អាជ្ញាធរជាតិប្រយុទ្ធប្រឆាំងគ្រឿងញៀន ចេញរបាយការណ៍ឱ្យដឹងថា ករណីជួញដូរ និងប្រើប្រាស់គ្រឿងញៀន បានកើនឡើងជិត ៣០ភាគរយនៅឆ្នាំនេះ។
នៅថ្ងៃទី១ មិថុនា អាជ្ញាធរឃាត់ខ្លួនជនសង្ស័យ ៦១នាក់ និងគ្រឿងញៀនមួយចំនួន។ កាលពីខែមេសា សមត្ថកិច្ចជំនាញពីមន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ រឹបអូសថ្នាំញៀនជិត ៦០គីឡូក្រាម នៅខណ្ឌពោធិ៍សែនជ័យ រាជធានីភ្នំពេញ។
បញ្ហាគ្រឿងញៀនត្រូវបានគេចាត់ទុកថា ជាវិបត្តិសង្គមធ្ងន់ធ្ងរមួយនៅកម្ពុជាបច្ចុប្បន្ន។ របាយការណ៍អាជ្ញាធរជាតិប្រយុទ្ធប្រឆាំងគ្រឿងញៀន ឱ្យដឹងថា រយៈពេល ៥ខែដំបូងនៃឆ្នាំ២០២០ នេះ អាជ្ញាធរបង្ក្រាបបទល្មើសគ្រឿងញៀន និងរឹបអូសបានប្រមាណ ២៦០គីឡូក្រាម និងឃាត់ខ្លួនជនសង្ស័យ ចំនួនជិត ៩ពាន់ (៨.៨៦៤)នាក់។ អ្នកទាំងនេះ ជាមុខសញ្ញាអ្នកជួញដូរ និងអ្នកជាប្រើប្រាស់ ហើយមួយចំនួនតូច ជាជនបរទេស។
អាជ្ញាធរឱ្យដឹងទៀតថា គ្រឿងញៀនដែលរឹបអូសបាននៅដើមឆ្នាំនេះ គឺមានជាថ្នាំចម្រាញ់សំយោគ ប្រភេទមេតំហ្វេតាមីន និងអ៊ិចស្តាស៊ី ( ដុំទឹកកក (Ice) គ្រាប់ (Wy) អ៊ិចស្តាស៊ី ហេរ៉ូអ៊ីន នីមេតាហ្សេប៉ាម )និងមានកញ្ឆាស្ងួត និងកញ្ឆាដើមជិត ២០ម៉ឺនដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។