ករណីជំងឺកូវីដ១៩ បានឆ្លងចូលដល់ក្នុងពន្ធនាគារហើយ។ រដ្ឋបាលខេត្តព្រះសីហនុ បានផ្សាយរបាយការណ៍លទ្ធផលការវិភាគវត្ថុសំណាក រកមេរោគកូវីដ១៩ នៅថ្ងៃទី៨ ខែឧសភា បង្ហាញថា មានអ្នកជាប់ឃុំចំនួន ៣៤ នាក់ ឆ្លងជំងឺនេះ ខណៈអ្នកឆ្លងថ្មី នៅទូទាំងខេត្តព្រះសីហនុ មានសរុបជាងមួយរយ (១២៦) នាក់។
សាច់ញាតិរបស់សកម្មជនដីធ្លី ដែលកំពុងជាប់ឃុំក្នុងពន្ធនាគារខេត្តព្រះសីហនុលោក កៅ ហួរ គឺលោកស្រី ឡុច ទូច ស្នើសុំអាជ្ញាធរ ផ្ដល់ព័ត៌មានលម្អិត ពីស្ថានភាពអ្នកឆ្លងក្នុងពន្ធនាគារ ព្រោះ លោកស្រី បារម្ភពីប្ដី ដែលជាប់ឃុំ ក្នុងស្ថានភាពចាស់ជរា និងមានជំងឺសរសៃប្រសាទ។ សាច់ញាតិរូបនេះ ទាមទារឲ្យ មន្ត្រីតុលាការ ដោះលែងប្ដីរបស់លោកស្រីវិញ ដើម្បីកាត់បន្ថយភាពចង្អៀតណែនក្នុងពន្ធនាគារខេត្ត។ ម្យ៉ាងលោកស្រី អះអាងថា ប្ដីរបស់លោកស្រី ជាប់ពន្ធនាគារ ដោយសារជម្លោះដីធ្លីទាំងអយុត្តិធម៌៖ « គាត់ជាប់៤ខែ ខែហ្នឹងហើយ ហើយមនុស្សគាត់វង្វេងបាត់ស្មារតីអ៊ីចឹង អត់សមយកគាត់ទៅដាក់គុកទេ ហើយគាត់មនុស្សឆ្កួតវិកលចរិតអ៊ីចឹងណាអូន។ វាអត់ ដែលមានតុលាការណា ស្រុកក្រៅឯណា ក៏គេមិនដែលយកមនុស្សឆ្កួតដាក់គុកដែរ។ ប៉ុន្តែនេះ រងការអយុត្តិធម៌ពេកហ្មង យកមនុស្សឆ្កួត យកមនុស្សឈឺជំងឺ ដែលចាំបាច់ ( ដាក់ពន្ធនាគារ ) ។ ពេលនៅផ្ទះ ខ្ញុំដាំបាយ ដាក់បបរ ខ្ញុំងូតទឹកឲ្យគាត់សឹងតែមិនរស់ផង ចុះទម្រាំយកគាត់ទៅដាក់អ៊ីចឹង។ នៅសល់តែឆ្អឹង។ នឹកឃើញប្ដីខ្ញុំ ខ្ញុំឈឺចាប់ណាស់។ ខ្ញុំតូចចិត្តណាស់ ជាពិសេសតុលាការ គ្មានយុត្តិធម៌ អាជ្ញាធរគ្មានដឹងលឺ»។
អាស៊ីសេរី មិនអាចសុំការបញ្ជាក់ពីខាងមន្ត្រីនាំពាក្យអគ្គនាយកដ្ឋានពន្ធនាគារលោក នុត សាវនា និងមន្ត្រីនាំពាក្យសាលាខេត្តព្រះសីហនុលោក ឃាង ភារម្យ បានទេ នៅថ្ងៃទី៩ ខែឧសភា ជុំវិញការឆ្លងជំងឺកូវីដ ចូលក្នុងពន្ធនាគារ ជាលើកដំបូងនេះ។
តែយ៉ាងណាលោក នុត សាវនា ប្រាប់សារព័ត៌មានក្នុងស្រុក (ភ្នំពេញប៉ុស្តិ៍)ថា បច្ចុប្បន្នខាងពន្ធនាគារ កំពុងរកមូលហេតុ។ លោកសន្និដ្ឋានថា បញ្ហាឆ្លងនេះ ប្រហែលបណ្ដាលមកពីអ្នកពាក់ព័ន្ធខ្លះ គាត់កើតជំងឺកូវីដ១៩ ប៉ុន្តែមិនមានចេញរោគសញ្ញា ទើបបណ្ដាលឲ្យមានការឆ្លងបែបនេះ។
លោកអះអាងថា កន្លងមក អាជ្ញាធរតែងតែអនុវត្តវិធានការចត្ដាឡីស័ក ១៤ ថ្ងៃ ជាមុនសិន មុននឹងបញ្ជូនមនុស្សចូលពន្ធនាគារ។ បន្ថែមពីនេះ លោកបន្តថា គោលការណ៍ថ្មី ខាងពន្ធនាគារ បានស្នើទៅខាងអគ្គស្នងការដ្ឋាននគរបាលជាតិ ឲ្យធ្វើតេស្តរកមេរោគនៃជំងឺកូវីដ១៩ ចំពោះជនសង្ស័យ ដែលត្រូវបញ្ជូនទៅតុលាការ ឱ្យរួចរាល់សិន ទើបសម្រេចបញ្ជូន ទៅខាងពន្ធនាគារ។
ចំណែក មន្ត្រីពន្ធនាគារខេត្តព្រះសីហនុម្នាក់ សុំលាក់ឈ្មោះ ប្រាប់អាស៊ីសេរីថា អ្នកជាប់ឃុំទាំង ៣៤ នាក់ មានអាការៈក្ដៅខ្លួន និងត្រូវបានបញ្ជូនទៅមន្ទីរពេទ្យ។ មន្ត្រីដដែលឲ្យដឹងថា ខាងគ្រូពេទ្យ គ្រាន់តែបញ្ជាក់ថា ស្ថិតក្នុងករណីសង្ស័យនៅឡើយ។ មន្ត្រីបន្តថា ជាវិធានការដំបូង គឺអាជ្ញាធរពន្ធនាគារបានរៀបចំអ្នកជាប់ឃុំទាំង ៣៤ នាក់ ឲ្យនៅដាច់ដោយឡែកពីអ្នកជាប់ឃុំផ្សេងទៀត។
ទោះជាយ៉ាងណា សង្គមស៊ីវិល ស្នើសុំឲ្យអាជ្ញាធរមានសមត្ថកិច្ច គិតគូរពីដំណោះស្រាយ ដោះលែងអ្នកជាប់ឃុំ ដែលមានទោសស្រាលៗ អ្នកមានជំងឺធ្ងន់ធ្ងរប្រចាំកាយ ជាដើម ឲ្យស្ថិតក្រោមការត្រួតពិនិត្យ ឬ នៅក្រៅឃុំបណ្ដោះអាសន្ន ដើម្បីកាត់បន្ថយភាពចង្អៀតណែន ដែលនាំឲ្យមានហានិភ័យខ្ពស់ ក្នុងពន្ធនាគារ។
អ្នកសម្របសម្រួលសមាគមអាដហុក ប្រចាំខេត្តព្រះសីហនុអ្នកស្រី ជាប សុធារី មានប្រសាសន៍ថា ខាងពន្ធនាគារខេត្ត បានផ្អាកឲ្យអ្នកក្រៅចូលជួបសួរសុខទុក្ខ និងឃ្លាំមើលស្ថានភាពក្នុងពន្ធនាគារ យូរណាស់ហើយ ដោយសារបារម្ភពីការចម្លងជំងឺនេះ។
អ្នកស្រីបារម្ភថា ការចម្លងជំងឺនេះ ក្នុងចំណោមអ្នកជាប់ឃុំ នឹងវិវត្តន៍លឿន ព្រោះស្ថានភាពអ្នកជាប់ពន្ធនាគារក្នុងពន្ធនាគារខេត្តព្រះសីហនុ មានសភាពចង្អៀតណែន ដូចពន្ធនាគារផ្សេងទៀតដែរ។ អ្នកស្រី ជឿជាក់ស្ថានភាពចង្អៀតណែននេះ មិនអាចធ្វើឲ្យ អ្នកជាប់ឃុំ តាមបន្ទប់នីមួយៗ មានលទ្ធភាពរក្សាគម្លាតសុវត្ថិភាពបានទេ។
