លោក កឹម សុខា បង្ហោះ​​សារ​​អបអរ​សាទរ​​ទិវា​បុណ្យ​ឯករាជ្យ​ជាតិ ៩ វិច្ឆិកា

វិទ្យុ​អាស៊ី​សេរី
2018-11-08
អ៊ីម៉ែល
មតិ
Share
បោះពុម្ព
លោក កឹម សុខា ប្រធាន​គណបក្ស​សង្គ្រោះ​ជាតិ ថ្លែង​ទៅ​កាន់​គាំទ្រ​នៅ​ក្នុង​ខណ្ឌ​ឫស្សីកែវ រាជធានី​ភ្នំពេញ កាល​ពី​ព្រឹក​ថ្ងៃ​ទី​១០ មិថុនា ឆ្នាំ​២០១៧។ RFA/Brach Chev
លោក កឹម សុខា ប្រធាន​គណបក្ស​សង្គ្រោះ​ជាតិ ថ្លែង​ទៅ​កាន់​គាំទ្រ​នៅ​ក្នុង​ខណ្ឌ​ឫស្សីកែវ រាជធានី​ភ្នំពេញ កាល​ពី​ព្រឹក​ថ្ងៃ​ទី​១០ មិថុនា ឆ្នាំ​២០១៧។ RFA/Brach Chev
RFA/Brach Chev

អតីត​ប្រធាន​គណបក្ស​សង្គ្រោះ​ជាតិ ដែល​កំពុង​ជាប់​ឃុំ​ក្នុង​ផ្ទះ លោក កឹម សុខា បាន​បង្ហោះ​លិខិត​មួយ​ច្បាប់​លើ​ទំព័រ​ហ្វេសប៊ុក​ផ្លូវ​ការ​របស់​លោក ចូល​រួម​អបអរ​សាទរ​ខួប​លើក​ទី​៦៥ នៃ​ទិវា​បុណ្យ​ឯករាជ្យ​ជាតិ ថ្ងៃ​ទី៩ វិច្ឆិកា។

លិខិត​លើក​ទី២ របស់​អតីត​មេ​បក្ស​ប្រឆាំង​ដ៏​ធំ​នៅ​កម្ពុជា ដែល​បង្ហោះ​ក្នុង​បណ្ដាញ​សង្គម​ហ្វេសប៊ុក​ នៅ​ថ្ងៃ​ទី​៨ វិច្ឆិកា លោក​ កឹម សុខា សរសេរ​ថា លោក​សូម​សម្ដែង​នូវ​អំណរ​គុណ​ប្រកប​ដោយ​កតញ្ញូ​តា​ធម៌​ដ៏​ជ្រាល​ជ្រៅ​បំផុត ជូន​ចំពោះ​បុព្វបុរស​ខ្មែរ ដែល​បាន​ធ្វើ​ពលិកម្ម​ ការ​លះបង់ នឹង​ការ​តស៊ូ ដើម្បី​ទាមទារ​នូវ​ឯករាជ្យ​ជាតិ​ជូន​ជាតិ​មាតុភូមិ។

ក្នុង​លិខិត​ដដែល​នោះ លោក កឹម សុខា យល់​ថា ការ​ទាមទារ និង​ការ​ថែរក្សា​ការពារ​ឯករាជ្យ​ជាតិ​ពិត​ប្រាកដ​ទៅ​បាន​ គឺ​អាស្រ័យ​លើ​ការ​រួបរួម​ជាតិ។ លោក​ថា ជា​ការ​ពិត​ណាស់​ មិន​អាច​មាន​ឯករាជ្យ​ជាតិ​ពិត​ប្រាកដ​បាន​ទេ បើ​យើង​បាក់​បែកគ្នា។ លោក កឹម សុខា ក៏​បួង​សួង​ឲ្យ​ស្មារតី​ឯករាជ្យ​ជាតិ​ ពិត​ប្រាកដ​ស្ថិត​នៅ​ជាប់​ជានិច្ច ក្នុង​បេះដូង​ខ្មែរ​គ្រប់​រូប។

មួយ​ថ្ងៃ​មុន​លោក កឹម សុខា ចេញ​លិខិត​នេះ លោក​ ហ៊ុន សែន​ បាន​ថ្លែង​ថា នឹង​មិន​មាន​ការ​ដោះ​លែង​អតីត​ប្រធាន​គណបក្ស​សង្គ្រោះ​ជាតិ ​លោក កឹម សុខា នៅ​ចុង​ឆ្នាំ​២០១៨​ ដូច​ការ​លើក​ឡើង​របស់​ប្រធាន​ចលនា​សង្គ្រោះ​ជាតិ​ លោក សម រង្ស៊ី​ នោះ​ទេ។

ការ​ប្រកាស​ជា​សាធារណៈ​របស់​លោក ហ៊ុន សែន កាល​ពី​ថ្ងៃ​ទី​៧ វិច្ឆិកា​ គឺ​ឆ្លើយ​តប​ទៅ​នឹង​អត្ថបទ​របស់​លោក សម រង្សី​ ដែល​សរសេរ​ក្នុង​បណ្ដាញ​សង្គម​ហ្វេសប៊ុក កាល​ពី​ថ្ងៃ​ទី​៦ វិច្ឆិកា​ថា តាម​ប្រភព​ផ្ទៃក្នុង​ពី​គណបក្ស​ប្រជាជន​កម្ពុជា លោក​ ហ៊ុន សែន​ នឹង​ដោះ​លែង​លោក កឹម សុខា​ នៅ​ថ្ងៃ​ទី​ ២៩ ខែ​ធ្នូ​ ឆ្នាំ​២០១៨ ក្នុង​ឱកាស​ខួប​ទី​២០ នៃ​នយោបាយ​ឈ្នះៗ ដោយ​ការ​ដោះ​លែង​នោះ គឺ​ស្ថិត​ក្រោម​សម្ពាធ​ពី​អន្តរជាតិ​សុទ្ធសាធ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល