រដ្ឋមន្ត្រីការពារជាតិរបស់កម្ពុជានិងថៃជួបគ្នាជជែកពីបញ្ហាប្រឈមនៅតាមព្រំដែន
2019.02.14
គណៈកម្មាធិការព្រំដែនទូទៅកម្ពុជា-ថៃ ជួបប្រជុំដើម្បីលើកកម្ពស់កិច្ចសហប្រតិបត្តិការ បង្កើតទំនាក់ទំនងល្អរវាងកងទ័ពប្រទេសទាំងពីរកម្ពុជា-ថៃ និងស្វែងរកដំណោះស្រាយបន្ថែមទៀត ចំពោះបញ្ហាដែលកើតមាននៅតាមព្រំដែននៃប្រទេសទាំងពីរ។ ចំណែកមន្ត្រីសង្គមស៊ីវិលចង់ឱ្យមានការទប់ស្កាត់ឧក្រិដ្ឋកម្មនៅ តាមបណ្ដោយព្រំដែនទាំងពីរឱ្យកាន់តែសកម្មបន្ថែមទៀត ដើម្បីផ្ដល់សុវត្ថិភាពជូនពលរដ្ឋរស់នៅតាមបណ្ដោយព្រំដែន។
គណៈកម្មាធិការព្រំដែនទូទៅកម្ពុជា-ថៃតែងជួបជជែកគ្នា មួយឆ្នាំម្តង ហើយឆ្នាំនេះកម្ពុជាជាម្ចាស់ផ្ទះ និងជាសហប្រធាននៃកិច្ចប្រជុំ។ កិច្ចប្រជុំដែលមានរយៈពេលពីរថ្ងៃ ពីថ្ងៃទី១៣ ដល់ ថ្ងៃទី១៤ ខែកុម្ភៈ ភាគីក្រសួងការពារជាតិកម្ពុជាដឹកនាំដោយរដ្ឋមន្ត្រីក្រសួងការពារជាតិ លោក ទៀ បាញ់ ចំណែកភាគីថៃដឹកនាំដោយរដ្ឋមន្ត្រីក្រសួងការពារជាតិថៃ លោក ប្រាវីត វង្សសូវណ្ណ (Prawit Wongsuwon)។
អ្នកនាំពាក្យរបបក្រុងភ្នំពេញ លោក ផៃ ស៊ីផាន ឱ្យអាស៊ីសេរីដឹងថា ជំនួបនេះគឺផ្ដោតសំខាន់ទៅលើសន្តិសុខ សុវត្ថិភាព ភេរវកម្ម និងឧក្រិដ្ឋកម្មនៅតាមបណ្ដោយព្រំដែននៃប្រទេសទាំងពីរ។ លោកអះអាងថា ចាប់តាំងពីបង្កើតគណៈកម្មាធិការព្រំដែនទូទៅ កម្ពុជា-ថៃរួចមកការពង្រឹងសន្តិសុខជូនពលរដ្ឋនៅព្រំដែនទទួលប្រសិទ្ធភាពខ្ពស់ជាងមុន៖ «យើងឃើញប្រសិទ្ធភាពការងារលេចចេញជាច្រើនដើម្បីរក្សា សន្តិសុខសណ្ដាប់ធ្នាប់ សុវត្ថិភាពតាមបណ្ដោយព្រំដែនរវាងប្រជាជន និងប្រជាជន ហើយកិច្ចសម្រួលជាច្រើនដែលគណៈកម្មាធិការនេះជួយសម្រួលដែរដែលទំនាក់ទំនងកិច្ចការព្រំដែនសំខាន់ណាស់»។
លោក ផៃ ស៊ីផាន បញ្ជាក់ថា បញ្ហាពាណិជ្ជកម្ម បញ្ហាព្រំដែន ការរត់ពន្ធទំនិញខូចគុណភាព គ្រឿងញៀន និងបទល្មើសនេសាទមិនមែនជាកិច្ចការដែលគណៈកម្មាធិការព្រំដែនទូទៅ កម្ពុជា-ថៃទទួលបន្ទុកនោះទេ។ ប៉ុន្តែលោកថា ក្នុងករណីមានបទល្មើសជាក់ស្ដែងនៅតាមបណ្តោយព្រំដែន គណៈកម្មាធិការអាចបង្ក្រាបបានរួចទើបប្រគល់ទៅមន្ត្រីជំនាញ។
លោក ផៃ ស៊ីផាន ក៏មិនទាន់ដឹងពីខ្លឹមសារស៊ីជម្រៅនៃកិច្ចប្រជុំដែលកំពុងធ្វើនៅក្នុងពេលនេះនៅឡើយទេ។ អាស៊ីសេរីមិនទាន់អាចសុំការអត្ថាធិប្បាយបន្ថែមពីអ្នកនាំពាក្យក្រសួងការពារ លោក ឈុំ សុជាតិ បានទេនៅថ្ងៃទី១៣ ខែកុម្ភៈ។
សេចក្ដីប្រកាសព័ត៌មានក្រសួងការពារជាតិកម្ពុជា ចុះថ្ងៃទី១១ កុម្ភៈ ឱ្យដឹងថា ប្រទេសទាំងពីរនឹងរួមគ្នាដោះស្រាយបញ្ហាប្រឈមនានាដែលកើតឡើងនៅតាមព្រំដែនដើម្បីធានាបាននូវសេចក្ដីសុខ និងជីវភាពរស់នៅរីកចម្រើនរបស់ពលរដ្ឋនៃប្រទេសទាំងពីរ។ ភាគីទាំងពីរនឹងបន្តកិច្ចពិភាក្សាដោយផ្ដោតសំខាន់លើការពង្រឹងនិងលើកកម្ពស់កិច្ចសហប្រតិបត្តិការបង្កើតទំនាក់ ទំនងល្អរវាងកងទ័ពប្រទេសទាំងពីរកម្ពុជា-ថៃ។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ សង្កេតឃើញថា សន្តិសុខតាមព្រំដែនកម្ពុជា-ថៃ ហាក់ស្ងប់ស្ងាត់។ ប៉ុន្តែមន្ត្រីសង្គមស៊ីវិលរូបនេះ ទាមទារឱ្យភាគីទាំងពីរទប់ស្កាត់ឧក្រិដ្ឋកម្ម និងបង្ការភេរវកម្មឆ្លងដែន ឱ្យកាន់តែមានប្រសិទ្ធិ ភាពតាមរយៈពង្រឹងកិច្ចសហការ និងមានផែនការរួមច្បាស់លាស់៖ «រឿងភេរវកម្មហ្នឹងជាបញ្ហារបស់សកលលោកហើយកម្ពុជានិងថៃជាប្រទេសដែលស្ថិតក្នុងការហានិភ័យភេរវកម្មទាបអ៊ីចឹង បើយើងបង្ការទុកមុនគឺជារឿងមួយល្អ»។
គណៈកម្មាធិការព្រំដែនទូទៅកម្ពុជា-ថៃ ដែលហៅកាត់ជាភាសាអង់គ្លេសថា ជី.ប៊ី.ស៊ី (GBC)បានបង្កើតឡើងក្រោមកិច្ចព្រមព្រៀងមួយ រវាងរបបក្រុងភ្នំពេញ-និងភាគីថៃ កាលពីកាលឆ្នាំ២០០៦៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។