អ្នកឃ្លាំមើលសិទ្ធិមនុស្សរូបនេះ ជំរុញឲ្យអាជ្ញាធរមានសមត្ថកិច្ចរកយន្តការនានា ដោះស្រាយបញ្ហានេះ និង គួរតែដោះលែងអ្នកជាប់ឃុំ ដែលមានទោសស្រាលៗ មានជំងឺប្រចាំកាយ ហើយមានមុខរបរ និងទីលំនៅច្បាស់លាស់ ដើម្បីកាត់បន្ថយភាពចង្អៀតណែន៖ «យើងអាចប្រើការសម្រេចចិត្តតាមនីតិវិធីច្បាប់ ព្រោះច្បាប់ក៏អនុញ្ញាតដែរ នៅក្នុងនីតិវិធីព្រហ្មទណ្ឌណា។ ក្នុងបទល្មើសខ្លះ គឺចៅក្រម ឬក៏ព្រះរាជអាជ្ញាហ្នឹង មានសិទ្ធិសម្រេចឲ្យគាត់ហ្នឹង ស្ថិតក្រោមការត្រួតពិនិត្យរបស់តុលាការ ហើយមានក្រុមគ្រួសារអ្វីហ្នឹង ជាអ្នកធានា ឬក៏មានមេធាវីអ៊ីចឹងទៅ ក៏គួរតែអនុគ្រោះដែរ។ អ្នកខ្លះទៀត ដូចថា គាត់មានជំងឺ មានអ្វី ស្រាប់ នៅក្នុងពន្ធនាគារ។ អាហ្នឹង ក៏គួរតែអនុគ្រោះឲ្យគាត់បាននៅក្រៅដែរ។ ចង់និយាយថា គាត់ចាស់ជរា គាត់មានជំងឺ មានអ្វីហ្នឹងណា»។
ខេត្តព្រះសីហនុ ជាខេត្តមួយ ដែលមានករណីឆ្លងជំងឺកូវីដ-១៩ធ្ងន់ធ្ងរ ហើយមួយរយៈចុងក្រោយនេះ អាជ្ញាធរខេត្តព្រះសីហនុ បានចាប់ខ្លួនពលរដ្ឋ រួមទាំងជនជាតិចិន ជាបន្តបន្ទាប់ ដោយចោទថា អ្នកទាំងនោះ ល្មើសនឹងបំរាមទប់ស្កាត់ជំងឺកូវីដរបស់អាជ្ញាធរ។
កាលពីថ្ងៃចុងខែ (២៧) ឧសភា ឆ្នាំ២០២០ រដ្ឋមន្ត្រីក្រសួងមហាផ្ទៃលោក ស ខេង លើកឡើងថា ដើម្បីគាំទ្រដល់យុទ្ធនាការដោះស្រាយសំណុំរឿងកកស្ទះ តាមសាលាជម្រះក្ដី អាជ្ញាធរមានសមត្ថកិច្ច នឹងដោះលែងអ្នកជាប់ឃុំ ខ្ទង់មួយម៉ឺន (១០.០០០) នាក់ នៅទូទាំងប្រទេស ដើម្បីបន្ធូរបន្ថយហានិភ័យការឆ្លងរាលដាលជំងឺកូវីដ១៩ និងបញ្ហាសិទ្ធិមនុស្សក្នុងពន្ធនាគារ។
ប៉ុន្តែរយៈពេលមួយឆ្នាំមកហើយ រដ្ឋាភិបាល មិនបានគោរពសន្យា ក្នុងការដោះលែងអ្នកជាប់ឃុំ មានទោសស្រាលៗ ដើម្បីបន្ថយភាពចង្អៀតណែនទេ។ អង្គការសិទ្ធិមនុស្សជាតិ (លីកាដូ) និងអន្តរជាតិ (Amnesty International) ធ្លាប់ចេញសេចក្ដីការណ៍រួមគ្នាមួយ ទាមទារឲ្យរដ្ឋាភិបាលគោរពកិច្ចសន្យានេះ តែរដ្ឋាភិបាល បដិសេធការលើកឡើងនេះ និងអះអាងថា មិនដែលបានសន្យាបែបនេះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។