ពុជាកាលពីថ្ងៃទី១៤ ខែតុលា ឆ្នាំ២០១៨ ដោយប្រើប្រាស់ទិដ្ឋាការ ប្រភេទទេសចរ៕