ក្រសួងការងារ និងបណ្ដុះបណ្ដាលវិជ្ជាជីវៈ បានប្រជុំ ដើម្បីស្នើសុំការគាំទ្រកែប្រែលក្ខខណ្ឌច្បាប់ការងារ កាត់លុយកម្មករវេនយប់ ឱ្យស្មើកម្មករវេនថ្ងៃ និងលុបចោលថ្ងៃឈប់សម្រាកសង ចំថ្ងៃអាទិត្យ។
ប្រធានសហភាពការងារកម្ពុជា លោក អាត់ ធន់ ឱ្យដឹងថា ក្រុមសហជីពមាននិន្នាការរដ្ឋាភិបាល គាំទ្រឱ្យកាត់លុយឈ្នួល និងលុបថ្ងៃឈប់សម្រាកបន្ថែម ដូចក្រុមថៅកែ។ តែក្រុមសហជីពឯករាជ្យ បដិសេធសំណើនេះ ទើបកិច្ចប្រជុំមិនអាចពិភាក្សាគ្នាបន្តទៀតបាន។ លោកថា រដ្ឋមន្ត្រីប្រាប់ឱ្យក្រុមសហជីពជជែកគ្នា ហើយចេញសេចក្ដីថ្លែងការណ៍រួម ដើម្បីបន្តកិច្ចពិភាក្សាតទៀត៖ «ការបារម្ភ វាបារម្ភហើយ។ ក៏ប៉ុន្តែ បើសិនយើងធ្វើពហិការ មានន័យថា យើងមានទៅកើតទុក្ខអ្វី ព្រោះថា ពហិការមិនចូល បើសហជីពណាគេចូល គេសម្រេចហើយ អាហ្នឹង។ រឿងថា ចូល ( ប្រជុំ ) ឬមិនចូល វាអត់សំខាន់ទេ។ ប៉ុន្តែឥឡូវនេះ មានរឿង២ គឺរឿងទី១ យើងធ្វើសេចក្ដីថ្លែងការណ៍មិនគាំទ្រការធ្វើវិសោធនកម្មហ្នឹង។ ទី២ សហជីពអាចនឹងចូល។ តែបើសហជីពចូល វានៅតែសំឡេងភាគតិច វានៅតែដដែលហ្នឹង ធ្វើម្ដេចទៅ បានសំឡេងភាគច្រើនជាងសហជីពខាងរដ្ឋាភិបាល»។
ក្រសួងការងារ និងបណ្ដុះបណ្ដាលវិជ្ជាជីវៈ បានរៀបចំសិក្ខាសាលា ប្រជុំជាមួយភាគីពាក់ព័ន្ធ ចំនួន៨៦នាក់ នៅព្រឹកថ្ងៃទី១៦ មករា នៅសណ្ឋាគារសាន់វ៉េ រាជធានីភ្នំពេញ ដើម្បីពិភាក្សាលើការធ្វើវិសោធនកម្ម ច្បាប់ស្ដីពីការងារ មាត្រា១៤៤ថ្មី ក្នុងគោលបំណង កាត់ប្រាក់ឈ្នួលកម្មករធ្វើការវេនយប់បន្ថែមទៀត ឱ្យទទួលបានស្មើគ្នាជាមួយកម្មករវេនថ្ងៃ និងលុបចោលថ្ងៃឈប់សម្រាកថែមទៀត ចំពោះថ្ងៃឈប់សម្រាកសម្រាប់បុណ្យជាតិណា ដែលចំថ្ងៃអាទិត្យ។ រដ្ឋមន្ត្រី អ៊ិត សំហេង អះអាងថា ការធ្វើបែបនេះ ដើម្បីបង្កើនឱកាសការងារ ផ្ដល់អត្ថប្រយោជន៍បន្ថែមទៀត ដល់កម្មករនិយោជិក បង្កើនសង្វាក់ផលិតកម្ម សេវាកម្ម និងទាក់ទាញ ដល់ការវិនិយោគបន្ថែម។
ហ្វេសប៊ុក (facebook) របស់ក្រសួងការងារបង្ហាញថា លោក អ៊ិត សំហេង លើកឡើងស្រដៀងគ្នា នឹងសេចក្ដីថ្លែងការណ៍របស់សមាគមរោងចក្រកាត់ដេរនៅកម្ពុជា (GMAC) កាលពីថ្ងៃទី១៥ មករា ដែលសរសេរថា ការកាត់បន្ថយប្រាក់ឈ្នួលកម្មករ ដើម្បីបង្កើនភាពទាក់ទាញឧស្សាហកម្មទំនើប ដូចជា រោងចក្រផលិតបរិក្ខារអគ្គិសនី គ្រឿងអេឡិចត្រូនិក និងការកែច្នៃម្ហូបអាហារ និងការបង្កើនការងារឱ្យពលរដ្ឋ ទៅតាមជម្រើស និងតម្រូវការជាក់ស្ដែង។ លោកថែមទាំងអះអាងថា ការធ្វើបែបនេះ ដើម្បីឱ្យកម្មករទទួលបានប្រាក់ចំណូលកាន់តែប្រសើរឡើង។
ចំណែកការលុបចោលថ្ងៃឈប់សម្រាកបន្ថែមសម្រាប់ថ្ងៃបុណ្យដែលចំថ្ងៃអាទិត្យ គឺដើម្បីឱ្យដូច មន្ត្រីរាជការសាធារណៈទូទៅ និងការអនុវត្តនៅក្នុងបណ្ដាប្រទេសមួយចំនួនក្នុងតំបន់។ ការលុបចោលថ្ងៃឈប់សម្រាកបន្ថែមទៀតនេះ គឺដើម្បីឆ្លើយតបទៅនឹងការវិវឌ្ឍផ្នែកសង្គម សេដ្ឋកិច្ច សំដៅលើកកម្ពស់ផលិតភាពការងារ និងពង្រឹងភាពប្រកួតប្រជែងសេដ្ឋកិច្ចទាំងក្នុងតំបន់ និងសកលលោក។ លោក អ៊ិត សំហេង អះអាងថា ក្រសួងនឹងពិនិត្យឱ្យបានគ្រប់ជ្រុងជ្រោយ និងធានា ថាផលប្រយោជន៍របស់កម្មករនិយោជិក គ្រប់រូបមិនត្រូវបានកាត់បន្ថយ។ លោក អាត់ ធន់ មិនទាន់ជឿលើការអះអាងនេះទេ ព្រោះលោកថា កម្មករធ្វើការវេនយប់ ធ្លាប់បាត់ប្រយោជន៍ម្ដងហើយ កាលពីឆ្នាំ២០១៧ ដោយក្រសួងកែប្រែច្បាប់ កាត់លុយឈ្នួលកម្មករ ពី១៥០ភាគរយ មកនៅត្រឹម១៣០ភាគរយ។
រីឯការពង្រីកវិសាលភាពការដោះស្រាយបណ្ដឹងតាមក្រុមប្រឹក្សាអាជ្ញាកណ្ដាល មិនរងការជំទាស់ពីសហជីពឯករាជ្យឡើយ។ សហជីពឯករាជ្យ គ្រាន់តែស្នើសុំក្រសួងការងារឱ្យពង្រឹងសមត្ថភាពមន្ត្រី ដោយមិនលម្អៀង ជាពិសេស ក្រសួងតែងតែផ្អៀងទៅរកក្រុមថៅកែ ជាងកម្មករ។
អាស៊ីសេរី មិនអាចសុំការបញ្ជាក់ពីប្រធានសហព័ន្ធសហជីពជាតិកម្ពុជា លោក សោម អូន ដែលជាសហជីពមាននិន្នាការគាំទ្ររដ្ឋាភិបាល និងជាទីប្រឹក្សារបស់ក្រសួងការងារបានទេ នៅថ្ងៃទី១៦ មករា ដោយសារមិនទទួលទូរស័ព្ទ។
ទោះយ៉ាងណា សំណើបែបនេះ ទទួលបានការស្វាគមន៍ពីក្រុមថៅកែ ក្រសួងការងារ និងសហជីពមាននិន្នាការគាំទ្ររដ្ឋាភិបាលខ្លះ តែដោយឡែកសម្រាប់កម្មករ និងបុគ្គលិករដ្ឋ ឯកជនខ្លះទៀត បានបង្ហាញកាយវិការមិនគាំទ្រ ការកាត់លុយឈ្នួលកម្មករវេនយប់ និងលុបថ្ងៃឈប់សម្រាកបន្ថែមទៀតឡើយ ព្រោះពួកគេ អះអាងថា ជាការខាតប្រយោជន៍កម្មករ និងធ្វើឱ្យស្ថានភាពការងារ កាន់តែមានភាពលំបាក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។