មនុស្ស ៤នាក់ស្លាប់ និង ៥នាក់ទៀតរបួសធ្ងន់ ពេលប្រជ្រៀតគ្នាយកអាំងប៉ាវនៅភូមិគ្រឹះលោក សុខ គង់
2025.01.23

មនុស្សចំនួន ៤នាក់បានស្លាប់ និង ៥នាក់ទៀត ពេទ្យកំពុងសង្គ្រោះនៅមន្ទីរពេទ្យ ដោយសាររបួសធ្ងន់ ក្នុងហេតុការណ៍ប្រជ្រៀតគ្នាពេលទៅទទួលអំណោយអាំងប៉ាវនាឱកាសបុណ្យចូលឆ្នាំចិន និងវៀតណាម។ ហេតុការណ៍នេះកើតឡើង នៅខាងមុខភូមិគ្រឹះអ្នកឧកញ៉ា សុខ គង់ ស្ថិតនៅតាមបណ្ដោយផ្លូវនរោត្ដម រាជធានីភ្នំពេញ នៅថ្ងៃទី២៣ ខែមករា។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សំ វិច្ឆិកា បញ្ជាក់ប្រាប់វិទ្យុអាស៊ីសេរីថា ជនរងគ្រោះចំនួន ៤នាក់បានស្លាប់នោះ គឺដោយសារតែពួកគាត់មានសុខភាពខ្សោយ និងរងការប្រជ្រៀតពីមនុស្សច្រើនកុះករ នៅខាងមុខផ្ទះលោក សុខ គង់។ លោកបញ្ជាក់ថា សមត្ថកិច្ចមិនមានចំណាត់ការស្វែងរកអ្នកទទួលខុសត្រូវ ចំពោះការបាត់បង់ជីវិតមនុស្សចំនួន ៤នាក់នោះទេ ព្រោះលោកថា ជនរងគ្រោះបានស្លាប់ដោយសារបញ្ហាសុខភាព។
ចំណែកនាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត សោកស្ដាយ ចំពោះការបាត់បង់ជីវិតពលរដ្ឋចំនួន ៤នាក់ ក្នុងព្រឹត្តិការណ៍ប្រជ្រៀតគ្នា ដើម្បីទទួលអំណោយពីអ្នកមានលុយមានអំណាច។ លោកចង់ឃើញសមត្ថកិច្ចស្វែងរកអ្នកទទួលខុសត្រូវ ចំពោះការបាត់បង់ជីវិតពលរដ្ឋ ៤នាក់ និងមនុស្សមួយចំនួនទៀត ដែលគ្រូពេទ្យកំពុងសង្គ្រោះបន្ទាន់ក្នុងមន្ទីរពេទ្យ។

សាច់ញាតិជនរងគ្រោះ ដែលស្លាប់បានស្រែកទ្រហោយំស្ដាយស្រណោះ ចំពោះការបាត់បង់ជន្ទល់គ្រួសារ និងសមាជិករបស់ខ្លួន និងបញ្ជាក់ថា ការណ៍ដែលពួកគាត់នាំគ្នាទៅទទួលអំណោយពីអ្នកមានលុយមានអំណាចនេះ គឺដោយសារតែមានជីវភាពក្រីក្រ៕
សូមលោកអ្នកនាងទស្សនាសេចក្តីរាយការណ៍ពិស្តារជុំវិញរឿងនេះ៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។