ព្រះសង្ឃគង់នៅវត្តដំណាក់ ខេត្តសៀមរាបព្រមទាំងពុទ្ធបរិស័ទច្រើនពាន់នាក់ មានគម្រោងរួមគ្នាដង្ហែក្បួនមាឃបូជា ឱ្យអធិកអធម្មមួយ នៅតាមបណ្ដាដងផ្លូវមួយចំនួន ដែលមិនធ្លាប់មានពីមុនមកសោះ ក្នុងទីក្រុងសៀមរាប នៅរសៀលថ្ងៃអង្គារ ទី៣ខែកុម្ភៈខាងមុខ។
ជាច្រើនថ្ងៃមកហើយ ក្នុងបរិវេណវត្តដំណាក់កណ្ដាល ទីរួមខេត្តសៀមរាប ព្រះសង្ឃ និងពុទ្ធបរិស័ទ កំពុងធ្វើការតុបតែង លំអព្រះវិហារ កុដិ និងចេតិយសំខាន់ៗ ដោយអំពូលភ្លើង និងក្រណាត់ពណ៌ ព្រមទាំងតុបតែងផ្កាស្រស់ នៅលើរថយន្ត និងរូបបដិមាជាច្រើនទៀត។
ព្រះភិក្ខុ ឈន់ ឈឿន ជាគ្រូសូត្រស្ដាំ គង់នៅវត្តដំណាក់ មានថេរៈដីកា កាលពីព្រឹកថ្ងៃច័ន្ទ ទី២ ខែកុម្ភៈថា តាមកម្មវិធីបុណ្យ ពេលព្រឹកថ្ងៃទី៣ខែកុម្ភៈ នៅក្នុងបរិវេណវត្តដំណាក់ គឺមានពិធីរាប់បាត្រព្រះសង្ឃ ១២៥០ អង្គ ហើយនៅពេលរសៀល គឺមានពិធីដង្ហែក្បួនមាឃបូជា នៅតាមដងផ្លូវ សំខាន់ៗក្នុងទីក្រុង៖ «ព្រះសង្ឃ អាចារ្យវត្តដំណាក់សូមអំពាវនាវ ដល់ព្រះករុណាគ្រប់ព្រះ អង្គ ហើយនិងញាតិញោម ពុទ្ធ បរិស័ទទាំងអស់ ចូលរួមក្នុងពិធីមាឃបូជានេះ ឱ្យបានច្រើនកុះករ»។
ប្រទេសកម្ពុជាដែលគោរពព្រះពុទ្ធសាសនា និងប្រទេសជាច្រើនទៀត តែងតែប្រារព្ធពិធីបុណ្យមាឃបូជា រៀងរាល់ឆ្នាំ នៅថ្ងៃពេញបូរមីខែមាឃ ដើម្បីរំលឹកដល់សម័យប្រជុំចតុរង្គសន្និបាត សម្ដែងឱវាទបាតិមោក្ខ និងថ្ងៃដាក់អាយុសង្ខាររបស់ព្រះសមា្មសម្ពុទ្ធជាព្រះបរមគ្រូ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។