ប្រធានចលនាសង្រ្គោះជាតិនៅប្រទេសជប៉ុន លោក ហៃ វណ្ណា បានប្រាប់អាស៊ីសេរី នៅថ្ងៃទី៦ វិច្ឆិកាថា លោកបានរៃអង្គាសថវិកាពីពលរដ្ឋខ្មែរ ដែលនិយមប្រជាធិបតេយ្យ ពីគ្រប់ទិសទីបានជិតគ្រប់ចំនួនហើយ ដើម្បីកសាងសំណុំរឿងប្តឹងលោក ហេង សួរ មន្រ្តីនាំពាក្យក្រសួងការងារ ដែលសង្ស័យថា បានគំរាមសម្លាប់អ្នកតវ៉ា។ លោក ហៃ វណ្ណា បញ្ជាក់ថា តាមគម្រោង លោកត្រូវការថវិកា ១.៥០០ ដុល្លារ ដើម្បីជួលមេធាវី។ មកដល់ពេលនេះ មានអ្នកបរិច្ចាគម្នាក់ ៥០ដុល្លារ បានចំនួន ២៧នាក់ហើយ ដោយ ២៤នាក់ជាអ្នកបរិច្ចាគនៅប្រទេសជប៉ុន និង ៣នាក់ទៀតជាខ្មែរនៅសហរដ្ឋអាមេរិក។ ដូច្នេះ នៅខ្វះតែបីនាក់ទៀតប៉ុណ្ណោះ នឹងបង្គ្រប់ចំនួនទឹកប្រាក់ដំបូង សម្រាប់ចាប់ផ្តើមជួលមេធាវីនោះបានហើយ។
លោក ហៃ វណ្ណា បង្ហាញសុទិ្ទដ្ឋិនិយមថា នឹងមានចំណាត់ការផ្លូវច្បាប់ ពីសមត្ថកិច្ចជប៉ុន នៅក្នុងរឿងនេះ៖ «ទីមួយយើងមានភ័ស្តុតាងសាក្សីរស់។ បើយើងមានសាក្សីរស់ហើយ ប្រហែលយើងមិនចាំបាច់ធ្វើកោសលវិច័យ ( សំឡេង ) នោះទៀតទេ។ យើងនឹងពិគ្រោះជាមួយមេធាវីម្តងទៀត ដើម្បីសម្រេច ពីព្រោះបើយើងធ្វើកោសល្យវិច័យផង និងមានសាក្សីរស់ផង និងមានភ័ស្តុតាងរឹងខ្លាំង នោះអាចនឹងមានវិធានការច្បាប់ពីប្រទេសជប៉ុន »។
លោក ហៃ វណ្ណា កាលពីចុងសប្តាហ៍កន្លងទៅនេះ ក៏បានសរសេរលិខិតចំហរមួយច្បាប់ ជូនអ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា គឺអ្នកស្រី រ៉ូណា ស្មីត សុំឲ្យអ្នកស្រី ជួយឲ្យមានការស៊ើបអង្កេតពីសារបែកធ្លាយនោះដែរ។
វិទ្យុអាស៊ីសេរីទើបនឹងទទួលបានព័ត៌មានថ្មីទាក់ទងនឹងសារបែកធ្លាយនាពេលថ្មីៗ នេះ ដែលគេជឿថា ជាសំឡេងរបស់លោក ហេង សួរ អ្នកនាំពាក្យនៃក្រសួងការងារ និងបណ្ដុះបណ្ដាលវិជ្ជាជីវៈ និងជាមនុស្សជំនិតរបស់លោក ហ៊ុន ម៉ាណែត។
នេះអាចជាភស្តុតាងថ្មីបន្ថែម ដែលអាចបញ្ជាក់ថា វាជាសំឡេងពិតរបស់លោក ហេង សួរ។ តាមរយៈខ្សែអាត់ ដែលមានរយៈពេលជាងមួយនាទីនោះ គេអាចឮសំឡេងរបស់លោក ហេង សួរ បញ្ជាឲ្យបក្ខពួករបស់ខ្លួនវាយធ្វើបាបអ្នកដែលហ៊ានងើបតតាំងនឹងលោក ហ៊ុន សែន តាមរយៈការជួលក្រុមជើងកាងឲ្យវាយធ្វើបាបអ្នកប្រឆាំងទាំងនោះនៅក្រៅប្រទេស ឬរៀបចំសម្លាប់ក្រោមលេសគ្រោះថ្នាក់ចរាចរ ប្រសិនបើជននោះហ៊ានចូលមកស្រុកវិញ <<ការណ៍ដែលវាយករូប មកជាន់បែបនេះ គឺជាការប្រមាថ។ អ៊ីចឹង យើងមិនអាចលើកលែងទោស ឲ្យអាពួកដែលវាហ៊ានប្រមាថមេដឹកនាំយើងទេ។ ពិនិត្យមើល! មិនដឹងថា យើងនៅហ្នឹង មានស្គាល់បណ្ដាញខាងណា! ត្រូវចាប់ផ្ដើមធ្វើដូចនៅកូរ៉េ អ៊ីចឹង គឺរកពួកជើងកាងមួយចំនួន ..មើលមុខសញ្ញាណាដែលចាំបាច់ យកជើងកាងទៅវ៉ៃវាទៅ ហើយជើងកាងត្រឡប់មកវិញយើងចិញ្ចឹម។ ធ្វើម៉េចឲ្យអាមួយហ្នឹងវាប្រកាច់ប្រកិននៅនោះចុះ។ ពួកអាជើងកាងគេមិនដែលចាប់ដាក់គុកនៅស្រុកគេទេ គេចាប់តែបន្តិចគេប្រលែងមកអោយជាប់គុកស្រុកយើងហើយចាំពេលមកដល់ស្រុកយើងចាំយើងចិញ្ចឹម។ រឿងនេះមិនអាចលេងសើចបានទេ ច្រើនដង ហើយ ..លើកមុនយើងមិននេះទេ ប៉ុន្តែលើកនេះ ទៅគឺនៅចំពោះមុខ ហើយគេហ៊ានជាន់បែបនេះ គឺយើងមិនអាចលើកលែងអោយវាបានទេ។ ហើយបងស្រេង ថ្ងៃមុនថា អោយមុខសញ្ញាអ្នកដែល ជាសកម្មជនពួកវាមកហ្នឹងណា ..ឥឡូវនេះ គឺយើងត្រូវធ្វើកិច្ចការនេះបន្តិច។ អានេះមកអោយវា គ្រោះថ្នាក់ចរាចរណ៍នៅស្រុកខ្មែរនឹងទៅ>>។
ប្រភពដែលសុំមិនបញ្ចេញឈ្មោះ ព្រោះខ្លាចការធ្វើបាបពីសំណាក់ក្រុមលោក ហេង សួរ បានអះអាងបញ្ជាក់ប្រាប់អាស៊ីសេរីថា ខ្សែអាត់សំឡេងនោះ គឺពិតជាបញ្ជារបស់លោក ហេង សួរ ឆ្លើយឆ្លងគ្នាតាម Chat Group ផ្ទៃក្នុងរបស់ក្រុមដៃឆៅរបស់គណបក្សប្រជាជនកម្ពុជា ក្នុងការរៀបចំផែនការបង្រ្កាបអ្នកទាំងឡាយណា ដែលហ៊ានប្រឆាំងនឹងរបបក្រុងភ្នំពេញ និងលោក ហ៊ុន សែន។
មជ្ឈដ្ឋានទូទៅ នៅតែទាមទារឲ្យអាជ្ញាធររបបលោក ហ៊ុន សែន ស៊ើបអង្កេតករណីសារគំរាមសម្លាប់ ដែលសង្ស័យថា ជាសំឡេងរបស់លោក ហេង សួរ។ ពួកគាត់ចាត់ទុកការមិនព្រមបើកការស៊ើបអង្កេត គឺជាការបង្ហាញថា រឿងនេះជារឿងពិត ហើយវប្បធម៌និទ្ទណ្ឌភាព កាន់តែរីករាលដាលខ្លាំងនៅកម្ពុជា៕
សេចក្តីបញ្ជាក់បន្ថែម៖ លោក ហៃ វណ្ណា បានប្រាប់អាស៊ីសេរី នៅថ្ងៃទី ០៧ ខែ វិច្ឆិកានេះ ថាថវិកាល្មមចាប់ផ្តើម ដើម្បីជួលមេធាវីនោះ តាមពិតគឺចំនួន ៣,០០០ ដុល្លារ។ ចំណែកឯថវិកា ដែលពលរដ្ឋខ្មែរទាំងនៅជប៉ុន អាមេរិក និង កាណាដា បានយល់ព្រមបរិច្ចាគ ដើម្បីបុព្វហេតុនេះ សរុបបាន ២៧ នាក់ហើយ ដោយម្នាក់ៗស្ម័គ្រចិត្តបរិច្ចាគ ១០,០០០ យ៉េន ឬ ១០០ ដុល្លារ។ ជារួម នៅខ្វះតែអ្នកស្ម័គ្រចិត្តបរិច្ចាគបីនាក់ទៀតប៉ុណ្ណោះ នឹងគ្រប់ចំនួនទឹកប្រាក់នេះហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។