កម្មកររោងចក្រដេរស្បែកជើង ចាកាស៊ូ (JACKA SHOES) ថា ថៅកែរោងចក្របានបន្តបញ្ឈប់កម្មករជារៀងរាល់ថ្ងៃ ដោយគ្មានមូលហេតុ និងទូទាត់ប្រាក់សំណងមិនត្រឹមត្រូវ ឬតិចតួចឱ្យកម្មករប៉ុណ្ណោះ។ មន្ត្រីសហជីពថា ទង្វើបែបនេះរបស់ភាគីថៅកែរោងចក្រជាការរំលោភច្បាប់ការងារ និងស្នើទៅក្រសួងការងារ និងស្ថាប័នពាក់ព័ន្ធជួយអន្តរាគមន៍។
កម្មកររោងចក្រដេរស្បែកជើង ចាកាស៊ូ (Jacka Shoes) ដែលត្រូវថៅកែបញ្ឈប់លើកឡើងថា ពួកគេធ្វើការងារនៅរោងចក្រមានរយៈពេលពីបីឆ្នាំទៅប្រាំឆ្នាំ ប៉ុន្តែពេលថៅកែបញ្ឈប់ការងារពួកគេ ខាងរដ្ឋបាលបានផ្តល់ប្រាក់ឱ្យ ពី ២០០ ទៅ ៣០០ដុល្លារប៉ុណ្ណោះ។
កម្មករម្នាក់ លោកស្រី ឃុំ សុខា ប្រាប់ថា រដ្ឋបាលរោងចក្របានផ្ដល់ជម្រើសពីរឱ្យកម្មករ គឺព្យួរការងារដោយមិនផ្ដល់ប្រាក់ឧបត្ថម្ភ ហើយបើកម្មករមិនព្រមព្យួរការងារ គឺរោងចក្របញ្ឈប់កម្មករដោយផ្តល់ប្រាក់ឈ្នួលដែលគិតចំនួនថ្ងៃ ដែលពួកគេបានធ្វើ និងប្រាក់អតីតភាពតិចតួច។ លោកស្រីបន្តថា ទោះមានការប្រឆាំងនឹងសម្រេចនេះក៏ដោយ ក៏ភាគីថៅកែមិនស្ដាប់ការទាមទាររបស់កម្មករនោះទេ និងបានបញ្ឈប់កម្មករជារៀងរាល់ថ្ងៃ៖ «ស្នើសុំឱ្យខាងរោងចក្រកុំពេលក្នុងសង្គមចលាចលគាត់មកបញ្ឈប់កម្មករមានយល់ចិត្តពួកថាត្រូវការលុយត្រូវការកាកបើគាត់បញ្ឈប់អ៊ីចឹងម៉េចកើត»។
កម្មករម្នាក់ទៀតកញ្ញា ជុំ មុំ ប្រាប់ថា ថៅកែរោងចក្របានហាមមិនឱ្យកម្មករអាចបង្កើតសហជីពនៅក្នុងរោងចក្រនេះទេ ហើយបើគេដឹងថា មានអ្នកណាចង់ធ្វើតំណាងកម្មករ ថៅកែនឹងបញ្ឈប់កម្មករនោះមុនគេ។ កញ្ញាបន្តថា ផ្នែករដ្ឋបាលគិតលុយឱ្យកម្មករមិនគ្រប់ចំនួននោះឡើយ និងបង្ខំកម្មករឱ្យផ្ដិតមេដៃលើពាក្យលាឈប់។ កញ្ញាថា ពេលនេះយ៉ាងហោចណាស់មានកម្មករប្រមាណ ២០០នាក់ត្រូវថៅកែបញ្ឈប់៖ «គាត់ ( រោងចក្រ ) មានការបញ្ឈប់រាល់ថ្ងៃ ពេលហៅបញ្ឈប់កម្មករហើយប្រហែលបើកលុយមិនគ្រប់កម្មករធ្វើការប្រាំឆ្នាំ ប្រាំមួយឆ្នាំបើកលុយបានពីរ ជាងបីរយជាងដុល្លារ ហើយអ្នកខ្លះបានតែមួយដុល្លារជាងអីហ្នឹង ខាងរដ្ឋបាលចេះតែគិតលុយនិយាយអ៊ីចេះ និយាយអ៊ីចុះដាក់គាត់ឱ្យគាត់ផ្ដិតមេដៃ»។
ទាក់ទងបញ្ហានេះ អាស៊ីសេរីបានព្យាយាមសុំការបំភ្លឺពីបុគ្គលិកផ្នែករដ្ឋបាលនៃរោងចក្រចាកាស៊ូ នៅថ្ងៃទី២៣ ខែមេសា ប៉ុន្តែ ទូរស័ព្ទចូលជាច្រើនដងគ្មានអ្នកទទួល។ ចំណែកអ្នកនាំពាក្យក្រសួងការងារលោក ហេង សួរ ក៏មិនអាចសុំការអត្ថាធិប្បាយបានដែរ ដោយលោកមិនទទួលទូរស័ព្ទ។
ប្រធានសហភាពសហជីពកម្ពុជា លោក រ៉ុង ឈុន ថ្លែងថា បើមានករណីដូចកម្មករលើកឡើង នេះគឺជាការរំលោភច្បាប់ការងារ។ លោកថា តាមច្បាប់នៅពេលថៅកែបញ្ឈប់កម្មករដោយមិនបានជូនដំណឹងជាមុន គឺត្រូវផ្ដល់ប្រាក់អត្ថប្រយោជន៍ទៅតាមអតីតភាពរបស់កម្មករ មិនមែន ផ្ដល់ឱ្យតែ២០០ទៅ៣០០ដុល្លារនោះទេ៖ «តាមការពិតការបញ្ឈប់កម្មករមិនជូនដំណឹងមិនទៅតាមនីតិវិធីផ្លូវច្បាប់ត្រូវគិតដល់បងប្អូនកម្មករប្រាំចំណុចមានប្រាក់ជំងឺចិត្ត ប្រាក់ខែចុងក្រោយអីណឹង ហើយពេលបញ្ឈប់ឱ្យពួកគាត់តែ ៣០០ដុល្លារ ជារឿងមួយសមរម្យសម្រាប់បងប្អូនកម្មករ»។
លោក រ៉ុង ឈុន បន្តថា ដើម្បីរកដំណោះស្រាយរឿងនេះ កម្មករគួរស្វែងរកអន្តរាគមន៍ពីមន្ទីរការងារ និងក្រសួងការងារ ឬអាចទាក់ទងខាងសហជីពណាមួយដើម្បីផ្ដល់ប្រឹក្សា។
ច្បាប់ការងារចែងថា ការបញ្ឈប់កម្មករដែលមានអតីតភាពការងារចាប់ពី ២ឆ្នាំ ទៅ៥ឆ្នាំ ត្រូវជូនដំណឹងមុន យ៉ាងតិច ១ខែ អតីតភាពការងារពី ៥ឆ្នាំ ទៅ ១០ឆ្នាំ ត្រូវជូនដំណឹងមុន យ៉ាងតិច ២ខែ។ និយោជកត្រូវផ្ដល់ទៅឱ្យកម្មករនិយោជិក នូវប្រាក់បំណាច់បណ្ដេញចេញពីការងារ ហើយប្រាក់បំណាច់បណ្ដេញចេញនេះទៀតសោត ក៏ត្រូវគិតទៅតាមអតីតភាពការងាររបស់និយោជិកដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។