សង្គមស៊ីវិល ហួសចិត្តដែលអង្គភាពប្រឆាំងអំពើពុករលួយ ថា លោក គឹម រស្មី មិនមានប្រាក់៥សែនដុល្លារចែកកូនទេ

អ្នកស្រី មៅ សុធានី
2019.06.28

អតីតមេបញ្ជាការកងរាជអាវុធហត្ថខេត្តរតនគិរី លោក គឹម រស្មី។ ប្រធានអង្គភាពប្រឆាំងអំពើពុករលួយ លោក ឱម យិនទៀង ។

បណ្ដាណសង្គម/រូបភាពឯកសារ

ស្ដាប់ ឬទាញយកសំឡេង

មន្ត្រីសង្គមស៊ីវិលសំដែងការភ្ញាក់ផ្អើលជាខ្លាំង ដែលប្រធានអង្គភាពប្រឆាំងអំពើពុករលួយ លោក ឱម យិនទៀង បញ្ជាក់ថា លោក គឹម រស្មី អតីតមេបញ្ជាការកងរាជអាវុធហត្ថខេត្តរតនគិរី គ្មានលុយច្រើនក្នុងធនាគារនោះទេ ហើយថាការប្រកាសចែកលុយកូនចំនួន៥០ម៉ឺនដុល្លារនោះ គឺជារឿងអួតសម្ញែងទ្រព្យសម្បតិ្ត តែការពិតគ្មានប្រាក់ទៅវិញទេ។

នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍តាមទូរសព្ទប្រាប់អាស៊ីសេរី កាលពីយប់មិញថា អង្គភាពប្រឆាំងអំពើពុករលួយ គួរតែស៊ើបអង្កេតករណីនេះឡើងវិញ។ លោកបន្តថា បើតាមវីដេអូប្រកាសជាសាធារណៈ របស់លោក គឹម រស្មី បង្ហាញថា លោកមានទ្រព្យសម្បតិ្តស្តុកស្តម្ភ ទើបហ៊ានប្រកាសចែកលុយកូនម្នាក់ៗ ចំនួន ១០ម៉ឺនដុល្លារ និងដីធ្លីផ្ទះសម្បែង មួយចំនួន៖

«មានប្រភពច្រើន ថាគាត់មិនមែនអត់លុយ ដូចដែលលោកឱម យិនទៀង និយាយទេ។ បើពិនិត្យមើលពីទ្រព្យសម្បត្តិ ដូចជាអចលនទ្រព្យ ហើយរបៀបរបបរស់នៅហ្នឹង ដែលមានភាពហ៊ឺហារមួយសាកសម ទៅនឹងអ្វីដែលគាត់អួតអាង ថា ឱ្យលុយកូនៗប៉ុណ្ណេះប៉ុណ្ណោះ។ ការស៊ើបអង្កេតរកមិនឃើញ យកល្អ អង្គភាពគួរស៊ើបអង្កេតឡើងវិញដើម្បីទទួលបានភាពទុកចិត្តពីមហាជន...»

ថ្លែងនៅចំពោះមុខក្រុមអ្នកសារព័ត៌មានកាលពីថ្ងៃសុក្រ ទី២៨ ខែមិថុនា លោក ឱម យិនទៀង អះអាងថា លោក គឹម រស្មី អត់លុយ៥០ម៉ឺនដុល្លារទេ។ លុយក្នុងធនាគាររបស់លោក គឹម រស្មី មិនគ្រប់៥០ម៉ឺងផងហ្នឹង គឺអួតសម្ញែងទ្រព្យសម្បត្តិទេ។ លោកបន្តថា ករណីសម្ញែងទ្រព្យ គឺគ្មានទោសទេ ព្រោះមិនមានចែងក្នុងច្បាប់ប្រឆាំងអំពើពុករលួយរបស់កម្ពុជា។ ប៉ុន្តែបើនៅហុងកុង ច្បាប់ប្រឆាំងអំពើពុករលួយមានទោសជាប់គុក តែនៅស្រុកខ្មែរ មិនជាប់គុករឿងសម្ញែងទ្រព្យសម្បត្តិទេ។

កាលពីថ្ងៃទី០៦ ខែកុម្ភៈ ឆ្នាំ២០១៩ លោក គឹម រស្មី អតីតមេបញ្ជាការកងរាជអាវុធហត្ថ ខេត្តរតនគិរី ត្រូវបានព្រះមហាក្សត្រ ចេញព្រះរាជក្រឹត្យ ត្រាស់បង្គាប់ លុបឈ្មោះចេញពីក្របខណ្ឌកងយោធពលខេមរភូមិន្ទ។ ការសម្រេចនេះ បន្ទាប់ពីលោក បានប្រកាសចែកទ្រព្យសម្បត្តិរាប់សែនដុល្លារ ជាកាដូសម្រាប់កូនៗ របស់លោក៥នាក់។

លោក ឱម យិនទៀង ទទួលស្គាល់ថា លោក គឹម រស្មី គឺជាអ្នកក្រពិតមែន ប៉ុន្តែក្រោយពីរៀបការជាមួយភរិយា ដែលជាក្មួយឯកឧត្តម គន់ គីម មក ទើបលោកមានទ្រព្យសម្បត្តិដោយសារចម្ការកៅស៊ូរបស់ភរិយា។

ទាក់ទងនឹងស្នងការរងនគរបាលខេត្តកណ្តាល លោក ស្រេង សុខា វិញ លោក ឱម យិនទៀង ក៏បានបញ្ជាក់ក្នុងសន្និសីទសារព័ត៌មាននោះដែរថា ក៏ជាការបង្អួតសម្ញែងទ្រព្យសម្បត្តិ ដែលតាមពិតគ្មានទ្រព្យនោះទេ។

ចំពោះបញ្ហានេះ លោក សន ជ័យ ក៏បានបញ្ជាក់ផងដែរថា គេអាចវាយតម្លៃបាន តាមរយៈ ការបង្ហាញរូបភាពជាច្រើន បង្ហោះក្នុងគណនី ហ្វេសប៊ុក របស់លោក ស្រេង សុខានេះ៖

«ករណីស្នងការរងខេត្តកណ្តាលនេះ ខ្ញុំអត់បានដឹងច្រើនទេ។ ប៉ុន្តែរូបភាពនិងស្ថានភាពរស់នៅ ក្នុងពិធីមួយអធិកអធមបែបនេះ គាត់មិនមែននិយាយកុហកទេ តែចង់បង្ហាញនិងអួតអាងពីការមានបាននិងទ្រព្យសម្បត្តិរបស់គាត់។ អង្គភាពប្រឆាំងអំពើពុករលួយ រកមិនឃើញនេះគឺជារឿងចម្លែកណាស់ សម្រាប់ខ្ញុំ...»

កាលពីខែកុម្ភៈ ឆ្នាំ២០១៩ កន្លងមកនេះ មានការផ្សព្វផ្សាយរូបថតជាច្រើនរបស់លោក ស្រេង សុខា ក្នុងពិធីភ្ជាប់ពាក្យ ដោយបានផ្តល់ឱ្យកូនក្រមុំ ១០ម៉ឺនដុល្លារ ចិញ្ជៀនពេជ្រ និងឡានទំនើប។ ក្នុងនោះ ក៏មានការសម្ញែងទ្រព្យសម្បត្តិរបស់លោកស្នងការរង ស្រេង សុខា ដែលមានចិញ្ជៀនពេជ្រ ខ្សែក និងក្បាលខ្សែក្រវាត់មាស ដាំពេជ្រ ជាដើម។

អាស៊ីសេរី នៅមិនទាន់អាចទាក់ទងប្រធានអង្គភាពប្រឆាំងអំពើពុករលួយ លោក ឱម យិនទៀង ដើម្បីសុំការបញ្ជាក់អំពីករណីនេះបានទេ កាលពីថ្ងៃទី ២៨ ខែមិថុនា។ ចំណែក លោក គឹម រស្មី អតីតមេបញ្ជាការកងរាជអាវុធហត្ថ ខេត្តរតនគិរី និងស្នងការរងនគរបាលខេត្តកណ្តាល លោក ស្រេង សុខា ក៏មិនអាចទាក់ទងបានដែរ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទពេញនិយម

RFA

ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា